2005 年 8 月 1 日 星期一 【晴】

昨天的日記，
只係記下舒服既上半晝。
冇錯，
比坐第二行睇戲更辛苦既還在下半晝。

下半晝係打「佐敦麻雀」，
因為我打麻雀唔打錢既關係，
我地係打掌上壓既。

賭注（其實唔應該用呢個 Term）仲愈打愈大。
由以往三番起糊，
最大八番，
一番一下；
到後來正風位乘五，
即東圈第一個人做莊時、
南圈第二個人做莊時……
到今次既鋪鋪乘五圈圈清。

簡單 d 黎講
即係出沖一鋪三番要做十五下。

宏觀黎睇，
因為打「累街坊」，
而且細牛同 Edmund 夾，
基本上冇得輸。
自己食糊唔計，
如果我出沖阿力一鋪三番，
我做十五下、
閒家康要做八下、
閒家細牛同 Edmund 都要各做八下。
人地加埋廿四下，
我做十五下，
有賺 tim 啦。

除非係要包既姐。

Edmund 包左我一鋪十二章。
話說我筒子混對對九張，
咁都應該唔會有人再打筒子，
然後我當中有一對四萬，
咁 Edmund 就打四萬畀我十二張喇，
最後我仲要自摸，
各送左六十下畀細牛同 Edmund。

不過出得黎行，
預左要還。
最後一鋪，
（本來摸和打完架啦嘛，冇啦啦要打多鋪）
對面阿力索子大對對，
下家九張萬子未叫糊，
我筒子混一色，
拿住一隻索子、一隻萬子，
打是旦一隻，
都可以三番單吊，
又或者可以棄糊。
不過下家既然未叫，
我梗係摶一摶架啦。
結局就包左鋪十二張自摸喇。

打呢次麻雀好健康，
我地五個人加埋做左成千下掌上壓，
最少既力王都要做一百下，
最多既差唔多做左三百吓。

>>August 3, 2005 at 10:02:52 AM GMT+8

2005 年 7 月 31 日 星期日 【溫暖】

今日又玩運吉團。
原本上牛寮做 Training，
結果因為雷暴取消。
最慘就係一路都話雷暴警告至到八點鐘。
（我地九點開始）
咁七點幾就打電話 d 學員 Confirm。
四個學員，
三個手提，
一個屋企電話。
屋企那個冇人聽，
我亦唔敢響咁耐。
（但結果佢有出現）

一個手提本人聽，
我交代晒 d 野。

一個「你所打既電話暫時未能接通」

一個屋企人聽，
竟然未訓醒，
仲要唔知有 Training！

我八點去到荃灣食緊早餐既時候，
先知雷暴警告延至十點，
結果就要取消。
咁我唯有拿拿聲打電話通知 d 人啦，
結果有一個打唔通，
（即係之前唯一一個打通那個）
其他人就全部黎晒大快活 =_=;;


食完早餐（其實得我同黃 Sir 兩個食），
有部份人返屋企，
而我地五個人就走左去睇 The Island。
去到戲院買飛，
坐既係第二行，
仲要係勁近個隻。
（有 d 戲院第一行同幕有段距離）

基本上係睇唔晒個 Screen 既。
一到動作場面，
對眼係 Focus 唔到，
眼花之餘，
仲要係有少少頭暈。
套戲仲要幾長，
有成兩個鐘多 d，
辛苦情況可想而知。

睇完戲，
陪阿棟去中興買跑鞋。
之後我要趕下場，
就坐地鐵返屋企先。

>>August 1, 2005 at 12:47:10 PM GMT+8

2005 年 7 月 30 日 星期六 【乍寒還暖】

又到短週，
今朝落大雨，
但都出左銀行打簿，
為既就係遲 d 申請信用卡。

中午食完飯，
就過左會展。
原本係因為有 d friend 扮星戰人物，
過去影吓相既。
不過早去到，
咪入場睇吓先 lor。
（影 Cosplay 係唔駛買飛入場既）


不過入場直頭係拿苦黎辛。
勁多人勁迫，
行都行唔到乜滯。
本來都有 d 野想買，
但係行都行唔到入去。
有冇帶梯 wor，
唔可以企高黎影。
結果今日係第二次我影完相係想全部 Delete 唔要既。

今日帶左支 14-45 同 50-200mm 鏡頭。
大部份時間都係用 14-45，
只有影台上先有機會用 50-200。
不過我都係影左一次台上，
所以支重重既 Tele 鏡可以話係白拎。

至於個相機袋，
今次係 Mix & Match。
用平時用開那個大 d 既哥倫比亞背囊，
內裡放了相機袋個膽做保護。
不過個膽有少少軟，
有時係背囊內會變左形。
遲 d 可能試吓唔好一舊個放相機同鏡，
而試下機有細袋裝，
鏡頭有鏡頭袋裝，
然後一個個袋放入背囊，
唔知會唔會好 d。
又或者用 d 紙皮固定個膽試下。

講返 Starwars，
真係激死。
原本場館舞台三點九有 Game Girl 選舉影，
我都補左個好位。
不過佢地話四點半出面 Starwars 開始，
咁我拿拿聲離開會場。
點知佢地五點幾先到……

>>August 1, 2005 at 12:46:53 PM GMT+8

2005 年 7 月 29 日 星期五 【乍寒還暖】

今晚放工後去左青衣打籃球，
一個冇空調既室內場。
個球場係長發村，
其實好近青衣城，
之但係因為一黎落雨，
二黎全部人都唔識行去，
結果就坐的士喇。

一上車轉完第一個彎，
司機就指住前面話：
「呢度咪係 lor」
但係因為唔可以右轉，
所以要繞少少路，
不過都係冇跳錶。

不過最攪笑個司機話，
其實好近，
行去都得架，
不過講出黎又話驚被人告拒載……


講返個籃球場，
冇空轉既室內場，
係仲慘過打街場。
打街場都話有 d 風，
室內場係冇風既，
結果就好似焗桑拿咁，
勁熱。

好彩個更衣室都叫見得下人，
有冷熱水沖涼，
又清潔企理，
好過打開個街場多多聲。


沖涼有四格，
最攪笑係有人入左最尾個格之後，
先大叫冇得鎖。
之後說：
「呢格冇水既，
扭極個制都冇水出。」

而事實係，
轉自係調較冷熱，
個水制係按落去先有水出既……

>>August 1, 2005 at 12:44:34 PM GMT+8

2005 年 7 月 28 日 星期四 【晴】

呢排食緊中藥，
但呢 d 中藥唔係以前三碗水煲成兩碗水個隻，
而係已經磨成粉，
用開水沖個隻。

咁一日一包粉分兩次食，
好多時我都帶埋返公司食。
昨日食完頭半，
放返落背囊。
夜晚返到屋企拿返出黎食既時候，
咦！
點解咁細包架？
唔通朝早開多左？

沖完涼，
始終覺得唔多正常。
打開個背囊伸隻手入去，
敝，成手粉。
拿拿聲拿晒 d 野出黎，
跟住成袋啦。
但係拿 d 隻出黎既時候又唔記得抹抹先，
結果攪到書枱都係。
攪呀抹呀，
整左粒幾鐘先叫做 OK。

d 粉細粒，
有時摸都摸唔到，
唯有靠個鼻黎聞，
聞到有味就再抹下。

今朝坐車返工，
上到車都仍然聞到個股味。
朝計衫褲係第二套，
袋又係第二個，
冇理由有味架。
原來係對 Headphone，
真係頭都大埋，
點清潔呢？

2005 年 7 月 27 日 星期三 【清涼】

媽媽今日返大陸玩，
我搭單睇下買唔買到個相機袋。
結果相機袋就買唔到，
買左部 MP3 機，
同 D 衫褲落黎。
最攪笑係，
Auntie 話上面冇相機袋賣架？
佢地都係落返香港買。
唔係掛，
我想買那個牌子係袓國架 wor……

講返部 MP3 機，
祖國牌，
但係外殼寫住 sony。
不足的地方係只係得 128mb，
入得 24 首歌（192 kbps）
個 radio 又有少少虧。

至於 d 褲褲，
又係冒牌。
我唔介意著祖國牌，
但就介意著冒牌，
尤其是串錯字既。

2005 年 7 月 26 日 星期二 【晴】

「休閒」了幾日，
總算想通了些東西。
雖則現在較自由，
但繼續「休閒」都不是辦法。
就算未爆鑊，
都應該盡力唔畀隻鑊爆。
應該集中精神作戰，
盡快了解件事。

2005 年 7 月 25 日 星期一 【晴】

最近買左個 ARPG，
叫天地之門（天地の門）。
ARPG 者，
Action Role Play Game 是也。
Role Play 即角色扮演，
觀其名而知其義，
即扮演一個角色去進行遊戲。
其實任何遊戲都是扮演，
例如踢足球的遊戲是扮演一個足球員，
空戰遊戲是扮演一個機師等。
那 RPG 又有甚麼特別呢？
RPG 中的扮演範圍會廣範得多，
而且你要完完全全代入去角色之中。
例如中學會考英文口試那個 Role Play，
你要代入角色，
才會懂得應該甚麼問題，
這點是其他遊戲不需要的。
代入也正正是 RPG 的精髓，
也正正是 RPG 好玩的地方。

出名的紙上 RPG，
有龍與地下城（D&D, Dungeons & Dragons），
靠主持（DM, Dungeon Master）口述故事內容，
靠想像去幻想畫面出來。

RPG 入了電子世界便多姿多采了，
但為電腦可以將華麗的畫面直接展現出來。
這類的 RPG 在戰鬥時會進入另一個畫面，
有一系列的指令讓你選擇，
例如攻擊、魔法、道具等。
可以是回合制的戰鬥，
也可以是近乎即時的。

至於 ARPG 的戰鬥便是另一回事了，
係戰鬥時會變為一個 Action Game 的形式，
控制著主角拿起武器戰鬥。

但在邏輯上，
有很多不合理的地方。
例如有無限的敵人，
殺了敵人後會得經驗值，
一定經驗值會昇等級，
加 HP（Hit Point）。
揮劍揮得多，
最多便是提高準成度，
提高威力等，
為何以提高耐打度？
怪哉怪哉。

最有趣的是，
入了城後，
除了在道具店購物外，
還可打破木箱、缸等拿取物品！
現實生活中，
你可否隨街打破木箱拿物品？
走進飯店打破缸拿物品？

不過這是遊戲，
又何需深究？
正如漫畫也有很多不會理的地方。
順手推介一本書：
「空想科學大作戰」
值得一看。

>>July 26, 2005 at 12:23:16 PM GMT+8

2005 年 7 月 24 日 星期日 【酷熱】

今朝又唔知醒，
唉……

之後同媽媽去左元氣食 susi，
唔係食左好多，
冇乜野想食。

再之後上左力王家，
首先係打機，
到人齊就開始打牌。
Total 五個人，
四個可以打錢，
一個唔打。
我梗係讓畀佢地打啦。
裝了杯可樂，
睇 Exam。
睇完 Exam，
將 d Exam 放回原位，
返黎之後，
發覺原本放係琴面杯可樂倒瀉左。
成琴都係，
攪到力王家姐係咁抹，
最慘我完全唔知咩事，
係咁被細牛同 Edmond 「賴」，
甚麼「煩到人又煩到自己」，
「下次唔好喇」……

2005 年 7 月 23 日 星期六 【晴】

估唔到我同佢既關係，
維持左兩年半都要放棄。
兩年半前，
應該就係我就黎開始上日文課既時候。
那時我們出雙入對，
陪我上日文課，
陪我返工放工，
陪我做 Gym，
陪我去旅行，
陪我出 Trip……


當然，
其間都曾經出過大大少少既問題，
例如因為我唔少心照顧佢，
令到佢受到不必要的傷害。
但我都有設法補救，
亦都有買過 d 名牌畀佢。
奈何……


前日放工如常拿部 MP3 機出黎聽，
開機就已經出 "file check error"，
但仲聽到收音機。

夜晚再開佢又好似冇事喇 wor，
我仲 update 到 d 歌 tim。

昨日返工開機聽，
又出 "file check error"，
但仲聽到收音機。
返到公司再開，
點知連之前 Save 低既 Radio 頻道都冇埋。

睇黎都係時候換過部，
不過其實我部 Pocket PC 自從買左張 1GB Memory Card 之後，
都可以聽到 MP3，
係聽唔到收音機姐，
係咪真係有需要買呢？
而且之前行過，
都冇乜邊款合心水，
都係寫落待買 List，
唔急唔急。
唔知有冇信用卡優惠送 mp3 機做迎新禮品呢？

>>July 23, 2005 at 12:07:26 PM GMT+8