2002 年 6 月 24 日 星期一 【晴】

今日要返學考中文Oral,都OK啦~個人短講既題目係"天無絕人之路?"如果呢句野係真既咁就好喇...而小組討論既題目就係"應唔應該係中,小學入面廢左中文書法?"其實我就百分之一百同意要廢左去既,因為呢樣野實在係太無聊同太廢喇,不過我又偏偏要話唔應該廢左去,真係幾假幾矛盾都有呀!!

考完就梗唔少得課後活動啦~今日又係去左同學屋企打牌...妖~呢期真係不適宜出征呀!今日又輸左成十幾蚊~不過唔緊要,賭仔格言:有賭未為輸!"下次一定要斬到佢地一頸血呀!!

今日我個二姑姐係美國返左黎,真係好耐無見過佢喇...再次見返面....Feel so Good~

>>June 25, 2002 at 12:23:57 AM GMT+8

2002 年 6 月 23 日 星期日 【晴】

今日無街出,留返係屋企...

好無聊呀!全日都係屋企,咁就唯有睇電視過日辰啦,今朝一早睇返上個禮拜既"Super Sunday",跟住食完野之後無耐又再訓過,訓醒都已經差不多6點喇...起身之後on下line又食晚飯喇,又係睇下電視咁到夜晚喇~真係無聊,不過算啦,考完試就當俾自己休息下啦....

其實心入面一直都有個問題:點解陳慧琳可以咁索既呢?頭先睇個個勁歌季選,佢今日個look好正呀!!黑衫黑褲兼露左一邊膊頭再配埋對大圈圈耳環...簡直睇到我如痴如醉...好期待睇佢個Concert呀!!!!!!

正歌推介:
願 林憶蓮

最美一幕 還未閉幕 最闊的路在塵世遠方
最好知己永在身旁 聽我講 我從不說謊

我想相聚 誰便再聚 我想歡樂便隨意去追
我想相信我做得對 想到人極疲累

我自信有日如願 縱使天高地厚
仍被我逆轉 假使一生會沒了沒完
總有日會如願

當結局未揭穿

>>June 24, 2002 at 12:00:59 AM GMT+8

2002 年 6 月 22 日 星期六 【晴】

今日約左一個好耐無見既舊同學Cathy出黎吹水同打牌,講起以前D同班同學,有D真係唔同晒,變晒質...以前最多都係食下煙,都唔係D咩大問題,但係而家竟然又fing頭,又隊草,又濫交...做咩事要攪到咁呢?點解可以咁唔珍惜自己架呢?雖然係無乜聯絡,但聽到自己以前D同學變成咁,真係有D感慨.....

其實做得朋友,就應該珍惜大家相處既時間啦...做咩要係度互相猜忌呢?你話我呢樣,我又話你個樣,咁又有咩意思先?多個朋友始終都係好過多個敵人既,第時真係可能要大家互相幫忙哩...如果朋友有缺點,而又唔係太過份既,咁咪包容下囉,唔駛下下去得咁盡既...

>>June 22, 2002 at 11:53:24 PM GMT+8

2002 年 6 月 21 日 星期五 【晴】

今日有開心,都有唔開心....

開心既係我早兩日遺失左朋友個個送俾我Cushion,今天竟然失而復得,真係high到上天花板呀~學校D校工都唔係撈野架!問佢個陣又話無,其實一直都係隔離個課室...拎左個Cushion過隔間個條友固然係賤啦!但呢個校工都好無水準囉,我拎走個Cushion個陣仲要問我:"你拎走左呀?",講到我好似搶佢D野咁....不過算啦,我心情好~~~呵呵~

不過....今日英格蘭輸呀!!!!真係跌爛我副con咁滯!奧雲入左第一球諗住好開心啦,就算入唔到第二球,死守都好啦~點知臨完上半場幾分鐘俾李華度入返球...呢球都算啦,因為真係幾靚,不過下半場朗拿甸奴個球,英格蘭個龍門施文要負好大責任囉~反應奇慢!!勁遲先跳呀!!傷左就換走佢呀嘛...而家英格蘭輸左....唉,好可惜呀!!!真係勁失望....

正歌推介:
心動 李曉培

有多久沒見你 以為你在那裡
原來就住在我心底 陪伴著我的呼吸
有多遠的距離 以為聞不到你的氣息
誰知道你背影這麼長 回頭就看到你

過去讓它過去 來不及 從頭喜歡你
白云 纏繞著藍天 如果不能夠永遠走在一起
也至少給我們懷念的勇氣 擁抱的權利
好讓你明白 我心動 的痕跡

總是想再見你 還試著打探你 消息
原來你就住在我的身體
守護我的回憶

>>June 21, 2002 at 11:43:54 PM GMT+8

2002 年 6 月 20 日 星期四 【雨】

終於都考完試喇,咁就當然要去盡情咁玩一玩啦~卒之最後都係去左黃大仙打麻雀,唔打由自可,一打就真係停唔到,由下晝大約3點到,一打就打到夜晚11點幾,大大話話都成8個鐘呀...真係好鬼癲~雖然係輸左幾廿蚊,不過每次同朋友打麻雀都會覺得好開心,係唔知點解架喎,就係一種開心既感覺!遲D真係要日日打呀!!

今日考Geography,都係唔係好得....都無野望架喇,只係希望阿sir睇左我寫左咁多版雞腸份上,俾多幾分我就好喇...查實而家都好眼訓,聽朝仲要考listening...都係早D訓啦,如果唔係唔夠精神聽日幻聽咁就唔係幾好啦~

唉.......個Cushion.......

>>June 21, 2002 at 1:08:29 AM GMT+8

2002 年 6 月 19 日 星期三 【雨】

遺失Cushion既心情仍未平復...
我覺得好慚愧...好對唔住送俾我個個朋友...
可能人心情唔好就會連運氣都唔好,今日考中史,十條入面淨係貼中左兩條...咁都算喇,但竟然做做下份卷隻眼勁痛,一陣之後隻眼好返D又肚痛,好辛苦先過左3粒鐘...最折墮既係今朝刷牙個陣支牙刷篤到D牙肉,當場痛到我標眼水...簡直係邪!

考埋聽日咋...雖然係極之眼訓,都要硬食啦,對住一D完全唔識既Geography,真係老鼠拉龜...繼續努力吧....

>>June 19, 2002 at 11:20:15 PM GMT+8

2002 年 6 月 18 日 星期二 【晴】

今日心情唔係幾好....

實在太大意喇!!我竟然將人地尋日先送俾我既Cushion漏低左係學校,之後仲要搵唔返,唔見埋...人地係尋日先俾我架咋!我自己都未望真呀!搵勻全校,問晒所有校工都話唔見...究竟係邊條粉腸拎走左呀...真係咩心機都無晒...

唉...意大利臨尾香...都唔知咩事...我都無心情再寫落去喇....

>>June 18, 2002 at 10:40:10 PM GMT+8

2002 年 6 月 17 日 星期一 【晴】

唉~今日份文學....小炒啦...溫左書都唔識既!!

今日lunch同兩個好耐無見既朋友食飯,講起好多係以前間學校讀書既野,真係好攪笑,特別係F.4,F.5呢兩年真係發生過好多野,開心或者唔開心既,而家都記得好清楚...不過,往事只能回味啦~

返到屋企又係溫書...到現時為止我諗我已經記左幾千個中文字入腦喇~~我諗仲爭唔係好多既....幾億字到啦...容乜易丫....大家都繼續支持我啦,ok?

>>June 17, 2002 at 11:01:28 PM GMT+8

2002 年 6 月 16 日 星期日 【雨】

風平浪靜既一日...

今日又係無出街,留左係屋企...當然又離唔開個樣野啦---溫書~~真係欲哭無淚...今日既進度都OK啦~我而家就向天發誓:星期四之後一定要活著VIVA!!!

今日世界盃兩場波都好好睇喎~特別係西班牙對愛爾蘭個場,打到十二碼個陣真係好緊張呀~西班牙個教練唔知點解臨尾要換走魯爾同摩連迪斯呢?真係睇到我一額汗...聽日巴西對比利時更加要睇呀!!

今日download左迪克與傻仔隻"咆哮2002",我覺得好好聽喎...特別係"他不愛我","至少還有你"同"心動",呢D好野當然要同大家分享啦,所以我已經擺左落"shared files" 度喇!

回覆張名:有關點樣成為扑濕既VIP會員,其實就咁既...我唔知喎~你知道之後就話我知啦!哈哈~~~~~~

>>June 16, 2002 at 11:09:53 PM GMT+8

2002 年 6 月 15 日 星期六 【晴】

原來今日係端午節,一早(其實都唔早)就俾屋企拜神燒野D濃煙攻醒左...

英格蘭好波~
估唔到連出線都危危乎,但係今日對住丹麥竟然贏左3:0,真係好Q出奇...以我所知丹麥唔係屎波架喎,佢地好似贏法國架嘛...英格蘭呢D唔知係咪叫遇強越強呢??不過點都好啦,英格蘭贏波一定有好多人好高興,佢地8強個陣好大機會會對住巴西,真係有D擔心,希望到時會再打好D啦~~

今日無出街,留左係屋企...本來諗住溫書架嘛,點知溫溫下又訓著左,中史既催眠能力真係得人驚,訓醒就食飯睇波喇,咩書都無讀過,係夜晚先溫左陣文學....諗起星期三星期四就真係心都寒埋...唔理喇~全力出擊文學呀!!

>>June 15, 2002 at 11:08:19 PM GMT+8