2003 年 1 月 5 日 星期日 【晴】

睇勁歌總選,個結果都OK啦...合理啦....最攪笑都係Juno拎"最佳改編歌"同"新人獎"個陣,全場噓聲震天,好抵死,唔知Juno係現場聽到有咩感覺呢....仲有...個個余文樂唱現場真係實在太難聽喇,好想打撚死佢!!!葉蒨文都有金曲,咁出年可能家燕姐都有喎!!!欣宜都做新人王啦~~~~~

陳慧琳做左"亞太區最受歡迎女歌星",意料中事啦....
個"最受歡迎女歌星"....邊個拎都無所謂啦,反正最實至名歸既陳慧琳都拎唔到~
不過我覺得陳慧琳已經昇華左喇,都做左最年青既傑出青年啦,仲志左呢D豬肉咩....
呢D先係福氣呀!!!我一定很愛你!!!!!!!!!繼續閃亮每一天呀~~~

有福氣既陳慧琳唱既有福氣

沒有花都 讓我擁抱 拖著落日自己去起舞
如沒聖母 聽我傾吐 買亦買到幸福番鹼泡
或我只需 獨個洗澡 掛念你或會洗去全無
然後著上 毛巾外套 疲倦讓我睡了再禱告

原來我已經 有福氣 天大地大大於心不死
懷念你一次便勞煩了天氣 港灣不禁也白雪紛飛

不要去羨慕 不要去妒忌
真的不想得到這福氣
美麗過的結局 美麗在回味
舊相片 曾一起 還有你

讓我關窗 又再洗澡 盼望泡沫再一次糊塗
來代替我 如泣像訴 誰來話我沒法過得好

忘了你 還有你 還愛你

>>January 6, 2003 at 2:07:05 AM GMT+8

2003 年 1 月 4 日 星期六 【晴】

家下係凌晨3點幾,岩岩吃完宵夜.....

今日係Ricky生日,下晝約左首領揀禮物
但係條死粉腸遲到,約佢545
佢敢死620先到....正仆街黎架!
丫....響新城市見到楊千嬅
好厚粉呀...又矮...條腿好短呀...唔掂~

揀左好耐之後,終於遲晒大到...除左主角Ricky之外
仲有老陰,大面,歐佬,Kitmy,Cherry,Chisty,Yoyo,首領同我
去到佢地已經坐低晒,仲吃晒咁滯,D野都凍晒Lu...
所以要再叫過其他野吃喇,不過都係唔飽....
新翠大排檔D野認真麻麻....
吃完之後,吹左好耐水,影下相咁囉...
再之後梗係有例牌節目吃糖水啦
跟住都散水架喇本來,不過送Ricky返屋企個陣
一路傾一路傾,傾到收唔到聲
於是又兩條友坐響新翠,11點幾傾到1點幾
最後都係要坐佢男朋友車返屋企.....

回覆張名:
轉玩排九呀?都好呀...不過你要俾D時間我學喎....
做咩又講sorry呀...sor咩ry呀...
係咩事根本就唔重要~
上年既事唔好再講啦,諗起都覺得無癮!!!
總之以後開心就係啦~

>>January 5, 2003 at 3:43:48 AM GMT+8

2003 年 1 月 3 日 星期五 【晴】

返學之前去左嘆早餐,嘆到10點幾....
之後先慢慢行去火車站,出到大埔再慢慢行返學校...
返到去岩岩好1115,坐低做左份閱讀理解
做左半個鐘,1145,鬆人~

下晝唔駛上Geog堂,又唔想返屋企
於是自己一個響沙田周圍行
行到累就坐下....都幾過癮呀~
自己鍾意想睇咩就睇咩~
好過同D自己唔熟又唔鍾意既人唱K啦!
橫掂我又唔係不甘寂寞.....挑~~

回覆張名:
係呀...新一年,都要祝你心想事成,溝返條正菜~
得架喇,A-Level呀嘛,我會讀既...真係會既....多謝你咁抬舉我喎,其實我唔係你想像中咁勁架咋,咪對我有咁高期望添呀!!
過去既野都唔好講喇,反正你地一定唔會明白我既感受,你個陣唔會明,而家唔會明,將來都唔會明,針唔拮到肉,係唔會知痛既....我都想學你話豁達D,不過事實係....已經豁達唔到喇~~我都認我同第一年F.6個陣唔同左架...無辦法,唔如意既事係上年發生太多喇,追都追唔返.....算吧啦,我硬係覺得你係唔知我講緊咩....
係呀....無咁friend呀....我上年開始已經覺架喇喎,我都唔知點解...我都唔奢望什麼"友誼永固",我唔覺得有野係可以永遠既~總之而家開心就得啦,最起碼知道大家都係有心人已經好夠~我都唔想我地淨係麻雀腳咁簡單~

>>January 4, 2003 at 2:59:46 AM GMT+8

2003 年 1 月 2 日 星期四 【晴】

Happy Birthday to You
Happy Birthday to You
Happy Birthday to KEI YIU
Happy Birthday to You....

今日係Kei Yiu生日呀,都無乜特別慶祝活動,淨係同佢夜晚出左新城市吹吹水咋~
傾左好耐下呀都....點幾先返屋企~
講左好多野呀....原來好多野都係唔講唔知~~~
佢20歲喇,真係睇住佢大~~
話時話,仲有3個月我都燒焦喇....

回覆阿心:
靚人影相梗係靚架啦~
咁既道理你都唔明???

>>January 3, 2003 at 2:29:11 AM GMT+8

2003 年 1 月 1 日 星期三 【晴】

1月1號完蛋日

又係無野做,又係留係屋企,又係諗下野咁.....
而家覺得自己愈來愈悲觀,諗野好多時都係諗左唔好個邊先....細個個陣我唔係咁架,再諗返起以前,其實我覺得自己由細到大都算幾好彩,雖則唔係含住金鎖匙出世,不過都叫做有屋住,有飽飯食,幸福過好多人架喇,有個都幾好既老豆老母,仲有個好錫自己既阿爺阿女麻添...讀小學個陣,成績都幾好架,雖然5,6年班個陣無1-4年班個陣咁勁,不過都叫中上偏上架,所以又順順利利咁入左間Band 1中學,難得係我唔係擺第一志願都入到喎,好多人擺做第一志願都入唔到架嘛....

讀左中學之後,成績唔叫好唔叫差啦,中規中矩咁,所以升班都唔係問題,而且我都唔係話要做最top個種....F.1,F.2都係咁樣,平平穩穩過左...F.3個陣,知道係6班F.3升5班F.4,不過都未驚過,明知一定Foul唔到我,到最後,一切都如我所願,入左自己揀既文科,讀到自己揀個8科....

升左F.4之後,就開始衰喇....讀8科,淨係中文同英文合格,都算喇...但係唔知點解愈來愈曳,愈來愈大膽,上堂差不多堂堂訓,唔訓就玩,尤其係Maths堂,玩都癲晒,操行又唔多好,個陣有D擔心要Repeat架...不過最後又符符碌碌升到喎...升左F.5,同F.4一樣,都係咁玩,一D要會考既意識都無,一直都無溫過書,考Mock個陣都無讀過,唯一好左既係玩得無咁癲囉.....到左考會考之前幾日先肯讀下,我仲記得考Econ係完全無讀過咁去考,做個陣都諗住死硬架喇,完全唔識做,都預左會Fail.....考完成個會考之後諗住自己10分8分左右,但係到左放榜,又唔係喎,Full Cert不特止,仲夠分升F.6喎,真係High到死咁滯....

其實除左係12歲個年聖誕之外,係我18歲之前既童年,都算係幾開心,幾滿足.....好想回到過去.....

18歲之後,一塌糊塗,失敗.......

回覆阿包同阿心:
做咩唧阿包你?家下唔俾人黎留言架咩??阿心唔好理佢,黎多D呀~~~
原來Cherry得閒個陣就會屙屎既......

>>January 2, 2003 at 3:46:29 AM GMT+8

2002 年 12 月 31 日 星期二 【晴】

12月31號,大除夕,2002年最後一日...
而家9點零鐘,仲有3個鐘到就新一年喇.....

無無聊聊係屋企,睇下今年睇過既戲既票尾,再數一數,原來今年我睇左成30套戲,我記得上年睇左35套架喎.....

1月4號---魂離情外天
1月12號---衰仔失樂園
2月3號---豐胸秘Cup
2月9號---嚦咕嚦咕新年財
2月11號---天下無雙
2月16號---嫁個有錢人
2月19號---怪物公司
3月2號---五個撲水的少年
3月6號---我的野蠻女友
3月27號---豬兜有情人
4月2號---想飛
5月3號---乾柴烈火
5月14號---見鬼
5月30號---美色飢饉四十
7月16號---我左眼見到鬼
7月24號---黑超特警組2
7月27號---扮野小魔星
7月31號---狗狗震
8月6號---一家之鼠超力仔2
8月12號---絕世好B
8月16號---三更
8月31號---3X反恐暴族
9月18號---近蛛者殺
9月20號---一碌蔗
9月27號---我老婆唔夠秤
11月5號---五個嚇鬼的少年
11月13號---勾魂谷
11月27號---九個女仔一隻鬼
12月28號---金雞
12月30號---英雄

每年我都唔知用左幾多錢黎睇戲......細個14,15歲個陣會用晒D錢去買CD,而家唔會囉...今年買左兩隻碟咋~陳慧琳既碟,係唯一既選擇....

2月1號---陳慧琳"Ask"
12月13號---陳慧琳"Baby Cat"

呀....10月18號陳慧琳拎左個傑青呀,完全係實至名歸啦~~
7月12號我去睇"陳慧琳飛天舞會演唱會"呀....好正啊~~我一定唔會忘記!!
陳慧琳---2003年一定會更好!!

其實2002對我黎講,係沉重既,亦都係思想上改變左我好多....特別係下半年.....
4月26號---生日,自己過,都無所謂,我一D都唔介意....
7月3號---係我今年最大既打擊,係之前無論俾左幾多心理準備自己,到最後完全無用...個一刻聽到之後完全做唔到任何反應,成個腦都麻痺左....
7月4號---發覺舔野既唔止係我一個,不過咁又點?我咩都做唔到,幫唔到....
7月10號---劉百樂散學禮,仲要上台拎獎....哈~算係點呀?諷刺我呀??

之後兩個月,我一直同自己講"算吧啦....算吧啦...."
算??點算呀???好憎自己呀!憎自己唔夠爭氣!!
成個暑假都係度諗,之後一年點算好呢?一年之後我又會點呢?
真係好唔甘心....好辛苦....

9月尾---慢慢好返喇....以為只要自己做好D,對人好D,人地都會對我好.....最後發覺一個字:"錯"!!!!
10月24號---第一次體會到心痛既滋味....原來個心俾人hurt到極點個陣,真係會痛架....唔開心,又唔 知可以同邊個講,最後我選擇左唔講,自己去承受,自己去面對,但其實係咩都做唔到,如果時間可以治療創傷,我諗呢段時間會係好長好長.....

11月開始學精喇,既然無人Appreciate我做既野,咪唔做囉....人地唔接受我唔緊要呀,我淨係希望唔好得閒就踩我兩腳....好難做架喎....開始覺得無所適從,不過點都好啦,唔再諗喇,原來諗野諗得耐都好累.....

諗下有無D開心野.....其實都有既....
原來除左第一年既F.6A之外,第二年既F.6A都係好好...好在係識到佢地一班人,老陰,歐佬,蛙仔,主席,大笪,首領,阿包,Ricky,Kitmy,大面,阿心,Denise,Cherry,鼠欣,秋玲等等.....其實Repeat對我黎講,識到佢地先係我最大既得著.....亦係因為呢班人,所以我對劉百樂仲有少少留戀~

出年考A-Level喇,唔知會考成點呢?不過都係唔樂觀架喇....點都好啦,我知道我係唔會放棄既,因為我根本就輸唔起...或者其他人會覺得我好懶,好唔著緊自己,不過我會覺得,我有自己一套讀書方法,而且我讀個陣亦唔需要同人講,總之我知道自己做緊乜野....出年就20歲喇,我生日個日都未考晒全部....不過算啦,都唔到我控制....前面條路好難行呀,計埋個A-Level,呢個19歲,真係難面對.....

而家10點喇,仲有兩個鐘就2003年喇喎....我希望我家人,所有朋友都要生活得開開心心,同埋身體健康呀!無健康就做咩都唔得啦....貪心少少,如果香港經濟好D就好喇,咁我萬一個A-Level考得唔好,咁我搵野做都易D嘛....

有首歌好好聽呀....唔知你地有無聽過呢......

說你不愛我 陳慧琳

下雨了 整個城市都哭了
我們應該說再見 還是不說
不是嗎 還記得從前你多愛我
回憶那麼重 讓我不能動
所以我等你開口

說你不愛我 我才可以往前走
第六感告訴我 你渴望的是自由
就讓淚慢慢的流 就讓心放肆的痛
雨後一分鐘 好孤單的天空

說你不愛我 我不要別的理由
如果你還不說 我會恨自己軟弱
寧願吹酸酸的風 寧願要破碎的夢
也不要聽見 我們永遠是朋友

幾秒鐘 一次完美的分手
可是為什麼雙眼會那麼紅
忘了嗎 日曆翻了又翻之後
你會記得嗎 大雨那一天 我還在等你開口........


其實大除夕應該好開心,好熱鬧先係既...
而家屋企好靜呀....不過都無所謂啦~
14歲之後都無試過係屋企過大除夕Lu
睇下屋企個來電顯示,原來個電話都有成30個鐘頭無響過喇~


"全城幸福的慶祝 然而在這角落裡 還是有場冷場需要面對"


HAPPY NEW YEAR La

>>December 31, 2002 at 10:15:19 PM GMT+8

2002 年 12 月 30 日 星期一 【晴】

睇左"英雄"喇,我覺得都幾好睇喎~好睇過"金雞"好多呀....雖然係全片講國語,但係呢D戲係國語襯D既~全片都拍得好靚!!!玩顏色玩得好絕呀~特別係張曼玉同章子怡決鬥個度由黃色變紅色,同埋梁朝偉同張曼玉寫書法既綠色....仲有係九寨溝個度呀,風景靚絕!!成套戲都好有唯美主義,好少睇到呢D戲喇~無睇張曼玉咁耐,都而家都係好靚!而劇情都有D估唔到....總之成套戲人靚景靚,唔怕聽國語既人就要睇喇!!其實我覺得"英雄"都無想像中咁悶呀,反而"金雞"就無想像中咁好睇就真~

仲有呀....好窩火呀!!!

>>December 31, 2002 at 2:33:36 PM GMT+8

2002 年 12 月 29 日 星期日 【晴】

去左媽媽度訓左兩晚.....

係28號睇左"金雞"喇,無想像中咁好睇不特止,而且都幾悶....好笑位都唔係好多,100分鐘入面打左90幾個呵欠....唯獨真係吳君如同曾志偉都做得幾好咁囉~

夜晚同Cathy行下旺角,食下野咁就返返黃大仙喇~

原來我媽媽煮飯係好好味架......

回覆阿心同阿包:
哈哈~咪好囉.......一定會開心過之前啦~可喜可賀~~~~~~~~~

>>December 30, 2002 at 2:56:06 AM GMT+8

2002 年 12 月 26 日 星期四 【雨】

扑星Day.........無收過任何禮物,無野好扑!!都係休息休息啦......

相信大家以後會愈來愈難見到我online喇,
因為我近日沉迷左玩Online BomberMan,好好玩呀!!

Shared Files最新存貨:(見到我Online先算啦....)
Cookies--Merry Christmas

九餅隻碟有首歌好好聽呀,D歌詞仲好正喎!

最後一塊 曲奇s

曾到我們手 以為永遠還有
浪費了才知不夠永遠擁有
像吃光了那盒藍罐的曲奇
才驟覺 好的時光 最後...
還是從黑暗裡溜走
告別摯愛朋友
臨散去才知 共誰最最親厚
但我想趁最後 還有這溫馨滋味
能讓你分一塊牽走

誰離開誰連戲 誰人必須執行李
共你都分享過 這年夏季 曲奇的美味
重提起 仍甜美 來年各有各遠足幾百萬里
願記憶成為營養 倦了補充你力氣
(願這曲奇成為你 行過深谷那力氣)

和你吃茶點 那時我最愉快
愉快到未知 經已最尾一塊
直到知道快樂 無法再取之不盡
才學會珍惜第一塊

來日有多幾百樣美點 同樣誘惑你
賣相很精美 然而也代價不菲 沒法比
當時年紀 粗糙也任性 那滋味
那些不必添加 自製的甜美

>>December 27, 2002 at 2:17:08 AM GMT+8

2002 年 12 月 25 日 星期三 【晴】

Merry Christmas~~~~~

同老陰訓左一晚,11點零鐘醒左,同佢食下野,玩下個腦,跟住就送左佢去搭車喇~返屋企之後發覺都係好眼訓,就再訓過喇.....

晏D同左Karmen,阿Wing,阿Dai,甄甄同佢男朋友出街....首先出左尖東行海旁,睇下燈飾,跟住就搭船船過海,去左灣仔之後就搵左間餐廳食大餐,係鋸扒呀~~食完之後去左會展個度個棵好Q高既聖誕樹度影相....個聖誕樹都幾靚呀~之後再搭返船船出返尖沙咀行.....行行行,跟住食埋糖水就搭地鐵返歸喇....

係搭地鐵個陣,見到件極品真係不得不提...呢件極品大約...15,16歲啦,佢本身已經係一件豬扒黎既,而且仲係一件爛面既豬扒...Shit~都不特止,佢個頭分左條T字界,後面再紮兩條孖辮,哈哈~~~~~著衫又核突,佢著左件公主袖既白色衫,下面係一條格仔既A字長裙....絕呀~~~

請問聲仲有無人未睇<無間道>呀?可唔可以搵人陪我睇呀....仲有<英雄>同<金雞>呀....我全部都好想睇呀~~~~~就算最後得我自己一個睇,我都要睇晒呢3套呀!!

又過左個聖誕喇....今個聖誕都幾快樂呀,你地呢??

>>December 26, 2002 at 2:54:00 AM GMT+8