2003 年 9 月 25 日 星期四 【微雨】

Title: K1000自由講

現時既電視連續劇的確能夠認真反映到現今社會對愛情既新觀念, 好似以前既 < 1號皇庭> , <妙手仁心> (其實都分唔到邊套打邊套, D人差唔多, 只不過係個角色唔同, 呢套係律師, o個套變左醫護人員咁大把)等入面所表現既畸形戀愛關係, 例如多角關係, 隨便既性關係等等. 收視每每都能夠創出佳績, 令普羅大眾都有茶餘飯後大談兩性關係既話題, 達到引人入"性"的效果.

電視劇既最新方向唔再只係局限係表現現實, 而係在於增加多D創意元素入劇情裡面. 好似近期做緊既 <英雄.刀.少年> 咁, 最近幾集繼有小順子同秉榮既情到濃時, 王大嫂對道揚起痰之外, 仲有格格同小五乾柴烈火之後繼而同居...編劇大佬/大姐可以將呢D現代元素加入古裝連續劇可謂令人又驚又喜, 簡直創意100分, 亦都可以睇得出佢地的確係攪盡腦汁, 不過個劇名稍嫌"娘"左少少, 建議改為 <情慾.都.少年> 較貼題.

>>May 8, 2005 at 3:47:50 PM GMT+8

2003 年 6 月 6 日 星期五 【雷雨】

Title: 時辰未到?!

你信唔信好人有好報, 惡人有惡報架? 你又相唔相信報應架? 聖經有講過如果你要人點對你, 你就要點對人. 佛家講過話人如果o係呢個世界做左D咩, 死後去到某一個地方就會有審判. 中國人有話: "若然未報, 時辰未到. " 我好相信呢D說話, 因此我做人對得住自己, 因為驚第時回望返現在o既自己時, 會面對唔到自己.

但係有D人就抱住"今朝有酒今朝醉"的心態去做人, 扮晒不羈浪子, 不斷放縱自己, 連道德都懶理, 為眼前的享樂放棄一切. o個D人究竟係因為自己擁有得太多想放棄一D野丫, 抑或覺得報應要到自己死後先來臨覺得無咩所謂, 或者根本唔信會有報應呢? 有時信不信由你, 通常大奸大惡既人下場多數都唔多好; 即使係死唔去, 都唔見得佢地活得開心. 可能呢D就係另一種的懲罰. 我無見過有大奸大惡既人擁有一個幸福家庭, 兒孫滿地, 日日弄兒為樂. 咁我想問呢D"道德放棄者"係咪想用自己o既命運去證明一下還是推翻一下呢?

希望呢個世界仲係恩怨分明, 賞罰分明.

>>April 28, 2005 at 2:25:25 PM GMT+8

2003 年 4 月 26 日 星期六 【微雨】

Title: 遲來的禮物

女孩與男孩分開快要一年. 她還清晰記得去年的生日, 酒店柔和的燈光, 優雅的格調, 精緻的擺設, 美妙的音樂, 醉人的美景----男孩特別預訂了一張倚靠落地玻璃的桌子, 坐在酒店餐廳的一角, 一雙影子照在玻璃的另一邊的海面上, 隨著海浪起舞. 雖然女孩已經記不起曾經吃過甚麼, 也許她一雙動人的眼眸禁不住停留在男孩的臉上, 但她卻記得那是一頓她認為是一生中最美味最開心的大餐 !

男孩送了一札色彩繽紛的鮮花給女孩, 有玫瑰, 鬱金香, 百合, 滿天星...活像一個小花園. 花蕾共有九十九個, 代表他們的愛長長久久, 真是羨煞旁人, 也是諷刺著自己的未來. 鮮花內還藏有一個小信封, 雖然它的顏色不比鮮花鮮艷, 但卻比鮮花顯眼, 因為那是男孩送給女孩的信.

女孩小心奕奕把信封打開的同時, 心裡卻很焦急, 巴不得立刻把時間調較到打開信封的時間. 女孩踏到鋼線的另一端, 一張美得不能再美的生日卡展現在女孩的眼前. 一對小男女互相依偎著, 兩片合一的白雲從他們的腦袋升起, 寫著"Happy Birthday with Forever Celebration". 圖畫是男孩親手畫的, 他們的戀愛亦是由男孩的雙手開始, 他的畫就是這麼能夠打動別人的心. 女孩仔細地打開生日卡, 卡裡傳來是一陣恐怖的聲音: "作死呀你 !! "

原來是一個回憶的夢...

恐怖的聲音來自眼鏡向兩邊翹起的刻薄男經理: "你又在睡覺?! "

" 不 !! 我正在構思剛才你吩咐我打字的文件應該怎樣排位." 女孩聰明地反駁.

" 你這蠢才! 我吩咐你打的文件, 你已經交給我了!! " 經理大發雷霆.

" 對不起, 我記錯了 ! 我剛才因為忘記了你其中一個appointment, 所以特地催眠了自己, 在腦海中搜尋那遺失的記憶. " 女孩又自以為很聰明.

" 那你想到了沒有?! " 經理粗魯地問.

" 哦, 經理您下午1時約了總經理到對面的酒店餐廳開會. " 女孩在偷望放在桌子下的經理約會冊.

" 奧, 我也差點忘記了, 今次算了吧 ! " 原來經理比女孩還要笨.

經理離開後, 女孩才敢深深的吁一口氣. 望望桌前的月曆, 女孩將"272"寫在今天的日期旁邊, 代表他們已經分開了第272天. 這272天的日子, 對女孩來說, 像過了272年, 甚至272世---這272天, 縱然他們工作的是同一間公司, 女孩沒見過男孩, 因為他們兩個部門的下班時間是不同的, 那管只是短短的30分鐘, 兩人也是緣慳一面. 女孩不敢特地等待男孩, 因為她怕男孩會更加嫌棄她. 明天是第273天, 也就是她生日.

" 只要他跟我說一聲'生日快樂'就夠了 ! " 女孩心想 .

女孩回到家才是10點多, 屋內寧靜得有點兒過份, 開啟了電視機.

"他會不會on air點歌給我慶祝呢?" 女孩忽然心想, 便立即飛奔到房內開啟了收音機. 收音機正播放深情DJ的談情節目, 女孩聽到一個個似曾相識的愛情故事, 驚覺原來自己與他已經經歷了那麼多. 時間一分一秒的過, 10點半, 11點, 11點半...12點 ...................................................12點半, 1點, 1點半, 2點, 2點半............女孩已經睡著了.......

女孩整天都沒精打采, 從醒來的一刻, 到上班, 到公司, 到正式工作...只有...

"鈴鈴..." "喂 ! "女孩充滿希望的接聽...

"哦...等等..." 女孩失望回應...

重覆又重覆...

"鈴鈴鈴..." 這次的鈴聲比其他來電特別不同, 因為它多了一下"鈴".

女孩的心再次燃燒起來, 深深地呼了一口氣, 但是鈴聲停了. 女孩看到她的好友提起電話, 因為每次女孩偷懶睡覺時, 好友都會替她代接電話.

"等等!! 它是我的!! "女孩語帶雙關. 好友亦放下聽筒.

"喂..."女孩興奮地接聽...

"哦..."又是一個失望.

女孩回到自己的坐位, 望望桌前的月曆, 女孩將"273"寫在今天的日期旁邊, 代表他們已經分開了第273天.

"不!! 我今天要等他下班, 即使偷望他一下也好! 算是自己送給自己的生日禮物 ! "女孩難得這麼堅定.

下班時間到了, 女孩飛奔到男孩工作的部門門口, 利用那30分鐘的時間替自己打扮一番. 雖然她不會讓男孩望到自己, 但也希望讓自己最美的一面看他.

5分鐘...

10分鐘...

15分鐘...

20分鐘...

25分鐘...

30分鐘過去了, 部門的門口亦開始出現下班的人潮, 由最初疏疏落落的一個兩個, 到高峰期的水洩不通人潮, 再回到疏疏落落的一個兩個, 到最後部門主管把大門鎖上.

"請問陳明去了哪裡?"女孩衝上前問主管.

"他呀?他今天沒上班呢! 好像是病了! " 主管友善地回答.

"謝謝您！"女孩失望的道謝, 已經不知是第幾個失望了.

她帶著失望的步伐, 搭上公司的接駁巴士回家了.

女孩連續天都沒精打采, 從醒來的一刻, 到上班, 到公司, 到正式工作, 到午飯時間, 到下班, 到回家, 到睡覺的一刻...

經理某天吩咐女孩下班後到他的辦公室, 因為她居住的大廈有住客染了肺炎, 礙於女孩對其他員工構成一定程度的染病風險, 所以經理要求女孩暫停工作十天.

女孩沒精打采的應承了, 並在公司的接駁巴士車站等候巴士. 女孩突然見到男孩在巴士站的對面走過. 雖然女孩很有衝動上前給從前親密過的他打個招呼...

"這是上天給我遲來的禮物, 我會好好的讓它原封不動. "

>>April 28, 2005 at 2:49:52 PM GMT+8

2003 年 4 月 11 日 星期五 【雷雨】

Title: 戀愛專家

愛, 是上天賜予動物的禮物; 談戀愛, 是上天賜予人類的禮物. 動物不懂談戀愛, 它們的愛在於傳宗接代; 人類也不是每個都懂談戀愛, 有些人視談戀愛為終身理想.

不是每個人都是戀愛專家, 不是談過戀愛的就是戀愛專家. 有些人談了多次戀愛, 還未懂甚麼是愛. 即使是戀愛專家, 也有分先天和後天. 先天戀愛專家是用"心"來談戀愛的, 後天戀愛專家是"腦"來談戀愛的.

非戀愛專家喜歡自己操縱別人的肉體, 喜歡將身邊的愛侶時時刻刻都攬在自己身邊. 他們不懂甚麼是體恤, 甚麼是關懷, 甚麼是體貼. 當他們的愛侶不在其身邊, 他們時時刻刻都怕 "一別成永抉". 於是, 他們的愛侶每個行為也得徵求他們的同意, 怕有一天愛侶的肉體在他們的操縱之外.

後天戀愛專家喜歡自己操縱別人的愛, 喜歡將身邊愛侶的愛玩弄於股掌之上. 他們懂得怎樣得到別人的愛, 卻不會付出自己的愛. 他們會為他們的"獵物"設計一個精彩的遊戲, 佈局奧妙. 令遊戲者與被遊戲者都有難忘的感覺. 當遊戲者達到某個目的, 也是遊戲結束的時候. 獎品是畢生難忘的痛苦.

先天戀愛專家喜歡自己連繫別人的愛, 喜歡將身邊愛侶的愛聯繫自己的愛. 他們懂得甚麼是體恤, 甚麼是關懷, 甚麼是體貼. 他們的愛天長地久, 無論兩個人身處何方, 兩顆心也能連在一起. 他們從心而愛, 隨心而行. 他們的愛不會終結, 即使百年歸老, 兩顆心也緊纏著一起. 獎品是畢生難忘的幸福.

感激我遇見.

你呢?你又是一個怎的戀愛專家?

>>April 28, 2005 at 2:52:06 PM GMT+8

2003 年 4 月 9 日 星期三 【陰】

Title: 聰明笨 "兔"

兔子上次輸給烏龜後很不服氣，憂鬱了數天。有一天，他終於驚醒了，決定向烏龜再次挑戰！兔子發出了挑戰信給烏龜，相約於有 "死亡賽道" 之稱的森林跑道決一高下。森林跑道之所以有 "死亡賽道" 之 "美譽" 是因為整條跑道的兩旁都種滿茂盛的樹木，曾經令很多參賽者在競逐時變得意志消沉。短短一分鐘的賽程，有些參賽者可能覺得自己已經跑了一天、十天、一個月、一年……甚至一生！有些參賽者因為抵不住那份孤獨感，會考慮利用身邊的樹木上吊自殺。而 "死亡賽道" 可怪之處並不在於其孤獨感，而是所有死者都是懂得飛的動物，包括千與千尋的烏鴉、飄零燕的燕子，甚至IQ博士的小吉，於是森林賽道更使人不寒而慄！

兔子今次選擇比賽於這條賽道上，很明顯是抱著 "不成功、便成仁" 的精神，而戰書上也刻有這六個大字。以兔子的為 "兔" ，他當然不會抱著 "成仁" 的心態啦！他只想利用這六個字來為自己增加一份孤高的感覺。他首先一大清早便拜訪了貓頭鷹，希望博士能傳授一些不睡的方法給他。可是，博士只說了 "顛倒眾生" 這四個字，說罷便用掃帚給他趕走了。

兔子的腦子圍著 "顛倒眾生" 這四個字想呀想，想呀想，一個人令他參透到箇中玄機──就是蝸牛先生。以下是兔子和蝸牛的對話：

" 蝸牛，蝸牛，我有事相求。" 兔子看似友善地說。

" 無事不登三寶殿，想說就說！" 蝸牛一貫刻薄地說，因為他經常被獵豹取笑，早已失去對別人的信任。

" 我想向你借一樣東西……" 兔子還沒有說完……

" 有甚麼可以借給你? 即使有，我回到家也要兩三個星期才可拿給你。而且，我也不會借給你的！" 蝸牛眼尾也沒有看他。

" 蝸牛兄，我要借的東西只有你才擁有。既然你不會義務借給我，那麼我們來一宗交易吧！" 兔子皮笑肉不笑地說。

" 即管說來聽聽！" 蝸牛似乎有些興趣。

" 好！那麼我就快人快語！你若肯借出你的殼給我，我便以後幫你拿食物回家，那麼你便不用每天出門找東西吃……" 兔子又未說完......

" 你當我是甚麼?殘廢的人嘛?即使我與你交易，甚麼保護我呢?" 蝸牛很憤怒。

" 你去的地方不會太多，我會在你走完一百米前交回你的身上。" 兔子很有信心。

" 算吧！我不會……" 這次輪到蝸牛未說完，兔子以迅雷不及掩耳的速度將蝸牛的殼搶去，消失於蝸牛的眼前，所需時間只是一秒。蝸牛還沒有走到警局報案，便被人類拿去作美食。

兔子三步當作兩步的走回家，突然醒覺起： "博士說要『顛倒眾生』，現在我已經拿到蝸牛的殼。若要『顛倒』的話，便要同時偷到烏龜的殼才能勝出。" 但兔子的身體太顯眼，而且不是偷竊能手，便靈機一動請了老鼠仔幫忙。

老鼠仔收了兔子一塊芝士的酬勞後，便到烏龜的家裡部署。當時烏龜睡得正甜，亦把龜殼放在旁邊。老鼠仔不費吹灰之力便把龜殼偷到兔子的手上，過程似乎太過完美……

比賽當天，兔子早了一小時到達比賽場地，並穿上他的超細碼必勝戰衣──龜殼和蝸牛殼各一個。由於兩個殼都太細小，兔子用了整整一小時才把戰衣穿上。他穿完以後，嚇見身邊有一位強壯的肌肉型男站在他的身旁，他只認得他的頭── 一副俊朗無比的烏龜頭！

一如以往，兔子還是一貫的驕傲，向烏龜投以傲氣的笑容。俊朗的烏龜頭還是一貫的誠懇......

在大象一記 "氣下通" 的聲音之後，比賽便開始。兔子首先跳出，觀眾早料到如此，並無震驚。但令他們被殺得措手不及的是，兔子像一尊佛像似的原封不動；相反，烏龜消失於各人的眼前，所需時間只是一秒。

"兔" 迷不斷聲嘶力竭地叫喚著 "兔仔，跑呀！" 他們似乎很著重這場比賽！兔子用盡全身的力氣跳呀跳、跳呀跳，使身影緩慢地消失於觀眾的眼前。 "兔" 迷亦似乎全的變了先知，把手上的彩票撕掉。

兔子不斷跳呀跳、跳呀跳，跳得全身力氣也耗盡。他停停、跳跳、停停、跳跳、停停、跳跳……但身旁的仍然是樹林。一分鐘的路程，兔子覺得好像已經走了一生、十生甚至一百生。他累得不能再動，便坐在一旁休息。一想到烏龜已經到達終點，那俊朗的烏龜頭露出一副殘酷的勝利笑容，兔子便萬念俱灰。兔子無計可施，便利用伸出來的雙臂，忍痛拔出他的兔毛，編織出一條世上最美的兔毛繩……

兔子的死訊傳出後，動物們除了悼念兔子外，亦驚覺 "死亡賽道" 的死者原來並不只是局限於懂得飛的動物。自此以後，動物們也嚇得不敢再踏足森林跑道……

　　" 顛倒眾生呀！你會變做第一個！" 貓頭鷹夢囈著……

>>April 28, 2005 at 3:09:59 PM GMT+8

2003 年 4 月 6 日 星期日 【陰】

Title: 屬於愚人的愚人節

　　四月一日係愚人節, 雖然唔咪話咩official既節日, 而過去既愚人節對於我黎講都無咩意義 (第一, 我都未到"愚人 "呢個咁神聖既級數；第二, 呢個節日都唔會有禮物收，第三, 都唔識點慶祝), 但係今年既愚人節似乎o係我身邊有幾件大野發生.

　　第一件就係零晨0014既時候就搵到一個好好好好(下刪1000個好)既女朋友仔啦！ 估唔到原來唔聲唔聲身邊出現左個傾慕自己既人都唔知...以前仲以為D女仔鍾意一個男仔會做晒我諗既野添, 點知原來自己錯喎...唔好講呢D住...今次我會對佢好好架喇, 因為佢真係好好架, 如果以後都係同佢一齊就好喇, 我相信我地會以後都會好好 ^^ 我相信以後的愚人節都會屬於我地兩個既周年紀念...一年...兩年...十年...廿年...都兩個白頭到老既時候都仲會互相捉弄對方, 兩個愚人梗要慶祝一下啦~

　　跟住就係收到"香港變疫埠"既消息啦, 嚇到D香港人鼻哥窿都無肉...聽到呢個消息之後, D香港人真係意料之內走晒去超市"搶"野喎,搶到好多野都無晒...但係有點唔咪好明呀 ! 就算香港變左做疫埠之後, 香港會無野賣既咩? 係咪香港會好似俾人隔離左咁連樹皮都唔入得口呢? 抑或會好似"宵禁"咁唔俾D人出街呢? 點解要去搶野買? 就算百佳執笠, 咁仲有惠康, 華潤, 士多, 街市啦, 點解無百佳就會無野買? 原來香港人已經愛上百佳喇 ^^ 恭喜晒, 香港人, 愚人節快樂 !! (特別係送俾依家屋企有8包10公斤米, 10罐豆豉鯪魚, 15條廁紙, 20罐餅乾, 同埋點食都食唔完既公仔麵既人)

　　最後就係哥哥唔係度既事啦, 初初聽到仲以為好似朝早惡作劇咁, 有人亂發放消息. 到李臻報新聞提要, 我同細佬見到佢"罕有地"抖啖氣先講, 以為係講哥哥, 點知一開口原來佢係講伊拉克打仗消息(haha...咁凝重做咩??), 講完先再講哥哥自殺的消息, 先信晒係真, 跟住收到king既電話問我係咪真, 我就話電視報左啦. 收線後立即同kk 3 line打俾何亨慰問下, 好彩何亨仲係談笑風生(不過其實佢唔咪哥哥喎~點解會去慰問佢呢?唔知呀~關心下都好~)...雖然我唔知哥哥做咩咁傻, 亦都唔鼓勵尋死去解決問題, 但係佢點都係一代巨星, 係呢度永遠懷念佢啦...

>>May 8, 2005 at 3:52:46 PM GMT+8

2003 年 3 月 28 日 星期五 【微雨】

Title: 肺炎的自白

各位好 ! 我係唔好話醫生都唔識講, 教授都唔知, 甚至連我自己都唔知自己叫咩名o既病菌. 我就犀利喇, 搞出一種叫"非典型肺炎"o既病, 嚇到D無膽到死香港人鼻哥窿都無肉. 我好開心有D人為左我連街都唔出, 覺都唔訓, 成日都掛念緊我；有D人一擇千金, 連成本1蚊, 售價100蚊o既口罩都買; 有D人仲搞笑, 搵D紗布呀, 爛鬼布黎扮口罩, 仲要成10幾蚊都照買, 只係因為班香港人驚得滯, 醒唔起自己好似傻仔甘, 好似搵個筲箕黎載水一樣, 仲以為會無事, 笑都笑爆我個嘴 ^^ . 香港政府點解無人多謝我促進內需, 令到D一毛不拔o既人都肯拎錢出黎消費呢??

今次出巡, 唔單止見到班香港人驚青到無得再驚青既樣, 仲遇到另一個朋友, 佢唔咪病菌, 而係一種病, 叫"心靈脆弱". 佢同我講, 話其實佢一早都o係度架喇, 不過無咩野俾佢出下黎玩之嘛. 今次見到我, 一齊出黎玩下, 睇下班無膽都無得再無膽o既香港人有幾狼狽.

ps. 不過, 我又發現有D叫醫護人員o既人類好勇敢o甘搵方法趕我走, 唔知點解食同一種米都有兩種o甘唔同o既人, D懦夫真係核突...

>>May 8, 2005 at 4:20:48 PM GMT+8

2003 年 3 月 16 日 星期日 【晴】

Title: 情深的一句

　　上個sem有一科人稱AA堂既Arts Appreciation既科, 好記得第一堂係要用Sharon作詞既 "打開蚊帳" 既英文版黎好似營火會甘介紹自己...仲要跳埋舞添 (自己諗點跳既) "I am Andrew, I am Andrew. How Are You? How Are You? Nice To Meet You, Nice To Meet You. Let's Be Friends. Let's Be Friends." 其實我覺得幾好玩, 因為我當好似幼稚園唱遊堂甘, 可以同D同學仔玩下都幾開心...

　　仲記得我地其中一個final-sem project係要present一篇love letter或者係love poem. 當我地聽到之後全部都話唔咪呀話, 我心諗 " 一來我未作過情信, 二來又要同人地分享下, 好鬼肉麻喎 ! " Sharon話同我地講唔駛驚作得唔好, 因為一篇有愛既文章就一定會好...我當然唔信啦...我D英文又唔咪咁好, 成日都詞不達意, 又唔識用英文押韻, 點會好丫...

到左人地present個陣, 雖然有D同學英文又讀唔正, 又唔咪好流暢, 但係都聽到大約佢地講D咩. 我唔知人地點睇我篇文呀, 不過有人地幾篇真係聽到好感動喎...原來愛係真係可以感染到人...無論你點詞不達意, 點唔 "浪漫" 都好, 總可以令人感受到...

今次有idea去寫呢篇文章係因為我個好朋友小龍, 佢話睇完我既"預知的結果"之後好有感覺. 其實我初初作既時候只係將我平時既感覺寫出黎, 都無諗過點樣去修飾下佢, 成日都覺得好似怪怪地, 又"垠"眼, 又唔咪甘感動, 只不過係想發洩下. 估唔到會有人感動, 我諗都要好感性先感動到(joking ^^ )...終於知道Sharon無呃我地 ^^

>>May 8, 2005 at 4:24:10 PM GMT+8

2003 年 3 月 13 日 星期四 【微雨】

Title : 交叉點

D人成日都講, 講到都差唔多無咩人再講, 因為講出黎都嫌你"俍", 但係我都想寫一次...人同人o係兩個唔同既地方出現, 相遇係一種緣份.就好似本來o係交叉兩端的兩個人, 因為緣份而慢慢接近, 最後相遇o係一點, 就係兩個人既相遇. 每對人既停留o係呢個交叉點既時間有長有短, 有D人可能得一眼既時間, 有D人可能有一年既時間, 有D人可能有一生既時間. 當然, 當我每次相識一個新既人既時候(無論係任何人都好), 我都想我同佢既交叉點係一世...

但係慢慢領會到, 我地因為某一種原因而相遇, 亦會因為某一種原因而分開...例如因為開學而識, 會因結業而散; 會因發悶而識, 亦會因唔再發悶而散...我地因為緣份而相識, 亦會因為緣份而分開...正如o係交叉點相遇後始終都要向前走向另一邊的兩端, 避不開, 亦防不勝防...所以要珍惜同每一個人相遇既機會...因為無野係必然... 無必然既相遇, 無必然既交流, 更加無必然既維繫...

(ps. 我同你因為悶而識, 記得每晚都o係同一部電腦等你online傾計, 去同一個網頁睇野, 玩一個無聊既占卜, 做一D無聊既事...曾經因為你的笑而笑過, 曾經因為我的笑而你笑過, 曾經因為你失意時而我支持過, 曾經因為你喊過而花盡心機去tum你...雖然與你素未謀面(起碼我未見過你), 但係我已經當左你係friend架喇...但係我諗我地應該唔會再會咁, 因為你唔再悶, 而我既感覺都變了.

>>June 7, 2005 at 5:11:07 PM GMT+8

2003 年 3 月 4 日 星期二 【雷雨】

Title: 是非不分

唔知呢, 幾時開始呢個香港無咩分大是大非, 就算一個人/一班人講既野係錯又好, 係岩又好......都唔緊要, 只要佢/佢地地位高D, 講得大聲D, 就叫做講得岩. 好似政府話要分期減公僕人工時, 雖然政府係有D做錯, 應該企硬少少一次過減, (邊有打工惡得過老闆架, 都係第一次見). 但係我都幾同情政府, 因為太多因素俾班公僕做籌碼. 不過仲好笑既係D議員同商人竟然話人分期我又分期, 要分期減綜緩, 分期加稅, 真係聽到都笑死人, 甘既野都諗得出, 分期付款咩, 等政府有錢先出綜緩啦, 得唔得??... 依家政府無錢嘛, D人成日覺得儸綜緩係應份甘, 減少少好似切左佢地D肉甘, 政府又唔咪前世欠左佢地...交稅就更加應份架啦, 小學生都知咩叫公民責任啦. 唔交稅個社會就會luplup亂, 個D人仲可以甘安心坐係都亂講野咩?唔好話出街啦, 坐係公司都俾人笠晒D錢啦, 甘咪"財散人安樂"囉...

D中國人"唔咪自己事, 一於好少理"既心態徹底呈現...都唔明D人讀甘耐書做咩...

>>June 7, 2005 at 5:13:04 PM GMT+8