2007 年 11 月 27 日 星期二 【微冷】

幾乎全日o係房，為3280 present同LAW report奮鬥，不停揭書打字
呢個烏克蘭present總係怪怪地，不過聽日pre喇，點都pre o左先啦

原來一日之內同咁多人chat過～～～


>>November 28, 2007 at 6:12:50 PM GMT+8

2007 年 11 月 26 日 星期一 【微冷】

收買人命o既八半2455 tuto，幾分鐘天才波present鳩吹後，全場釣魚
宿生都係唔適合上八半，八半tuto又眼訓又悶死，返房又即刻大覺訓

P.S. Week 13先o黎咁精彩，想讀返書，發覺讀極都讀唔完……

＊－＊－＊－＊－＊－＊－＊－＊－＊－＊－＊－＊－＊－＊－＊－＊

讀Law的Legal Executive梁安琪


律師蕭思江


大律師李永健


難怪我o地要竭力捍衛香港法治……

>>November 27, 2007 at 4:09:42 PM GMT+8

2007 年 11 月 25 日 星期日 【晴】

CHI考試，出去盡情爆肚，爆乜都得，結果出去唔知爆o左乜
3220結束，close book final exam隨時死人，o的theory超難記

GPA 3220 全家福


2455 paper做唔切，早知走埋最後o個節lecture，但係個腦一片空白
同時又要傾3280 present，以為烏克蘭好易做，傾傾下先發覺冇重心

>>November 26, 2007 at 3:44:10 PM GMT+8

2007 年 11 月 24 日 星期六 【晴】

Nelson帶隊3220 field trip，走訪老家深水埗，發掘豐富o既空間元素
由南昌站新區行返去舊區，原來仲有好多深水埗歷史小弟都未聽過

＊－＊－＊－＊－＊－＊－＊－＊－＊－＊－＊－＊－＊－＊－＊－＊

立法會港島區補選，敢唔敢輸賭？

1.誰是最低得票候選人？

2.港島區將有超過90個票站，有沒有候選人未能在所有票站都獲得最少一票？

＊－＊－＊－＊－＊－＊－＊－＊－＊－＊－＊－＊－＊－＊－＊－＊

2010世界盃歐洲區外圍賽抽籤結果

第1組：葡萄牙　瑞典　丹麥　匈牙利　阿爾巴尼亞　馬耳他
第2組：希臘　以色列　瑞士　摩爾多瓦　拉脫維亞　盧森堡
第3組：捷克　波蘭　北愛爾蘭　斯洛伐克　斯洛文尼亞　聖馬力諾
第4組：德國　俄羅斯　芬蘭　威爾斯　阿塞拜疆　列支敦士登
第5組：西班牙　土耳其　比利時　波斯尼亞　阿美尼亞　愛沙尼亞
第6組：克羅地亞　英格蘭　烏克蘭　白俄羅斯　哈薩克　安道爾
第7組：法國　羅馬尼亞　塞爾維亞　立陶宛　奧地利　法羅群島
第8組：意大利　保加利亞　愛爾蘭　塞浦路斯　格魯吉亞　黑山
第9組：荷蘭　蘇格蘭　挪威　馬其頓　冰島

>>November 25, 2007 at 6:34:10 PM GMT+8

2007 年 11 月 23 日 星期五 【晴】

同另一個Eric清理坪石o既banner同海報，酒樓裡面遲o的先
你o地都贏到開巷啦，唔使仲冷嘲熱諷嘛？佢o地真係好X煩

＊－＊－＊－＊－＊－＊－＊－＊－＊－＊－＊－＊－＊－＊

《政政足球隊本季首場超聯賽事精華及檢討》



2007-2008年度中大超級聯賽首戰，面對本組之種籽隊，系統工程及工程管理系(SEM)，他們過
去的表現在芸芸由學生組成的中大球隊中算一線尾二線頭，因此賽前目標先求不失，試探對方
底蘊才伺機進攻

政政隊排出陣容如下：
1.Eric(GK)　3.立爺(SW)　5.馬仔(RB)　23.奶誠(LB)　6.洪爺(CM)　13.Simon(CM)　21.Avan(CF)

估計雙方實力有一段距離，以不求大敗為目標，因此此子責任重大


洪爺都要回防頭搥解圍


又要同奶誠夾擊對手


進攻更加唔可以冇佢


不過，經過約10分鐘的交鋒後，發覺SEM並不如想像般厲害，我們甚至佔得中場優勢，只是仍
以穩守為先，大部分攻勢仍以Avan單打獨鬥和洪爺後上支援為主。SEM兩閘(尤其左閘)不夠集
中，轉身又慢，因此單箭頭Avan相應移到邊線以翼鋒姿態出現，試圖以速度爆破而且有成效，
令SEM禁區頂有點亂。終於，Avan一次右路突破，從底線變速避開敵衛殺入中路，地波傳給遠
柱的洪爺，洪爺控定後冷靜射向相反方向，在SEM一眾嘩然聲中，我們先開紀錄

始料不及地取得領先優勢，當然不會笨得立即死守，仍保持原有踢法，加強中場壓迫，不容對
方從容組織攻勢。不過，兩閘奶誠和馬仔仍有點慌張，一些可以慢慢處理的波都大腳踢走，這
雖然安全，但有信心的話可以讓己方控球久一點

有佢一夫當關，小弟非常放心……除了有次在自己禁區邊扭過對手


中場休息，大家面授機宜


帶著一球優勢結束上半場，洪爺居功至偉，助攻助守，出現在球場每個角落，只是擔心他的體
力。立爺統領的一條防線亦非常稱職，令我整個上半場其實相當空閒，只是可以再給自己一點
信心，以及硬朗一點

下半場保持相同戰術，後衛穩守，中前場繼續製造空位反擊。SEM下半場即加強壓力，初段便
狂攻，但攻勢經常在起腳前被瓦解，我們絕不吝嗇解圍。其實，我們被攻得有點亂，而且不時
被SEM前鋒輕易轉身，有時被迫以超技術攔截，立爺最終要吃黃牌

Avan都要指揮隊友守角球


洪爺更加同對手糾纏到自己底線


小弟工作其實同上半場冇乜大分別


終於一次，立爺被對手以身型強力壓過，殺入禁區單刀怒射(單刀做乜要怒射？)，幸好小弟指
尖碰到皮球，再彈楣高出，但後防已響起警號。數分鐘後，禁區內瓦解對方攻勢後，遲遲未能
解圍，結果輪到馬仔在右閘位被壓過，立爺未及回防(皮球就是他腳下被拍甩)，再次單刀，終
於被射破十指關，志在必得的SEM追平

其實面對種籽隊SEM，雖然他們未有強陣出擊，但能迫和取得1分已算有交代，可是洪爺實在帶
給我們太多驚喜。另一位要讚的是奶誠，他從慣常的右閘轉踢左閘，下半場穩健了很多，凍結
對方右路攻勢之餘，還敢於引球出擊，反客為主。再於左路進攻，帶到對方K角位附近，突然
傳出直線穿過兩個守衛給早在底線等待的洪爺，洪爺沿底線直闖門前，趁門將漏出大大個近柱
位，再度怒射破網，失守後數分鐘，迅即再度超前

奶誠下半場鎮守左路防線，滴水不漏


下半場後段，是時候刻意墮後，但防守中場突然消失，Simon有點輕出，洪爺又經常到閘位支援
兩閘，Avan留守前線，令立爺有時孤軍作戰，幸好尚算頂得住，他們的遠射充無威脅。洪爺完
全替代了立爺上季的角色，不斷被撞擊，不斷被撻落地，球證連牌都冇張？最後階段，SEM企
圖高空轟炸，但立爺和洪爺防守上的制空力絕不下於敵軍。罰球反而更有威脅，禁區頂被罰，
對手射穿人牆，立爺突然伸腳，正當害怕他會否又令皮球改變方向彈入網，重演上季對TRA(翻
譯系)的烏龍球之際，所有人都碰不到皮球，皮球已飛到自己身前，幸好仍懂拍走皮球

清道夫立爺始終是防線的重心


最後的角球攻勢，被對方搶點成功，插水式批向遠柱，幸好越楣而過


最後的10分鐘終於捱過了，政政足球隊爆小冷，2比1擊敗種籽隊SEM，首戰即全取三分。其實
人人都是功臣，大家都打出超水準，值得贏取掌聲，當然最大功臣首推滿場飛兼梅開二度的洪
爺，沒有他，我們未必能取勝。馬仔首度亮相，雖然有點緊張，仍不過不失，末段獨力堵塞右
閘缺口

擊敗SEM其實不算甚麼，反而這隊SEM是輕敵之師，而且我們能擊敗SEM，其他球隊亦有能力打
敗我們，組內仍有統計(STA)、計算機科學(CSC)這兩隊出線競敵，與他們交鋒才是關鍵。不過
無論如何，我們率先取得三分，令D組形勢更見混亂，而且殺退強敵，有助建立信心，對往後
的比賽必有得益

同組，計算機科學(CSC)對人類學(ANT)，互交白卷，前者連勝斷纜


>>November 24, 2007 at 7:25:27 PM GMT+8

2007 年 11 月 22 日 星期四 【晴】



為答謝候選人、助選團一番辛勞，黨中央舉辦選後慰勞宴好好輕鬆
位處大埔滘o既小白鷺餐廳，幾個九東助選團成員約埋o係中大飛的

關教授一早o黎到


今晚超大棚人，黨內外300人聚首一堂，但係燒烤爐好似唔多夠使喎
點睇青口食得未？成日大批大批燒，轉頭俾支部幾條契弟搶哂o黎食
抽獎，乜九東次次都唔中o架？反而富亨、康怡成日中獎，仲有新西

呢餐黨魁o既！


港島區選民，見到乜o野數字？


壽星女Wendy (中)！


九東得阿鳴抽中獎


司馬文(Paul Zimmerman)都有獎！


Sam哥，你貓o左喇！


Kingsley


越睇越唔似未來大狀o既Jay


食就唔係食好多，唔夠爐，燒又o徙時間，都係周圍搵人影相留念啦
玩夠，影埋大合照就分隊散，真有頭有面，司機特登o係中大放低我

九東仝人！




>>November 24, 2007 at 4:55:01 PM GMT+8

2007 年 11 月 21 日 星期三 【晴】

悶爆o既3280 present，組組都pre得好悶，唔飲咖啡一定訓著
仲講人o地？下星期到我o地pre烏克蘭喇，依家先定到條flow

LAW 1050 present，原來我o地最後一組，present時間好似比預期長
莊生問問題又唔算太深，只係我o地準備未夠好o者，report寫好o的

完o左Thomas Yu，即時轉投Anson Chan！出灣仔聽工作人員briefing
唔係一般企街派單張o既義工，係做監察點票代理人(Counting Agent)
即係點票期間，代候選人o係點票站監察點票過程，同埋爭拗問題票

一入去，唔明點解AuFei會搵我，入面個個都專業人士！得我係學生
經歷坪石一役，似監察投票代理人(Polling Agent)好玩o的，冇所謂啦

P.S.港島區選民，12月2日，請投7號陳方安生一票！

＊－＊－＊－＊－＊－＊－＊－＊－＊－＊－＊－＊－＊－＊－＊

咎由自取，死不足惜！



>>November 23, 2007 at 3:35:00 AM GMT+8

2007 年 11 月 20 日 星期二 【晴】

同Yr 1 Barnett傾聽日LAW 1050 present，輾轉o係CC Can樓上傾
Law Present從來都係苦差，而且個case太無聊，真係冇乜動力



返o黎中大舉行，再次得閒睇比賽，中大政辯打正方，港大粵辯反方
阿女Christina開辯！不過總係覺得政辯未中point，最終1比5連輸三屆

＊－＊－＊－＊－＊－＊－＊－＊－＊－＊－＊－＊－＊－＊－＊

《有危自有機，不必灰心(後)》

眾人擔心泛民的地區基業日漸被左派蠶食之際，我們應該慶幸，公民黨成長於泛民風雨飄搖之
時，因為如果像民主黨般一開始便太順境，就可能不懂應付將來的逆境，倒不如一開始便身處
劣勢，在這環境下建立的基業才夠紮實

毫無疑問，泛民處於歷來最艱苦，形勢的凶險的時刻。可是，左派大舉佔據區議會，是否代表
他們就可平步青雲，從此以君臨天下之勢主宰政局？又或者說，泛民是否真的沒法子再向左派
上演帝國反擊戰？

泛民在區議會，即使四年前得七一效應之助，其實一直都處於弱勢，是少數派；但看看早被廢
除的市政局和區域市政局，原來當年泛民的表現優於左派和其他建制派，立法會更不消多提。
為何這樣？香港一直有一批立法會投票給泛民，但認為區議會沒意義，因此甚少出來投票選區
議員的泛民支持者，他們在當年市政局選舉亦多肯出來投票，令左派難以單憑鐵票逞強，一直
屈居泛民之後

政府表示會繼續讓區議會掌握更多參與地區管理的權力，這正是我想指出的「有危自有機」。
只要給區議會真正充權，單靠地吃喝玩樂就未必足以拉攏人心，因為區議員不再單純吹水，而
要真正肩負管理社區的責任，選民的期望自然有所改變。這不就是強左派所難嗎？因為他們只
懂搞網絡，搞地區動員，就是不懂用自己的腦袋為社區出謀獻策，而非向他人「爭取」！

左派搶下大量議席，難道他們就不用花心機保住這些席位嗎？我們的「機」，正正是趁區議會
逐步擴權，讓左派向世人展示他們除了精於建立網絡，還是否精於運用權力做一些關係社區的
決定。泛民要鬥腦筋，難道會繼續陷於劣勢嗎？

我不敢講，泛民鬥出主意，一定比左派優勝，但既然將來存在區議會職能轉變的未知之數，實
在不應過早妄言自己大勢已去。當然，泛民迫切需要痛定思痛，但總不應太心灰

至少，我絕不會心灰

>>November 24, 2007 at 4:39:31 PM GMT+8

2007 年 11 月 19 日 星期一 【晴】

返坪石謝票，1386票雖然未如理想，但係始終代表選民o既信任
企o係天橋面向夕陽，感到新的旅程即將展開，未來要加倍努力

＊－＊－＊－＊－＊－＊－＊－＊－＊－＊－＊－＊－＊－＊

《有危自有機，不必灰心(前)》

這可能是小弟在這裡筆耕以來，篇幅最(冗)長的文章……

從議席數目和氣勢上，「泛民區選大敗」是沒太多人反對的解讀。民主黨、民協俱大敗，民主
黨議席跌破60大關，第二梯隊張賢登、陳家偉被擊倒，九龍各區樁腳幾近被全面摧毀；民協連
深水埗大本營都被左派攻陷，弄得主席馮檢基都要謝罪下台

九龍東素來是左派根據地，但左派在九龍東的戰績，不但大勝，而且大勝得非常恐怖。紮根彩
虹八年的獨立民主派劉家華，竟然被民建聯27歲新人莫健榮以逾千票之差擊敗，左派力守的坪
石，在雙方都改派新人出戰下，票差由不足50票一下子拉到1300票

如此一來，從橫頭磡(黎榮浩)、黃大仙(林文輝)、鑽石山(簡志豪及蔡六乘)、彩虹(莫健榮)、牛
池灣(何賢輝)、坪石(陳百里)、啟業(施能熊)、麗晶(潘進源)、牛頭角(陳國華)，直到觀塘中心
(陳華裕)，龍翔道和觀塘道這兩條九龍東主要幹道，沿線而被民建聯和隱形左派全面佔據！泛
民唯一保得住的地帶只有彩雲三個區(前綫、民主黨、社民連各一)，但再往山上走，「順」字
開頭的地區，又係左派地帶！小弟只能用「赤化」形容九龍東的佈局(我們辦事處恰恰位處此地
帶的正中心)

新政黨，社民連和公民黨的戰績都不理想，社民連派30人只得6人勝選，不少新人以頗低的得票
落選，而公民黨派42人只得8人當選，甚至有立法會議員譚香文落選。表面看，公民黨首次出征
未如理想，但平心而論，公民黨的表現並非太差，始終我們創黨時間尚短，黨內有選舉經驗的
人少之又少，在資源、人力、動員力和經驗均遠遜於對手下，部分選區只以數百票之差落敗，
已經有所交代(當然，九龍東全軍覆沒是意料之外)

Phillip說得對，選輸一兩次選舉不算甚麼，最重要是吸取教訓，調整策略將來再戰。這次敗選，
最低限度給我們親眼見識到，左派和其他保守勢力是怎樣組織鐵票，選舉時一次過動員出來投
票，這正是我們不屑，但又一定要做的步驟。於我而言，經歷區選一役，區議會並非地區工作
之爭，是動員能力之爭

老實說，理性的人其實不應在投票選區議員，因為民主選舉的意義，在於競逐公權力的人，必
須得到人民以選票授權，才可得到公權力，誰天下間誰人不知區議員其實乜權都冇？幫長者申
請生果金，幫長者登記換智能身分證，幫居民爭取綠燈延長兩秒，這些所謂「地區工作」，何
須每四年選一個人幫你做？非區議員就不能幫街坊寫信去運輸署(或者，街坊親自去信)？區議
員沒實權，人所共知，但作為「樁腳」卻具有重大的戰略意義，又有政府給予資源，協助黨擴
充地盤，因此政黨才群起爭奪議席

今屆前往投票的，仍然是年紀較大的為主，尤以公屋選區為甚。小弟無意製造階級分化，但小
弟發覺即使你對社區有多少真知灼見，政綱如何鋪排，選民根本看不明！左派和政府不斷強調
區議會選舉要看候選人的地區工作而非政治立場，但稍為複雜的地區工作，選民根本不願意花
時間理會、消化，試問我們提出透過拆清八的士站和搬小巴總站，可以怎樣催谷清八商舖出租
率和帶動區內就業，多少選民願意花時間理解這份本來已經圖多過字的政綱？小弟亦無意批評
香港人，但很多香港人真的懶得思考，費事為他們寫政綱，他們都不屑一顧

到頭來，當選民原來並不留意政綱，政黨能令多少支持者出來投下「無聊」的一票，就成了關
鍵：論動員力，泛民根本不可能跟左派相提並論。於是，左派憑所謂「地區工作」－飲飲食食
－建立牢不可破的街坊網絡，輕易把絞盡腦汁才砌出來的政綱擊潰

(待續)

>>November 20, 2007 at 7:37:22 PM GMT+8

2007 年 11 月 18 日 星期日 【晴】

星期六開始，連踩39個鐘，中間得個幾鐘訓覺時間，終於踩完
03:30終於有覺好訓，但係無論CHI抑或Nelson，都完全集中唔到

>>November 20, 2007 at 4:43:29 AM GMT+8