2005 年 11 月 11 日 星期五 【晴】

今晚同阿Sue去左睇林憶蓮演唱會.
之前都冇乜期望,純粹貪得意咁就應承左.
點知睇完之後,直頭後悔冇買到前排.

成個演唱會真係好正,冇乜冷場.
有人話過,梅豔芳去左之後,林憶蓮係香港唯一既舞台皇后.
實在並非浪得虛名,佢表演時真係揮灑自如,不愧係香港少數既Diva之一.

我本身都唔熟林憶蓮既歌,但都不禁俾佢既魅力吸引,真係會投入.
成場既氣氛都好好,搞到我同阿Sue都好想起身又跳又叫.
可惜山頂地帶D觀眾唔夠熱情,兩條友起身會幾樣衰.
睇住下面四百蚊玩得咁high,好無奈囉.

相比之下,容祖兒就未夠班啦.
唔計唱功同跳舞,只係講佢仲未有林憶蓮咁既魅力.

其實Solar一part都唔係差丫,都叫夾到個show.
何況佢地solo都係為左俾主角換衫咋嘛,作為一個廁所位,佢地已經做得好好架啦.

唉,真係好難再有機會睇到咁正既concert啦.
四百蚊既機會錯過左就錯過左......

>>November 13, 2005 at 3:05:58 PM GMT+8

2005 年 11 月 9 日 星期三 【晴】

今日約左Gary去中環SOHO食飯,終於得見傳說中既"香港潮人生命堂".



真係改壞名囉,我諗改名既人冇諗過,今時今日"潮人"既意思會變成咁.

等左Gary勁耐先到,跟住求其搵左間野食.
我之前食左野,Gary又叫左個大size既pizza喎,結果食剩好多,side料.
叫左個Long Island Ice Tea,原來真係好勁既.
飲完半杯,酒氣發返晒出黎o個下真係差D想嘔.
好在頂得住冇嘔出黎,過左之後就冇事lu.
我係天生酒氣散得快既人,一飲酒即面紅.
而且唔會醉,因為一飲得多就會嘔,根本冇時間俾個人醉.

食完飯落去蘭桂芳行左個圈,行上去時我都已經話唔多對路.
果然,上到去真係冇乜人.
今晚仲要係Lady's Night,不過捧場既係賓妹多囉.
難得我大駕光臨,居然D人唔知去晒邊.
氣氛唔夠熱鬧,唔好玩既,同Gary坐低吹左陣水就散lu.

自從Gary去完印度之後,好耐都冇見過佢啦.
可惜丫,佢都冇乜時間真係睇真印度,都冇乜野可以分享俾我.
今日講起中環山邊咁多舊樓,同海邊商業區唔協調.
不過,我就係鍾意咁樣,呢種就係中環既特色.
如果剷晒D舊樓,中環就唔係中環,SOHO亦唔再係SOHO.
我唔係好鍾意冰冷,冇乜人情味既感覺.
真係唔想見到政府為左錢錢錢,係咁將D舊區剷平.
周圍都變晒所謂現代既建築物,咁留返一兩棟孤零零叫有歷史價值既建築又有咩用.

希望Gary真係上到總會去荷蘭啦,到時我一定會過黎探你.
我記得,要一齊為美好既世界而努力.
希望我唔會太早撻皮......

>>November 12, 2005 at 12:27:46 AM GMT+8

2005 年 11 月 6 日 星期日 【晴】

今日Ron竟然咁大膽走黎串我,話早過我收工喎.
可惜丫,今日我晏晝一點已經port sick左去睇牙醫,返到屋企時都係兩點幾.
算吧啦~你係永遠鬥我唔過架啦~

話時話,今日去睇牙醫前都有D驚.
又怕會痛,又怕搞得貴.
好在最後都係補四隻牙咁大把,比預期少.
埋單都唔洗一千,真係執返身彩.

真係想呢兩個月執返好晒成個人,好好咁迎接新一年.

>>November 7, 2005 at 10:29:07 AM GMT+8

2005 年 11 月 5 日 星期六 【晴】

今日阿lum結婚,本來諗住早少少返去,結果因為執靚D,真係只係早少少.
大家都著得靚靚咁返去,不過晏晝冇時間加冇位,結果成班先生女仕要露天食飯囉......

跟住阿lum婚禮,成個過程都好簡單,但個氣氛真係幾lum囉.
都唔係第一次去人婚禮,新鮮感就冇乜.
不過新郎哥自己作左首歌仲唱埋俾新娘聽,抵讚!
最衰班攝影哥哥成日攝晒D靚位,遮實晒,搞到miss左好多重要時刻影唔到.
以前去婚禮都會諗下幾時到我做新郎既,不過而家咩幻想都冇啦.
人越大,好女人越黎越難求,邊諗得咁多丫.

今日又撞到百成,佢問我幾時升家員.
我都好想快D做到,唔想辜負佢地既期望,不過......

完左同雙欣,阿Sue去tea,傾左D女人野.
都同Ron講過架啦,男人俾人話成日睇靚女,其實D女仔咪又係成日睇靚仔.
其實我都好開通架,咪再當個個男人都大男人啦.
有時D女人野問下男人意見,咁先係多角度思考架嘛.

>>November 6, 2005 at 4:12:52 PM GMT+8

2005 年 11 月 3 日 星期四 【晴】



朱銘 - 單鞭下勢


只保留簡單既線條,而可以表現到最重要既神態出黎.
唔洗形似,但可以做到神似.
簡約,最考作者"丟"既功夫.
偏偏從來都係積累容易,丟棄太難.

>>November 5, 2005 at 5:41:15 AM GMT+8

2005 年 11 月 2 日 星期三 【晴】

我一向都唔會放呢類野.
不過今日睇"MAXIM"時見到呢篇,真係睇到會心微笑,實在忍唔住要copy落黎.


有型士50 MUST

你是否想型盡香港，引死靚女？要成為超級有型士，請做好熱身，跟隨以下指示，包你成為超級萬人迷。

1.不論是在行街坐車食飯搭地鐵，要記住無時無刻戴著你的有型黑超，最好是那些黑到見不到雙眼的，被人誤認為是明星的效果更好。
2.出入要駕電單車，而且指定要烈火戰車的啡鈴款。
3.手上佩戴佛珠手鏈金厄戒指幸運繩，愈多愈好。
4.左右腳穿上同款不同色的波鞋。
5.不時把香煙盒拿往手掌心拍打，並告訴別人拍實了煙絲，味道會更濃更佳。
6.搭電梯時用Blue-tooth無線耳筒大聲講電話。
7.穿窄身衣服展露肌肉。
8.學懂吹奏八個音符以上的口哨。
9.被人問及最愛的電影時，答他是法國高達的《斷了氣》。
10.拿著厚厚的英文小說在公共交通工具內閱讀（或裝作在閱讀），書籤最好夾在全書的一半左右位置。
11.大熱天時也要穿上黑皮褸。
12.天寒地凍也要穿背心晒肌肉。
13.講中文時每句話都應該摻雜最少一個英文單詞，如：「請你Pass個Sugar俾我，Please。」語氣盡量自然平淡。
14.用八達通手錶。
15.飯齋啡。
16.搭巴士或地鐵時雙手插袋瀟灑站立。
17.駕車時單手持方向盤，另一隻手模仿藤原拓海的托著頭。
18.帶一條粗大銀褲鏈。
19.手持Starbucks咖啡外賣杯，要不透明那款，就算喝光了也要繼續拿著四圍走，手勢以姆指及食指自上面隨便吊著為佳。
20.鞋帶繞腳一圈把結打在腳跟後面。
21.行街時把iPod掛在頸上，連接巨型DJ耳筒聽歌。
22.熟悉《哈利波特》最新小說劇情。
23.去超級市場購物時用白金信用卡簽賬。
24.排隊輪米時要看South China Morning Post。
25.在中環鬧市穿上全套短褲背心跑步。
26.戴女人用的頭髮箍。
27.把太陽眼鏡架在頭上。
28.超窄身牛仔褲外搭長筒皮靴。
29.說再見時舉起食指中指指著額頭。
30.揹著結他行街。
31.前臂佩戴NBA抹汗護腕。
32.穿扣鈕恤衫時，喉頭數落四粒鈕不要扣上，打出胸肌。
33.紮黑人栗米頭。
34.學吹笛（要橫的，不要直簫）。
35.在海灘著T-back泳褲。
36.染金毛再gel成大龍鳳龍珠頭，要和眉毛的黑形成強烈對比，如眉毛不夠粗可用眉筆輔助。
37.把煙盒攝在肩上。
38.把煙仔攝在耳仔上。
39.把吸完的煙頭用手指彈飛五米以上。
40.打邊爐時開紅酒飲。
41.戴上會隨環境光線改變深淺的變色太陽眼鏡。
42.左右耳都帶耳環。
43.口裡叼著牙籤行街。
44.揹著超大型LV手袋。
45.在健身中心最易被街外人看到的位置做運動，動作可以盡量誇張。
46.梳郭富城《對你愛不完》中間分界頭。
47.用單手徒手抆鼻涕。
48.隨身攜帶Perrier礦泉水。
49.鼻環臍環利環lin環通通穿齊。
50.學打golf。


佢講既50項實質係玩人既,跟住黎做只會係白痴仔,而唔係型仔.不過講返轉頭,全部都好熟口熟面,實有一D係我地做過或者諗過做既.原來男人都有共同之處--想型.

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

男人是野獸
時刻都在搜尋獵物

>>November 3, 2005 at 3:29:33 PM GMT+8

2005 年 10 月 29 日 星期六 【晴】

琴晚上左阮仔屋企訓,佢今朝要做接待,所以好早就同佢返到新堂.

完左崇拜去左摩士聽落迦密既弟兄姊妹分享,其實我都有D想落返去少年團.
希望下年升到家員,跟住做實習助導睇下咩情況啦.

跟住cell去荷里活睇"怪誕屍新娘"(Corpse Bride),都唔錯架喎其實.
老實講丫,睇Tim Burton既戲,就係貪佢夠cult,夠怪雞.
想要logic既情節?注定失望啦,唔通會好似迪士尼咁樣咩?根本就唔係o個路戲.
比起"怪誕城之夜",呢套失色在正常左,唔夠瘋狂.
講返轉頭,娛樂性係少左,但人性化左,同埋諷刺既意味都大左.

睇完去左Pizza Hut食飯,跟住就去阿陶屋企等踢波.
實在太累,同細佬孖鋪訓左個晏覺.
好好訓,完全冇受生保床影響.
夜D落返摩士比賽,又輸兩粒,都冇野好講啦......

>>October 30, 2005 at 5:26:14 PM GMT+8

2005 年 10 月 28 日 星期五 【晴】

人與人之間,最重要既到底係咩呢?
好懷疑,我到底識唔識同人地相處......

我都係......柄埋算啦......



都係Gary最好!

>>October 29, 2005 at 1:17:39 PM GMT+8

2005 年 10 月 27 日 星期四 【晴】

今日又係開cell既日子,上次冇到,今次幾大都唔可以甩底.

今次係阿恩hold,先黎玩"拍檯game",跟住玩從未試過唔禁人既切麵粉.
不過斯文D都好既,玩到成面都係粉其實幾陰公架.
細佬講左句"快得滯",就俾人串足成晚,真係慘.

至於默想既材料,竟然係一則柏拉圖既故事加一段經文.
我覺得呢個方式有少少中世紀味道,即係希臘哲學加神學.
其實唔太係既,只不過咁巧合講到柏拉圖,先至會有咁既感覺.

老實講,咁既方式唔一定唔work,或者只係作者引導既手法唔好.
不過講實真係要幾用腦,而且background資料要夠,進行既時間亦都唔可以太少.
總而然之,就係hold既人要準備得好足.
如果搵到更好D既故事同經文,都可以再試多次既.

講返轉頭,阿恩既表現太緊張囉,唔夠自信,想講又唔敢講咁.
之但係老實講,一條友對住成組人,俾我都會怯場,希望佢慢慢可以習慣到啦.

開完cell落左大成街食飯,居然係食羊腩煲,真係覺得D弟兄越黎越"佬",嘿嘿嘿~
傾左成晚都未落實禮拜日去邊,希望唔會再係阮仔屋企啦......
返到屋企成十二點幾,聽朝仲要準時到禽獸花園,真係殺左我吧.

－－－－－－－－－－－－－－－－－－－－－－－－－－－－－－－－－－－－－－－－－

我始終係明事理既人,明白呢D唔係人地既錯.
其實心情已經平靜返好多,我只不過係唔鍾意事情未明朗既時候.

>>October 28, 2005 at 11:41:35 PM GMT+8

2005 年 10 月 26 日 星期三 【晴】

再一次張開翅膀　得到的是再一次失落
是我的羽毛還擦得不夠亮麗嗎？
抑或我天生就太軟弱？

伏在舒適的巢穴中　沒有伴
那還不是一個真正理想的棲身之所

真的要來一趟遠行？
飛過遼闊的海洋　到那遙遠的彼岸走一回

或許
回來時　一切就會變好

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

心緒不靈時，洗澡是消磨時間的最好方法。
任由暖水沖刷身體，想著那件不知如何解決的事。
雖然事情不會在洗澡時得到解決，但出來時的清爽卻能使神經得到緩和。

>>October 27, 2005 at 11:15:04 PM GMT+8