2005 年 3 月 25 日 星期五 【晴】

一連兩日的廣州之旅終於告一段落，好累啊~~~

3月25日早上11時約在上水火車站等，大半小時後，終於齊人了，起行！

一到羅湖站，人人大嘆一句﹕早知坐直通車啦！真係多人到人都傻呀！

過得關黎，去到買到廣州的火車票最快都要3點了，到廣州已四點幾……五點幾，終於到酒店了，本來以為upgrade到豪華房，點知又無左lu，不過似乎係好事，慳番d，哈哈。

房間唔錯丫，簡簡單單，但我幾滿意。普通的“標雙”都有小露台。因我、希文，同萊萊髀髀、仲有榮仔地盤佬三pair的房在隔壁，因此我地一齊出露台影左好多相，個感覺好得意，哈哈。

之後落左去泰式私房菜房食中菜，好美味呀，令我印象最深既係d茶，好清香！食完飯，出去珠江邊行左一陣，就番酒店了。當時只係十點幾，我仲以為大家番酒店沖完涼後會去其中一間房玩下至訓，點知因為花花同髀髀佢地架的士，中途落左車去買野後，俾第二個司機帶左佢地環遊廣州，搞左成大半個鐘至番到黎。佢地已經俾人玩到累死左，於是紛紛覺豬豬去也。

好彩，仲有地盤佬同榮仔過左黎，我地玩左一陣鋤大弟，一陣kum綿toy、希文同榮仔玩左一陣十三張，我同地盤佬就係度睇重播的美國超模，到兩點度，就各自去訓喇~~~ 唔錯唔錯~~~

第二日早上，大家玩左一陣UNO，就落去Checkout，仲係酒店餐廳食早早。食完後，就分頭行事，萊萊+髀髀+雲妮+花花去左行白雲山，而其餘一干人等，就去左行街街去也~ 去左陳家祠，比我想像中多野睇，影左好多相，幾滿意！中途見到個銀包係我好中意架，點知我想要既色佢地無哂貨喇，真係好失望呀……

之後，去左行上下九，其實都係行左半條街，好似旺角咁，好多好多人，賣既都係d中低價貨，無太多特別野。之後，去北京路會合番佢地四個，陪佢地食左少少野，就一同去火車站喇~

本來之前收到Hilda既電話, 以為夾到時間可以約埋佢、阿Joe同Dr.等一同飲個茶, 不過都夾唔岩時間，下次吧~

就係咁喇，而家好累了，唔寫咁多喇……聽日同髀髀入南why島行下~yeah!


>>March 27, 2005 at 2:36:55 PM GMT+8

2005 年 3 月 13 日 星期日 【乍雨乍晴】


唉，又來了……

本來以為平平淡淡一家人出外試試泰國菜，給些意見，好讓二哥遲些開舖，偷d橋~ 本來以為會開開心心的……

回家後，二哥對阿媽講左兩句有關大哥的事，我知即時賴野了，雖然二哥唔係有心撩起，不過好明顯係阿媽有意講起……係咁講係咁講，講好多我聽過三百幾次既野，我都真係識背了……

成日都係度踩到大哥好似一pat屎咁，又話大嫂唔尊重佢，又撩番哂好多之前發生的事出黎講……唉，何苦呢?

佢一方面話明白二哥好辛苦，懶係鼓勵佢俾心機；另一方面卻又講咁多大哥既衰野，根本就係分化佢地兩兄弟，你講到大哥衰成咁，佢又點會做得開心? 而且二哥已經咁辛苦，做到咁夜番黎仲要聽你大吐苦水，一聽就大半個鐘，仲要諗下點安慰你……加上仲要話如果你做電腦係成功既，我都唔想你番黎做，唔想你地兩兄弟一齊做……唔……其實最初我已經一早話過咁係無好結果，不過你明明堅持咁至係最好，一次又一次係要叫到二哥番黎做為止，如果唔係佢就係好不孝，就係好唔識諗；咁而家佢番左黎做，你都知佢辛苦，但係你仲要講d咁令人氣餒既說話，你咁倏真係開心咩?

唉，我講過好多次了，我只係想要個開開心心的家，真係咁難?!


>>March 14, 2005 at 2:50:19 PM GMT+8

2005 年 3 月 8 日 星期二 【晴】


好累啊，今日又做gym了……

今日難得放下假，諗住可以訓晏d，點知訓到九點幾就醒左，個頭好痛……搞咩呀? 放假都唔俾我訓晏d???

今日因為去開太古坊既關係，所以同埋岩岩放工的希文一齊走~有人送我番灣仔，幾開心~~~

~~~~~~~~~~~~~~~~~~~~~~~~~~~~~~~~~

講番黎緊既復活節，產生了重大變化，由原本打算同地盤佬及其男友一同去台灣，變到得我同希文去布吉，再變到而家既決定 --- 廣州!!! 哈哈，唔係話去長洲咪算你好彩囉~

原因係咁既，我上個星期日死lur要跟鍾生番國內出席總裁下午茶，因為我未去過國內d分店丫嘛，所以想去下咁啦，其實都無咩特別期望架。

地點係金融酒店，氣氛同香港無咩分別，只係果度個知客唔識死，竟然係帶我入去之前係咁玩……算啦，有時做野辛苦，玩下都唔怪得，只係如果我係普通客人，我會覺得佢地唔尊重我囉。完左之後，鍾生帶我行左個round，我覺得果度d房大過香港果d好多，間間都有舒適的sofa，又有靚擺設、電視，總之正過香港果d好迫既房好多啦！我係咁話正，鍾生話我係鄉下妹，一陣去果間至真係正。

之後，我就跟鍾生架車，佢周圍去巡舖，去第一間時佢話好快，叫我唔駛落車；到第二間我未落車見到間酒店已經覺得超靚、超grand! 由落車開始，已經係咁讚好靚好正、問鍾生酒店book晚房要幾錢，佢話三百幾，嘩，咁抵?! 原來係稻香高層book有discount，原價八百幾~

果度個宴會廳都好大好grand，果日咁岩有人擺酒，個新娘件婚紛個架拱起哂，都幾……娘! 上一層，經過一d睇起黎好舒適既四人座位加檯，好似香港酒店幾high果d coffee shop格局咁，鍾生話原來呢d係俾客人等位時坐。下? 唔係化? 廿幾張咁靚既檯，俾人免費坐o係度等位? 唔好玩啦……

跟住就係戲肉所在喇，登登登鄧，私房菜！

去到第一間房，嘩！！！！！
就由呢一秒開始，我個口好耐都合唔番埋。我諗我真係鄉下妹，對我黎講果度d裝修真係好正好正，我勁中意，一張舒適的十二人飯檯，旁邊有個小廚房，有一個小客廳，仲有個好靚既小廁所，真係好正~

之後果兩間，格調不同，但同樣令我嘩然，如果間間都可以試勻就好喇！

我好想囉部相機出黎影相，好想張張椅都試下坐，不過鍾生企係度同阿高佬斌傾緊d好serious既問題，我咁低能好似有d唔好意思，正如阿欣成日講果句﹕「你身為鍾生既秘書，你做得出咪做囉」，哈哈，所以都係算吧啦~

走後，鍾生問我稻香都算無失禮你喇卦?! 咁緊係無啦，我失禮稻香就真。我問o係私房菜食一晚要幾錢，原來係三千六minimum charge，都唔係好貴姐，我忍唔住講一句，鍾菜都要三千五啦（個心諗﹕但鍾菜間房同呢度無得比）。之後鍾生就話叫我得閒同d屋企人或朋友黎，佢埋單。咁我緊係話唔好啦……之後佢話脆脆地收我一千……

尋日我問番鍾生要點book房，佢又再提起佢埋單……咁……勉為其難啦，哈哈，因為其實我又真係唔想俾人覺得我好似「痴」佢d野，收我一千咪好地地囉，不過佢講左咁多次，唔俾佢請又真係好似唔俾面……

好啦，咁一於搵多d人去食窮佢啦!!!!

當晚，同鍾生去食左間以粥底野邊爐食店，又幾特別喎，我覺得幾好食，不如稻香抄佢丫~ ^_^


>>March 9, 2005 at 4:03:29 PM GMT+8

2005 年 3 月 2 日 星期三 【乍雨乍晴】


呢排工作比之前無咁忙, 輕鬆左少少, 壓力亦少了一點......

尋日聽大髀講，人力資源部問佢想唔想調去物流做QA。我一聽到，即刻心諗唔好呀！我唔想無左髀髀，而且髀髀仲要陪我做GYM架嘛.....

有一件事係值得開心既, 因為我之前考果個項目規劃及管理既徙弟試, oh! 我竟然有100分, 仲係狀元添!!! 哈哈, 不過其實總共都有好幾個狀元架。

仲有前晚去飲現飲的新春團拜, 即時話我應該跟住鍾生出去social下。我夠知啦, 黎之前我已經諗左好耐啦, 不過唔想去之嘛。因為我覺得鍾生唔會有興趣介紹個咁既質地既秘書俾人識囉......我又點同阿欣喎......知喇知喇, 要減肥丫嘛......
不過值得開心既係, 當晚每人都獲贈一個福袋, 入面有好多禮物, 包括一包助助身茶，我除左我果包之外, 有幾位同事都俾左佢果包我呀, 哈哈, 所以我而家就免費有四包喇!!! 阿Paul話飲左會瘦到不似人形喎, 係就好呀, 哈哈!


>>March 3, 2005 at 3:23:55 PM GMT+8

2005 年 2 月 26 日 星期六 【晴】

今日同露大髀、即時同埋雲妮打羽毛波，好開心呀，第一因為呢個新配搭啦，第二因為好耐無打羽毛波喇，終於今日打得好盡慶呀。

打完波波，本來諗住陪髀髀買運動褲，最終都係買唔到。點解髀髀無端端要買運動褲呢? 就係因為佢同我一齊報左Physical做gym呀，佢就為左佢三月尾個目標努力，我就為左做番個正常人而加油！我地現時暫定逢星期一、星期四會做，另外星期二或五就視情況而定啦。

三月中開始既星期三，我就會去上堂喇，由公司全資贊助的秘書課程。希望d同學仔唔好個個都鬼咁細個啦，希望上堂會開開心心啦，更希望上完堂番到黎有助做個更稱職既秘書啦。

今晚去檔口食完飯後，番到屋企阿媽又開始講佢覺得大嫂有幾唔好……我之前都忍左好幾次，今日忍唔住口答左句﹕「來說是非者、便是是非人，你又何必聽外人點講大嫂呢? 外人誤會佢我地無辦法，但係我地係一家人，點解要咁話佢呢?!」就係咁，就賴野喇，阿媽開始連我都鬧埋，覺得我幫住大嫂。可能聽起黎係咁啦，但我只不過真係咁諗，覺得大家係自己人，唔應該咁話佢，我只係出於好意，又俾人屈一輪、鬧一餐……點解要咁呢? 我同佢講過好多次，我只係想一家人o係埋一齊係開開心心，係唔係真係咁難? 我唔想再有事發生喇，唔想再好似上年咁，究竟果d日子可唔可以由得佢過左去，唔好再番黎?!

算啦，多講都無謂……

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

尋日Iva大讚我今次【優資培訓】條橋好得，雖然我唔係覺得條橋有咩咁特別，但係俾人讚始終係開心，而且佢又讚得好似好真咁。大力話過，【優資培訓】帶動左好多其他專欄；唔理佢係唔係講真，呢句說話我會記住，作為一種推動力。而家其他專欄都進步得好快，好似一下子完全唔同哂咁，所以我更加要俾心機至可以保持到水準，我既目標係令【優資培訓】唔再只係一個資訊站專欄，而係真真正正輔助到培訓部，加強到分店同事的服務意識，亦都直接幫到同事學到更多服務技巧。有時候，為左呢個目標，會迫到阿開牙痛咁聲，唔好意思都要架喇，有時做野要做到效果就係要辛苦d，有時一d好似大費周章既野，雖然對結果既影響好似唔顯著，不過影響之大可以超出意料。其實過程中，我地都突破左自己架嘛。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

來月，我會有約7日都唔o係香港。
3月25-28日，會去台灣玩四日；一日去同深圳傾優資培訓、一日番國內食飯（因organizer比賽得季軍，國內包尾要請食飯）、仲有一日係跟鍾生去國內的總裁下午茶。哈哈，d同學仔個個又要飛英國training、又要飛KL、我都要搭火車番國內架，幾巴閉呀！ ^o^


>>February 26, 2005 at 5:19:38 PM GMT+8

2005 年 2 月 12 日 星期六 【晴】

不知不覺，初五了。今個新年，好似逗得好少利是呢……唔開心…… ToT

年初一，原本要去炒檔，不過見難得咁齊人，於是改為初二至去。果日有阿媽、大哥、大嫂、雅惠、康康、詠希、二哥、寶玲、家姐、姐夫、馬生、馬太，同埋我。以我個家庭黎講，已經係最齊人架喇。我好開心，真係好耐無咁齊整了，真的要失去過才知道擁有的幸福。真係有好多好多年都無試過咁齊人，而且以後仲唔知會唔會咁既機會……總係覺得而家大哥同二哥一齊做野會有D反面既危機，希望係我多心啦。

年三十晚打麻將輸左三百幾已經夠衰，仲要年初一去櫃員機o禁錢，唔記得拎!!!!!!!!!!!!!!大拿拿五舊水架!!!!!!!!!!! 晏晝打牌，馬太明明話包我唔會輸，又話咩”送”d牌俾我，包我有賺，點知，再輸舊幾……

初二同初三落左大埔火鍋做收銀，去之前大家都好擔心我會入唔到個收銀櫃，好彩入到，不過撞頭撞左幾次囉，而家洗頭仲會痛……好就好在都逗左十幾封利是咁大把，係咁架喇，收銀位，而且又生面孔。其實入機都幾好玩，不過都好多野學，而且又急，都入錯幾次野…..今次落舖之後，對分店既了解多左少少，覺得佢地原來真係好辛苦，忙起上黎真係頭昏腦脹……

聽日就係年初六喇，亦都係情人節。計起上黎，已經係我同希文一齊過既第八個情人節喇！可惜丫，佢聽晚又要去佢老細屋企拜年……嗚…….

我咳左個幾星期了，幾時至咳完……?

>>February 13, 2005 at 3:09:56 PM GMT+8

2005 年 2 月 1 日 星期二 【晴】

係咪呢?! 係咪呢?! 有開心事時唔即刻記低，日日都諗住聽日先，終於就搞到而家得閒d唔開心既野記喇.....

呢幾日好唔開心，前幾日因為我一句說話，搞到大哥好唔開心，差d搞到屋企又鬧大交......點解一句出於關心既說話可以完全變質?

工作上，點解覺得壓力無端端大左好多? 一直以來都有壓力，跟住阿欣邊有得話無壓力，但係一直都受得住......點解我覺得好似自從呢個月開始，我好似做咩都係錯? 點解好似我係部門入面最無用果個? 乜我講既每一句說話真係咁唔岩咩? 做又錯、唔做又錯，咩都係錯......

錯唔係問題，我唔介意被指出做錯，不過要有合理既理由俾我知我錯咩，同埋咩先係岩。就算無以上既野都算喇，千其唔好前後矛盾，唔好之前講過係咁咁，跟住我去做又話唔係咁咁。我明白做每件事都要有彈性，不過要合理！......總之呢排無心機做野，工作效率其低，而且我知我個樣其衰、成日黑口黑面，就當我無用，就當我小氣，不過我真係諗唔通。我反省好多次，都唔知究竟點做至係岩。

我希望我要追求既係做對既事，而唔係討好到一個人既事。......

>>February 2, 2005 at 2:06:39 PM GMT+8

2005 年 1 月 24 日 星期一 【晴】

好久沒有寫日記了......原因是近來太忙了，忙工作、忙屋企事。

其實有好多日都好想寫日記，因為有好多值得記低既事。又因為有咁多事件發生，有更多好深既感受。

大哥既舖頭今日開張了。總共有二十個花藍呀！早知我同家姐唔送啦。見大哥好似好開心咁，咁又係既，佢間舖又真係執得幾整齊企理，唔錯呀，我都希望佢生意興隆。仲有仲有，佢隻腳之前淥親到而家都未好番，仲好似愈來愈嚴重，希望佢快d好番啦。

睇見二哥又好似真係好努力做野，或者以前我太細個，都唔記得佢以前係點做野架喇。我好似係第一次見到佢真係咁勤力。

最開心既係阿媽，因係大哥二哥都咁努力去合作做好間舖，或者我之前對二哥番黎做唔樂觀係我太多心了，我都希望佢真係生生性性。

呢幾日，比起開心既感覺，我會形容我係感動既比較多。時刻見到一家人一齊做野既情景都覺得好感動，我好似咁大個女第一次真係覺得我地係一家人......如果就係一家人係雖然做野做到好辛苦，但係又同時好開心果一刻能夠變成永恆，那應該無憾了。

而家二哥搬番黎一齊住，我用電腦既時間少左好多好多，唔寫咁多了，有時間再寫吧。


>>January 25, 2005 at 1:36:06 PM GMT+8

2005 年 1 月 8 日 星期六 【晴】


今日訓到十點起左身。

約左Ade、Angie同佢fiancé一齊去鍾菜飲茶，飲左三點，Ade趕住去補習，所以大家就散水了。都飲得好開心呀！

之後返左公司做野，做左一d好濕碎，但又好time consuming既野，都幾開心。

原本二哥話今日下午返黎，點知晏晝我接到大哥電話，話二哥要聽日至返黎。佢聽日就同埋果個小雪一齊返黎喇，咁我夜晚又無得點用電腦喇，嗚……

所以大哥都話我應該買張電腦檯放係廳（佢無非都係怕我幫唔到佢打單之嘛），我諗都可能真係要諗下計仔……

呢幾日成日想寫一d純心情記錄的日記，有諗過用紙同筆寫會有feel d，不過終於都係無寫，都唔知由邊度寫起好。

忽然想起今日阿媽同我講起一d有關阿爸以前既事。雖然我聽過好多次，不過次次阿媽都唔記得佢自己已經同我講過，而且我估寫低我就會記得d，如果唔係阿媽講起，我都唔記得……

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

「你阿爸係個有恩報恩、有仇報仇既人，如果有人對佢有恩，佢就以後點都會對果個人好好；但如果有人對佢唔好，佢到死果日都會記住。

你阿爺好爛賭，賭到輸哂屋企d屋契，仲要做d假既契黎呃你阿麻。後來你阿媽知道左好嬲，當時大住個肚，都八個月架喇，差d想去自殺，不過好彩你大姑媽知佢有d唔妥，跟住佢，所以佢至無自殺咋。後來，有一次食荔枝，就霍亂死左。死後d人幫佢推個BB出黎，個BB仲好似成日佛公仔咁，係仔黎架……

佢細個時，你阿爺賭錢賭到輸左好多錢，於是就叫你阿爸去二舅父度食飯。你阿爺以為，佢以前風光時，都借過唔少錢俾呢個二舅父，諗住到自己唔掂時，佢都會幫下手照顧你阿爸。點知，以前你阿爸去，佢地都會有咩送都一齊食，點知知道你阿爺輸哂d錢，你阿麻又死左，佢就同你阿爸講﹕『阿九，你以後少d黎食飯喇，你知啦，姑死舅唔親呀。』

之後，你阿爸就無再去過食飯，就算餓死都唔會再去食一啖飯。

後來，佢地真係窮到咩錢都無，你阿爺唯有將兩個女賣俾人。果晚，佢地幾個攬埋一齊喊，果兩個女仲話記得屋企個地址，以後會寄信番黎……點知，賣左俾人就咩消息都無哂喇。

你大姑媽就嫁左俾人做平房，果家人成日當佢係妹仔咁駛……你阿爺真係養唔住你阿爸，又見你阿爸硬頸到真係情願餓死都唔去投靠二舅父，於是唯有送佢去孤兒院。

你阿爸係果度好惡架，成日打到D人都怕哂佢。佢話如果唔係咁，根本就搶唔到野食。因為果時你阿爺聽人講，你阿爸要左邊面破相先至有運行，諗住帶佢去俾人穿耳；點知，佢一腳就Yang左個人去好遠，果個人就唔肯幫佢打喇。之後，佢係o係孤兒院係都要跟番阿爺走，果度d姑娘見佢咁就諗住用鞭鞭佢，點知就鞭中隻左眼喇，咁就盲左一隻眼喇，咪就係算破左相囉。

你阿爸一路都對佢阿姨同五舅父好好，因為佢係孤兒院時，佢阿姨成日帶煲仔飯俾佢食，佢五舅父成每個星期都帶舊鬆糕俾佢食。但係佢到死都一直唔再啋番二舅父喇，就連二舅父d仔女佢都無同佢地講野。

我尋晚發夢，都仲見到你阿爸係街上見到佢阿姨，佢仲叫番佢轉頭，話要俾500蚊佢d仔女買野食，仲好似真既一樣。所以我諗我潛意識都仲記得好清楚佢對佢阿姨好。」


~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

就係咁喇，好夜喇，第日再打過啦。



>>January 9, 2005 at 4:32:19 PM GMT+8

2005 年 1 月 7 日 星期五 【晴】


今日係鍾生生日，45歲喇喎，又大一歲喇。不過我無打電話同佢講生日快樂呀，好似太怪喇，星期一見到佢至補番講啦。

今晚係勁歌總選呀，無街街出，所以可以係屋企慢慢睇。今年我最開心既係，雖然我只係睇左兩個頒獎禮，但係兩個既填詞人大獎都係由我其中一個偶像 - Wyman奪得呀，真係可喜可賀！仲有開心既係，最受歡迎男歌手獎又係劉德華囉喇！雖然我身邊近乎係無一個朋友鍾意佢，不過我都係依然咁鍾意佢架！無可否認我都唔鍾意聽佢d歌，不過我鍾意佢個人呀！最受歡迎女歌手由容祖兒囉都好呀，我鍾意佢d歌，佢把聲好好聽。

睇完上網玩online game，發覺個website update左好多新game，真高興！



>>January 9, 2005 at 3:56:10 PM GMT+8