2005 年 4 月 20 日 星期三 【晴】

今日去東海做完野收工都係五點,落到去尖沙咀都未洗五點半.

本來諗住只係入九龍公園搵廁所,點知俾水池D紅鶴吸引住,停低睇左陣.
跟住忍唔住又去睇埋雀籠,好耐冇黎,好似入左新品種.
睇完都成五點九,約左MoMo六點半,冇乜時間費事去Pacific Coffee上網.

去藝術館等埋MoMo一齊入去,睇"心符—韓志勳的藝術".
唔知係唔係近期睇得黃易多,睇左幾幅就知道作者對佛,道學問有研究.
我比較鍾意一系列加入潑墨手法既作品,講求自然,渾然天成,更能夠反映出佛,道學說既玄妙.

睇完畫展出黎去左M記食野,跟住就返屋企.

<自大狂>越黎越覺得我有做藝術家既潛質

>>April 22, 2005 at 12:14:11 PM GMT+8

2005 年 4 月 18 日 星期一 【晴】


http://img.photobucket.com/albums/v614/hanschen/cheers.jpg


出街時行開CD鋪,買左陳綺貞既精選.
其實之前出過既三隻CD我都有買,基本上大部份既歌我都有.
除左兩首未收入過album既歌之外,首首我都聽到熟.
不過作為長期支持者,我都係要買.

Cheer既形象越黎越成熟,越黎越有女人味.



http://www.cheer-chen.com/images/photo1.jpg


人地話,睇一個人鍾意咩藝人,大概會估到佢既理想對像係點.
睇返我鍾意既女藝人,到底有咩共通點呢?

有才華?
有自己既堅持?
比較成熟?
或者係啦......

我都承認我比較鍾意有能力同獨立既女性.
最好二人世界之外,大家又各有自己既世界.
唔好太倚賴我呢個賤人,我唔係好鍾意俾人纏住哂.

>>April 19, 2005 at 11:24:42 AM GMT+8

2005 年 4 月 16 日 星期六 【晴】

今朝大佬墮馬,我自己返第一堂,唔知點解訓左八粒鐘都仲會咁眼訓.
下晝冇野做,完左家會食埋飯,返左屋企.

夜晚九點半先開波,八點鐘去到摩士.
今日對以馬排出黎個陣有D怪,我地D波又唔夠爽.
先輸一粒我都冇野好講,但睇住一路都追唔返,又唔俾我落場,真係火火地.
最後輸一粒完場,激死人啦!

>>April 17, 2005 at 10:51:50 PM GMT+8

2005 年 4 月 15 日 星期五 【晴】

出氣球 - 范曉萱

妳愛我嗎
妳給的是我要的嗎
我的壓抑也許妳總看不到
但不可能不知道

恨他嗎
我想我還做不到
我的價值觀不是妳想的那樣
即使妳常
說我還沒長大

一直幻想　走到山上　坐在大樹下
把我所有的煩惱
用力吹進想像的汽球裡

輕輕放手　讓它飄走　煩惱跟著風
一切都在我閉上眼的想像中
不見了　不見了　不見了　不見了


想快樂,就是快樂不起來......
就讓心憂鬱個夠,反正早晚都會過去......

>>April 16, 2005 at 1:05:44 PM GMT+8

2005 年 4 月 14 日 星期四 【晴】

琴晚Gary約左去尖沙咀食飯,行去搵佢時又同上次個賣藝哥哥買左兩隻CD.

今次唔去海港城,轉左去諾士佛臺.
第一次上去食飯,一路餐廳酒吧都好熱鬧,果然係蘭桂芳以外既上佳選擇.
最後去左Mabhabar,鍾意間野夠逼,裝潢又有民族feel,仲有個衣著性感既dancer跳肚皮舞,氣氛唔錯.
一路同Gary食住野,望下出面D女仔,又講下女人,幾寫意.
Gary話成日做野,要出黎減下壓.
而我,出黎只係悶得濟,想出街hea下.

呢度有種好特別,好大支既煙供應,本來我都想抽下,但怕會勁得滯,都係冇叫到.
間野既野食都OK,食到咁上下,性感dancer姐姐又出黎跳舞.
起初氣氛都唔係咁熱烈,跟住dancer姐姐好醒目咁請左個鬼妹出黎一齊跳,當堂成個氣份熱烈哂.
全場麻甩仔都睇住鬼妹跳舞,連出面經過既人都停低黎睇.
睇住dancer姐姐同鬼妹兩個扭呀扭,真係有D火辣既感覺.
搞到我都想出去玩下,不過我唔識跳舞,費事出去獻醜啦.

食完落左旺角一間cafe繼續hea,出到黎就唔想咁快返屋企.
同Gary兩條麻甩仔又邊睇女仔,邊講女人.
Gary,唔洗將個條件set得咁死既.
其實唔同既女人都有唔同既味道,成熟,青春,活潑,冷酷等等唔同既女人,都有佢既可愛之處.

講講下又講起溫子康,Gary話我好似佢,成日得個講字.
唉,我都想可以的起心肝做多D野,但當D野得黎太易既時候,又真係刺激唔起我要更加努力.
俾多D時間我啦,到我再忍受唔到既時候,我就會奮發圖強架啦......

>>April 16, 2005 at 2:07:44 PM GMT+8

2005 年 4 月 13 日 星期三 【晴】

好少咁早就打日記,因為通常一起身就要準備返工,冇時間打.
但琴晚發左個奇怪既夢,忍唔住要早少少起身記低.

夢中我做過D乜,其實已經唔太記得,只係記得幾個最特別既片段.
第一個片段,就係以馬既家活動竟然係去網吧打Rainbow Six.
好特別既電腦囉,兩個人竟然可以用同一部電腦一齊打既.
更特別既係,打緊Rainbow Six既阿培,竟然變到好多野講.
好難想像,阿培有不停講野既時候.

第三個片段,就係經過舊屋定福樓樓下既時候,有班男女o係度唱"老鼠愛大米".
當個男既唱完之後,突然一百八十度轉變,扮William Hung唱歌.
之前佢個樣好正常,但呢個時候佢個樣,身型,把聲都突然變左,竟然變到勁似William Hung.
呢下實在太突然,一向討厭"外國人笑柄"既我,居然都會忍唔住笑.

第二個片段係最特別既,我一定唔會忘記.
先黎既係,以前譚伯羽班女同學竟然夾份o係置樂開左間boutiue.
成員都係我唔熟既人,許麗萍,黃海盈,黎潔兒,梁慧詩......嘩......咩事呀?
呢個唔係最特別,意想不到既係連我新寵范曉萱都有份.
冇錯,係范曉萱!(下簡稱"萱")
(范曉萱叫Mavis,黃海盈又係叫Mavis,撞鬼......)

最最最特別既係,我同萱好似之前已經識咁,佢一見到我就好熱情.
我同個唔知乜水既男仔入左去間boutique之後,就同萱,許麗萍,黃海盈一齊坐低傾偈.

萱好似當其他人冇到咁,係咁同我講野.
我好似以前曾經同萱講過D咩咁,所以佢見到我就湊埋黎用國語同我講:"你還未改變."
而我竟然好大膽咁,用爛到爆既國語同佢講:"親親......"
跟住萱就大力咁錫左我面珠一啖,許麗萍同黃海盈當堂睇到眼都突埋,啞左.
唔洗問都知,夢中既我同萱係咩關係啦.
萱仲叫我坐埋佢身邊,但呢個時候我竟然好唔識趣咁離開間boutique.

以上就係呢個怪夢既其中三個片段.

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
第一同第三個片段,我冇乜興趣深究.
不過第二個片段,相信某程度係因為我既潛意識而產生既夢境.

第一,"你還未改變"呢句,好明顯就同我一直以黎既願望有關.
一直以黎,我都好想擺脫枯燥既生活.
更希望既就係改變我自己,但呢個我一直都仲未做到.
所以當萱同我講"你還未改變"時,我既心情係又驚又喜.
驚既係經過咁耐時間我真係仲未有改變,喜既係竟然有人關心我既願望.

第二,萱錫我令許麗萍同黃海盈眼突,亦係同我既願望有關.
我想改變自己,除左因為我想突破自己.
某程度上亦因為我想做返一D出色既事,等我可以o係以前睇我唔起既人面前威返次.
面對舊同學,我冇自卑,因為我而家既生活的確唔會比佢地差,最少o係心靈既層次上面.
但畢竟你有幾多個人修為,其他人唔易發現到,亦唔易理解到.
所以我一直想做返D實質既事,叫所有人都會知道,我已經今非昔比.
估唔到呢個願望,竟然o係夢中以"范曉萱錫一啖"黎實現,真係搞笑......

第三,我間唔中就會幻想自己可以唔洗返工,每日就係做自己鍾意做既事.
追尋自己既理想之餘,又唔洗為擔心生計,會係幾好既事.
曾經我都幻想過,會有個女人肯養起我,等我可以全心去修行,嘿嘿!
最好係個女人自己叻之餘,又欣賞我,俾錢我洗,就係賭我將來會有一番成就.
好似係女仔先會有俾人養既諗法,其實唔係啦,男人都會幻想唔洗做又有人養架.
所以萱睇中我,某程度上應該都係呢種諗法既寄託.

第四,就係我一直以黎都希望自己既另一半都係個出色既人,萱就附合哂囉.
當然,現實我梗係唔會咁高要求,可以o係夢中試下已經唔錯啦.

唔知睇完呢篇野既人,會唔會覺得我成日發白日夢,冇乜男子氣慨呢?
咁事實我又真係唔算man架嘛,況且,唔係諗下都唔俾嘛?

>>April 15, 2005 at 11:17:24 AM GMT+8

2005 年 4 月 11 日 星期一 【晴】

今晚搞乜,開cell個個都話唔黎得,call齊人都係得五條友.

本來收左工,去左Pacific Coffee諗開cell做乜好.
但收到一個又一個電話,搞到我都唔洗再諗.

返到新堂執齊人,最後決定去食飯就算.
又係椰林,附帶節目又係睇電視劇.
今日大家好勁,睇左兩套先捨得走.

如果強仔問起開cell我地做過咩,答案就會係:
"今日開cell既節目就係睇電視,成班人坐埋一齊一邊食飯一邊睇電視劇,係咪好有一家人既感覺呢?"

>>April 12, 2005 at 4:29:10 PM GMT+8

2005 年 4 月 9 日 星期六 【晴】

琴晚咁快返屋企就係為左早D起身,點知今朝七點起身都冇用,俾大佬累我搞到要返第三堂.
早知係咁,我就唔咁早訓又咁早起身啦......

晏晝join返多馬,一齊玩killer.
有陳氏兄弟成個局就會亂,再加埋郭立強就亂上加亂.
成個下晝都要用腦,原來都好累架.

夜晚踢波,今日唔打前打翼.
除左走漏左一次之外,其實今日既表現都算OK,話哂唯一一次起腳都叫中框先.

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
別試圖戲弄獅子......

高傲的獅子,可不怕寂寞.
主動親近,牠雖未必會理睬,還好以惡相報始終非其作風.

假若不知好歹地惹得獅子厭煩,牠就會一聲不響地離去.
最壞的,更會被反咬一口.

>>April 12, 2005 at 4:22:17 PM GMT+8

2005 年 4 月 8 日 星期五 【晴】

以前讀書時從來冇諗過,我竟然會同MoMo兩個去睇畫展.

收左工打左好幾鋪機,跟住落尖沙咀HMV買左兩隻CD.
今次唔買pop同rock,買左"古典之門12宗教音樂"同"Aero Latin".
跟住再去商務行,買左本"老子今註今譯".
遲D睇完"覆雨翻雲",就會學下咩係"道可道,非常道".
三點幾MoMo先到,跟住就落去join佢.

今次係第二次去睇Impressionism畫展,一去到就見到勁多人,條龍超長,同上一次既直行直過係兩回事.
喂,乜香港唔係文化沙漠黎架咩?點解會有咁多人去睇畫展架?嚇親......

好辛苦終於捱過悶熱既天氣排到入去,我同MoMo入到去已經覺得勁累,興致已經減左七分.
精選左一D畫黎睇,問起佢先知原來一幅畫除左層次感,顏色既運用都係大有學問,又學多左野啦.
我就係咁,好多野都有興趣學,但又唔會志在要學得精.
好多野都係學過下就算,正式周身刀,冇張利.

講起先知,原來MoMo上年年尾自己一個人去左倫敦,巴黎,柏林.
聽佢講起自己一個人住hostal,亂咁行,銀兩有限,言語不通之類既麻煩事,都幾得意.
好佩服佢咁勇,今年我其實都有錢去自由行,但就係怕去完之後一貧如洗,結果都係打消左個念頭.
而家先知原來最少有兩個人已經去過,忽然有少少後悔冇好好用筆花紅添.
今年之內就算近近地,我最少都要去台北自由行一次!
至於歐洲,下年睇下份花紅幾大先算啦......

行完畫展出返黎已經勁肚餓,同MoMo落旺角食十蚊那渣麵.
跟住去朗豪坊買飛睇"哈爾移動城堡",估唔到上左兩個幾禮拜都仲咁多人睇,要買到第三行最側邊.
真係好,居然有人嬲我睇一直想睇既戲,唔洗我再諗到底搵邊個陪我去睇.
行左陣朗豪坊,等到夠鐘就入場.

好在間戲院夠迷你,就算坐前排睇都唔會覺得辛苦.
哈爾靚仔就唔洗講,蘇菲都好堅強,竟然遇上冇啦啦變阿婆咁不幸既遭遇都仲可以咁樂觀.
不過佢走出城堡喊既一幕真係令人有少少酸,點解要佢咁細個就面對咁既命運.
成套戲對人性既著墨其實唔多,亦缺少左一貫驚險既冒險旅程.
有人話係宮崎駿既失手之作,但我仍然覺得好好睇囉.

睇完出黎都十一點幾,本來好應該送MoMo返屋企.
都諗起聽朝七點鐘要起身,佢又話唔洗我送,結果我就真係冇送,sorry呀!
諗返有D後悔,覺得自己好冇風度囉,人地講兩句唔洗送我就真係唔送.
望到58X經過時,我真係有衝動想即刻上返車......

不過點到好,無聊既日子裡面難得一日有人肯陪我做左兩件我想做既事.
多謝MoMo~

>>April 10, 2005 at 5:56:33 PM GMT+8

2005 年 4 月 7 日 星期四 【晴】

I scored a 51% on the "How Hong Kong Are You?" Quizie! What about you?

51%?
我嫌高添啦,不嬲都唔覺得自己似香港人.
或者的確只係我自己以為啦......

>>April 10, 2005 at 6:00:52 PM GMT+8