2005 年 6 月 12 日 星期日 【晴】

昨天，長長的一天…
一早到了阿婆家拿粽，
因為約左七師妹，六師弟，九九八十一師妹同阿ken飲早茶﹗
七師妹，難怪你叫七個一皮啦@@
極之享受這個早茶，美味的~~
---------------------------------------
加油站福音班，
可以預備得更好，
不過上帝倒也補了我的不足，
在她們的問題中，
我也發覺了自己有很多地方可以有進步的地方，
很高興她們都願意返黎，
儘管只是兩個人﹗
---------------------------------------
音讀計，很高興我的組今次第三，
上次尾二架﹗
如果o個題十二門訓答o岩就贏埋呀，
巴多羅買呀，不是巴羅多買~~
我請了他們食雪糕，雪條，
他們好像很滿足的~~呵呵﹗
下次創世記，記得睇多d聖經呀﹗
要紮根於上帝的話語呀﹗
-----------------------------------------
馬拉松會議，
看到有很多問題、困難，
我們要留意的地方，
下星期還得再處理一些難搞的事﹗
要好好的祈禱~~

馬拉松會議後，
跟舒媚，他們談了半小時，
雖然只是半小時，
但是卻是非常寶貴的時間，
我了解大家的心情，困難，
你們坦誠的說出來，
謝謝你們對我，對舒媚的信任。
我們會盡力處理的，
即管放心考好你們的試，好嗎？

一個結束的祈禱，
我不想大家把不快的事帶回家，
即管把這些事交託神，
祂是我們的主，祂會為我們作主﹗

坦白說，我聽完大家的分享後，
心裏是沉重的，
整夜的腦海就是一個一個的畫面，
到今朝，我還是帶著這樣的心情回教會。
也不斷想有甚麼事可以改變現狀呢？﹗
放心的，這是好事，
我愛約團，也愛大家，
才會這樣，對嗎？
努力禱告~~~
---------------------------------------------------
梓晉：你提到的，我會留意，雖然我不覺得是這樣的，但謝謝你的提醒﹗

子僑：對不起，令你有bad feeling~~我也留意到我最近的防禦機能很active，好像昨天你用那兩個字形容我，我覺得被侮辱，所以我會反擊。嗯~~~但我會改的~~

>>June 12, 2005 at 8:09:38 AM GMT+8

2005 年 6 月 11 日 星期六 【晴】

打完篇波經，
我會再打另外一篇，
唔好投訴話好悶﹗
-------------------------------------
展鵬黎左，我地班同工去食lunch，
叫了山竹牛肉，
也叫了牛肉炒河，
強呀~~
打波，點解分隊次次都分成咁﹗
好明顯咸美頓係鬥唔贏馬力路斯的

Ada：我尋晚先去睇波，未有得寫，今日寫左啦﹗

阿鑾：想睇搵日一齊啦

梓晉：牛牛牛﹗

>>June 12, 2005 at 7:46:38 AM GMT+8

2005 年 6 月 11 日 星期六 【晴】

尋晚去左睇波，
去到o既時候，
打緊女甲，南華對福建，
見到楊教練呀~~
去到已經見到阿鋒，阿州，阿襪，阿沈，女人，吳卓佳，觀音同埋劉子，
之後過左一陣就見到埋倫倫，洋洋，梁英豪，
賊仔就好遲先到，可能去左辦案﹗
永倫就見到阿翁冇換衫

南華今次o既先發係阿鋒，劉子，觀音，洋洋同倫倫，
州州冇得打正選﹗~~
一開始已經好緊要，南華打出一段10:0，
倫倫8分，阿洋2分，
之後就到永倫打返一個11:0 o既攻勢，
鍾馬菲連入3球3分，阿香2分，
跟住冇耐鍾馬菲就兩犯，被換出左。
然後就係兩隊狂唔入，
潘志豪第一節最後一個攻勢搏到兩個罰球，
第一節17:12永倫領先~~
第一節，阿倫8分，阿洋4分，其餘南華無人入過波。
第一節阿洋d籃板超勁，同埋相當aggressive，勁呀﹗

第二節，不得不提阿襪，
佢出左應該唔夠一分鐘，
幾乎冇做過任何野，
出到黎，"咩"唔到位，搶唔到進攻籃板，
返到去防守，又搶唔到防守籃板，
仲比子浩搏埋and 1，
咁就換走左佢﹗
子浩一節入左8分呀﹗
呢節兩隊其他人都好平均，
冇人超過四分，
呢一節，阿州開齋啦，最後一秒入左球三分﹗
追到34:37

中場休息，見到有人幫阿洋紮住對腳，
佢好痛苦咁呀~~~希望佢快d好返啦

阿州第三節發力啦，
入左兩球三分，先係一球又係剩返一秒o既三分，
但係下一個攻勢就turnover，
再之後又射一球3分，又入埋﹗
呢節南華入左6球3分，
阿州兩球，阿倫一球，觀音一球，阿鋒一球，賊仔一球﹗
南華領先55:53

第四節開始超級緊張，
先係阿賊連入6分，
一球3分波，然後又一次攻勢，
永倫唔知邊個mark佢，
以為佢一定射三分，
點知佢扭過佢，然後搏埋and 1，
但係可能係連入6分的緣故，
發左狂咁係咁帶波扭波，
換來o既係兩三個turnover

然後到潘志豪發圍，入左9分
開始拉据o既局面。
無耐嘉耀就五犯﹗
阿州係咁扭波過人，搏左幾球罰球﹗
又入左球三分，
再搏埋潘志豪犯規，潘志豪都五犯啦
唔知係咪潘志豪出左場，
觀音好似冇左個目標咁，發夢咁o羅
有球空哂三分唔射，射左又比人block﹗

呢個時候，另一個姓潘o既人突然入左兩球關鍵球，
之前佢得兩分乍﹗
先入左球3分，返超前一分﹗
然後阿洋入左球，南華領先73:72，
重有一分鐘都唔夠，
永倫有個攻勢，如果唔入南華就好有機會贏，
結果潘浩賢o係呢個攻勢o既最後秒入左，
永倫領先74:73
跟住南華開波，阿倫踢左出界，
得返好少時間，即刻犯規，
阿香射二中一
永倫領先75:73，
得返8秒，
南華由阿洋射，零度位，都幾遠，
阿鋒執到籃板唔射，
交左比觀音，觀音唔敢射，
好近咁交左比左阿州，
阿州好似冇乜心理準備觀音會交，
所以射大力左~~~~
就咁輸左lu~~~

今日阿倫雖然有13分，
我諗佢腳傷未好返，
佢今日係有射下3分，有入波，
不過佢好少跳，又唔見佢爆入籃底，
雖然有時都幾個人主義，
但係佢又真係勁架喎
同埋今日佢都出得唔算好多~~
希望阿倫同阿洋快d好返啦~~

阿州：20分，4個3分波
阿倫：13分，3個3分波
阿洋：13分
阿賊：8分，2個3分波
阿鋒：6分，2個3分波
女人：5分
觀音：5分
劉子：2分

鬼佬：17分，4個3分波
阿豪：15分，1個3分波
阿勁：13分
阿香：10分，1個3分波
潘浩賢：7分
嘉耀：6分
楊子光：6分

>>June 11, 2005 at 12:03:50 PM GMT+8

2005 年 6 月 10 日 星期五 【晴】

尋日，又黎~~~
搞錯呀，煩死麼？﹗

今 晚去睇波啦，餓左兩個星期啦~~~
南華對永倫呀

尋日無食到牛呀，死啦~~~呵呵﹗
尋晚門訓補課，但係無時間食飯，
門訓時候食左兩條蕉，好味喎~~
之後食左一隻超級好味o既油雞脾，
重有一件格仔餅，荃灣好多呢d好野食呀~~

同阿慈傾過之後，決定買票睇女排，
睇8/7，無辦法呀，
雖然第一晚應該唔係最好睇，
但係第二、三日都唔得閒，
同埋波飛都貴，
第一晚平好多架~~
好~~而家訂飛先﹗

阿橙：唔得呀，好想捐呀~~

九九八十一師妹：好呀，好耐都冇据扒啦~~~

>>June 10, 2005 at 8:59:58 AM GMT+8

2005 年 6 月 9 日 星期四 【晴】

尋日同阿luen，高雞同橙橙食lunch，
去左綠兒島，我繼續我o既牛魔王大計，
綠兒島主要都係得黑椒牛扒飯(我唔食黑椒…)
一係就係日式牛肉飯，我都麻麻地﹗
所以就叫車仔麵，
本來諗住叫三個"送"都係牛架，
就係牛肚，牛腩同埋牛扁，
但係我唔知乜野係牛扁o羅…
我問阿luen，
阿luen居然答我：拍扁左o既牛肉﹗
最尾我都係冇叫到拍扁左o既牛肉，
我叫左牛肚，牛腩同蘿蔔
好後悔，因為d蘿蔔好難食﹗
--------------------------------------------
放工o係教會打波，
好癲呀，打左個幾兩個鐘冇停，
我尋晚本來十一點就落床訓，
但係手手腳腳太痛，
太腿係重災區，好似仲左幾粒子彈咁呀﹗
訓唔著呀，幾灰~~~
為左打波，重放棄埋pizza，
唔緊要~~~打波太正啦﹗
--------------------------------------------
頭先睇籃總個網頁，
出左今年超級工商盃d野啦，套票$150，
經過一輪計過度過之後都係唔去啦，
雖然極想睇，但係計過暑假會用比較多錢，
都係唔睇啦，頭幾日重要o係伊館，
伊館真係老遠~~~~
最尾兩日o係紅館打，但要返工，
頂多睇到16/7夜晚八點半o個場，
又唔知有冇港隊份，
算數~~~~~~~~~~~~~~~

ada：不如你send去我email啦，我icq收唔到file架﹗

橙橙：是的，有保證…

>>June 9, 2005 at 8:45:45 AM GMT+8

2005 年 6 月 8 日 星期三 【晴】

昨天嘛，
lunch去左秋田食，
食呢個燒汁牛扒飯，
變牛魔王係必然o既事~~
我又係牛，又係狼(郎)，
牛郎呀，諗起天鷹座o既牛郎星呀﹗
可能太耐無食過牛，
味道真係一流，
最好味就係連埋d肥肉~~~

夜晚阿毛叫我落元朗食飯，
同褟達明同埋一個叫阿毛o既學生，
(據稱佢係姓毛o既)
呢個"毛"字要高音，
即係"發毛" o個個音，
佢地話有興趣去行山班喎，
希望佢地多d機會聽福音啦~~~

頭先食左阿橙比請我食o既粽，
細細隻，但係好好味喎，
多謝橙橙~~~

鴻強：牛扒好味呀呵？

梓晉：我以前o係紐西蘭食好多牛架，好味架﹗有rib eye，fillet steak，rump steak……最好味係fillet steak，但係好貴呀，一塊仔要成幾十蚊港銀，未煮架喎﹗

emily：其實我覺得都幾好笑…呵呵﹗

銘子，松小姐：呵呵~~~唔識比反應你地tim

ada：首歌好難彈呀，重有呀，你唔係send首歌比我咩？

>>June 8, 2005 at 9:28:36 AM GMT+8

2005 年 6 月 7 日 星期二 【晴】

尋日返學之前去捐血，
點之失敗左，
血色素唔夠，
如果捐左血會貧血…
所以隔多兩個星期到先可以再試過…
護士小姐話叫我食多d牛肉，
後來我自己諗下，原來成幾個星期冇食過牛肉，
我呢兩個星期要係咁食牛，
變牛魔王先~~~
呵呵﹗
-------------------------------------------------------
去左基道睇書，
睇梁牧師o既一本書，
超級好睇~~
睇佢點回應其他人，
佢"O"人o既技術都好高超架﹗@@
--------------------------------------------------------
放假其實冇咩野想做，
查左陣經就去左彈canon，
都幾難彈架喎~~
唔，我諗我未必咁有恆心或者時間去練架啦，
睇下點啦﹗

>>June 7, 2005 at 8:39:19 AM GMT+8

2005 年 6 月 6 日 星期一 【晴】

尋晚同兩個老友去左仙跡岩飲野，吹水，
轉工王又顯功架，
佢好似轉左五份架啦播﹗
不過佢唔係亂轉o既，
大家都係講下工作，談談生活，
與老友吹水，好得無比﹗

以前在中學的日子，
和他們幾乎天天見面。

大學的日子，
我返香港時也見得很多。

我地出黎工作的日子，
最初還可以一個月見一兩次，
打下波，慶祝下生日。

最近一年的日子，
兩個月出黎一兩次已經不錯。
還要不要次次都到齊，
有一兩次出唔到黎，
隨時三四個月先見到一次﹗

年輕人，好好珍惜你們中學的日子，
珍惜你身邊的好朋友~~
-----------------------------------------------
見到咁多人留言，
個感覺好正~~~

梓晉：我有笑咩？我好似睇下係咪真係咁無聊乍嘛﹗

ada ：其實我覺得篇日記好好笑o羅﹗

銘子：要挽回我日記o既聲譽，唔可以成日比人話我日記悶嘛﹗

阿朱：下次留意下啦~~~

權仔：大家實唔想食啦，想一路望住我個樣嘛﹗

阿橙：下次同你食，我咪會咁講o羅…

阿鑾，阿毛：你們都有同感吧﹗可以稱佢地為批評王~~

>>June 6, 2005 at 11:24:44 AM GMT+8

2005 年 6 月 5 日 星期日 【晴】

我發覺同佢地食飯，
無論去到邊度都係好多野批評，
A話：嘩﹗十八蚊咁細碟？人地好大碟喎﹗
B話：我覺得比人扼錢﹗
C話：鹿兒島好味D喎﹗
D話：咁難食o既…
E話：好貴喎﹗
F話：都唔抵o既﹗
G話：D野食咁耐都未到架…
H話：個餐牌重覆o既，上面有燒鵝瀨，下面燒鵝瀨粉咪一樣
I 話：杯野飲咁細o既﹗
J話：呢間野好污糟...
@@@@@@@@@@@@@@

我就話：咁多不滿，下次唔好黎咪得o羅﹗
我又話：飯都係屋企香﹗

遲下佢地話到無野話，
可能會話：d侍應咁樣衰o既~~~~~

>>June 5, 2005 at 8:10:29 PM GMT+8

2005 年 6 月 5 日 星期日 【晴】

今朝寫左一段仔，
但係未寫完，而家再寫

活力崇拜家豪講道，
講雅各書，幾好聽呀，
又有得著~~
完左就等剪髮，
rocky仔都剪，
佢惟一靜到落黎o既時間，
就係剪髮，呵呵﹗
佢剪到成隻泡泡龍咁，但係又好睇喎﹗
-----------------------------------------------
之後就係成班人同鍾曉輝，超必慶祝生日，
我冇過到去，因為等o係另一邊食飯，
不過就有過去唱生日歌，
佢地好嘈呀~~~
之不過，我地都唔弱，
有人有好多冷笑話，
但係由simone一聲號令：鼓掌吧﹗
我地就拍哂手掌，成晚重覆左好多次，
笑到我傻左~~
----------------------------------------------------
A君：你食咩呀？
B君：XXXX飯啦，咁你又食咩呀？
A君：XXXX飯啦…
B君：你打電話啦﹗
A君：我打電話？尋日我打左啦喎…
B君：你尋日打左關我鬼事呀，我尋日都無份食﹗
A君：好啦，我鼓起勇氣打啦…
旁人：咪玩啦，打電話叫外賣之嘛，要幾有勇氣呀~~~又唔係叫你表白…
A君：咪嘈呀~~我要用把感性D o既聲打…
旁人：打去外賣，用感性o既聲打~~~想點﹗@@

>>June 5, 2005 at 3:05:08 PM GMT+8