2005 年 5 月 13 日 星期五 【晴】

Yeha，yeah，yeah
返埋今日工又有三日假。

2005 年 5 月 12 日 星期四 【晴】

今日日記講既都同今晚上日文堂有關。

首先係我覺得好攪笑既。
話說教緊一個文法，
講講和以前學的另外一個文法有咩分別。
老師話：
「我見到佢好凍，
咁就要用文法 A。」

之後佢指住個窗，
打開個口，
跟住呆左咁定左兩秒。
成班當堂係咁笑。

之後老師先繼續講書：
「我見到佢打緊冷震，
推測天氣好凍，
就要用文法 B。」


根住係我覺得激死既。
話說上一堂派左功課，
咁照常理都係做完下堂對答案丫。
點知今堂老師話因為所有同學都未做，
所以唔對住，
留返下堂先對。
激死我，
趕頭趕命做起份功課先返學，
攪到遲到，
佢竟然唔對。


之後就係唔開心既。
呢排好多人病病，
首先係我咳啦。
老師又傷風 Wor，
呢兩堂都成卷廁紙拿上枱面用。
今日又有另一個同學仔唔舒服，
上堂上左十幾分鐘已經頂唔順，
要早退返屋企。

希望大家都早日康復，
少 D 病痛啦。

>>May 13, 2005 at 5:09:04 PM GMT+8

2005 年 5 月 11 日 星期三 【晴】

放工出左 SOC 練跑，
今日個訓練都幾甘。
首先係 X 特訓，
咩係 X 特訓呢？
其實以前都講過，
X 特訓係變速跑既其中一種，

變速跑就是在快跑一陣後，
再慢跑一陣，
然後快跑及慢跑交替進行。
當慢跑時，
肌肉活動不很激烈，
運動所需能量靠吸入的氧氣進行有氧代謝就可以滿足肌肉活動所需。
當快跑時，
肌肉所需能量大大增加，
單靠有氧代謝不能滿足運動對氧的需求，
所以需借助無氧代謝來供給肌肉所需能量。
這種跑步方式的好處是不但能夠有效提高肌肉有氧代謝能力
(耐力的訓練)，
而且改善肌肉進行無氧代謝的能力
(肌力及速度的訓練)。

而 X 特訓就係靠數步來決定何時快、何時慢。
先跑五十步快，之後二十步慢、二十步快、二十步慢，
升級一百步快，之後二十步慢、二十步快、二十步慢，
之後百五步快，之後二十步慢、二十步快、二十步慢，
再上二百步快，之後二十步慢、二十步快、二十步慢，
繼續二百五步快，之後二十步慢、二十步快、二十步慢，
升至三百步快，之後二十步慢、二十步快、二十步慢，
再依次降至二百五、二百、百五、一百、五十。
限時係三十五分鐘，
不過我聽錯左係三十分鐘，
原本可以上埋三百五……


之後有個公園定向，
二十三個 Points。
第五個出發，
個 Flow 都算順，
不過都仲有唔少既錯，
可以再改好 d。


愈黎愈擔心佢地既身體狀況，
一個係媽媽，
一個係某人。

>>May 12, 2005 at 3:04:32 PM GMT+8

2005 年 5 月 10 日 星期二 【乍寒還暖】

唔知點解，
我一係耐一耐都唔病下，
一係就病親都大大大鑊。
好似 d 咳咁，
咳左成兩個星期都唔好。
由寒咳變熱咳，
由白痰變黃痰。
醫生又睇過，
西藥又食過，
連民間療方都試過，
都係唔好，
原全唔知點解。

2005 年 5 月 9 日 星期一 【乍寒還暖】

東隧加了價都成個星期有多了。
一路都話好多「將會」唔用東隧轉用紅隧，
紅隧將會大塞車云云。
我原本好驚架，
我住佐敦，
公司在觀塘，
每日返工都要經加士居道和漆咸道。
其中一個入紅隧的路段，
就係漆咸道轉上康莊道橋面，
係加士居道天橋黎既車，
如果想入紅隧，
就要由最右線切過去最左線，
所以繁忙時間呢度都會幾塞車。
但係呢幾日返工，
冇塞不特止，
仲幾暢順 tim。

新聞話東隧流量整個星期下跌了二十二個百份點，
而紅隧及西隧卻只有少量贈福。
三條隧道的總流量卻下跌 6%，
減少了一千五百二十二架次。
五一黃金週剛過去，
繼續吹風話今日會大塞車，
結果呢？
返工亦然好暢順。


原來，
只要市民肯配合，
係會有效率好多既。
只要大家多 d 用公共交通工具，
唔好「一人一車」，
路面自然少了車，
交通亦會暢順很多。
紅隧也可以冇咁塞的。

咁其實，
東隧加價，
係壞事一件，
定其實是造福社會呢？

>>May 9, 2005 at 12:48:00 PM GMT+8

2005 年 5 月 8 日 星期日 【溫暖】

今日係母親節，
首先祝所有母親母親節快樂。
原本今日有場色級比賽，
比賽地點係寶馬山。
今年賽季每場比場都跑得唔好，
呢場色級賽，
同月尾場色級賽都以訓練為目的，
好讓自己可以再次掌握比賽的節奏。
所以今場比賽故意報低兩個組別，
希望係較易既賽程中，
專心做好每條 Leg 既 Flow，
唔會因為難既賽段而分心。


昨晚天氣報告話有驟雨，
都預左會水戰。
今朝八點左右食完早餐，
見到出面已經開始落大雨。
上天文台網頁一 Check，
雷暴警告現正生效，
Oh no，
即係話賽事會取消。
轉個頭，
已經到今日做工作人員既阿健電話，
Confirm 左取消既事實。
後來仲有黃雨警告 tim。


原本想返崇拜，
不過家姐九點當完幾通宵更想同媽媽飲茶。
Well，唯有有所取捨啦。

因為去左飲茶，
我得到左關於生日禮物既消息，
就係有部 PSP 喇，
Yeah yeah yeah。


飲完茶，
冇帶傘冒雨返到屋企，
幫媽媽安裝部 DVD Rcorder。
之後訓午睡，
原本打算訓一陣之後去做 Gym，
點知一訓訓到黃昏。
應承左媽媽陪佢睇「早熟」，
所以都冇去做 Gym。
點知佢買十點場，
早知就做埋 Gym 先啦。
十點鐘，
係戲院門口 Join 埋媽媽同 Auntie。
媽媽 d 誇張句又黎，
我已經係門口等緊，
佢打黎問我做乜未到，
佢已經到左。
攪到我以為我去錯戲院，
原來佢仲係樓下未上黎……


好憎 d 人睇戲傾計，
有時講返套戲都可以諒解，
不過無啦啦同我講，
「咳就唔好飲凍水」
………


講返套戲，
原來差 d 走雞。
開頭見演員有房祖明，
有少少反感唔想去，
不過睇完又覺得套戲唔錯，
尤其是個兩對父母，
曾志偉、毛舜均、黃秋生同余安安。

睇完戲，
又火起。
話說因為夜，
想坐的士。
未行到路口已經伸手截，
我同佢講話方向不對。
點知行到路口，
佢失憶症又發作，
又伸手截的士。
究竟係我人微言輕，
定係我思覺失調，
冇講過都以為自己講左？

>>May 9, 2005 at 12:47:46 PM GMT+8

2005 年 5 月 7 日 星期六 【晴】

買左支 11-22mm 既 Wide 鏡好耐，
但一直都冇為佢加添一塊用左保護既 UV Filter。
主要原因係佢咪有機會出動，
所以亦懶得去買。
為下個月既旅行煩左好耐，
究竟帶邊（幾）支鏡頭去好呢？
當然可以帶晒去，
不過一黎重，
二黎帶亦都未必用得晒。
係 Forum 問過意見後，
決定帶一定 Wide zoom(11-22)，
一支 Tele zoom(50-200)，
支 kit lens(14-45)唔帶。
亦即係話，
要幫支鏡買返塊 Filter。
趁今日下晝有野做，
不如出尖沙咀買啦。


得知原來三點係中港城有星追，
咁就帶埋相機同支 50-200 返工。
放工先去追星，
追完再去買 Filter。

中港城個場幾細，
而且因為嘉賓包括 Cookies 既 Stephy 同 Theresa，
自然吸引好多瘋狂 Fans。
有時都覺得呢 d Fans 好冇禮貌，
司儀講緊野，
佢地係咁大叫偶像個名，
聲浪蓋過司儀用咪把聲，
相點 Wor……

By the way，
其實今日主角唔係頭先提個兩個，
而係做司儀既 Purple 姐姐。
點解咁講呢？
因為佢兩個人只係合唱一首歌，
Purple 姐姐一個人獨唱了兩首歌！

2005 年 5 月 6 日 星期五 【晴】

昨日畀完錢，
今朝先話我知報錯價，
漏左 Weekend 附加費每程 $300，
即係 Total $600，
真係激死。

2005 年 5 月 5 日 星期四 【晴】

今日上日文堂發生左幾件趣事，
第一件係關於對答案。
話說我地對答案係採用每位同學輪流讀一題既方式，
咁一來對到答案，
二來又可以練到會話。
咁到其中一個男仔，
佢竟讀返上一題。
咁一次半次的話，
都可以話佢係唔覺意。
但係輪左一個圈之後，
佢又係讀返之前個人個題，
當場全場爆笑。


同學仔中有幾個係中六、七學生，
咁中文其中一 Part 係課外讀物，
估唔到咁多年都係要睇文化苦旅。
有個女仔 A 小姐週圍問其他同學仔讀邊間 u 咩系，
原來我地呢班有兩個中大、
兩個港大同一個科大。
中大另外一個都係讀 Engine。

A 小姐問其中一個女仔 B 小姐係咪仲讀緊書，
B 小姐答佢畢左業好耐。
之後就 A 小姐好直接咁問 B 小姐，
「你畢左業幾耐？」
咁同直接問佢幾多歲有咩分別呢？
年齡一般都係女人既秘密，
當堂攪到 B 小姐唔知答唔答佢好。


放左學，
去左櫃員機過數畀個 Travel Agent。
嗚嗚嗚，
戶口咁就冇左萬幾蚊。
紅簿仔數仔直線下滑，
跌破十七個月黎新低位，
再次得返四位數字。
唔制呀，
個筆「非經常性」收入幾時先到手？

>>May 6, 2005 at 10:54:00 AM GMT+8

2005 年 5 月 4 日 星期三 【晴】

昨日發生左件好攪笑既事唔記得講。
話說我放工返到屋企樓下，
見到有個男人按緊大厦部對講機。
咁大厦個大閘唔係用鎖匙既，
一係就按某樓某號等開門畀你，
一係就入密碼。
咁我見佢入幾次密碼都開唔到門，
梗係有少少唔耐煩，
望住佢睇吓係唔係白撞，
睇下佢想入到幾時啦。
咁跟住佢突然發爛渣，
講左句：「你按埋佢喇。」
就走左去。
咁我話知佢按密碼入去啦。


到我食完飯出門口返學事，
係大閘見到看更，
咁個看更同我都幾熟既。
佢同我講話那個人頭先向佢投訴，
話我係度監視佢 wor……