2004 年 9 月 19 日 星期日 【晴】

今日, 買左一本書﹕【生死必修課】。

點解呢? 已經想行書店好耐好耐, 不過銅鑼灣好似好多書店都執左……一係就搵唔到我想要既書。咁, 又真係太想睇書, 放左工就去屋企樓下間cheap cheap文具店，有幾本書賣下既都照殺啦!

其實果度賣既書唔多, 而且成日經過都會行, 所以都無咩新書。

呢本【生死必修課】其實見過好多次, 不過都無試過囉起黎睇下, 因為市面上以呢類題材混水摸魚既書太多, 多數都係無聊, 一係就玄到我睇唔明。

不過因為真係無新書既關係, 今日囉起左呢本書黎睇。一睇, 發現英文書名係【The Orphaned Adult】。幾特別喎又!

再睇下, 係講一d成年人失去父母既感受同點解呢個社會好少有討論呢個話題。

一揭, 睇到有關悼念父母既文章, 我覺得, 睇下都好丫, 反正呢幾日充斥我腦海既都係呢個topic, 可能又係dr.講既共時性吧?! 點解咁多次都唔囉起呢本書, 係今日至囉呢?

我呢幾日成日想起「鬼眼」入面一句對白, 係個仔同阿媽講﹕ “everyday!”

果一幕, 我太深刻喇, 因為佢阿媽講番條問題出黎既時候, 我真係眼淚直流! 我覺得睇呢套戲, 淨係睇呢度都已經值回票價!

我尋晚坐係沙灘, 心裡面係有d野, 我又講唔出係乜野。我諗, 我真係卦住佢, 真係卦住。我知道原因, 因為我遇上一個會令我想起佢既人，仲要差唔多每日都見住果個人。

……我永遠都唔會忘記果個夢。

夢裡面，我同你一齊坐小巴。我記得我攬住你, 好舒服。我好似, 又變番小時候既我。我知道其他人見我攬住一個老我咁多既男人, 佢地唔知你就係我爸爸, 佢地用好奇怪既眼神望住我, 但係, 我唔會介意, 更加唔會因為介意而放手。

你問左我一條問題, 我回答左你。你再回應我, 俾我知道, 當我以為你離開我既呢d日子, 你一直都係我身邊, 默默為我做了許多……許多……你從來都無離開我, 無放棄我, 無嬲我, 無怪我。即使我做唔到你既期望, 你都無對我失望。

我知道呢個夢唔係假既, 我真係知道, 真係知道係真既。我知道無人會信, 無人會明我當時果種感覺, 不過, 只要我知道, 只要我記得……

我相信, 我現時擁有既一切, 都係你為我安排既最好!

希望你都一樣幸福!

>>September 24, 2004 at 3:03:04 AM GMT+8

2004 年 9 月 18 日 星期六 【綿綿細雨】

今日又係星期日喇, 一個應該好好休息既叉電日。

每個星期日, 例牌朝頭早會聽到好似敲門既聲音。習慣喇, 唔會再去應門。

訓到十點幾, 起身睇電視。睇到十二點幾, 同媽咪出去食野, 買野。兩點幾番到屋企, 記得自己約左雄B, Evan, 舒舒, 阿飛, Tracy, Marco 同阿Roy。知道自己好快又要再出去, 真係有d想話唔去。

不過算啦, 其實我係想見下佢地既, 因為畢竟佢地都係一班好可愛既人, 難得我都無係楷亞做野一年多喇, 都仲有人記得我, 仲會約下我出街, 一定要去。

四點幾去到岩岩前兩日至去完既淺水灣, 我都唔知原來行到盡頭有廟既。行左一陣, 哂左一陣太陽, 六點開始又BBQ喇。

阿Roy遲到,8點幾至到,就係咁, 一燒就燒到10點幾。

中途, 我自己一個走過出去海邊坐兩次, 唔知呢d叫唔叫離群, 不過我又真係覺得就咁坐下都幾好丫, 真係幾舒服。有時間真係可能自己一個人入去坐下, 咩顧慮都無, 一定仲舒服!

十點幾, 我想走先, 大家話我次次都係咁, 唔可以。我又貪可以跟Evan車出黎, 嘻嘻, 一留就留到十二點幾至走。

大家傾左個幾鐘度, 雖然我無咩出聲, 阿Roy都話成晚都無聽過我出聲。不過其實我覺得佢地講果d話題都好得意, 特別係Marco, 講下d咩外星人呀咁, 哈哈, 佢講好多野我都未聽過, 簡直係大開耳界呀!

番到屋企, 咩都唔做, 沖左涼就訓lu~

>>September 24, 2004 at 3:03:46 AM GMT+8

2004 年 9 月 17 日 星期五 【綿綿細雨】

星期六.......尋晚又玩到咁夜.......都幾眼訓。

都係忙緊下星期要交既幾個計劃咁啦，要交一份雙周刊可行性既研究啦, 一份劇本啦, 仲有兩份功課添。

一點放工，本來係打算同希文去唱K,，點知又FULL哂，無得唱。

跟住去左東湖飲茶，NOEL又話好平，兩個人$120，我又唔覺好平喎……

飲完茶，就去搵埋地盤佬同埋佢男朋友(點解地盤 “佬”會有男朋友架呢?)一齊去跑馬地打羽毛波。地盤佬話想食雪糕，我地去左OK便利店買，於是佢地兩個同埋希文就一人一杯喇，我無食架！

買完佢地話坐的士入去喎, 奇就奇在今年連希文都咁話，咁我都無咩所謂既。

點知好耐都無吉既的士，於是我地就去左利園截喇。上左一架的士，話俾司機知我地去黃泥涌室內運動場，點知個的士司機唔識路，又唔問清楚，又唔CALL台問。跟住佢竟然……跟住佢竟然……車左我地去跑馬地墳場！仲話呢度就係黃泥涌道，前面有得打波。我忍唔住扯火，話前面係墳場呀！你唔知又唔問清楚，又唔CALL台！佢仲死話呢道就係黃泥涌道，佢覺得自己無去錯。我話黃泥涌室內運動場係佢既名，你唔知就唔該你問清楚！ 嘩！真係好難唔發火，佢點過份都無理由車左我地去墳場打波下化??????? 仲要死唔認錯!!!!!!!

跟住已經好嬲，又發現原來唔記得帶羽毛波，好彩中途有一間文具舖買到。

終於去到場館，去到六樓諗住簽場啦！可怕既事情又發生喇！原來我係Book左乒乓波場，唔係羽毛波呀！我到果時至記得，係喎，有一個星期係Book唔到羽毛波場架喎！今次真係SIT喇！

連聲Say Sorry之後，幫手簽場果個男人話我地可以打住先，有個場未有人到。不過我就覺得book得場都應該一定會黎。於是多謝左佢既好意，到番四樓去問果度book場既同事有冇乒乓波拍可以借。係呢個時候，已經聽到地盤佬打電話話緊俾人知我既瘀事！真係唔該哂！

果度d人好好，借左兩個拍俾我地，再去隔離場借個波，打得！有位果度做野既嬸嬸仲主動拎多兩個波俾我地打添。

點知跟住六樓幫手簽場個哥哥仔走落黎話我地知book左場既人仲未到，我地可以上去打住先喎。咁我地一行人就浩浩蕩蕩咁上去啦，見到嬸嬸問我地唔打乒乓波喇? 又唔知點答……點知一上到去，見到兩母女岩岩入場，咁即係我地無得打羽毛波啦。咁我地又再浩浩蕩蕩落番去四樓。

嬸嬸唔知我地搞咩一班人走黎走去，我地答﹕熱身囉！

跟住又番去打乒乓波喇。嬸嬸又主動拎多兩塊拍俾我地，等我地可以雙打。之後，六樓果個叔叔仲特登落黎同我地解釋番喎，仲問我地book唔book夜d，佢話9-10pm仲有兩個場喎。佢真係好可愛！

一路打到差唔多仲有15分鐘完場時，有個菲傭抱住一個鬼仔BB睇我地打波。因為跑馬地果度係用璧球房打乒乓波，佢地就係房外睇入黎。個BB個樣雖然唔係好靚仔，不過成日笑，好鬼可愛。希文又睇到佢成日"痴"左塊面埋玻璃，搞到個樣平哂。根住我睇，又真係喎，真係好鬼死搞笑，笑到我地波都打唔到，笑到死左。Calvin仲要做d動作引佢笑，佢一路笑，一路"痴"埋玻璃，真係得意到死呀！

我真係唔能夠相信，點解果度d工作人員個個都好得咁緊要架，個個都主動幫人架喎！原來香港地仲會搵到d咁有溫情既地方架！ “近”呀！我真係好鐘意佢地呀！

所以雖然遇到個衰司機，雖然唔記得帶波之後發現根本唔係打羽毛波，不過原來就係因為我book錯場至發現到香港仲有d咁主動幫人既人，真係好開心呀！

同地盤佬打波佢永遠都唔記得雙打係一人打一球，一係就全部佢打哂，一係就呆左唔識反應，d動作又地盤佬到死，真係就快笑死我！

打完波，一齊去飲野，俾Calvin呃左我話佢而家30歲(其實係27歲)之後，就各自番屋企喇。飲野既時候提到想10月1日同前後一兩日一齊去澳門玩，因為我家姐屋企可以睇煙花，唔知去唔去得成呢?

又係好開心既一天，遇上跑馬地果一班人，所以係非常開心的一天！

>>September 24, 2004 at 3:04:43 AM GMT+8

2004 年 9 月 16 日 星期四 【晴】

今日開左兩個會，上左一個"總結及分析技巧"training，由阿欣主理。一日過得真係好快，都好似咩都無做過就過左一日。死啦，productivity係唔係真係咁低......?

今日係我已經o係稻香集團做左三個月o既大日子，嘩! 真係好耐無試過做一份工做到會過probation架! 不過過唔過到都係未知之數既, 因為阿欣都未有時間同我傾......有d擔心架.....

今日朝早同事話我知人力資源部一位我一句計都未傾過既同事會搵我，我仲以為係同probation有關既事。原來.....係我o地集團阿業務總監 - 何華先生之前去北京玩，帶左一份手信俾我!!!

有人送手信，當然開心! 不過佢一早已經話左俾我知係咩o黎既~~~ 就係一隻大笨象!!! 真係多謝哂!!! 用一個好精緻既紅色小盒子裝住，盒面仲有阿華哥親筆提既數隻大字﹕祝 你象欣宜! 何華。

唔~~~似以前果個定係而家果個先? 係而家果個幾好丫!

之前我同話阿欣講華哥話買左手信俾我，佢話"係你就應該開心啦，佢好少買手信俾人架!" 我相信一定係佢見到果隻象既時候，實在係即刻諗起我，所以至會記得買俾我囉!

之後有同事問我其實會唔會介意華哥送呢份禮物俾我? 唔會呀! 點會呢? 問心喎, 真係一d都無介意。可能其實華哥係想我介意, 跟住的起心肝減肥。

可惜丫, 我已經到左一個不知廉恥既地步, 又真係開心多過唔開心喎~

我認為如果一個人係討厭你, 根本唔會同你開玩笑。咁既然佢同得我開玩笑，即係都唔討厭我啦~~~ 好開心!!!

放工後，同另外六位同事一齊去左BBQ, 算係幫阿欣補祝生日。燒左唔係好耐咋, 食左唔係好多, 係咁影左好多笑死人既相。

跟住本來諗住玩波波, 不過發現個波波太輕, 成日俾風吹到周圍飛。轉左玩TRUTH OR DARE。玩玩下, 都變左問答遊戲, 都問埋D唔會有人選DARE既問題既! 終於玩到十一點幾大家番屋企lu~~~

又係開心的一天~~~

>>September 24, 2004 at 3:05:07 AM GMT+8

2004 年 9 月 15 日 星期三 【晴】

今天是總裁下午茶的日子。三點o係北京道潮樓開始，我差唔多兩點五十五分至去到，差d遲到，嚇死我。

去到o既時間，十四位o既出席同事已經到齊，坐哂o係度，我嚇一嚇，心諗﹕嘩，好彩無遲到！
臨上到去之前，收到一個電話，知道阿鍾生會遲半個鐘至到。佢好少咁架喎，咁我即係要主持住頭半個鐘啦，第一次，真係有少少緊張。

好彩，今日d同事多數都比較開朗健談，氣氛都唔錯丫。
大家一齊傾下計，講下o係果度睇煙花一定好正，仲食左好多野，鍾生終於o係大約三十五分鐘後到達。

呼~~~鬆一口氣！

完場後，發覺鍾生今日心情好似唔錯。佢問我﹕你......點呀?
呢句係佢見親我，一係唔問我野，一問就多數會問呢句既野。

咁我又多數會答﹕幾好丫，無野呀~
其實我都覺得自己行o左d既，不過真係幾好，真係無咩丫嘛~~~

跟住佢連珠炮發放﹕點呀? 做得慣唔慣呀? 覺得稻香點呀? 有無遇到咩困難呀? 我有無"恰"你呀?你覺得我點呀? 同我做野有冇咩問題呀?

-________-" 暈喇！唔識答！

我答﹕都咁少見到你，無咩點呀，幾好呀！


>o< 唔係好識同佢傾計添~

跟住佢話去答地鐵，我就去左答船仔番灣仔！番到公司同同事傾下計，放工了。

開心的一天！

>>September 24, 2004 at 3:05:44 AM GMT+8

2004 年 9 月 14 日 星期二 【晴】

有點耿耿於懷............
我點解總係好似唔懂得同人相處? 無論我個心係幾咁想對佢地好, 幾咁想同佢地傾下計, 點解我好似一d都唔識可以點做???
我好羨慕好多人自自然然就已經好得人中意.......
唔通..........真係要等下一世...........?

>>September 15, 2004 at 3:06:05 PM GMT+8

2004 年 9 月 13 日 星期一 【晴】

今天心情不錯。番工，忙忙碌碌的一天，不過倒是一貫的忙得開心。
之前離開Golay, 好唔捨得Agnes, 覺得唔知去到下一間公司, 仲會唔會有好似佢咁可愛既同事。
終於都同而家既同事相處左就快三個月喇, 佢地個個都好好, 我覺得同佢地一齊做野好開心, 不過最唔開心就係......都係果句啦﹕點解我係最老果個???????
當然, 我依然經常卦住Agnes......好想搣佢......右手手臂!

希文話, 佢check過自己既成績, 應該可以報讀佢想讀既課程!!! 好事丫, 祝你好運! 你講得岩, 相信你set 高d個目標一定會達到架! 我一定支持你架!

>>September 13, 2004 at 4:17:16 PM GMT+8

2004 年 9 月 11 日 星期六 【晴】

終於申請到本日記!!!!! yeah!!!!!!!!!!

>>September 12, 2004 at 8:16:57 AM GMT+8