2004 年 1 月 23 日 星期五 【晴】

已經好幾日無打日記喇!!! 其實有諗過, 再打唻仲有d咩意思呢?? 最值得保存既回憶都保存左o係另一個地方喇, 再繼續打為乜野呢??

今年既過年好特別呀!!

年三十晚都仲要返工, 呢日真係辛苦, 因為要抹野, 我敢講全餐廳抹得最多野個個係我呀!!! 返屋企食左團年飯之後, 今年無同爸媽出到去行花市, 因為媽咪怕凍呀!! 再夜d, 我同左Sunny, Paul, Autumn, Astro 去維園, 好多人好迫呀, 其實年年咁樣迫都唔知為乜架, 不過行開就唔想停呀!! 可能今年既過年少左寄託, 有點兒... 大前年好多人一齊行花市, 包括佢, 我仲不斷想辦法接近佢... 前年佢無行, 而我為左份禮物攪盡腦汁, 好難得遇到一份佢好鐘意既禮物, 跟住既一日仲買左魚蛋粉... 上年行唔到花市, 雖然大家距離好遠但心是一起的, 我相信!!... 到今年距離好近, 但已經...

今年年初一唔使一早起身拜年, 無再坐車坐到頭暈, 無再去觀塘既麥記食lunch!! 今年訓到兩點先起身, 我地全家只係去左黃大仙拜年, 之後出左尖沙咀食飯, 食蕉葉咖喱屋, 雖然我一向都唔係點食得辣野, 不過難得爸媽肯出街食, 而佢地又好鐘意食辣既, 所以我無理咁多, 一樣照食呀!!! 呢餐亦係我地三姐弟夾錢添架, 爸媽都食得好開心呀!! 之後我地又出去同人迫, 去睇花車, 難得爸有耐性等, 媽咪又有興趣, 雖然都有d小風波, 不過都唔錯架喇!!! 今個年初一又特別又開心呀!!!

年初二堂哥同堂家姐兩家都o係我屋企食晚飯呀, 好好好熱鬧呀!! 有成十二個人坐埋一齊, 有d誇張呀!!! 我地仲打牌開年, 我同阿爸父子兵上陣, 好可惜雙雙敗陣, 每人輸左二佰幾呀...嗚嗚...唔緊要, 我相信d衰氣一早走晒, 好運就會跟住唻架喇!!! 我地又一齊o係電視睇煙花, 我咁大個仔到依家都未現場睇過維港既煙花架, 幾時先有機會呢??

今日我終於買左一套老西呀!! 感覺好大個呀...

聽日有得打波呀, 等左好耐喇, 我已經好耐好耐無打過喇!!! 相信聽晚會係開心既晚上!!!

>>January 25, 2004 at 4:53:42 PM GMT+8

2004 年 1 月 16 日 星期五 【晴】

aiya..之前打左個diary無晒呀...激氣!!! 要再打過....

好開心返到唻之後仲有好多friend陪我, 俾我知道自己係屬於香港!!! 朋友們, 珍惜依家既關係呀!!!

講真, 我真係唔想再過返去讀書呀!!! 有屋企既感覺真係好好架!!! o係個邊, 我 一直都無屋企, 只係成日講"返college", "返DLC", 有得返屋企真係好幸福架!!! 好討厭一個人, 亦唔鐘意有外人

今晚, 我拎晒d月結單出唻計, 估唔到我上年全年用既錢會多到出乎我意料之外!!! 而爸媽既態度亦係出乎我意料之外!!! 我真係好大使??...點解咁既......

我有自己既執著同堅持!!!...

>>January 17, 2004 at 4:04:10 PM GMT+8

2004 年 1 月 14 日 星期三 【晴】

唔想返工呀!!! 真係好支力呀!!!! 返左咁多日都無假放!!!!
今日仲要受人氣呀!!!
好想打波,好想唱K呀!!!!!!!!!!!!!!!!!!!!! 好想好想呀!!!!!!!!!!!!!!!!!!!!!!!!!!!!

>>January 15, 2004 at 3:55:30 PM GMT+8

2004 年 1 月 7 日 星期三 【晴】

尋日下晝返工時俾我遇到兩個人, 攪到我都諗左唔少野!!! 首先第一個男仔係鏞記waiter, 佢好橋咁o係大利撞到佢個friend, 原來佢地係o係溫哥華一齊讀書識既!!! 因為無乜生意, 所以我都有意無意咁聽佢地講野!!

估唔到個waiter原來o係多倫多同溫哥華讀完書先返唻, 返到唻搵唔到工, 要暫時做住waiter, 不過in waiter時, 第一句就俾人問識唔識英文, 跟住就係識唔識普通話!!!(連做個waiter都要求咁高!!!) 佢不斷同個friend講話讀咁多書都唔知為乜!!! 咁我呢?? 讀落去又係唔係值得呢?? 讀,我當然會讀落去, 只係有d擔心...

而佢個friend原來連婚都結埋, 佢只係25,6號渣!!! 佢仲話有d佢地o個時讀書既friend都結左婚, 仲生埋仔女tim!!!

呀, 唔知兩年(希望可以)後畢業自己會點呢?? 5,6年後又仲係點呢??

>>January 8, 2004 at 2:07:18 PM GMT+8

2004 年 1 月 2 日 星期五 【晴】

又踏入左另一年喇!! 03年o係我由細到大離開屋企最耐既一年, 呢一年發生過好多好多好難忘既事, 無論係自己既屋企, 學業, 感情, 朋友都有過大起大跌, 起既有d係咁大個仔經歷過最開心既, 跌既亦有d係咁大個仔以唻跌得最痛!!!
點都好, 經一事, 長一智啦!!! 總之, 做自己想做既野, 做自己應該做既野!!! 希望04會更好啦!!!

>>January 3, 2004 at 4:12:37 PM GMT+8

2003 年 12 月 28 日 星期日 【晴】

尋晚終於都去左Anthony屋企度燒野食!! 個plan已經plan左成個幾月架喇!!! 個時o係Sydney已經講明個個要帶自己既女朋友出席, 好可惜我同Kevin最終係做唔到, 不過kevin帶左佢第一個女朋友上去, 變左只係得我一個係孤伶伶一個人!!! Anthony, Ken, Tin, Kevin都一對對, 而我就孤身隻影喇!!!

o係Anthony屋企, 我第一次去掂狗, 摸狗, 抱狗, 好得意呀!!! 初初係有小小驚, 不過慢慢覺得實在太可愛喇!!! 隻狗好似個BB咁, 好鐘意同人玩, 而且又聽話wor....

夜晚我地仲係Anthony車我地返屋企, 我返到去已經2:30喇, 3:00先訓, 今朝7:30又要起身, 都幾辛苦架!!!

>>December 29, 2003 at 2:26:16 PM GMT+8

2003 年 12 月 24 日 星期三 【晴】

一連玩左三日喇!!!
前晚同Autumn, Astro, Paul食飯兼睇無間道3!!!
尋晚同Sunny, Alan, Amos, Alf o係我屋企打邊爐, 不過攪到爐都整 'lone' 左, 我擦得好辛苦, 但係始終都救唔到...
今日同Sunny, Alan, Amos, Alf 加埋Paul去創興Neway唱K,好抵好抵呀!!!唱4個鐘又有野食都$38, 好耐未試過唱k唱得咁抵喇!!! 夜晚同Kathy去添馬艦個嘉年華, 好多好多人呀!!! 用左唔少錢不過都只係得兩個細公仔, 唉...都無運既!!! 雖然玩得好似'dump'錢咁, 不過自己應付到, 另外又開心既話, 又有咩所謂wor...晚飯出番旺角食, join左Edmond同Johnny!!!

>>December 25, 2003 at 5:59:44 PM GMT+8

2003 年 12 月 21 日 星期日 【晴】

尋晚同Joefi傾電話, 或者有d野佢講得好岩, 一個人既感覺改變了就是改變了, 雖然我相信時間可以沖淡一切, 但我真係唔希望咁樣...或者自己都係未夠成熟去處理感情既野... 但係我發現左自己真係屬於香港, 我身邊仍然有好多好多關心自己既朋友!!!

我承認自己會將感情放得好重好重, 會將女朋友等同左自己既屋企人, 將愛變成左責任, 唔單止自己對佢既要求暗地裏多左, 諗既野多左, 無形中因此而俾左好多壓力對方, 亦令自己成日都唔開心!!! 咁樣做其實算唔算自私呢?? 不過無必要再深究喇!! 或者自己真係仲細卦, 都係將拍拖放埋一邊先啦!! 正如媽咪成日話齋, 讀飽書驚無女仔鐘意咩!!! 我真係要好俾心機讀先得, 再fail就抬唔起頭架喇!!!

總算諗通左卦, 縱然幾放唔低都應該要放低!! 不過放低唔同放棄架麻, 無野無可能麻!!!

>>December 22, 2003 at 3:15:40 PM GMT+8

2003 年 12 月 16 日 星期二 【晴】

終於都得到答案, 今晚發覺到你既成長, 自己既原地踏步...
一句 '尊重我既決定' 真係當頭棒喝
"我亦算知醜 無謂強迫你
難道要我對著你句句要生要死"
再見亦是朋友吧...對唔住,Kathy!!祝福妳!!!

>>December 17, 2003 at 3:27:45 PM GMT+8

2003 年 12 月 11 日 星期四 【寒冷】

今日好白癡咁等左半個鐘, 原來一直等錯巴士站...

每日既日子都係公式化地度過, 返工, 放工, 睇電視, 訓覺...每日返工都係出賣勞力, 唔係只係落單咁簡單, 每晚放工都累到o係火車地鐵企o係度恰眼訓, 眼腫,腳痛都未同過爸媽呻過一句, 真係唔知為乜...

一個月得三日假, 今日突然叫我聽日放假, 咁到Christmas只係得番兩日...聽日放假可以做d咩呢??...

點解??多愁善感??唔係我想要的...

>>December 12, 2003 at 3:29:27 PM GMT+8