2005 年 10 月 16 日 星期日 【晴】

今天早上是行政部例會，啟動活動時，阿欣把所有同事都叫來了，玩了一個「最xx同事選舉」。有以下五個獎項﹕
1. 最負責任
2. 最抵得諗
3. 最親切
4. 最有才華
5. 最大進步
小女子有幸奪得頭兩個獎項，以一個馬鼻位勝出。最親切獎4位女同事同票數，最終由Cherry奪得，最有才華則由阿Zen一面倒勝出，最大進步則由實至名歸的珊珊奪得。竟然仲會有獎品，就係一個「招財進寶」軟綿綿cushion，仲有一支hand cream。真高興！哈！

得到別人認同當然開心，但其實心知和角色有關。身為處主管，還有「不負責任」這個選擇嗎? 盡力而為而已……不過最開心是有同事投我一票因為「做錯肯認」，我覺得這才重要！做錯要認，打就企定！被打得夠痛了，才會學乖。

-----------------------------------------------------------------------------------------------------

今天晚上原定和髀髀去做尖，但當我們高高興興走到時代廣場時，發現今晚是「再說一次我愛你」的首映禮。可以見到劉華耶！我和髀髀都極為興奮！

於是我們改變主意，馬上去吃飯（又被人騙了一次，＜魚一丁＞coupon用唔到！），吃完馬上下來做小fan屎，等劉華出現。

記得上次又是在這地方等看首映儀式，是「頭文字D」。今次又再可以見到偶像，又是一套我期待的電影，三位主角我都喜歡。

大約等到9點，竟在不遠處見到Donald和Ada，原來他們有首映的戲票呢，太妒忌了！

到9:15，儀式開始了。雖然有點遠，總算還了多年的心願，見到劉華了！還有Charlie和阿Sa呢！正！期間有個騎呢阿叔，用擴音器大叫「劉德華，劉德華，你聽唔聽到呀?」劉華沒有理會，不久幾個保安來拉走他了。哈哈，真搞笑。

回到家，一見髀髀online，她馬上問我：「你唔愛我喇?!」，原來，我忘了替她帶些東西回家，更忘了剛才玩得忘形時sip在她衫領的紙巾，她到將軍澳才發現呢，哈哈，笑死人喇，傻婆！


>>October 17, 2005 at 2:53:34 PM GMT+8

2005 年 10 月 15 日 星期六 【晴】

早已約了媽媽今天和她去飲茶，今天1:30就和她到了鍾菜，還踫上了Michael哥和斌哥呢。媽媽每次說起有很多客人都很欣賞她做的粽，就會很驕傲的奸笑，又說鄉下的朋友都大讚她煮的菜好吃，加上我大讚她做的肉餅是全世界最好吃的，她完全飄飄然了……

飲完茶，媽媽說因為近來要出席不少飲宴，因此想去買套「飲衫」，於是我們便往Sogo進發。千多元就這樣不見了。

之後，本來打算帶媽媽去看「童夢」，但她說不想我再花錢了，於是提議去看貓貓，因為我飲茶時又提到好想養隻貓貓啊~

可惜，今天看的都不太可愛呢……失望而回。

逛完，去吃了很久沒吃的義順雙皮奶。吃完後，媽媽說不明白為什麼義順那麼好生意。討論了一會兒後，媽媽得出了結論，是要做到別的地方吃不到的水準，客人就會喜歡。大概在時代廣場附近，大家走著走著，我突然聽到媽媽「咭」一聲笑了出來，看過去見她笑得彎了腰。「你……怎麼了?」「就好像我做的粽一樣……」原來她又想起她的粽很受歡迎，客人都覺得「只此一家」，所以她又很開心了。哈哈，她真是個可愛的小女孩！心境開朗讓人變得年輕......

回家已經5時多，不知怎的，覺得很累，於是小睡了半小時。被大哥的電話吵醒，一行四人到北角去試試潮式菜館﹕「鴻記小館」。因為大哥近來對稻香集團有說不盡的意見，不停說要帶我去試試做得好的食肆……看來上次出品品質測試對改善我和他的關係，真的居功至偉呢！

叫了很多食物呢，當中我覺得最美味的的凍魚和糖心皮蛋(<- 這個會令師傅傷心嗎?)。反而鹵水食物，以及遠近馳名的無骨鴨舌，顯得平平無奇。最不好吃的，是蒜香雞，吃了第一口，已經不想再吃下去。不過整體是不錯的，而且服務員很親切，大廚也很好客，而且挺有成熟的男人味，哈哈。

席間話題不絕，大家都吃得很開心，氣氛很融洽呢。相信在座每位都很享受這頓飯吧?! 而且我們已相約了，今個星期五一同吃自助餐，慶祝雅惠生日。

我真是個幸福的人！

未來一星期都無法回家吃晚飯了。
星期一﹕做尖
星期二﹕中學同學聚餐
星期三﹕約了Ade買結婚禮物給Angie
星期四﹕寫作會
星期五﹕與家人自助餐

不過我今天做了兩個飯盒帶回公司，有好多菜架，哈哈！


>>October 16, 2005 at 2:10:46 PM GMT+8

2005 年 10 月 14 日 星期五 【晴】

今天下班，和希文去了唱k tea。多星期的扁桃線炎，現在病好了，終於可以唱歌，真開心。

唱完歌仔，就去睇四點四場的「童夢奇緣」。

原本沒有打算看這電影，但因小學同學Horace說她所有朋友都說很好看，我抱著一看無妨的心態一試。

其他的先別說，首先真的不得不佩服劉華。背後固然有不少幕後功臣的鬼匠神工，但他總是個誠意可嘉的人。

飾演小劉華的，真的有九成似，連帶點倔強的神態，都似！可惜，感覺有點怪怪的……

劇情，由大雄哥回到自己家吃飯開始進入高潮，祕密揭盅。他真正開始反思過去的一切，原諒，想追回時間，頓悟，放下……

「人生本來就是個過程，可悲的是它不可以從來，可喜的是它亦根本不需要從來。」

「以前每次我不開心，便會到這樹上，看進屋裡。現在，我發現不是這個家不歡迎我，只是我自己不肯回去。」

「每個人都覺得，自己有的是時間。」

聯繫到自身的經驗，很感觸。

我想到我兩位阿哥，這些年來在外邊胡亂的闖，焦頭爛額，還不是想找個安全的、溫暖的「窩」。我們每一個曾經都以為，有的是時間，不必急於和家人好好相處；我們都曾經以為，是這個家欠了我們。

其實，一個都不能少。

也許一天你都會發現，原來爸爸為了愛您，付出了那麼多。正如我發現，我的媽媽是位可愛的少女。

愛身邊每一個人。


>>October 15, 2005 at 6:08:48 PM GMT+8

2005 年 10 月 12 日 星期三 【晴】

我想，我是個幸福的人。

幸福不單止因為我遇上了令我覺得開心的人和事，幸福是因為，不知何時開始，我學會了抓住幸福。

時刻提醒自己，時刻緊記，要將快樂的事刻在石上，把不快樂的事寫於沙上。


今天，好難忘啊！是近年來，一家人吃得最開心的一餐飯。我、媽、大哥、大嫂、馬生、馬太、雅惠、康康。7:30，他們到了。他們坐下不久，我找對了話題盒子，我知道，和大哥說起他前幾天的出品品質測試經驗，他就會滔滔不絕。

我們，好久沒有談得如此愉快了，好久好久……

康康本來因為病而不開心，但後來我把相機借給他後，他又活潑起來了。本來對我毫不理啋的他，都過來挨在我身旁開心的拍東拍西的。即使他是有點太現實了，但我仍是很享受那種溫馨呢。

看到康康為媽媽拍下V字手勢的相片，


我又替大哥和康康兩父子拍了張合照，甫拍完大哥便抗議了：「影到我咁肥！」


很簡單，卻太幸福了，起碼對我來說是這樣……

近來，我和媽媽的關係似乎改進了很多。最近，每次和她傾計時，都覺得她很可愛，滲透著絲絲的少女情懷、天真、可愛、又帶點羞澀的，哈哈，有趣有趣。

-----------------------------------------------------------------------------------------------------

鍾生今日又對Karen讚我既身材喇，佢話佢到英國後，真係覺得我既身材好正……佢話佢想下個月約我食飯都係呢個原因喎……夠了吧……?

但另一方面，當佢轉左電話，佢叫Karen俾佢新電話我，我問Karen：「佢會唔會講第二個阿霞呀?」「唔會呀，佢話『肥霞』，所以一定係你……」

……多謝哂……究竟我fit定唔fit架……?


>>October 15, 2005 at 6:23:48 PM GMT+8

2005 年 10 月 11 日 星期二 【晴】

今天的時間過得比想像中的快。

原定13:00才開完的市場會，提早於不到12:30便完結了。還有時間多做點工作，便和即時、珊珊和阿Zen出去食lunch。

3點幾出發，到北海搵鍾生，等佢上企業文化課break時sip十幾分鐘。佢一見到我，就讚我靚左好多喎，哈哈。今次搵得佢，都預左俾佢窒我地呢d「讀書人」唔明白佢，果然。算啦……

轉頭去同Winnie夾下下星期例會司儀稿，我地主要都係搵下d網上爆笑or低能IQ題，咁就hea到5點半喇……

落到八樓，見到鍾生係玻璃房打算開會，房內仲有好久不見的Candy呢。鍾生大叫一聲「阿霞」，我咪行番轉頭囉，佢叫我等佢半個鐘去飲杯野。

就係呢半個鐘，我去左信潮check手冊。番到黎，仲要等多45分鐘佢至開完會。鍾生本來7點幾約左朋友食飯，要延遲了。於是，我地又係去新德興，坐左大半個鐘喇。

佢又講左好多野喇，我feel到公司黎緊真係會有比較大既改變……亦感覺到有些人，再努力，也可能只是徒然……

鍾生話，成功既人都有一個最重要既特質，就係"自我激勵"。我都認同好緊要。我唔係好叻，只算識少少，不過如果無左呢少少，我估我早就頂唔順走左了......同時因為我目標清晰，我好清楚我短期同長期目標要d咩，所以我至有動力繼續行落去......

在你心中，讀書人永遠和你格格不入。要怎樣做，才可得到你的認同……?


>>October 12, 2005 at 3:29:39 PM GMT+8

2005 年 10 月 10 日 星期一 【晴】

開始緊張了，因為即將會做旺角開業動員會和集團例會的司儀，一連兩個Function，其中一個還要對著二百多人，在城大惠卿劇場……很怕會怯場呢！

每次想到例會當日，連自己都忍不住笑，我和Winnie這配撘實在太完美了…… -___-“

又想起Paul每次開始有關我外型的話題便會高興到滔滔不絕，又想起鍾生難得在英國也想起我是因為見到一些「肥美」女子的postcard……

做尖！做尖！唔好咁懶啦！

-----------------------------------------------------------------------------------------------------
前幾天提到簡單的幸福，想起有一張相是早前拍的。



當時的媽媽正在用我和家姐買給她的「美腿魔師」按摩，她的美腿向來特別多小毛病。按摩期間，她竟然舒服得睡著了，真可愛。我馬上用手提偷偷拍下，還send了給家姐呢~

第二個幸福，就是我的扁桃腺炎 --- 經已康復！可喜可賀！

從未試過病兩星期，我又多一個經歷了，多好！嘻。

-----------------------------------------------------------------------------------------------------

今天看了花的Blog，有點感觸啊。

有人說，每個人的優點都在前面，缺點在背面，所以人永遠都看不到自己做得不夠好的地方，永遠以為自己是最好的。

是否因為這樣，所以在選擇另一半時，往往如此困難?

我不說誰，就說我自己，總覺得和身邊的人在溝通上有點問題，總有點難以言喻的隔膜……究竟真的是無法找到知音，還是只是自己自命清高?

因此，我都總覺得，自己一個就好。

的確，有時候，看得太清楚了，你會發現事實和想像中有太大出入。男人，只是其中一種。但，也許過一段時間，你又會看開了一點。凡事沒有絕對，別太心急就是了……


>>October 11, 2005 at 3:34:45 PM GMT+8

2005 年 10 月 8 日 星期六 【晴】

剛剛看了一隻DVD，是一隻買了最少一年多，都一直提不起興趣看的DVD。

今天原本約了Horace睇童夢，不過臨時得知原來佢有另一位朋友仔都想睇，所以我無一齊睇lu。於是，打算自己係屋企休息下，希望個病快d痊癒啦。屋企電視壞壞地，所以我打算播套悶悶地既戲，一邊放一邊訓。突然見到呢隻「Angel Eyes（觸目驚情）」，見自己買左咁耐都無睇，一於睇下啦。記得買呢套戲，係因為其實想買「咫尺閃靈」，不過買錯左……（完全唔同戲種都買得錯，巴閉！）

一睇就睇左兩個鐘喇，我完全無訓過喎……幾好睇喎。入面有好多心理學既元素，而且都無咩廁所位，睇到後段又搞喊我喇，唉……真係唔錯架。始終，呢個世界真係無「絕對」既對與錯，始終，要愛你身邊既人。

男主角係戲入面既名叫「Catch」。男主角忘記哂以前既一切，包括自己既身份，從新開始。原來因為一次車禍，佢失左佢最愛既家人，只記得佢地最後一次一齊時候，佢個仔同佢玩，將玩具掉俾佢，講左既一句「Catch」。

其實呢句好有意思。每個人都想逃離痛苦，但好多時會不自覺地將幸福的片段都一併忘了。幸福，雖然往往短暫，但我們都要好好抓住，讓它變成永恆。

簡單如今天當我係7仔買野，撞到大哥同大嫂岩岩經過門口，大家簡單的笑笑說說幾句；簡單如今天回到家時，見到二哥，他很開心的告訴我他買了新電話……

簡單，太簡單了。但沒有吃過苦，就不會知道，原來清水已經很甜，很甜……

-----------------------------------------------------------------------------------------------------

今早，同左希文去K。去到時，播緊「The 媽咪」。開頭講古埃及果段好正，即係講阿炎酷鐵同果個法老王情婦果part呢，好正。我真係好鬼中意古埃及，好神秘，又有好多古老智慧，到現時仍未能完全破解。家中有不少有關書籍，又有d VCD，不過我覺得係「The 媽咪」入面造出黎果個畫面好正，如果有機會親身去一次就好喇！


>>October 11, 2005 at 7:04:28 AM GMT+8

2005 年 10 月 7 日 星期五 【晴】

又係狂食既一日。今日......又食左好多餐添，騎騎。

今朝依然好病，但係因為已經請左好多假既關係，唯有頂硬上番工。番到去，真係有d想死既感覺。

放工後，其實真係好想番屋企訓，因為真係好病。但因為早於兩星期前，已經約左髀髀同三眼仔出黎食lunch，仲要今日花花突然改變主意，同我地一齊食，我當然唔會甩底咁衰女。

一去到，見到三眼，我隨口叫左佢一句"Herbert"，佢即刻問，"做咩咁生外呀? 你唔係叫我三眼架咩?" 嘻嘻，三眼真係好中意三眼呢個名喎，係我病到傻左，叫錯左添，以後我會記住叫番你真名﹕三眼。

一路食，一路幫阿花同三眼影左好幾張相。我有少少回到剛入黎稻香時既感覺，記得果時我影好多相，因為阿花成日鬼咁多表情，唔影低佢真係唔得架。

食飽飽，即時睇醫生，睇完標番屋企打算狂訓。點知就接到Ade電話，叫我出去飲野。佢成日都咁忙，又番工又補習、仲要讀緊master，難得佢有時間，我唯有帶住痛爆既頭出去啦。

同左佢去OM Cafe飲野，我地仲一人食左一件cake添，唔錯丫。

飲到5點幾，番屋企諗住訓，跟住又收到髀髀電話。原來佢同花花已經睇完戲，於是我地一齊上左我二哥既"泰好味" 食dinner。

菜色無咩特別，我地三個女仔，食左八個菜呀！食品不過不失啦。仲病緊既二哥，睇起來精神都ok。

食飽，我只係隨口講得閒要帶花花去我朋友間cafe試下，俾d意見，點知佢同髀髀都話不如即刻去，食番個甜品。

於是，我就係今日內，第二次黎到OM Cafe喇。我估阿Roy唔會太驚卦，哈哈。

我地一人叫左杯野飲，再加上食左4個甜品，一碟曲奇。其實，真係幾可怕。

不過，今晚我覺得最好食既，係"一碗白飯"。呢個甜品係好似梳乎里咁，外表似碗飯，不過係用蛋白做，同埋texture比較濕少少。我覺得好香，甜度適中，好食過梳乎里喎！



唔，要走喇，因為阿花話仲想試埋個"假雞蛋蛋糕"呀，如果再唔走，佢真係會叫架......

終於番屋企了，終於都係成日都無休息下，仲要狂食增肥添......good!

---------------------------------------------------------------------------------------------------------------------------------------------------------

這是一張我近來最喜歡的照片。一見到，喜歡到不得了。



見到這張相，是今天下午和Ade到OM Cafe 時，拿起她的手機隨意按。

左邊的是Ade的媽媽，右邊的，是Ade兩歲多的兒子。

Ade解說，當時兒子的pat pat仍在梳化上，但頭已經跌下去，因為他喜歡靠著婆婆睡。

我好想知道，如果我是Ade，會對這張相有什麼感覺。看到自己的兒子，依偎在自己媽媽的懷裡，他倆還握著手，畫面感人到不行。我會覺得自己......很幸福很幸福。

一家不知一家事，我明白Ade亦有她的煩惱，而且壓力不少。但我會建議她每當傷心時，開這張相出來看看，好好感受這種幸福的感覺。

Ade，你是我最好最好的朋友，雖然也許你不會看到，但我仍希望你知道，我好希望看到你幸福。


>>October 9, 2005 at 3:05:13 PM GMT+8

2005 年 10 月 4 日 星期二 【晴】

其實今晚，已經很累了。今晚就寫無咁長既日記好了。

今早約了阿欣食早餐，8點9去到Comma……真係好大挑戰！

唔……沒有太可怕的場面，只是一貫嚴肅的氣氛啦……始終我都是個嚴肅的悶蛋。

回到公司，10:30-14:00開市場會，一開完即逃，因為15:00要過到北海開intranet會。

開到四點幾，未食lunch的我，同即時去左Roy 既café食左少少野，傾左多多野。首先當然係傾左正經野先，就係……

「食咩呀?」。

跟住，傾埋intranet既action plan，之後再講講大家近來工作的情況。我還是很坦率的說了很多，又有沒有說了不該說的話呢……我總是這樣。但，我真的很享受坦誠的對話，好久沒有和Jess這樣傾個痛快了。

-----------------------------------------------------------------------------------------------------

晚上，約了Paul、欣及方圓，一行四人到TS對面的魚一丁晚飯，加開「寫作會」，阿Paul話想出本有關「快樂人生7健康」既書，點解會搵最唔健康既人有份寫呢? 天啊，我枝筆，真係唔得架喎！真係唔得架喎……所以，我已經安排左一個負責「輸入」既崗位俾自己。但正式分工要留待下次寫作會了。

今晚，阿Paul近乎係一坐低就「飲大左」。我意思係，佢講既野，佢既行為，令我覺得佢「飲大左」。都幾孩子氣喎……有時都覺得佢幾可愛既……不過，始終，我同佢，係兩種人，依然好有距離。

但令我想起一種我一直都有既想法﹕男人，無論幾歲，都係小孩子。

無咩貶義，只係可能我太有母性而已……哈哈，唔知喇。


>>October 5, 2005 at 4:19:25 PM GMT+8

2005 年 10 月 3 日 星期一 【晴】

今日下午到鍾菜check管理手冊。同事們都很nicey，很開心。我還看中了兩個同事可以做主持呢，東雲哥叫我睇中邊個隨便揀，哈哈。

放工後，本來可以好準時咁同髀髀去做gym，但因為喉嚨太痛喇，想慳d錢都唔得，都係要髀髀陪我睇左醫生先。診所係同一間，醫生係另一個，佢睇完我喉嚨後，佢話﹕「嘩，仲係發得好厲害。」佢問我有冇食spicy野同炸野，我本能咁答佢：「兩樣都都好少食，我都唔中意既。」不過答完即刻想起，岩岩去O門時，食左好多粒激Spicy的大利魚旦，唔通佢就係元兇?!

好耐無做gym了，一入到去，有陣熟悉的味道，好親切啊。一邊做，一邊痛，痛死我。點解次次都好似睇完醫生就嚴重左? 總係覺得係因為醫生要我mark到個口咁大，所以我更痛。我覺得，喉嚨好似痛過前幾日岩岩發時，但好彩今次唔係太頭痛。每吞一口口水，都好似用刀仔割喉嚨咁。我總係凝住，我條喉嚨係會爆或斷。

今次去到physical，好似比之前去既時候多左肥妹喎，點解咁既?

--------------------------------------------------------------------------------------------------------------------

做完gym，同髀髀又去左拉麵街食飯。我地講起有關O門間屋，原來髀髀都覺得間屋唔係太舒服，我地大家都覺得應該同未入伙有關，太冷清了。講起佢至知，原來我真係好細膽架。我講起自己有個怪癖，就係會好似「不速之客」咁，成日去到邊都要關門。因為我覺得咁樣至有安全感，咁樣可以減少自己既想像空間。例如我訓覺，一定要關門不但止，更一定要鎖門，仲要反覆檢查門已關緊。更可怕既係，我細膽到一直同阿媽一張床訓，直至廿三歲呀！仲要係一定要掂到佢果隻！而家我夠膽一個人訓，真係好叻架喇。為何會如斯膽小? God knows...

--------------------------------------------------------------------------------------------------------------------

我的日記總是長長的，很多朋友都沒心機看。但我對自己說不打緊，因為會寫長篇大論的日記的，才是Sonia。

最後，如果你有心機看到這裡，真不枉我一直愛你的。花花，生日快樂！


>>October 4, 2005 at 4:07:38 PM GMT+8