2005 年 8 月 1 日 星期一 【晴】

尋晚，終於都真係同左Dr. 去鍾菜食飯。一齊既仲有佢太太同埋兩位舊同事，同埋地盤佬，可惜Hilda唔得閒黎……

尋日五點幾鍾生打俾我，問我食飯有幾位；我叫佢食完飯過黎坐一陣，佢無應我。

到左約定時間八點，見唔到Dr.。反而係o係出面散檯遇見兩位舊楷亞友，吹左一陣水。

差唔多到八點半，Dr.至到。呢個係佢缺點。又令我想起，鍾生都唔會遲到既……

黎到後，期間有同事同埋店長入黎介紹餐單，不過Dr.一眼都無望人地。我覺得咁樣唔太好……唯有我望多d啦……

食下、傾下，時間去到九點幾。

突然聽到地盤佬話：「鍾生呀！」我望出去，就見到鍾生係我地食飯既三號房既玻璃門後。我相信我當時只係mark大個口，一個驚訝樣。跟住呆左一陣至記起要企起身，恭迎聖駕。

鍾生一開始就同Dr.寒暄下，兩個都係典型生意佬咁啦，吹左一陣水，鍾生係咁飲紅酒。佢話之前同鍾太係屋企練左好耐，至練到搖杯d酒唔會飛出街，哈哈。

佢地講下呢樣果樣，得閒又笑下我。鍾生仲話我「無叉用」添，又話我地呢d「讀書人」都係無咩料到。算啦，聽慣了，毫不介意，厚面皮！哈。

鍾生竟然咁耐以黎都無話過我知，原來以前鍾太去Dr度上過兩堂，番到屋企仲係咁喊添。鍾生話佢咁耐都未試過整喊鍾太，Dr竟然整喊佢。

食到一半，我已經feel到Dr.開始「發功」，向鍾生「套料」，睇下MBA岩唔岩駛。

點知，過多一陣，佢竟然真係叫鍾生去幫佢係MBA講番個鐘……唔係卦?! 你當住咁多人面前叫，即係焗佢應承啦……我當堂好唔高興。

佢不停話同鍾生傾左咁耐，已經無收佢錢……係咩? 其實……應該邊個收邊個錢架?

仲犀利既係，到左十一點幾，見鍾生飲紅酒飲到「紅都面哂」，我唯有幫鍾生解圍，話夜了，叫佢不如先走。鍾生臨走，Dr. re-confirm鍾生應承左佢會去MBA。最後吐出兩個字﹕「順德。」

好。做得好。

要鍾生特登去順德幫你講成個鐘野，黎「回報」你今晚同佢傾左咁耐??? 哦……原來係咁。

我錯了，錯在叫左鍾生黎「坐下、傾下計」。鍾生，對唔住，我真係唔想為你添麻煩。

完左之後，Dr.仲講左d野，令我怒不可遏。

放心，我會盡力，勸鍾生唔好去。

我都有我既界線。

如果唔尊重我最尊重既人，我有可能幫你嗎? 我都想我有咁既量度，不過，抱歉，我未有。

Hilda講得岩，唔值得為呢個人動氣。

我尋晚同今朝都有諗起Hilda，我好想好想勸佢快d走，唔好再浪費自己既時間。今晚，我終於都忍唔住打俾佢。原來，佢早已有呢個感覺，對呢個人真係死心了，只要過左呢段時間，佢就會離開。

太好了，Hilda，我真的會支持你的。我知道，Venus都希望你快樂。一定是這樣吧……

-----------------------------------------------------------------------------------------------------------
聽Hilda再次提起，今個月是Venus的忌辰。那叫人永遠懷念的小天使……
我間中會不自覺地想起她，每次總想得眼都紅了……我卻很相信，你現在比我們誰都快樂，對吧?
-----------------------------------------------------------------------------------------------------------

這次是一課，就如地盤佬所言，多麼寶貴的一課啊。

我所上的課，卻是飯「局」後，透過憤怒、想通、再憤怒，以至與Hilda談完了才算上了的。

我慶幸我離開得快；
我開心我亂闖亂撞的做了鍾生的秘書一年了；
我詫異他對我以及我身邊每個人的謙虛和尊重；
我感謝他讓我開了眼界，以身教讓我知道這世上有人的量度真的如許大。

他值得我不顧現時不快的事，去為他堅守我曾許下的承諾。原來，一個這樣言行一致的人，真的能叫我深切自慚、反省。

Hilda說得對，這樣真的值得了，就算人工不高，當交學費也可說是超值了。哈。

除了多謝二字，我只能時刻提醒自己﹕「堅持」！

哪管他是真正這樣一個好人，還是個好戲之人；總之他能給予我這樣的推動力，給予我人生的希望，哪怕被騙一輩子......


>>August 3, 2005 at 1:14:18 AM GMT+8

2005 年 7 月 30 日 星期六 【晴】

今日，同左媽咪、仲有係內地黎既阿姨同表妹一早去左客家飲茶，之後去左唱k，咁就無左大半日了。

去完番屋企，好眼訓，所以訓到6點幾，起身食飯。

食飯時接到張小姐電話，原來陳主席想去試下杏花私房菜。星期五張小姐至試完，咁我估佢應該覺得ok喎，如果唔係陳主席都應該唔會去啦……希望佢地滿意啦！

尋晚同左表妹出街，陪佢去完影貼紙相，佢又話要去蘭桂芳，但係佢得果16歲，所以我同佢行左一個圈就走左喇。回程時，佢突然話想睇鬼片，於是我就同左佢去睇10:30既「零時三點三」，都ok恐怖啦，不過係果種嚇完就完左果種囉，我依然好想睇到好似「鬼眼」咁好睇既恐怖片！

睇完，番屋企。阿Joe有d事搵我，打俾我，佢話岩岩睇完戲，同朋友食緊飯……我話，你唔係……「紐約戲院！」「10:30果場呀?」「係呀，你1院定2院呀?」「2院呀！」「嘩，好驚呀，你坐第幾行呀?」原來，佢坐F，我坐I，竟然咁都撞唔到。都唔知，咁叫有緣定無緣，哈哈。

上星期四，很冒昧地，打左個電話約Dr.食飯。佢係咁問我係唔係要嫁人，如果唔係做咩要請食飯……其實真係無咩原因架，只係因為想囉。終於約左聽晚7:30係鍾菜。本來我試下約鍾生，佢話8點幾黎join，點知講講下，佢3宦係唔黎了，oh……可惜可惜。

希望聽晚開開心心~

>>July 31, 2005 at 3:47:21 PM GMT+8

2005 年 7 月 23 日 星期六 【晴】

終於追到華哥為先進報寫下字。似乎係老生常談既一篇文章，套用於近來發生既事件上，特別有深刻既感受。

文章係講，「心」好比一粒種子，「思想」係種植過程。

所謂種瓜得瓜，種果得果。你投放咩種子，就會得到乜野結果，大自然定律是也。

我都曾經以為改變種植過程，有助改變結果，原來真係唔得；我一直都忽略左我早已經放左仇恨既種子。

由一開始，我就認定左我同佢完全唔同，佢唔會認同我，佢係睇我唔起，佢係有心冼我……等等。因此，即使的期間努力地做過幾多次調節，都似乎last唔到好耐，過一陣又再唔開心過。

自己有時都覺得自己無聊，又浪費時間，唔開心乜鬼野姐，過左咁耐啦，唔面對現實都唔得啦。但係我又覺得自己用緊「中醫心理療法」，想一次過將所有唔開心野撩哂出黎，可以治本囉~哈哈！

不過，都過左咁耐啦，我都唔想再浪費自己所餘無幾既青春，係度唔知唔開心d乜野。

快！快！快！快！快！快！快！我真係想快d收拾心情呀~!


>>July 25, 2005 at 2:51:07 PM GMT+8

2005 年 7 月 18 日 星期一 【晴】

今日……諗極都諗唔起，好似有d好重要既野要做，但係又醒唔起係咩喎……唉……

未有料寫抵食報……灰。

雖然今日都做左好多野，不過有少少悶的感覺，好想出下街……

早上send左個email約阿花食飯，點知佢約左朋友行街，唉……

放工……以為要番屋企吽。點知臨上巴士，收到阿花電話，話佢同佢朋友cancel左，可以同佢出去食飯lu~~~~

去左銅鑼灣既Woodstone食，都幾貴喎，仲要係麻麻地好食，d位又坐得唔舒服。不過其實係好想食鵝肝，都係忍住口，下次同阿媽黎食啦，佢好中意食丫嘛。

不過，都係果句啦，同呢個傻婆去食飯，都係好開心既~~~


>>July 24, 2005 at 9:22:29 AM GMT+8

2005 年 7 月 16 日 星期六 【酷熱】

今日，一個人係屋企悶悶地，諗住摷返d舊VCD出黎睇下。發現我既VCD實在係太亂喇，忍唔住執呀執呀，咁就執左半個鐘喇。執完，食飯，仲叫外賣，飲左my favourite既螺頭湯，正！

食完，再一次睇鬼眼，睇第五次，都仲係覺得佢極好睇！好睇到飛起呀，個細路真係唔係人黎架，點解咁有戲架?! 痴線架！

仲有呀，尋晚又睇左一次Hide & Seek。故事唔太突出，有少少故弄玄虛之感。反而係個細路女又係極為有戲，眼神野野都交足戲，真係叻叻！

不過，讚嘆之餘，有時會諗，究竟佢地唔拍戲時又係點架呢……? 咁細個，卻好似看透世情咁……其實，都幾可怕……

尋日收到一個內地朋友既ICQ Msg，終於都覆我喇，我仲以為你有咩事添。好彩，仲識得叫我幫你交電話費，好啦，幫你一次啦！

以上，算係近日較為開心既事了。

睇番自己日記，自從搬入火炭之後，都好少有開心既日子了。我唔中意而家既工作呢……每一日都過得唔開心，每一樣曾經對我有意義既野我都一一失去了……日日番工時，心情都好灰，去到火炭火車站，就會提自己adjust番心情，投入工作狀態……

工作，毫無動力；要做得好，似乎只係為達到其他人既使命，無共同目標，精神上停滯不前。

能夠推動我既，只會係「一個我服既人」，nothing else！

失去了，無得怪任何人，只怪機會曾經放到自己手上，自己還是讓它溜走了……

星期五同Karen拍完野，同左佢去飲野。聽佢講佢既工作，面上有開心幸福的笑容，好羨慕……

總結會，我要去呀……仲要早一晚去……食下飯、傾下計……? 同邊個呀? 哈……

「我今日好開心，因為……?」因為咩呀? 唔知喎，我唔覺得我今日好開心喎……咁……「因為尋晚訓左覺好」既囉。事實上，有覺好訓都真係一種幸福既。我生活好枯燥? 係呀，因為我唔叻囉，我只係一個笨蛋，笨蛋生活係會枯燥架啦。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

其實諗番轉頭，都好清楚自己係自尋煩惱。一切老早已成定局，點解係都要睇番轉頭呢……?

呢排，屋企無咩大事發生，幾平靜，唔錯。阿媽呢排心情靚，都好願意體諒我、支持我。佢以前好少講出口，但係呢排有一兩次佢都係電話度同我講叫我放鬆d，比d心機，佢會支持我；其實呢個係佢好大進步黎架，佢都叻左好多。

值得開心。

星期三唔舒服，終於去左睇醫生，醫生話應該只係小問題。我一直煩既問題，可能只係個小問題，放心哂。

值得開心。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

要多多自我訓練正面思維，人才得以成長。

>>July 17, 2005 at 5:06:53 PM GMT+8

2005 年 7 月 8 日 星期五 【綿綿細雨】

今天過了心情異常有問題的一天，我都feel到自己好有問題……

原因? 唔肯定，可能係好多野夾埋，又可能會係今朝個夢卦……

今朝6點幾醒左，訓到7點幾期間，夢到自己將會主持既港灣動員會，搞到好唔掂……d人笑我、唔理我，仲要走哂去開飯添……如果真係咁就死喇，所以終於係嚇醒左格！

跟住成日個心都好唔舒服，加上臨時取消去北海影相，搞到番到火炭時遲到左一分鐘！唔理呀，我會寫番外出工作記錄表架，唔可以當我遲到架！

之後係開會，原本以為開到5:30既會，只開到2:30。中間討論過程，我好像有點過激了，不過我真係咁諗丫嘛！阿Paul叫我開完會後留10分鐘，原來係講一d之前阿欣已經同我講過下既野……估到丫。

放工後，唔想去一齊食飯了，因為個心真係好唔舒服，好想好想喊出黎，希望可以舒服d……不過最終都係無做到……

算啦，慢慢會平伏的了。

我估都應該係同尋晚同Angie同Ade傾計既內容有關卦……男人……?! 唉，算吧啦。不過尋晚同佢兩個傾計真係極之開心，開心到好耐都無試過咁開心，我好想以後有多d機會咁樣3個人傾計呀！可惜丫……Angie今日飛番Aus了……佢11月就結婚喇！

串燒三姊妹，剩低我一個了……

>>July 10, 2005 at 4:59:14 AM GMT+8

2005 年 6 月 26 日 星期日 【綿綿細雨】

之前幾日，又係日日都想寫日記，又係日日都灰到唔想寫，哈哈，次次都係咁！

我記得以前聽過一個故事，係講我地要將唔開心既事刻係沙上，讓它隨風而去；我地要將開心的事刻在石上，永遠保存。

之前一、兩個星期所發生的事，可算是我平淡的人生中最「刺激」的事了，令到我頭痛了個多星期，甚至昨晚都十時多便睡了，因為不想再請假了！

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

時刻處於作戰狀態，生怕被攻擊時無力反抗……

我相信保護自己的人，是因為不夠愛。

之前我缺乏信心，覺得不停被擊倒，總覺得會永遠被誰「食住」……

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今天，收到了一份沒想過會收到的禮物。

我要永遠都記住這一天，2005年6月27日。

他把這小禮物交給我，只輕輕說了一句﹕「送份小禮物俾你。」我冷靜的接過，放進袋裡。

他車我出旺角，路上又說了很多。我又明白他多一點。

將近到達，他說：「不知道這樣對你是好還是不好，好是一個寶貴的機會讓你多見識，不好是你會變得比同年紀的人老。」

我常對媽媽說，每個人的優點，總會連著一個缺點，相反亦然；又正如每件好事，都會有一個壞影響，相反亦然。

世上每件事，都是相對論。

而我當然覺得這是好，老又如何？我老得開心！

我明白簡單的人生很快樂；但是我卻更希望「人一世，物一世」，我要過豐盛的人生！

記得中學時Mandy問過我，情願要平淡而簡單快樂的人生，還是像煙火一樣華麗但短暫的人生?

答案是後者。

又記起Dr. 常說有些孩子會無意識地想要活出父母未完成的部份。我知道我是。我想要過一個精彩的人生！我想和爸爸，那一直陪伴我的爸爸，一起去經歷不同的旅程！

每次我不開心，或開心時，總會想起那個夢。今天晚上又再一次向媽媽說起。希望她也知道，你一直在身邊守候著我們，將最好的禮物，都放在我們身邊。

就像今次，我明白了 - 退一步，真的海闊天空！

不是一份禮物，是一份認同，一份支持。多謝。

112巴士上，我想通了。

我會好好努力，無論別人如何，我會盡我的能力支持他們。

無論你是為什麼送這禮物給我，哪管只是想「回禮」， 哪管是什麼更可笑的原因，我不要看得太清楚；我只要衷心的感謝你，給予我力量，再去加油，做好自己！

還有一個人得多謝，就是髀髀。虐待你的耳朵太多了，對不起。多感謝，你總是在我身邊。



備註﹕說到要過像煙火的人生，我想到了有一個先決條件……髀髀，我要減肥！哈……

>>June 27, 2005 at 4:11:57 PM GMT+8

2005 年 6 月 19 日 星期日 【晴】

哈! 哈! 哈! 過山車，好玩嗎?

玩完一次又一次。

呢個遊戲，好似係由3月尾開始玩，原來一玩，差唔多三個月了。

Keep住坐係過山車上面，大上大落；俾你回回氣，又再黎過，真係唔該哂。

可能為左迎接 Disneyland 開幕吧……真係多謝大家。的確刺激非常。



退一步……真的海闊天空?


點解，每一次當我開始珍惜，就要放手?


……

……

……



累了，太累了……


~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今晚，同be be去我二哥度食完泰國野，就諗住去times square行下watson’s。

點知，原來今晚「頭文字D」首映！

我地兩個傻婆，不停俾果個死人吊吊下的攝錄機攝入鏡，終於由8:40等到9:15，等到一班型人出黎喇！YEAH！

周杰倫、陳小春、陳冠A、余文樂、杜汶澤、鍾阿B、黃秋生 ……（以上根據型既程度排序）仲有Michael哥，哈哈！

勁開心！


>>June 20, 2005 at 4:29:22 PM GMT+8

2005 年 6 月 6 日 星期一 【晴】

今天，為幾位同事準備了一個簡單的培訓，是有關由陳大力牽頭，即將進行的資訊站及刊物大型檢討。
效果，可以吧，希望無教錯野。
反而似乎最有效果果part，係即興的即場role play。

上完training，中午食飯得番我一個人食，因為即時今天竟約了男友，其他人都出去工作了。

還好，我都想好好靜一靜。

那從昨晚開始等待的電話，終於還是沒有響起，希望你沒事吧。

但一坐下來，竟發現肚痛得很厲害，背骨痛得要命，全個人都累得不行了……整個lunch time都像一pat野般 dart 來 dart去，怎坐都不舒服。好像是史上最痛的一次呢！

本想請下半天假，不過收到阿欣電話，知道要等雄哥回來做些事，唔敢走。

後來又收到阿欣電話，事情有變卦，相信有點嚴重……終於還是捱到放工……

放左工，阿媽仲竟然叫我番去幫手包粽。真識揀日子！

我出到去，包左一隻超肉酸的，就都係頂唔順，先回家了。

中間有一段小插曲，就是在電梯口撞見大哥。我向他打了個招呼，他 cool cool的，我們一句話也沒有說，也許還在生我的氣吧……

回到家，馬上download 王菀之的「一秒感動」，激好聽，聽左幾十次。

開心。

>>June 7, 2005 at 3:57:22 PM GMT+8

2005 年 6 月 5 日 星期日 【暴雨】

近來胡思亂想得太多了。

每日最珍惜就係番工放工既時候，一個人，唔需要理其他人，好好享受屬於自己既時間。有時番工時會遇上同事，我都會打聲招呼，便繼續自己一邊聽歌一邊行。好似好無禮貌添，但係我真係自私地唔想錯過每一秒的私人空間……或者呢個係我轉左番火炭後，近乎唯一一樣開心左既事。

其實諗親既，都唔係開心既事。但係我係中意諗，我就係一個有咩事，就又中意諗、又中意講，總之要舒發哂成件事為止。

我對每件事都有多多睇法，我控制唔到自己對每件事都諗好多好多野。

套用以前楷亞學過既，
我有時覺得自己係old soul，因為我一d都唔似d young soul咁aggressive，咁追求一d野，我只希望睇見我身邊既人，個個都好開心；
但有時又覺得自己好young soul，對每件事都想好多好多野，好想見識多d自己未經驗過既野，有時明知係錯，因為好奇，都會無法抽身。對一d自己未接觸過既野，好多時會有好多好新既感覺一湧而上，好似新奇到不得了咁；但有時我又會發現果d野對好多人黎講都係平平無奇既野，唔知點解係我自己至會咁被觸動呢……

有些事，對於其他人來說，是基本的；但可能對於我來說，從來都未得到過，沒想過會得到，卻又一直渴望……終於經歷到了……一接觸，便觸到心靈很深的位置，揮之不去……

我，真的什麼都不計較，只願你過得好。

>>June 7, 2005 at 3:37:02 PM GMT+8