2003 年 12 月 24 日 星期三 【晴】

持續了一段時間的holiday mood繼續蔓延，平安夜，普天同慶，當然是盡情歡樂的日子，今天是李敏兒同學的生日，小雲老早就安排了一切，準備在莫芷恩家中為敏兒慶祝生日，小雲仲親自下廚煮糖水。而我就買蛋糕及花，但唔知點解要由荃灣買入去天水圍？？？莫同學的樓下就有蛋糕店啦！！！都唔明點解咁蠢咁笨！

我地三點幾，就慶祝生日，開始打邊爐，好多野食，真好玩呀，一路打邊爐，一路打番幾圈，本人仲大殺三方，好開心呀！！！玩下玩下，都玩到成六點幾，小雲D糖水好好飲，但D芋頭就硬左D了，若煮耐D，會更好。今日先發覺，小雲真係好似個呀媽，仲勁過我的母親呀！！！

六點半後，就轉移陣地，到Airho的嘉湖山莊打機兼打Bowling，一打就個半鐘，打得相當激烈，不過Dorathy隻鞋就甩左個底，行到"吉"下"吉"下，都唔知佢點著鞋的，玩完Dowling，梗係繼續直落啦，出尖沙咀，乘輕鐵，轉西鐵，再轉地鐵，我地搭輕鐵時，攪錯701線的方向，白等了許多時間，出到尖咀，已是十二點了......

2003 年 12 月 23 日 星期二 【晴】

夫子補課，猛咁講，講完一課，再開多一課，下晝就練Oral。

今天是非常幸運的一天，放學後去買六合彩，買左一張電腦票，居然中三個字，得到個安慰獎，可以收20蚊，攞番個本，這次是本人自十八歲以來，首次中六合彩！！！

好在得施同學的提醒，幾乎錯過了英文的補習，多謝施同學！！！

>>December 26, 2003 at 6:50:22 PM GMT+8

2003 年 12 月 22 日 星期一 【晴】

今天AL中史，Miss Lam 補課兼測驗，我今次空槍中陣，老吹一番。

下盡同敏兒、Dorathy、小能、Pauline、樹熊、阿薩、Airho，去漢和食飯，食完就去左Airho 屋企打機，兼去會所打bowling，好耐無試過了。可惜的是Airho delete 晒D相，把他虐待兒童的證據消滅了...

>>December 26, 2003 at 6:27:29 PM GMT+8

2003 年 12 月 21 日 星期日 【晴】

慘喇，今個月日日出街食，又連續送左幾份生日禮物，加埋出左咁多日街，個庫房都空得七七八八，本月錄得有史以來最嚴重的赤字，下星期仲要出街、聖誕節和敏兒的生日，睇怕都要破產了，現在只好開源，實行番多幾日工，以填補赤字。

對，今日返綠楊，做MC，開頭手震震，做落就定得多，原來都唔難ga！順便可以練下D Oral，一舉兩得，哈哈！

>>December 26, 2003 at 5:44:03 PM GMT+8

2003 年 12 月 20 日 星期六 【晴】

本星期的節目特別多，是個"快樂週"，一連幾日，節目一個又一個，開心死了，今天就參加了由歷史學會辦的文化參觀，先到新界參觀圍村，再到八鄉古廟吃盆菜，食得飽飽！朱子都有去呀！

一早，番到學校集合，結果是F4之一的譚健能因病未能出席，另外，就見到小敏的出現，然後乘旅遊車到元朗，看下書室，再到鄧氏宗祠，看到一大堆牌匾，其中一個是「欽點翰林院庶吉士」，俾阿初問左句："翰林院庶吉士 即幾多品，考第幾呀？"

這問題有關於清朝的科舉制，會試及第後，會以殿試分等第，共分三甲，一甲三名，賜「進士及第」，名次為「狀元」、「榜眼」、「探花」，「狀元」授「翰林院參撰」之職，「榜眼」、「探花」授「翰林院編修之職」，而二甲多名，賜「進士進身」，三甲多名，賜「同進士進身」，二三甲之士子，會按成積而授官，「翰林院庶吉士」、「六部主事」...，而「翰林院庶吉士」就是個五品官，官位須小，但要中舉卻一D 都唔易。

係祠堂門口，影左張合照，然後買花生糖，甜甜地，好好食，再行到聚星樓，之後就要八鄉古廟食盆菜了，個盆菜又大盆，又多R，食極都食不完，飽死了！我仲而食多碗豆腐花添！！！原來Kristy非常之食得，食量仲勁過我地皇帝！

. . . . . . . . .

食飽飽，繼續行程，到大埔林材許願樹，我當然唔放過這次機會啦！！！我今天非常之幸運，一拋就拋到，(左圖紅圈)，願望當然是入讀中大的地理與資源管理系啦！！！希望真的願望成真啦！唔知朱子、阿初、敏兒、莫芷恩又許左D乜願呢？

2003 年 12 月 19 日 星期五 【晴】

一早就開聖誕派對，真係有少少唔習慣，故今早就無食早餐，留番個肚食野，班主任真慷慨，贊助全場食物，其他老師亦有贊助禮物。其間，仲有F4 的預演！

大合照

夫子和校長都有到場，大家興高彩烈的拍照，不停的拍，直情當夫子是人肉怖景版添，D野食都好好味呀，太好了！聖誕節真好！！！