2004 年 5 月 20 日 星期四 【雨】

上完BDA諗住搵Vincy問野， 點知搵唔到佢呀， 攪到想問既野改左問咁岩係Department既Johnny！ 今日既EEMLecture比起平時上既人數差唔多， 可能的人溫晒書啦， 但我就因為唔想溫書， 所以走左去上呢一堂！ 而今堂EEM係教晒書之後就玩一個“團隊角色”既分析， 而個分析係之前已經玩過， 個陣個結果就唔記得啦， 而今次個結果顯示我係一個“媬姆”！ 跟住堂MAFSeminar就只係得八個人上咋， 但係今堂的數好快就講晒， 唔駛個半鐘就可以放啦， Florence既堂都係第一次咋！ 夜晚冇乜點溫到書， 因為唔知點解好眼訓， 攪到連兩套電視大結局都冇睇到呀！

>>May 23, 2004 at 11:37:08 AM GMT+8

2004 年 5 月 19 日 星期三 【晴】

今日返左學校溫書， 因為尋日阿玉話要請我食飯嘛， 以我既性格梗係一定到啦！ 溫書溫到二點鐘， 我同阿玉就到Canteen食Tea！ 阿玉係拎食具期間成日拎留野， 睇黎阿玉都唔係好熟青衣IVE既佈局喎！ 再跟住返去圖書館繼續溫書， 但係可能食太飽既關係， 溫溫下係咁約魚！ 見自己有的眼訓， 係咁出去圖書館外面行黎行去， 不過好似冇乜幫助！ 過左一陣Carmen又叫我去Tea， 我見冇乜心機溫落去， 又去一去Canteen坐下， 而Carmen今日又請我食野， 真係多謝晒！ 食完再上去圖書館再溫， 不過就冇乜精神係咁訓， 所以都係返屋企啦！

>>May 20, 2004 at 1:46:26 PM GMT+8

2004 年 5 月 18 日 星期二 【雨】

今日要英文Present呀， 咁就約左的組員係九點鐘返到學校準備下啦， 不過有的組員好遲先到啦！ 準備到九點十， 大家都要去A406上堂， 但係我地成組人都遲左啦！ 由於之前的人話Susan會睇住我地Present， 所以入去之前都有的驚， 但入到去見到Susan要同另外一班做Present， 係呢個時間就定左好多啦！ 不過Present個陣就有的唔係咁順， 而且仲成日都冇望James， 總之今次Present得唔好啦！ 上完堂就再睇埋EEM上次個Test既分， 發現個分比我預期中差左少少咁啦， 但有的同學既分就好似比平時低左好多咁， 跟住個個同學都話Vincy改卷好手緊， 咁我應唔應該開心好呢？ 今日堂SPM好快就落堂啦， 由於約左人食飯， 咁就冇同其他同學仔食飯！ 今日就係學校Canteen食飯， 方便的IVE人， 因為Cherry要等上堂， 阿玉要係圖書館溫書， 濤哥要係學校Interview， 但係Celia就要由屋企搭車過黎啦！ 今日係Canteen叫左三個菜， 但係就有人話我冇叫“檸汁雞”， 下次係學校叫菜食都係問晒的人要乜先啦！ Celia今個暑假唔跟人去旅行， 因為佢話要上堂喎， 但係去旅行呢的時間唔係時時有架嘛， 其他識佢既人快的叫佢係呢個暑假去啦！ 食完飯就去左StudyRoom溫書， 但係就冇乜心機， 溫左一個鐘都冇就同Carmen去左長康間麥記食Tea， 今次Carmen請我食雪糕呀， 多謝晒呀！

>>May 19, 2004 at 12:59:37 PM GMT+8

2004 年 5 月 17 日 星期一 【晴】

經過各位組員既努力， 終於係下晝兩點半攪掂個EEMProject， 而且個效果都唔錯添呀！ 跟住各組員都去左Canteen食Tea， 我亦都叫埋今日黎青衣IVE溫書既阿玉一齊Tea！ 但係今日Canteen的野食比平時既質素差左， 原因係Kimmy同阿玉都中左招呀！ 之後同阿玉傾下傾下， 居然傾左去聽日約人係學校Canteen食飯， 不過聽日既食飯時間要到一點半呀， 因為我個陣先至放學嘛！

>>May 24, 2004 at 10:13:12 AM GMT+8

2004 年 5 月 16 日 星期日 【晴】

攪左成晚既EEM終於叫做有的野打左， 雖則唔係好多， 但我已經再無能為力再做落去啦！ 今朝上CBS個陣， Gaby一見到我就話我似HarryPotter， 咁我又有多人個新名啦！ 上完CBS， 我就同Carmen、Christina仲有Kimmy去左葵芳傾EEM， 雖然聽日要交呢份野， 但傾落去既感覺好似岩岩開始做咁， 如果唔係上星期有兩個Test， 相信呢個Project唔會最後一日都仲攪唔掂！ 放左學諗住印MAFNotes， 點知仲未Upload上WebCT！ 不幸既係我仲將的Notes印錯左， 攪到同學們聽日冇Notes用， 真係唔好意思呀！ 夜晚繼續個EEMProject， 不過個進度就好似好慢， 希望聽日唔駛趕啦！

>>May 18, 2004 at 11:56:26 AM GMT+8

2004 年 5 月 15 日 星期六 【酷熱】

本來今日諗住全日都係度做EEM份GroupProject， 但係因為尋日玩得太疲倦既關係， 攪到夜晚先至有心機做！ 夜晚係咁諗的Point應該點寫， 但係的Point就勁難作！ 而我今日先至知道我做個Part都幾多分既， 唔想令到佢地因為呢份Project而低分， 唯有努力咁做好的啦！

>>May 16, 2004 at 2:10:35 PM GMT+8

2004 年 5 月 14 日 星期五 【晴】

今朝早要TestBDA， 但係就訓到唔知醒， 差的遲到添呀！ 而個Test都做得叫做滿意， 但係當收完卷之後個個都係度討論個Test既內容， 而有的我又好似冇做過咁！ 聽聽埋埋已經知道有廿分一定冇左， 唯有之後考試小心的啦！ Test完就同Kimmy加埋阿Ling到麥記食Lunch， 而我同Kimmy就係咁散叫的汽水都薯條， 早知就買個餐唔駛煩咁多啦！ 經過兩個幾鐘頭同阿Ling既討論， 再加上係新都會見到Carmen、Christina同埋Vicky， 終於決定去BBQ呢個班會活動， 一齊係葵芳Join埋Helen一齊入屯門， 因為相信好難再有機會同咁大班人一齊再有呢的活動！ 今次BBQ出席者有我、Brian2、Carmen、Ceci、Cherry、Christina、Helen、Ivy、Leo、ManMan、Stanley、Vicky，同埋阿Ling， 但係Brian2、Ceci、Ivy、Stanley燒左一陣就去左進行竹戰， 其他人就係咁燒同埋燒， 直至到玩TruthOrDare先至成班坐埋一齊！ 呢個遊戲開頭我都幾旺， 係咁答問題， 但係其他人就覺得我唔係咁真話， 攪到冇人想再問我！ 而ManMan係呢個遊戲係咁揀Dare， 因為大家都想睇下ManMan既表演， 而ManMan亦表演得唔錯架！ 呢個遊戲完畢既時候亦係ManMan爆樽既時候， ManMan實在太犀利啦， 一轉個樽就爆左！ 同時間有的同學包括我都想係呢個時間走， 點知第一批就既就係同我一齊入屯門既同學， 都真係幾巧合喎！

>>July 23, 2004 at 3:56:48 AM GMT+8

2004 年 5 月 13 日 星期四 【雨】

今日可以係BDA既時候用電腦試SQL準備聽日個Test， 而我亦都做得幾滿意， 相信聽日個Test個應該問題不大！ 上MAF既時候由於Florence想早的放， 比我地成班同學有多的時間準備個Test， 所以全日講書都好趕， 攪到我都有的答案抄唔到， 真係“針冇兩頭利”呀！ 跟住就到左TestMAF既時候啦， 雖然今次個Test準備都叫充足， 但係收到份卷個陣都有的驚！ 當做到TimeValue個題既時候， 就唔係好明條題目想問乜， 只係諗到點做就點做， 希望呢題比我諗得岩啦！ 夜晚返到屋企只係睇過下BDA之前的SQLLab， 但係有的Lab點解要咁做既就始終唔明， 不過算啦， 因為個人好疲倦， 都係走去訓覺聽日先算啦！

>>May 16, 2004 at 3:29:18 AM GMT+8

2004 年 5 月 12 日 星期三 【酷熱】

今朝早返學校的FreeLab溫SQL， 點知一返到去就見到Leo、ManMan同Stanley正在努力中， 呢三位同學真係勤力啦！ 下晝上左去圖書館溫MAF， 而溫書既同學亦都多左Carmen、Kimmy同阿兜， 大家都對今次Test既範圍都有的唔明， 但經過各位同學既多次討論， 問題都開始迎刃而解， 再加上問過下Florence， 好多唔明既野都叫有的眉目啦！ 不過返屋企前發現左一個問題， 但係就冇人可以解答到我， 唔理啦， 博佢唔出啦， 如果聽日出既話先算啦！

>>May 13, 2004 at 11:12:53 PM GMT+8

2004 年 5 月 11 日 星期二 【酷熱】

今日既SPM本來要Discuss的Seminar Question， 但Belinda見我地好似冇人識的Question咁， 所以今日係呢堂Seminar好似上Lecture呀！ 可能係地方既問題， 覺得係課室上Lecture都幾好， 起碼個個同學都係度聽書！ 下晝係學校溫左同問左陣MAF， 覺得今次個Assesstment比上次容易， 希望個成績會好的啦！

>>May 12, 2004 at 12:43:11 PM GMT+8