2004 年 11 月 24 日 星期三 【乍暖還寒】

尋晚道維叫我勤力d寫多d日記，我話邊有咁多特別野寫丫，唔通日日寫返學放學睡覺同笑呢ｄ日日都做既無聊野咩，我又冇乜野咁感觸要寫，估唔到今日就來左單大野，真係唔寫唔得，呢單野我真係好諤然。

一代詞聖 黃霑 病逝
黃霑(原名：黃湛森)，1940年於廣州出生，小學在喇沙小學就讀，1960年於喇沙書院畢業後考進香港大學中文系，及至1963年於港大畢業，20年後再考獲香港大學哲學碩士學位，並於去年獲得香港大學哲學博士榮銜。
黃霑先生畢生從事演藝及文化工作，並不斷努力進修。經他手填詞的歌曲有逾2000首，其中包括家傳戶曉的《獅子山下》、著名兒歌《世界真細小》，以及他母校喇沙書院的校歌中文歌詞。
黃霑先生打從19歲起便煙不離手，於早前更證實患上了肺癌。延至今日凌晨12時46分因肺癌引發的併發症於沙田仁安醫院離世，享年64歲。


繼2002年羅文，2003年張國榮、林振強、梅豔芳後，於2004年的今天，我們再次失去一位偉大的音樂人，真是令人感到心痛婉惜。


我越來越覺得，人生真係好唏噓，生命真係好脆弱，真係要珍惜眼前人啦！

阿Chris個RTHK Radio4訪問今日播左出街，好勁呀，佩服佩服！

>>November 24, 2004 at 11:43:51 PM GMT+8

2004 年 11 月 13 日 星期六 【陰】

今朝一早被人chow起身，走去行大東山，我都未訓醒，好無奈咁起行啦。其實我有ｄ擔心係我冇乜做過運動既情況下，再加上唔夠訓，走去征服香港第三高峰，會好唔掂，估唔到係開頭岩岩行上去既時候辛苦ｄｄ，其餘時間都同行商場冇乜分別咁（山上好大風，幾涼下），唔覺得有ｄ咩辛苦囉，條路仲話係「難行」級別既添，莫非經我屋企自細訓練下，行山對我來講真係易過借豆？

行到去接近山頂既地方，勁似深山熱帶雨林，再加埋勁大霧，有ｄ怯怯地。行行下，有幾篤新鮮牛屎，估唔到真係行多一百米，有隻好肥壯既公牛係條路上面食緊草，真係有ｄ想返轉頭，隻牛好似仲驚過我地，自行閃埋一邊，騰出空間畀我地行過。冇耐，聽到ｄ人聲，我地沿途都唔見有人，突然間聽到好熱鬧既人聲，有ｄ鬼秘，再加上大霧，隱約看見不遠處有一大班著住白色衫既小朋友，仲加添幾分神秘感，心諗：「希望真係人啦。」我話：「咦，小學生咁辛苦行上來旅行？」爸話：「唔係呀，中學生來架啦。」.....行多幾步，終於睇得清楚ｄ，原來係一班香港航海學校既中一學生，有2個阿sir帶佢地來行大東山（由梅窩去東涌），其中一個阿sir仲前日岩岩先帶完另一班學生來過，勁呀，salute！個阿sir話今日有兩班學生來行，呢班係後出發既一班來架啦～(果時都未到11am！試諗下佢地幾點起身係赤柱出來囉，仲要個個咁精神，真係值得salute。今次咁難得居然係深山見到班赤航仔，估唔到赤航仔都幾醒目架喎，又好口，都幾有禮貌，好主動。間學校同ｄ學生阿，老師阿，都幾得意，搞ｄ咁既野玩...哈哈，兩個阿sir都勁後生，似岩岩大學畢完業就去赤航教啦，有個仲好靚仔下添，著起件制服好型下呀！係果ｄ唔做阿sir，可以做model果隻囉。好搞笑既就係，我地一齊行左一陣，我地跟住話行先啦，因為佢地話要找三角網測站，個阿sir叫班學生同我地salute囉 ^^)

落返山，係東涌地鐵總站一落車，聽到有人大叫alvin囉，我望一望後面，估唔到咁岩得咁橋，見到bobo、tracy佢地果班coun psy guys囉，我即刻醒起佢地話過呢幾日會入塘福camp，估唔到咁快就出camp啦。

今日學生家長打電話來，我先記得，係喎，聽日要4pm同佢個仔上堂喎，唉，唔知去唔去得切拔萃個garden fete添，我兩邊都應承左，真係煩，我諗我聽日要一早去DBS啦~

>>November 13, 2004 at 3:56:50 PM GMT+8

2004 年 11 月 9 日 星期二 【陰】

今日真係幾無聊，只係返左去樹仁兩粒鐘，上果個咩personal growth (0 credit!!!!)，跟住又返返屋企。早知真係唔返就算，多日假期畀自己，but算啦，拎番本reference寫culture essay，都好過咩都冇收獲過。

岩岩返到校門附近，電話響起，個學生家長打來話今晚個補習postpone到聽晚，事關佢個仔個表姐成4點幾先搞畢業典禮，咁佢阿表姐話想我個學生去觀禮，咁佢阿媽驚趕唔切返來喎。跟住唔知點解講到佢阿表姐原來係樹仁應屆畢業生，今日係樹仁搞畢業典禮，佢同個仔都會去觀禮，跟住佢問我係咪都係係樹仁畢業架，我話只係year 1嗟，岩岩係學校。世事又真係幾蹺既，世界又真係幾細下囉。

>>November 9, 2004 at 8:30:24 PM GMT+8

2004 年 11 月 8 日 星期一 【陰】

今日終於發放psycho既mid-term paper 1既成績啦。由於我果次係冇溫過既關係，所以全日都勁驚，我唔想我就係果ｄ只得1x/40呀，到Grace Ip叫到我個名........個心簡直就似停頓左咁。我諗真係要好多謝個天呀，佢真係幫左我，仲有一定要多謝Mabel、Melody同阿7，我先可以拎返個30/40咋！真係好開心呀，要感恩呀！我量都有A-至B+卦。算係咁啦。我頭15條差不多中晒，係差一條衰大意咋，咁就可以拎15連貫啦，哈哈，一開頭就連岩15條，真係好叻仔下囉！今次睇返自己既表現，原來自己對果D variables (confounding / independent / dependent果ｄ)好唔熟，我諗要係時候搞清佢啦。29號再來mid-term paper 2，我要再創高峰！

因此派卷同做discussion，我地個presentation又再延期，已經延左3星期囉，就快唔記得囉。早知尋晚就唔駛咁辛苦又準備presentation又要搞portfolio啦，搞到我4點先訓得。

今晚食食下飯，有電話打入來，原來係我個補習學生既媽咪打來，嚇左我一跳，覺得好唔好意思。其實我上星期五有電話過去，星期六我唔係屋企，星期日又唔得閒，就打算今晚9點幾打，費時阻住人地食飯啦，估唔到畀佢截左糊，我咪即刻澄清話：「唔好意思呀，其實我上星期五打過去你屋企，冇人聽喎，我正想今晚聯絡你架啦。」，估唔到佢話唔緊要，事緣係因為佢地成家星期五同六都唔會住係東涌架喎~~~（呆左，真係有錢。我仲以為東涌要來渡假既多，原來佢係返來住，出返去渡假，搞笑），咁大家互相了解左一陣，我問佢仔仔讀邊間架，原來係民生書院小學部，英小來架，佢仲話佢個仔以前個補習哥哥同佢補完成績反而仲差左，我當堂呆左，話：「下?係咁呀，哦，咁我盡力試下幫下佢啦。」聽日6點，正式開波，祝我好運啦！

>>November 8, 2004 at 11:26:42 PM GMT+8

2004 年 11 月 7 日 星期日 【微冷】

岩岩同劉浩賢暢談完一陣中學往事，大家正互相羨慕對方中，莫非真係隔離飯永遠係香ｄ？我諗可能係因為自己既想像永遠係最完美既，正因並未受現實事實既污染過，更顯得其完美無瑕，令人神往；而自己所經歷過既，自己睇得到亦都好清楚其毛病陋弊，所以有ｄ厭棄。
今晚一談，我真係覺得Eric真係好smart，觀察入微，講好多野都好中下，不得不令我要吐吐真言、吐吐苦水，我諗今次算係第一次真真正正咁豁出去交流自己講講自己，講左好多好多野，講下自己既過去、交流自己既想法，又講下大家點睇對方，呢ｄ咁深入既交流，真係好難得。我好treasure咁既一段關係，我好希望大家可以做到深交。

上星期四，好難得，收到補習agent既電話，我居然終於收到一個小五男仔做我補習學生。好諤然，好驚喜。我仲好記得一個星期前既星期四，我去hku，先同濤濤大呻我一個補習都收唔到，好無奈，好覺得自己唔掂，畀人嫌棄（因為佢當時收到agent電話，佢推左，我有感而發，講到差ｄ想喊），估唔到一個星期後就有人肯畀我補啦！真係好開心呀！佢係我第一個學生，我好希望我真係可以幫到佢，教到佢，好希望陪到佢升上中學，升上一間好既中學呀（我既定義，差不多識我既人都知架啦：傳統EMI名校）！

尋日去左銅鑼灣開會，肥魚突然問我一個問題，搞到我要自爆（因為我唔自爆，佢遲早都會知），哈哈哈！算啦，呢個我係樹仁既「秘密」，就係咁自爆左啦，希望唔好咁快widespread住啦，我想觀察多一陣，at least畀我開心多一陣先。尋日既一聚，令到我同佢認識大家都深左，係好事呀。（其實真係有ｄ唔係幾好意思，我係有心fake大家架囉，係特登架，哈哈，我都幾係自私下，算啦，畀我自我安慰下都好丫）......

下星期將會勁忙....presentation....portfolio....essay........sigh....仲要派mid-term啦，我上次冇溫過書，實死得，好驚呀！今個星期返得２日半，唔錯，哈哈，當係個break囉，真係好辛苦呀我！

>>November 7, 2004 at 3:01:00 AM GMT+8

2004 年 11 月 1 日 星期一 【晴】

11月1日星期一，１１１１，一切從新開始。但係我個新開始，好似......哈哈。

今朝9點，阿爸係公司打返返來，我扎醒起身聽電話，眼隨即望下檯頭個鐘，即刻眼都大埋，阿爸問：「究竟你今日係幾多點上堂架？」，我一望掛係書櫃門既timetable，心諗：「大獲！原來我今日10點鐘上堂，而家乜9點鐘架啦，正常應該係要出門口架啦喎～」，我支吾以對，爸又再問多次，我敷衍他，隨口答了句：「就快出門口架啦」，其實，我根本仲係張床上面，乜都未搞。拿拿林收左線，第一時間衝去washrm啦，頭又冇時間搞，求其lup住頂帽著件shirt咁就走人，阿媽坐係一旁猛咁講風涼話：「我都叫左你較鬧鐘架啦，我唔會叫你起身架喎，咁大個仔啦，都咁冇責任感既......」。唔知係咪匆忙得滯，記得帶呢樣事拎漏果樣，就係咁仆出去啦。我用左我既極速15分鐘搞掂，真係未試過咁快。

返到學校，我只係遲左18分鐘，真係Out of my expectation！覺得自己好掂呀！唔知頭唔知路咁撞返入自己個位，一坐低先知原來做緊IT Quiz！大獲啦又！個lecturer懶好人咁guide住我set好野，就同我講：「拿，你仲有11分鐘做左呢份野佢，要照足晒喎，唔准用keyboard架！」，臨急臨忙，連係本notes既邊版有得睇返都唔知，係咁望隔離，但隔離果個原來望緊唔係我想要既野，真係倒霉，咁唯有起勢咁猛做，亂click一通，整極都唔多似果份野，正苦惱，突然「必」，眼前一黑，螢光幕冇晒畫面，一陣叫囂除之傳來，原來成半班人既電腦都跳左制，有人大嗌：「哎呀！死啦，未save添，點算呀！」我心入面一陣陰笑，覺得天助我也，咁多人陪我要從頭做過(良心都覺得自己幾衰仔)，搞左5分鐘，都冇乜進展，阿sir唯有叫受影響既人過隔離房從頭做過，估唔到隔離房好多機都hang左，我揀果部冇事喎，咁又準備做之際，Kay衝左入來大叫：「哎呀，唔駛做啦！果邊又唔得啦！大家唔駛做啦！」，阿sir冇耐又叫返我地過去原本果間房度話：「算啦，今次睇來都係做唔到架啦，我地以後都唔做架啦，大家唔駛睇返其實係點做啦。」so消極！anywayz，都好，真感恩，個天幫助我一把，多謝晒！

其實今日係要psychology mid-term quiz既，但我一d都冇溫過，原本諗住搭車果時溫下，點知上左車先發現唔記得拎埋本psycho書，決定唯有打我由中二開始打開既「天才波」。估唔到，個天今次又幫我一把，佢搞到堂IT堂勁混亂，唔係呢樣壞就果度冇電，連個Projector都冇埋電，簡直就係癱瘓左成堂，畀左我時間攝位睇兩下psycho，最好既係，上天俾左唔少貴人我，有melody啦，mabel啦，同阿7啦，佢地勁好人，借書我睇，借notes我溫，仲教埋我添，令到我可以係好短時間入面take up返晒好多野，真係好多謝，非常感恩。

係lunch入面，desmond問會唔會問psycholofy係幾時found既呢，搞搞下唔知點解阿jenny爆句話係welham wundt搞左呢樣野出來。哈哈，估唔到份quiz第一題就係問邊個將psychology獨立成一科學。勁正！個天又幫我答左一題，好感謝！

之後果個sociology既culture，我第一次完全唔覺得眼訓，仲覺得幾好心情添，真係難得，仲有係未試過可以咁輕鬆咁過左呢3堂野，真係多謝晒，可以畀我抖返下，唔駛令我成日都處於tension狀態，雖然今日我都係偶偶地架啦，但感覺真係唔錯呀，多左人主動撩我傾計喎，好少呵，尤其阿邊個阿邊個，真係神奇，哈哈，anywayz，多謝晒各位啦，包括個天！

尋晚我入左科大同30號壽星仔小花係佢個宿(hall 4)度喪玩。癲架，我地真係，玩得好激，唔知係咪畀ｄ o'camp涂毒左，玩左好多變態野，但係真係爆開心。不過最激都係佢果層樓個lift門口倒吊左個吹氣公仔囉(色情果ｄ呢，畀ｄ男性要來洩慾果ｄ），講真，我咁大個仔，都係第一次親眼見架咋，不過佢咁擺法，係冇防備既情況下，一打開lift門，真係咪話唔嚇親，佢地層樓d halloween decoration真係掂到無倫，果個吹氣真係夠晒驚嚇，哈哈！btw,我地結果同左果個吹氣公仔影相，爆搞笑！（原來吹氣有3個洞穴架喎，口啦、下面啦，同後面啦咁，真係滿足晒唔同既需要 :P )

係科大發完癲，出左去西貢繼續癲過，係滿記狂講木瓜奶，哈哈！回味無窮。唔知係咪成晚無停係咁大笑特笑，仲喪玩之下，個肚感覺好empty，頂唔順係7-eleven叮飯食，認真難忘。11點幾係西貢公園食龍鳳大茶樓叮飯，風味一流！

>>November 2, 2004 at 12:36:10 AM GMT+8

2004 年 10 月 28 日 星期四 【微冷】

今日真係好特別的一日。

今日係我選擇放棄ENG101以來，第一日正正式式咁放左個Day-off.
我好好咁「善用」左呢個day-off，做左D傻野。

今日凌晨１點鐘，電話鈴突然響起，呢個咁突如其來既午夜phone鈴，真係嚇得我半死，我以最飛快既速度衝左去聽電話，唔想個電話鈴聲響醒晒所有人，以惹來一頓痛罵。奇怪在，今次居然好似除左我之外，冇人聽到個電話響咁，因為冇人醒左走過來我間房依依哦哦。電話的另一旁傳來濤濤的聲音，呢個死仔都好耐冇同佢傾過電話啦，係認認真真咁通一個電話，佢今次突然主動打來，真係好surprised，最surprised係........成凌晨１點打來，你唔驚我訓左呀，仲有原來佢果時先岩岩落樓等車返St. John's College!!講左幾句廢話、亂吹一輪水，我真係唔係好記得講過ｄ乜野lu，可能果時魂魄唔齊，只係記得講過話今日果個intro psy lecture要幫佢霸位咁。收左線，2點幾3點，我沖完涼，發現濤濤on左line，佢終於返到SJC，又真係幾快，佢搭紅van，我諗起紅van都心寒，尤其經過果次北角紅van大車禍，對紅van猶有餘悸。

6點3咁上下，俾廳出面heeheehumhum同一陣鈴聲嘈聲，其實跟本我就未訓醒既，聽聞話火燭喎，屋企人好神色凝重咁睇住保安台，諗緊走唔走好，我見到咁既情形唔對路，拿拿林搓兩下塊面，隨手披左件soc褸，戴返頂帽，拎埋銀包準備隨時走人，認真呢hae。睇住保安台，好多人出出入入，個個都好驚咁，又掩鼻又剩，唔俾人搭lift，但之後又每次有人要落樓就有個消防員陪住咁搭lift，d保安員又好緊張咁走上走落，我果層lift大堂好嘈，好多人開門睇情況準備走人，有幾個出左去唔對路返返屋企。由於冇人叫我地走，我地密切咁監察情況冇走到人，但據聞好多人落晒ground floor疏散緊，mom拿拿臨拎埋ｄ貴重同重要野就準備走人，等到7點，港台報新聞，講左發生咩事：
東 涌 一 單 位 起 火
2004-10-28 HKT 07:01
東 涌 富 東 邨 東 埔 樓 一 個 單 位 清 晨 六 時 許 發 生 火 警 ， 消 防 到 場 ， 十 多 分 鐘 後 將 火 救 熄 。

最後冇事，一切回復正常。後來mom發現混亂中，整爛左佢對龍鳳鈪，好唔開心。

我求其係雪櫃拎左包weider in-jelly就當早餐，其實幾難飲。

去到港大，等濤濤來。我唔想咁奇奇怪怪咁入去LE1。佢著住件好紫既SJC hall褸來，真係揚眼。佢話冇衫著，所以著件咁既野，又話要買返件hku law既褸喎，真巴閉。係LE1，見到梁卓禧、劉定光。嗯，佢地坐得太遠，冇打到招呼。濤濤差不多訓足半堂，真係好好訓，我從未見佢上堂可以咁好訓過。佢不斷話mc咋嘛，唔駛理佢啦。真係有d無奈。anywayz，其實後面果part佢醒左（可能因為break果時出過去買coffee既關係），就同佢係咁chat chat chat，基本上冇聽過書，算！聽完都唔知個prof.講乜，哈哈！

hae左個lecture，行過去swire果度既canteen食lunch。勁爆多人，尤其勁多king's仔。濤濤發癲係度blah blah blah，唔知點解佢咁唔順超。d野好難食其實。食完佢等下場tutorial，咁就坐係度吹左輪水，我同佢大吐苦水，講到我差ｄ想喊出來。其實放榜以來，我都係好唔開心，好自卑。我唔想果次海富中心咁失儀既一幕重演，我拿拿林係咁搓塊面，希望阻止到ｄ眼淚。

送左濤濤去k k leung上堂，我行返過去library building。
好想扮勤力溫下書，最後不敵睡魔，大部時間訓左去，真慚愧。

呢幾日要準備個CHI101既Presentation，睇《寂寞的十七歲》。個主角好多野都好似我，唉。（當然唔係全部啦，哈哈！）

好想補返一樣野，半個月前，魯士春(chi101 lecturer)話BBA果邊有個叫劉浩賢既男仔，佢又係住大嶼山，問我係咪我D兄弟，佢仲話我地唔單只名似，個樣都好似，係劉浩賢個樣比較反叛D，我個樣乖D咁喎～　無啦啦又多左個劉浩賢，呢個叫michael，唔係eric呀！

>>October 29, 2004 at 12:42:18 AM GMT+8

2004 年 10 月 17 日 星期日 【陰】

　　　　　一道廣闊的低壓槽　正覆蓋著我頭上的一片天空
　　　　　　　　　　　　心裡的不憤鬱悶自卑　又再度萌芽綻放
　　　　預料心中的一片巨大的烏雲　快將灑下暴雨
　　給人瞧不起　自己也瞧不起自己的感覺　很難受
　　　　　　　　　　　但我還能做什麼嗎　我只知道　大勢已去

>>October 17, 2004 at 5:04:12 PM GMT+8

2004 年 10 月 7 日 星期四 【乍暖還寒】

10月7，又係阿陳生既生日，哈哈～首新歌，真係...哈哈...唔知係咪佢自己填既詞來既呢？
btw，又有人叫我做陳生勒，都有一排冇人叫我做陳生啦，哈哈，背後其實係一個勁爛既gag～

anywayz，呢排轉天氣，又涼左，最弊係乾燥，我既頭號敵人，年年一到乾燥天氣，我就會敏感架啦，唔單只容易病，皮膚仲易敏感，嚴重既時候試過出疹添，拿，今年唔好咁呀，雖然而家已經好辛苦啦，經常咳/打乞嚏，不能自控地流算水，嚴重鼻塞，超容易累，成日眼訓，連續３晚坐係電腦面前挨住度房門訓著左！十成九點九係作病啦，真係搞到我冇乜心機，超唔想返學，真係太疲累啦我！

雖然好多日冇打過日記，其實呢段時間發生過好多事架。
尋日，被人召左去見教務主任(sth like that la)，原來係講：「拿，因為你地(註：被召者人數達八人)既a-level use of english既成績有c grade or above，學校唔想徙左你地，因為你地既英文底子唔錯，可以唔駛徙時間學埋ｄ咁容易既english usage啦，學校而家想畀3條路你地行：一、就係照上返usage，咁當然啦，你考試有著數啦，拎條A，GPA高好多啦；二、唔駛上，但要照考；三、就係免修USAGE，果3個Credit照計，當你考左，不過冇grade，轉而插班修讀其他人year 2先讀既english writing，當人地出年讀呢個既時候，你地就讀advanced english writing，最後你地可以讀埋其他人唔會讀既最高既層次（註：唔記得左個名），咁當然升左一級，d野難左，就保唔到你地有A架啦，對想拎高GPA來講係有影響架啦。」今日，我一早就SIT9點果堂English writing，個lecturer就係個panel，佢係一個幾funny既老男人，成日話自己lazy，自己d notes係a pile of rubbish，話ｄ同事係crazy，仲有成日話要嚇下我地呢ｄ sit堂既唔敢讀，咁佢就可以教少ｄ人，哈哈，講真，我睇落d野又唔係真係咁深，但最main point擺明做到唔想我地讀既姿態就係："they had handed in their 1st assignment and that shared 20% of the exam mark. So, if you new guys join us now, you will lose that 20% as you haven;t handed in that assignment."呢一句決定左我唔會跳班來讀。我係度考慮and考慮，唔上堂就可以有一日day off，仲有唔駛上9am呢堂最早既堂，睇落幾優遊，橫掂maria都係照書講，仲有我可以照sit架嘛，哈哈。

9月27，一日成名，因為一幕「著西裝扮色狼」而一炮而紅，令到全部為數九十幾人既coun psy year 1 students知道有我呢個咁既人，個個話要求重演。冇計啦，J.B. Watson組個個精英，我地一個psychology presentation（第一個presentation)已經成功排眾而出，成功烙印係有份睇既人心中，當然就係贏得出名閹尖既grace ip(professor)既直豎拇指，and連講三堂、逢人說項我地個presentation，而我飾演既西裝「色狼」阿哥就因為咁紅遍coun psy year 1，相信已經贏左金像獎影帝。其實我地個presentation係講同性戀既，分左兩part，第一part係講我地點睇同性戀，我地於是採用輕鬆既手法就係用做drama來表達（配合極其美麗既powerpoint做場境，概念係做到好似電視熒幕咁，有台徽有字幕，超靚超pro，連我自己做果個都覺得靚，哈哈），其中一幕就係我扮一個搞細妹既阿哥，於是個妹憎左男人，去左做lesbian。另一part，係講psychoanalyst點睇同性戀，由於學術性重ｄ，我地決定formal d去present，就係用powerpoint懶pro咁去正正經經present出來，實行無論邊種口味我地都可以迎合到，你要搞gimmick有gimmick，你要pro我地有pro，正因為呢part所需，我就著左件西裝返去present啦，其實就唔係好似外間傳媒所講，係因為演呢個角色而著成咁，而係因為為左formal presentation而著成咁。自從9.27一日成名，阿grace對我超有印象仲可以隔左成個禮拜都仲講既情況下，「傳媒」不斷追訪，fans不斷要求重演，日日上a-one（娛樂）頭條，再加埋陳生既爛gag稱號，爭ｄ仲要求我rap埋，真係有ｄ感到無奈。尋日既中文堂就係有fans爭住要同我一組，令到我應接不暇，畀魯士春(lecturer)無啦啦話我唔專心，其實我只係應左一句「好呀」，爆無奈，我澄清完，佢無再怪我，哈哈。課後，我同果班人講（又係爛gag）：「你地搞到我形象盡毀啦，我要找lawyer來出律師信畀你地啦。」

9月25科大之行，科大真係好靚，係果度讀master，都應該唔錯。

>>October 7, 2004 at 12:59:29 AM GMT+8

2004 年 9 月 21 日 星期二 【晴】

岩岩揀好左 counselling用既相，原來好多以前細個既相已經唔係好記得啦，但我最有印象果張竟然係3歲囉！睇返睇返，重拾昔日童真，我發現我細個既時候都幾靚仔架喎，哈哈，唔知點解而家差左.......唉~ 呢份assignment最令我有得著既竟然係話返到俾我知其實我都係靚仔一名囉，哈哈～～
好多reading等緊我.....真係慘......

>>September 21, 2004 at 12:49:44 AM GMT+8