2003 年 2 月 21 日 星期五 【晴】

Title: 舊地重遊

今日晏晝溫左陣書, 諗下好似好耐無踩過單車, 岩岩細佬又bump左條胎, 於是就出左去踩單車喇. 開頭踩左上大埔道, 好斜呀條路, 聽到隔離行過D車既摩打都好似好辛苦甘. 其實我係想試下行下條徑口路, 睇下點樣可以行到落顯徑啦.

嘩!! 原來個條路真係好斜, 勁用力踩左個brake制, 搞到隻手都痛埋. 跟住本來想周圍踩下就算, 突然間想返博康睇下喎, 於是咪踩衡油去啦 !

踩到博康之後, 就即刻上博達(即係我住左成10年個度), 以前踩條斜路覺得好斜架, 依家一踩就踩到, 走左去以前樓下既球場 (我學識踢波就係係個度架喇). 得返幾個靚仔踢波, 以前逢星期六, 日都好多人踢架. 依家無咩人lu...

望返上舊屋, 對窗都仲係個幾對啡色框既窗, 都仲有部冷氣機突出黎, 但係已經唔咪我地個部啦(梗係). 望返對面, 唔知個鄰居搬左未呢?以前佢成日企係窗邊susu架, 諗返起都幾好笑...好似做戲甘, 真係有個波碌埋黎...不過同做戲唔同, 我無笑笑口甘俾返個波佢, 一來我坐係部單車度, 二來佢都唔咪BB, 自己行左過黎執...

跟住我落斜路, 以前成日衝落斜路(阿媽稱為"楂火箭", 梗係啦, 刺激嘛 ^^ )...依家唔會喇, 我識brake住喇(我驚煞唔切掣...畢竟大個喇, 知驚喇) 跟住係博智下面兜左個圈, 因為以前成日覺得個度好陰森, 今次無甘覺得, 因為下面既老人院多左好多公公婆婆......然後就行返落去博逸落大排檔條斜路, 細個成日覺得個度好斜, 我會係斜波頂抖啖氣先衝...試過驚得滯唔記得拉手掣, 衝到仆低左, 仲撞到人添....依家發覺唔咪好斜(應該係唔斜), 一 陣就行完 ha~~

行返去街市出面既舖頭, 公信既哥哥變左叔叔, 永明既老闆生左好多白頭髮...以前既節拍變左大昌, 空既生果舖變左裕記...不過7仔都仲係7仔 (但係多左利嘉兒叫你買高鈣奶飲), 以前"質"都"質"唔入既凱施勁多空凳, 馬炳耀雖然成日都無人入去睇佢(因為佢係醫生), 但係仲係度...

相信問番依家既小街坊, 無咩人會記得杏花閣餐廳, KK超市,中南銀行, 個個月交租既辦事處, 同埋細個等校車既橋底(o個度媽咪教識我有種叫"怕醜草"既草, 好得意架 ^^ )...依家只係淨返個馬鐵地盤....因為一齊都變了...

>>June 7, 2005 at 5:17:46 PM GMT+8

2003 年 2 月 7 日 星期五 【陰】

Title: "繩"之於法

今日返工呢, 又有好笑野發生......事緣呢, 公司成日都話我地坐o係度做野o既時候都要掛住張職員證, 但係一直以黎都無咩人會理究竟有無人掛到, 通常D monitor抄完我地o既職員number(用黎confirm我地present)之後就會叫我地收埋佢, 所以通常十個有六七個都唔會掛o既, 而我自己就淨係有en做先會掛o既(習慣黎架)......

但係呢, 今日做做下野突然間monitor話要睇下D人有無掛職員證, 無掛o個D要俾人抄低職員number(抄完D number要黎做咩??我諗遲D會有用掛, 用黎做咩?你諗下啦~). 跟住我坐o個行o個D同事就個個都好狼狽, 事關好多人都無帶到掛batch條繩......o甘點算好呢? D人就周圍搵D可以掛得起張證o既野啦, 好似"發達通"D證件套呀, 有人儸衛衣頂帽條繩綁住呀, 甚至唔知o係邊到搵到條西餅絲帶都有......真係搞笑. 於是之後有個同事就講笑o甘話:"我放工之後請你食打西餅丫, 我要條絲帶得喇 ! " ^^

>>June 7, 2005 at 5:19:51 PM GMT+8

2003 年 1 月 24 日 星期五 【微雨】

Title : 估領袖

我返工o個度呢, 呢排除左平時要聽電話外, 無電話o既時候仲要玩下估領袖...非常刺激, 真係寓工作於娛樂呀...

不過呢, 呢個遊戲就唔咪個個想玩, 因為輸左唔單只要罰, 仲分分鐘無得撈. 其實呢, 我地平時如果唔駛聽電話o個時係非常得閒架, 咁無野做時我地可以點呢? 如果同friend一齊坐咪可以傾計囉; 如果無friend o係身邊咪同D唔識o既同事傾囉(我成日都係咁架喇); 再唔咪可以揀閉目養神, 甚至"嗑"一陣都得 (不過記得聽電話, 因為無得揀聽唔聽o既)

但係依家無呢支歌仔唱喇, 因為每次有唔同o既monitor走黎走去check住呀. 見到訓覺就抄低職員number, 所以我地依家返工都眼仔碌碌, 非常專心...咁如果悶得滯想訓咁點呀?咪估下今次邊個係領袖, 話俾隔離正訓到流緊口水既同事聽: "喂, 殺到喇..."

>>June 7, 2005 at 5:22:02 PM GMT+8

2003 年 1 月 17 日 星期五 【微雨】

Title: 諗得太多

諗野唔咪唔好, 有時如果可以做事之前諗多D, 咁錯可以錯少D; 有時如果對某D人o既人格諗多D, 咁可以俾人呃少D; 有時如果對身邊o既環境諗多D, 咁可以適應多D. 所以我成日諗野, 但係原來諗得少唔好, 諗得多都唔好. 其實我覺得"物極必反"呢句話好o岩, 奈何info唔夠位無寫到.

當要做一件事之前, 我會盡可能諗晒所有可能會出現既後果, 然後每個後果諗D應對既方法. 所以我去見工前會諗個interviewer將會問我咩問題, 然後每個問題諗D答案, 到時佢問到我咪唔駛手足無措囉.

當有人做左一件對我唔住既事, 我會諗下佢做既原因,可能: 1)佢俾人迫 2)佢有苦衷 3)佢唔當我係friend 4)佢做既時候唔知會對我唔住 5)佢做左自己都唔知 6)人地嫁禍俾佢...甚至 7)我自己都有責任...通常我對自己既friend都唔錯(起碼我覺得啦 ^^ ), 我唔會諗佢係有心既. 即使係, 我都唔信. 因為我覺得如果我對一個人好, 佢係唔會害我o既.

你睇到黎呢度, 或者你開始/已經問: "呢個世界D事真係會咁'盡如人意'咩?"問得好!! 或者我開始明白點解以前o既女朋友會同我講: "同你一齊壓力好大", 因為如果佢做一D唔關我既事, 我就會佢開始唔鍾意我...佢同另一個男仔傾多幾句, 我就會諗佢係咪變左心...有時諗得太多真係唔好...

>>June 7, 2005 at 5:23:53 PM GMT+8

2002 年 12 月 30 日 星期一 【乍雨乍晴】

Title: 一年大事回顧 (2002)

20/01 第一日返馬會

02/02 第一次收人工

28/04 第一次開始整homepage

07/06 第一次考到急救證書

08/07 第一日返金輝

07/08 收到AL成績,雖然BS(竟然)升到兩個grade, 但係於事無補.

28/08 第一次去台灣

16/09 第一次考車
第一日返SPACE

27/11 第一次考到車牌

25/12 第一次倒數聖誕

31/12 第一次寫大事回顧, 希望下年有得寫

01/01 第一眼見到欣宜.....

>>June 7, 2005 at 5:25:28 PM GMT+8

2002 年 11 月 28 日 星期四 【微雨】

Title: 街車王小匯前傳之駕駛考試

前兩日係我一個既難忘(其實係因為驚唔記得先至寫o係度~)又開心的一日, 因為o個日係我o既駕駛考試, 第二次考試...

o個朝我提早左30分鐘就報到(唔係因為想早D冷靜下自己,而係因為我搭早左一班車 > < )去到考試報到室, 梗係交本手冊輪隊先啦, 之後就坐下左. 我一面聽住MP3(係我o既習慣~), 一面 jep住香口膠(聽聞有助減壓), 等嗌名試車.

過左一陣, 職員叫我個名, 我就跟住考試組o既師傅出去檢查我架"考試車". o個部車o既編號是260, 我上了車後, 就楂住部車同師傅o係學院入面兜左個圈, 然後就返番去等候室喇.

再過左一陣, 當我又係聽緊MP3時, 職員又叫我名, 即係...我要考試喇 > <

到左考試車, 正諗住開車門時, 就見到阿Sir(考試主任)行緊過黎 (上次我o係車度等左5分鐘佢先黎呀,今次咁快既). 當我閂埋車門時, 阿Sir就開門上車. 我梗係即刻講:"阿Sir,早晨!" 阿Sir亦講返:"早晨!" (上次o個個阿Sir無應我架, 梗係啦, 對於一個即將會當你係仇人而你又要對佢大開殺戒既人, 點解要咁好禮貌呢?所以我覺得呢個阿Sir應該好好人既)

開車喇! 阿Sir叫我前面轉右出校門, 我問:"靠左定靠右呀?" (因為當時有兩條線轉右, 靠右行就一定係行易D個條線, 靠左就要聽天由命) 但係阿Sir話: "你自己決定行車線!" (大家唔好以為之後個考試係我決定點行呀, 只不過係我決定選邊條行車線, 出去之後仍然係佢決定考邊條考試線架. 我心諗: "死喇, 阿sir會認為我連行邊條線都要問, 會覺得我判斷力低wor, 早知唔問啦) 我記得師傅說過:"無講就點都行左呀!" 當然要乖乖靠左行啦!

駛出學院後, 阿Sir就話:"靠右轉右" 當時我要面對o既係旁邊o既兩條行車線, (如果岩岩係靠右, 咁我就淨係過隔離條線), o係短距離內由最左線駛到最右線, 而好多考生最弱的是轉線, 所以我諗: "玩野呀嘛?" 但係好在師傅講過有D阿Sir係咁樣做o既, 我就記住佢地話: "慢慢黎, 慢慢做, 如果多車咪最多停左車等D車走晒先囉!" 當時無車o係附近行緊, 所以我可以專注"表演"我o既轉線步驟. 行到最右線時, o個時好多車停o係燈位等轉右, 我要不停"開車停車", 其實呢個動作係有難度架, 因為開車時加油唔夠會"死火", 加油太大又會"飆前", 不過我"未驚過" ^^

順利轉右後, 就係愉翠苑出面o既巴士站, 好在無巴士"埋站", 我可以加速, 但係前面o既"學神"一時行得快, 一時行得慢, 我心諗: "減唔減波呢?" (註:減波會行得慢D, 如果要行得慢又唔減波, 部車會"打冷震"架) 當時正係猶疑之際, 已經去到較闊o既路面, 唔駛繼續跟住佢, 但因為我仲係諗緊剛才o既情況,cut左一半線先記得發出指揮燈,不過問題唔大. 差唔多到左讓路口,又要留意o個隻狗o係唔o係附近. (當時唔記得架, 好在無o係附近走出黎, 聽D師傅講話個隻狗識得睇"駕駛考試"個牌,分得出考試車架, 專揀有考試車先走出黎, 上次考o個時佢o係路邊度想走出黎又唔出, 差D俾佢累死...

...經過o個個彎後, 我就向威爾斯醫院(條路)進發,o個度無咩太大難度...我停左一個燈位後, 就左轉繼續我o既考試喇. 轉彎後, 就要遠望前面o既燈位, 因為它直接影響我需要調節o既速度. 我見到前面燈位開始行車, 但係師傅講過o個個燈位大約只能夠容許五架車駛過, 所以我唔可以行得太快, 因為我一定要o係o個度停車. 轉番綠燈, 我再開車喇. 前面係停車場出口, 師傅話要留意出口, 我當然望實個出口啦, 當時有架褓姆車等住轉出來, 但係o個個司機好好人, 無駛到出黎, 等我慢慢駛過, 大概係因為見到我係考緊試掛! (換轉係平時學緊o個陣, 我行到佢面前佢都會出黎呀! 學車行得慢到死丫嘛 !! )

前面係燈位, 當時係著緊綠燈o既, 我就慢慢駛過. 正當我部車就黎踏到白線時, 盞衰燈突然轉黃, 師傅講過應該停車架. 但係又講過如果貼到白線而前面無危險都過得wor. (死喇, 停唔停好呢? 但係停唔切喇, 過埋啦) 但係, 當我過左燈位轉彎後, 眼尾睄到阿Sir突然90度轉身向住我呢邊望 (死喇, 今次大鑊喇 >< )跟著係大直路, 正當我諗住岩岩o既事時, 發覺應該要"推高波"加速wor, 於是我就立即"推波棍", 點知又點推都推唔到 (唔咪掛, 點解推唔到既?...(唔得! 陣定D!) 好在最後都得!

然後最後都返到學院喇, 落車後返去等候室等儸成績. o係等候室入面, 見到好多人"肥佬", 我就越黎越驚喇...擴音器叫我名喇, 我入到運輸署間房入面儸成績, 他遞左份成績單俾我(咦?!咪係上次o個個?), 我接左同講聲"唔該"就出去喇. 我當然急不及待睇成績, 看到丙部(路試)一欄有一個"Pass"字(咦?唔咪眼花掛??)當我想再睇清楚,職員就要儸我張成績單. 又等左一陣, 一位師傅叫了我出去, 帶我去隔離間房, 我知道我得左喇!! 跟住佢同我推銷左D課程, 我"敷衍"佢就走左(其實D課程都幾有用, 不過好貴呀)

出左門口後, 當然要打電話返屋企報喜啦! 我聽到媽咪的聲音, 就話"媽咪, 唔好意思呀, 又要徙多你幾千蚊喇"o個邊傳黎o既係: "下?又衰左喇?"( 搞錯呀, 對個仔o甘無信心都有o既?)我就話"唔咪呀, 要幾千蚊買車俾我呀"跟著再講左一陣, 我就收線喇, 再打電話俾爸爸, 用了差唔多o既方法, 得到o既係"都話你啦..."我插嘴話"我得左喇!" 我爸爸即刻轉口話"都話你得架啦..."(又會轉得咁快o既,真係激死我 >< )

報完喜後, 我就搭巴士返SPACE, 我又"鈴"番MP3出黎, 耳筒傳來o既係未播完o既"大開眼戒"...

>>January 9, 2007 at 3:05:01 PM GMT+8

2002 年 11 月 1 日 星期五 【微雨】

Title: 登陸太空

呀))))))近一個星期突然間有很多野要做,令我覺得好大壓力同辛苦, 真係悲哀....

04-11 要開soci同philo既會
05-11 又要開soci會同埋Eng Test,之後又要返工
06-11 無得返工既話就要做功課
07-11 Accounting同Economics要補課..補足成個下晝
08-11 要排drama(之前仲要諗下點做喎),又要搞soci
09-11 預左搞soci架喇
10-11 又要返工
11-11 主菜喇!! Accounting Test同埋Account交功課
12-11 Soci Present (英文present >< )
13-11 又要返工
14-11 AA Drama Presentation呀
15-11 Econ交功課

咁多野堆埋兩個星期做晒, 搞到好似打仗咁, 行步路都行得好快咁, 依家好似唔係做緊"登陸諾曼第"喎!!

>>June 7, 2005 at 5:33:56 PM GMT+8

2002 年 9 月 6 日 星期五 【晴】

Title: 再次相逢

那天...很掛念你...是我不對...遷就你...你會孤獨嗎?...有沒有掛念我?...想問你...開始過...結束...

那天...沒看過你一眼...是我和你都不對...為什麼...你不孤獨...沒有掛念我...知道你...比從前快樂...結束...

那天...早知...你和我也長情...不應該發生...好朋友...恨你...也感激你...

>>June 7, 2005 at 5:36:17 PM GMT+8

2002 年 9 月 6 日 星期五 【晴】

Title: 故事的主角

呢三日睇左四本書, 好耐都未o係咁短o既時間睇咁多書喇...算係讀得幾快喇嘛(我唔係full-time reader哦 ^^)

無錯, 我鍾意睇佢寫o既書(我鍾意o既書我都睇得好快). 之前o係沙田圖書館只借到一兩本佢o既書, 但o個日卻一口氣o係荃灣圖書館竟然借到六本佢o既書(用盡左我D quota喇). 極速睇完三本後, 又o係沙田圖書館遇到三本(之前點解唔出現呢?)...依家有五本"存貨"o係我手上...嘻!!

我鍾意幻想自己係書裡面o既主角(好像有D不切實際), 佢傻傻地, 但有o既係機會, 而且多得很. 他多情, 但是唔濫情(專一嘛). 他o既佢對佢好, 佢o既她亦對他好...一切似乎係太完美喇, 完美得好似係存在於第二個空間, 但又好像是存在於這世上o既某一角, 只是唔係我遇到的空間裡...似乎是命中註定...到了最後一頁...醒來了...下一本書吧... ><

>>June 7, 2005 at 5:35:12 PM GMT+8

2002 年 7 月 20 日 星期六 【晴】

Title: 避風港

返左玩具店十幾日, 到依家都仲算開心, 因為一來有班好同事, 二來成日可以對住D玩具 (雖然個老板衰D, 成日話我走左去唔知邊度)

有一日聽到個客講: "丫, 我每次黎親睇玩具就會唔知點解會好開心架喇 ! " 我諗其實做人簡單就係我地自己既心靈避風港. 每個人o係社會之中努力拼搏, 為既其實只係搵兩餐, 但係為左呢兩餐我地要隱藏自己, 又要防備別人; 諗既功夫多, 做既功夫亦多. 但係每日放工返到屋企或者同自己既朋友一齊既時間, 呢D功夫就可以全部放低.

有時聽到身邊既人話做人做得唔開心, 我諗裡面有D人其實係因為諗得太多, 做得太多而令自己連自己想點都唔知. 有人話唔開心, 因為諗唔到辦法防備別人, 成日俾人呃. 有人話做人好悶, 因為佢地想搵D更大既刺激黎麻醉自己唔好諗咁多. 有人話做人好辛苦, 因為佢地對自己期望太高.

但係人生短短幾十年, 開心又係咁過, 唔開心又係咁過. 點解要搞到咁唔開心呢? 俾人呃既人應該慶幸自己唔係呃人o個個;飲酒唱K麻醉唔到自己咩?做下運動, 打返場康樂棋都得架. 刺激唔駛大, 最緊要中. 鍾意做咩都可以, 駛鬼理人點睇咩; 對自己期望咁高做咩喎, 問下自己有無咁既能力先?有既話就恭喜晒, set高D都無問題.

>>June 7, 2005 at 5:37:57 PM GMT+8