2005 年 1 月 3 日 星期一 【乍雨乍晴】

病了好幾天，終於病好了。

十二月三十一日晚上，應該是和希文一起過的第八個新年了，我地之前諗左好耐都諗唔到有咩好做。於是，我就諗住不如去一個有d人，但係又唔會太多人既地方例數，又諗起我一直想去食大久保，於是我地係前幾晚已經去買左"飛"，諗住到時一於打住日式邊爐倒數架喇！

十二月三十一日晚，放左工同希文同阿媽去左屋企樓下新森林食飯，我因為唔想搞到去大久保食唔落，所以我地三個人只係叫左兩個餐。七點幾食完番屋企，一路睇下電視、hea下，到十點九我同希文又再出發喇。奇就奇在平時應該隔左幾個鐘又可以再食過既我，竟然覺得好飽，食唔落......去到後，我同希文都係食左好少野，不過好彩，都食左我最中意食既北寄貝同埋牛肉火鍋。果晚條街真係凍到人都傻，塊面好似唔係自己既咁呀，真係好凍好凍。

食完諗住番屋企，同希文玩下啤牌或者大富翁呀咁至訓，點知就番到屋企，發現個肚好唔舒服，好似好想嘔咁呀。於是一番到屋企就攤左係床度，咁就唔舒服左成晚，仲係好唔舒服，唔係好訓到果隻......

05年1月1日，約左6個同事去赤柱BBQ架嘛，點知實在係太唔舒服喇，一早打俾阿花，點知佢之前果晚又係嘔，佢都休息緊，仲未出門口；咁諗住打俾大力，佢無聽電話；之後再打俾露髀，至知原來大力之前果晚都係嘔，仲入過院添......哈，真係好似夾埋咁呀。

我一病就病到星期一喇，星期一都仲係呆呆滯滯咁，仲係好頭痛，個肚又唔舒服，總之成個人都唔自在......但係又唔想請假，因為應承左阿欣果日有兩本手冊交俾佢；本來打算星期二至休息番，請半日假，點知露髀提我至記得，係喎，星期二集團例會喎，我都唔請得假......嗚......

一直到而家喇，都好似好番好多喇，算啦，都係妹仔命，未得放假咪算囉......


>>January 4, 2005 at 2:34:15 PM GMT+8

2004 年 12 月 29 日 星期三 【晴】


今日第一次收遲到通知書，瘀到爆，三眼仲要特登打電話黎串我！係呀，係收遲到通知書呀，係仲要被forward到全世界都知呀，點丫~ 我都唔想架！

今日第一次做廚藝比賽小記，幾新鮮丫，不過感覺上係唔容易突破到舊模式……今日最開心係去到見到三眼同新新！

番到屋企食食下飯，阿媽至話我知今日係阿爸生忌。我又係衰既，永遠都唔記得既。食完飯，雖然坐左係sofa好暖、好唔想郁，不過終於都去裝左注香比阿爸，加句生日快樂……就係咁大把，係唔係有d不孝?!

聽日就係除夕喇，咁又一年lu~ 期待星期六同花花同其他同事一齊去BBQ~

不過果日好似會凍到傻左……




>>December 30, 2004 at 4:47:03 PM GMT+8

2004 年 12 月 25 日 星期六 【晴】


嘩！竟然有成半個月無寫日記，太過份喇，太懶喇！

其實有幾次都好想寫架，不過又已經好夜喇，累到連電腦都無開……好啦，等我一次過寫啦。

12月19日，番左番禺幫Dr. 手做音樂，用左新software做，未致於手忙腳亂，ok丫，可能今次無咩特別，都幾易做。不過可能又8落5，同d assistants唔係好傾得埋，因為我唔識講咩好呀……唔係有心架……

12月20日，部門做冬，搵埋髀髀去，左去蔡瀾美食坊既詠藜園食，以為可以搵岩岩去左做秘書無耐既Elaine book位添，點知佢咁岩病左，仲以為承機探下佢添。8點幾完左後，約左12月19日抵港既Angie出黎飲野，仲有佢既法藉fiancé。講起工作，我好似比較失敗的一位，我要加倍努力喇。唔見左Angie咁耐，佢係好似有少少唔同左，不過性格都仲係咁傻妹，我依然係咁中意佢。>
☆ 做冬靚相 ☆

12月22日，公司聖誕party。係TST Marco Polo搞，都幾好玩丫，有好多禮物。我玩得好似太癲，完全無理會自己係鍾生秘書，好似會唔會過份左少少?! 今晚第一次搵鍾生影左相，佢無端端kiu住我隻手黎影，於是我個樣就變到好核突，所以唯一一張相就係好核突喇。今日係阿花last day，希望佢番新工會開開心心啦！我會卦住你架！
☆ 派對靚相 ☆

12月23日，同希文、Noel同Kevin出去唱K，本來預埋Hilda既，不過佢又夜左放工，唯有我地四個唱住先啦。Noel係度跳舞，好鬼搞笑，我仲錄低左添，次次睇番都笑死我！唱到十點幾，就再同埋Hilda、Novem一齊出去澳門茶餐廳食野，兼交換禮物。我原先抽到「哈哈！多謝。」，個無聊Noel，得果幾個人抽都搞埋d咁既野，咪又係要俾我再抽過。我抽到個常滿糖加毛巾，希文就抽到我一直都想買既士多啤梨味潤唇膏，佢都唔岩駛，我唯有再同佢換啦！之後由Kevin帶起玩「Black Magic」同「上上落落」，第一個我識玩，不過第二個就玩唔到，真笨！雖然無去咩特別既地方，不過都好開心丫！

12月24日，拍優資培訓搞到七點至放工，放左工同阿媽去小城故事食所謂既「聖誕大餐」，總括一句，極之不滿，唔怪得佢地咁淡啦（25日晚行過得一檯客）！ 食完番屋企睇電視，睇到十點幾再同希文出左去一陣，就番屋企訓了。好平安咁過左一個平安夜。

12月25日，一早就同希文、Noel、Kevin去左海洋公園玩。剛開始時，因纜車事件發生左一段小風波，搞到Noel、Kevin唔係好開心添……不過好快無事lu，玩左成日，玩到5點幾，各自回家了。番屋企前，想同希文出去食d野，不過去度度都咁貴，終於都係食左平平的點心皇。

12月26日，無約人出街，留係屋企陪媽媽。出左去想睇下有冇可愛既貓貓，想買一隻養，不過未睇岩呢……




>>December 27, 2004 at 12:44:14 PM GMT+8

2004 年 12 月 11 日 星期六 【晴】

近來忙到出煙了！好多濕濕碎碎既野做......

飛劍岩岩個星期三開始番工, 佢都幾得意, 俾我既感覺都係好小朋友, 我愈來愈自己老喇......

黎緊呢個星期都會幾忙, 不過我都忙得好開心, 我要繼續努力呀！

>>December 12, 2004 at 3:36:36 PM GMT+8

2004 年 12 月 5 日 星期日 【晴】


呢排好似少左寫日記，唔知呢，懶左卦……

其實日頭成日都好多野，好想寫低，不過到夜晚就唔記得左喇。尋日睇左個節目，講有個女仔成日都好無記性，跟住到左五十幾歲就……老人痴呆……-___-“

睇左一個朋友既ICQ Info，一方面替佢開始懂得珍惜而開心，但另一方面又替佢接受一個唔應該接受既現實而再一次失望……覺得同佢既距離愈來愈遠……

我生於一個好dis既家庭，家中每個人，除了我二哥，都係dis。個個都對事事批判，睇咩都唔順眼。我由細細個就成日俾我阿媽話我無性格，我自己一路以黎都接受左喇，我係一個無性格既人，好容易就會受身邊既人同事影響。自從阿爸死左，阿哥家姐個個一早結哂婚，陪阿媽既責任一早就落左o係我身上。

仲記得，我應承過我自己，阿爸唔係度喇，當日我都無好好珍惜過我阿爸，以後我就要代阿爸好好地對阿媽。

不過，我都唔知其實我做唔做到……點解我總係覺得，陪極佢都唔夠，佢每隔一排就會無端端發好大既脾氣，仲要每一次佢都會覺得我衰過以前? 哈，有時都覺得幾好笑。

我都同過我自己講，要完成我阿爸既一點心願，我希望佢在天有靈見到我，都唔會以我為恥，希望佢唔會唔敢話俾佢天上面既朋友知，我係佢個女。好多人都話佢以前最錫我，對我好大期望，我點可以叫佢失望?!

不過，有時睇見身邊既朋友，個個都好似一盤一盤溫室裡面成長既小花，靚到好似掂一掂就會散咁，真係好羨慕佢地。我由細到大，都係default左係一個惡人，ok，都要接受現實，有得揀咩?!

有d野，我知既，不過都無辦法改變，唯有接受……

---------------------------------------------

記得以前Dr. 成日講 “唔識睇既睇熱鬧，識睇既就睇門道”、“看山是山，看山不是山，看山還是山”……以上用一條線隔開係因為其實呢d說話跟本就同我今日想寫既野無咩直接關係，不過係唔知點解呢幾日成日諗起之嘛。




>>December 6, 2004 at 4:03:34 PM GMT+8

2004 年 11 月 29 日 星期一 【晴】


今日有好多值得記低既事。

今日又係一周裡面最長既一日，又係總監會喇。

下半場開始就係六帽開會好幫手既比賽，我地用lego砌左個工具出黎，幾厲害呀，竟然係加埋公投，一票都無! 真係唔野少~ 都係果句啦，雖敗猶榮！(雖然無咩好榮~ 不過我同大力既解說，阿Paul話表演都應該計分呀，哈哈~)

之後，阿欣今日六點要走~佢五點四至話我知叫我幫佢報今日兩個powerpoint......有d驚架，話哂都係第一次~ 不過都無乜野啦, 無風無浪, 咁就報完~

放工，鍾生又再提我佢今晚約左我溫習。因為佢聽日要考試，考咩項目規劃，我識鬼咩~ 原來佢係想同我講下先，等我聽日可以寫快d。跟住就跟左佢出去食飯。落左樓，就見到阿飛既爸爸媽媽，幾好笑，但係鍾生又一味行一味行，我都唔知停唔停係度同佢地傾兩句好，原來佢都又係去緊稻香食飯~ 講左真係兩句我就跑番去追番鍾生喇~

其實同鍾生兩個人出去食飯都係第一次。鍾生最初話去街邊食唔知咩魚......點知跟住又改變主意去左信和潮樓。去到一坐低，佢就問通哥有咩魚食，唔通佢今日真係好想食魚?!

一食就食左個幾兩個鐘，期間都係傾左少少公事上既野，其他多數都係講下佢d經歷呀咁~ 聽左好多野呀, 我覺得佢講左好多好得意既野俾我聽~ 好就好在佢又好老實，好既醜既佢都照講，聽左好多，我覺得好得意。我覺得呢餐飯之後，我了解佢多左，同埋我對佢講野都無咁拘緊~ 都幾好丫~

食完飯走喇，見到阿財即刻捉住佢，關心下佢上次甜品事件有無嚇親佢。佢係咁同我say sorry， 係咁話佢好內疚，真係講左好多句。我當然係安慰佢，因為佢雖然未了解清楚就做係有唔岩，不過其實佢都係出於好意，今次當上左一堂咪算囉~ 不過安慰極佢都好似仲係好介意，我幾驚佢想喊呀.......

傾傾下，鍾生又走了。我追出去，岩岩見到佢背影傾住電話咁落緊天橋，即刻追上去，追到。我估佢原本以為唔見左我，就諗住自己走~ 跟住轉頭見到我，就等埋我。傾多兩句，收左線。我地行下傾下，行到天橋底，突然聽到佢大大聲講﹕"你睇d人幾肉緊!" 我望過去，就見到原來有pair情侶街頭擁吻~哈哈！佢咁鬼大聲，個男人即刻嘴住咁望下我地~ 我話佢駛唔駛咁大聲，佢話呢d人大街大巷咁做, 無人望佢地仲唔開心喎~ >o< 係咪架?!

跟住我鼓起勇氣，話搵日請佢食麵，佢話好呀！我話你唔問我請你食咩麵既? 佢話，我咩都食格，無所謂格！

哈哈, 唔知幾時有呢個機會呢? 帶佢去食下我阿哥檔口d麵丫嘛~

之後，佢仲特登送到我屋企附近 (其實都係順順地路~) 咁就散水了~

^_^ 係唔係記錄得好詳盡呢? 因為開心既事係值得記住架嘛~



>>December 1, 2004 at 2:46:33 PM GMT+8

2004 年 11 月 27 日 星期六 【晴】


尋晚同阿媽去大家樂打邊爐。最初我地個爐個火好細，根住就叫左人幫我地換。食到差唔多尾聲，阿媽好八卦咁“裝”隔離檯，原來佢見人地個火又係好細。佢就同果兩個女仔講，“你地個火又係咁細呀，你叫人換啦。” 跟住係咁說服人地換過個。其中一個女仔都有應下佢，不過另一個就唔係點理佢，覺得唔駛換。跟住大家各自食野啦，過左幾分鐘，有應我媽咪個女仔行左開去一陣之後番黎，同個朋友講﹕“對腳好痛呀！” 咁佢朋友就答﹕“都話叫你換左佢架啦！” （我估可能係講緊對鞋卦~）跟住阿媽即時撘訕﹕“係呀，你地換過個啦~”（佢竟然以為人地仲係講緊個爐……）之後，果個女仔唯有苦笑，敷衍下佢。之後最終都係無換爐。

不過從呢件好小既事，我有時覺得阿媽真係好可愛，佢又會咁熱心，俾著我就唔會喇~ 有時睇見佢好熱心果個樣，真係覺得佢好小朋友，好可愛……

今晚我大哥番黎食飯，其實自從佢做左新舖之後，都少左番黎屋企食飯，而且我自己都忙……我發覺我愈來愈唔中意佢，我覺得佢成日都係戴黑帽，永遠都係戴黑帽，以為自己係鄭大班……? 我都唔識點講，我曾經因為見到佢好大壓力，好辛苦而做過一d我自己都唔知我點解會做既事……今年年頭我寫過一封信支持佢，鼓勵佢；不過我覺得佢唔識珍惜佢身邊任何一個幫佢既人，包括佢老婆，包括我阿媽……永遠都只係識搞破壞，對每個屋企人都批判，我真係每次見到佢都覺得好煩，連佢既電話都唔想接。

相反，聽到阿媽話我二哥而家係鄉下住得好開心，同我阿姨同我“契哥”一齊住得好開心，佢仲感染到佢身邊既人都開心埋。我聽到好開心，我希望佢今次真係生性，真係識諗，好好地做人，唔好再俾人睇唔起！我有想過打個電話問下佢點，不過又覺得好似好怪，畢竟我地一家人都唔識咁close去相處……

前兩日係黃霑離開我地既日子。睇番好多懷念佢既show，覺得阿媽講得好岩，佢話﹕“如果佢d仔女睇到，可能覺得佢daddy仲係度，不過係去左電視台做show之嘛。” 我都覺得係，睇番佢以前既show，仲好強烈咁感覺到佢果份生命力，佢笑，佢認真，佢喊……每一個鏡頭都係一個活生生既人……我睇番播一d片，講佢仔女以前都有係鏡頭前講過非常崇拜佢地daddy，我係佢地眼神真係感受到佢地以有黃霑呢個爸爸而光榮，我覺得好感動~~~我覺得佢的確係一個好好既人，佢離開左，真係有d可惜……

不過我真係好相信，佢而家去左一個更加開心既地方！或者仲會遇上好多老朋友！祝您愉快~ ^_^




>>November 28, 2004 at 4:11:53 PM GMT+8

2004 年 11 月 24 日 星期三 【晴】


呢排話忙，又唔算真係好忙……不過多野諗，成日都諗野，成個樣都諗哂咁……可能就係因為咁，就少左上網，更加少左寫日記。

呢排自己個部門有d動盪，伊娃要走喇，佢呢個做左半年既暑期工，就快要返去澳洲讀書喇，我地既資訊站就會少左一個靚靚主持人lu~

今日出左去旺角拍優資培訓，中午同May May一齊食lunch，食得好開心呀~ 原來May May都真係幾幸福，有個幸福既家庭，真係羨慕呀~ 拍野拍左兩個幾鐘，有阿銓係度都幾搞笑，不過佢又真係自信好爆棚，都唔一係係太好既事……

今日阿花同爹力佢地一干人等又係o係旺角拍良好工地，阿花扮“人”，我地遲佢地幾個鐘至去，但係我去到仲見到阿花仙子係度講 “我係「人」，「人」係工作環境最重要既……” -________-“ 佢既對白真係得意……真係岩哂佢呀下……

聽日Evan生日，又大一歲，哈哈！聽晚book左檯同一眾楷亞人去信和潮樓食飯，有d好耐無見架喇……希望聽晚玩得開心d……

仲有呀，我今日應承左Hilda12月19號幫佢做音樂，有d緊張，好耐無做過喇~~~ >o<



>>November 25, 2004 at 3:48:41 PM GMT+8

2004 年 11 月 15 日 星期一 【晴】

今日又到總裁下午茶既日子喇！

老實講，其實我每個月，都幾期待呢一日架。因為，我唔同阿欣咁叻呀，對於我黎講，每個月既呢一日，就係我同鍾生一齊出去既日子，透過聽同觀察佢同其他同事講既野，我每一次都學好多野。

可能，好多人都覺得鍾生不過係一個平平無奇既生意人，不過對於我黎講，佢係一個好值得尊敬既人。

佢好叻，叻既唔單單展現於佢做生意上，仲有佢平時一言一行、佢既經歷、佢既人生觀，佢既處事作風。

有時睇住佢處理一D事既時候，我feel到自己係呆左，“mark”大個口得個O，我面上寫住“五體投地”幾個大字。

雖然佢無做咩大動作，不過佢好似總係會係適當既時候做適當既決定或反應。

有時又覺得佢好傻氣，好似佢係總監會上食完粒糖又會用張糖紙好認真咁摺紙，但係唔知摺左D咩出黎架喎；佢有時總監會明明係佢囉錯左隔離位d野黎睇，人地話佢，佢又會賴話係人地擺歪左架喎；又好似佢會因為阿欣叫佢著Sharp D，佢就著到一身好可怕咁都大模斯樣咁周圍走；又好似佢扮掃地阿伯同扮阿Paul都係一百分入型入格……太多了，我總係覺得佢係一個好全面、好真、有血有肉得黎又好鬼叻既人。

……係唔係讚得多得滯呢？

其實佢真係同阿Paul好唔同架，阿Paul既外殼係一個經過嚴格訓練既出色戰士，又同時係一個鐵面既文人，而內裡又有一個蠢蠢欲試既小朋友，又同時係極有使命感既一個人……佢個人好似有好幾層咁架~

~~~~~~~~~~~~~~~~~~~~~~~~~~~~~~~~~~~~~~~~~~~~~~~

今日去完青衣城下午茶，就番左公司等阿欣開完華哥主持個會，就一齊去買試做六帽既material。點知，番到去，就俾佢捉左去幫手做會議記錄。無所謂呀，都幾好呀，原來佢地傾十項全能機制既inter-dept合作。都聽左又學左好多野，我同阿欣都覺得今日華哥好勁、好有立場得黎又幾有見地喎！wow!

跟住差唔多9點至走，出去又去楷亞偷野，又去診所扮哂野偷紙杯，都係執唔齊d野……十點幾，唔理咁多，食野lu！

同阿欣兩個人一齊出去食野既機會唔多，今晚一食就食左兩個幾鐘……

傾左好多野。阿欣明明上去食野之前都話我無咩情緒既，食完之後就話原來我個人咁多野諗，多愁善感……我話女人善變就真，一餐燒烤之嘛，口風變得咁快！

……我今晚會唔會講得太多野呢? 講自己d野唔打緊呀，但係好似講左少少人地既野……希望係對件事有幫助架啦！




>>November 18, 2004 at 4:11:24 PM GMT+8

2004 年 11 月 14 日 星期日 【晴】

今日早上開六帽工具既會議......無咩結論添......

緊接住既又係總監會，開到五點幾就走左，因為要去現飲會慶會場幫下手。Candy叫我幫下嘉賓扣名牌同襟花，其實我絕大多數人都唔識，都唔係好幫到手.......騎騎!

跟住例牌聽下各大粒佬講野，張宇人經常現身，又講話同董董見面講咩，又播哂video咁，我覺得好似佢既競選大會咁......

食左好多野~~~ 阿欣話鍾生肯資助我一半去纖體，唔知係唔係真架呢，哈哈！我都知我失禮佢架喇，咁不過我連一半都出唔起呢......嗚......

成晚俾d女人既香水味搞到超頭痛！終於十一點至走。

仲有，成晚諗住阿欣同我講既另一番話，又係唔係真架呢......? 佢仲會唔會搵我傾呢......?


>>November 15, 2004 at 4:26:01 PM GMT+8