2006 年 6 月 28 日 星期三 【晴】

過了４天～呢４天就長到好似４個月咁～
返工ｏｔ通頂睇波～經歷幾場～一場比一場震憾～
一場比一場看得人心力交瘁的ｆｏｏｔｂａｌｌ　ｍａｔｃｈ
第１次睇到咁ｕｐｓｅｔ～因為荷蘭和葡萄牙的火爆氣氛
第１次睇電視睇到腳軟～因為９２分半，臨完場前半分鐘，托迪的一球１２碼
第１次睇到咁感動咁想喊～看到施丹９２分鐘的入球
這都是１６強的賽事
場場都值得看～場場都冇欺場

不過，對於間中的悶場～忍耐力自然大一點
看意大利、看澳洲～一字記之曰「守」
你啲球迷想睇啲進取啲既球賽啫
但人哋輸１球就可能跟ｗｏｒｌｄ　ｃｕｐ　ｓａｙ　ｂｙｅ了
始終不比小組賽～這場４５１唔得嘛，下次轉番４４２囉
來到１６強，每個戰略比起之前的都更舉足輕重
大家一字記之曰「ｅｎｊｏｙ」吧

〔英格蘭ｖｓ厄瓜多爾〕
英格蘭出的是４５１陣式～用單箭頭朗尼
即使是悶戰～也值得１看啊～因為看到碧咸射罰球呀～入嗰隻
離門唔知幾米的自由球～繞過人牆，直接入門
電視影住ｖｉｃｔｏｒｉａ成個彈起
碧咸的笑好開心啊～好襯佢既鴨仔聲
睇住佢用食指指住朗尼～同埋唔記得邊場摸左朗尼個頭１下
就覺得佢兩個的關係好好咁


〔葡萄牙ｖｓ荷蘭〕
雖然最後是葡萄牙贏了
但這場比賽看得人特別ｕｐｓｅｔ
由下半場開始～就好擔心有流血事件
１６面黃牌４面紅牌～即使晉級～都要煩呢啲拎牌後遺症
唉﹗唔好咁啦﹗
唔知點解我看的跟別人說的很不一樣啊
哥斯天拿拎的２黃１紅是無可厚非的
但迪高也是抵死嗎
點解我睇到既只係火爆既荷蘭腳下下郁手（雙手嗰隻）推葡腳心口
有幾下推到人哋跌落地
我睇到既係咁～～
看到ｃ朗因傷被換出時喺場邊喊～其他工作人員又攬下佢安慰佢咁
我就覺得其實ｃ朗唔係咁差啫～不過嘉燕和ｓａｌｌｙ叫我唔好咁易俾佢扼到喎～
哈﹗搞鬼呀～


〔意大利ｖｓ澳洲〕
看過澳洲ｖｓ日本之小組賽後，對澳洲極為反感
這班科學怪人一味靠推靠撞
個個心口像加了墊，一撞埋身型弱小的日本國腳度，日腳就被彈開
不過，今日佢哋打少了茅波啦～我做證
澳洲一開始就擺明要逼到意大利你同佢打加時～何苦呢
死守～～～你守咩意大利都唔同你客氣又照守
很開心看到迪比亞路今場正選上陣～可惜冇咩突出表現
說這是悶場嗎～也不盡然～也有機會看保方表演啊～少有的表情豐富的門將
舒華沙都冇悶親大家啊
看到下半場我也恰了眼瞓～
當你看到雙方苦苦爭持了９０多分鐘仍分不出結果來
突然間看到格羅素喺禁區控球時＞跌﹗低﹗
而緊貼其旁見到１個澳洲腳～
嘩﹗未睇定，未消化到發生咩事，都尖叫定先
十﹗二﹗碼﹗
嘩﹗真係吹咗～
嘩﹗咁峰迴路轉
差３０秒～即係大家由１數到３０，或者由負３０數到負１
又好比坐喺度眨６次眼的時間
咁就會正中澳洲下懷～打３０分鐘加時
隔咗１０幾秒，就看到托迪的大頭了
ｃａｍ　ｍａｎ　俾了個托迪雙眼的ｃｌｏｓｅ－ｕｐ
嘩﹗嘩﹗嘩﹗嘩﹗嘩﹗～佢未腳軟～我已經腳軟咗
佢呢１腳所背負既壓力大到我都唔知點形容
總之壓力大到我都腳軟埋１份
一射～嘩﹗入咗
呢啲位呢～如果唔尖叫出來～會谷到頭痛的～多謝﹗


〔瑞士ｖｓ烏克蘭〕
唯一ｍｉｓｓ了的１６強賽事
嘩﹗瑞士１２碼三球不入～嘩﹗烏克蘭只失舒夫真高一球﹗
咦﹗克勤話呢場好悶喎﹗咁唔睇都唔大損失啫
不過我唔會錯過下一場的烏克蘭賽事的


〔巴西ｖｓ加納〕
即使你（其實係我）之前有幾唔認識加納隊
看過今場後，１定會對一個人印象深刻～
＞＞＞＞加恩／ｇｙａｎ／基恩
２００６世界盃射門命中率最低的前鋒～救命呀～下下射飛機
喺巴西腳下拎到咁多進攻機會都失了～１球不入
一係就唔中，一係就只係軟弱無力的地波（即係我走埋去踼開ｄｉｄａ，我都會接到嗰啲）
哎也～加恩唔急觀眾急～死嘢呀～
看到朗拿度漸入佳境都替他開心既～畢竟風靡一時的球員～
看到他一腳不如一腳並非甚麼開心事
唉～魯爾唔知又可以點呢
今晚看到卡路士俾人呵呀～ｓｏｒｒｙ呀～我實在接受唔到
一直被寄予厚望的ｋａｋａ～至今都好似冇咩突出的表現
經過我和嘉燕的分析～係因為佢個樣太林善了～壓唔到場～人哋埋黎一笠佢個波就笠到了
ｋａｋａ～請多看科學怪人的賽事～偷偷師吧


〔西班牙ｖｓ法國〕
睇下而家個鐘，呢場賽事已打完４５小時～但係我仲未平靜到啊
施丹入球的畫面喺我個腦度ｒｕｎ完一次又一次
就好似ｔｉｃｋ左ｒｅａｌ　ｐｌａｙｅｒ個〔重複播放〕ｍｏｄｅ咁
賽前真係好希望施丹助攻俾亨利入的
因為啲人話無咗施丹的亨利先會發揮到～因為啲人話施丹和亨利不和～因為啲人話亨利冇大賽命～因為啲人話施丹唔掂了～因為啲人話法國唔掂
全部都係啲人話啫～
今晚你哋睇下啦～
完全看不到法國之前的老態～追波扭波搶波交足功課
好啦﹗講下１：３的賽果
西班牙的ｓｃｏｒｅ是由１球大衛韋拿施射的１２碼得來的
至於法國的３球～哈～我要慢慢講啦～

第１球︰由列貝利（即嘉燕和ｔｅｒｅｎｃｅ口中的刀疤仔）射的
話說西班牙下下都用越位陷井對付法國的前鋒，每次都係亨利中招
(看到賽後，報紙批評亨利是場球賽掂波太少又經常越位，不得不為他平反一下)
你睇列貝利呢球～亨利幾咁冷靜～洞悉到自己處於越位位置，
郁都唔敢郁，有得列貝列單刀
同埋要注意呀，呢１球係４１分鐘入的～
還未中場休息～即亨利應付西班牙之越位陷井之方法是經過個人的分析和思考而得出的，
並非經由杜明尼治提點的

第２球︰由韋拉喺左門位置踼入
呢球係由施丹施射的自由球，踼到龍門左前方，被１法腳
（睇唔到邊個，但依位置推斷，很有可能係亨利）頭鎚頂到韋拉的位置
再由韋拉好冷靜咁撩入咗
企咗喺左門既卡斯拿斯和１西班牙腳只能喺入球後抓住左網唔知有冇輕嘆

第３球︰施丹單刀
施丹由左路攻門
１西班牙腳迅速回防係咁迫施丹往底線方向想收窄佢的角度
點知～施丹忽然好冷靜咁反方向推後個波，再往右移２大步繞過西班牙腳～
搵個好位置靚角度射入
沒有蹧蹋到這難能可貴的機會（ｇｙａｎ你看吧）
對唔住呀～如果我的尖叫聲有吵親你的話
如果他的球賽生涯以此球為終結，相信也無遺憾～不過既然可以走遠１步，就再出出力吧


射入後１分鐘就吹雞完場了～施丹攬住韋拉～施丹攬住亨利～列貝利俾人抱起咗～施丹又攬住巴夫斯～
連沙比阿朗素都攬埋
我覺得佢覺得法國好似贏咗冠軍咁
我都覺得法國好似贏咗冠軍咁
ｗｏｗ～

>>June 29, 2006 at 5:53:55 PM GMT+8

2006 年 6 月 24 日 星期六 【晴】

６月廿三是施丹的生日，也是韋拉的生日
６月廿四是美斯的生日，也是茜嘉的生日啊～生日快樂﹗
上星期就是簡尼的生日
六月果真是生日的旺季


烏克蘭打的３場分組賽，只看了佢大敗０比４的一場
到聽到佢第２場贏４比０，第３場贏１球１２碼
真的很替舒夫真高高興啊～一掃首場的烏氣
證明了他不是孤軍作戰的～畢竟１人球隊是不能打出這樣的成績

〔多哥ｖｓ法國〕
真的是因為少了施丹嗎？心情矛盾極了

〔德國ｖｓ瑞典〕
第１場１６強賽事
看到場邊的簡尼～覺得他很可憐啊～也讓我更不喜歡列文
這場的拿臣、龍格保等人都打不出水準來。雖然不想這麼說，但不得不說２：０這個比數原本應該更大的。
有好幾球，瑞典差丁丁丁丁丁丁點就失了～
看德國的賽事時，總是很喜歡看場邊的奇連士文呢～俾多幾個ｓｈｏｔ佢呀唔該

〔阿根廷ｖｓ墨西哥〕
墨西哥實在太令人另眼相看了～
雖是墨西哥先得一球～但就不禁攰視佢︰會唔會好似日本咁，先得１球，見失番３球架
點知無應驗，反而讓阿根廷打得筋疲力竭
對塞黑那仗的列基美被吹捧得天上有地下無～今仗卻成為一眾旁述針對的對像
總覺得列基美的眼神跟謝拉特的有８個相似～可憐悽慘得很
雙方磨爛蓆９０分鐘仍分不出勝負～大家都累了
要踼加時～到如斯地步～對輸了的一方一定很殘忍啦～不過，還好沒有了黃金入球制度
雖說沒有特別支持那一隊，但看到麥斯在加時上半場入了一球後，
不禁起了雞皮
一方面為打得筋疲力竭的阿根廷高興，另一方面為拼搏進取的墨西哥失落
墨西哥成了我心目中，繼捷克後，第２可憐的球隊
麥斯的一球比起英格蘭ｖｓ瑞典時，祖高爾射入的一球更美妙
個拋物線靚到～真係識得去到龍門口開始墜落入龍的
無怪乎麥斯成了這場的ｍａｎ　ｏｆ　ｔｈｅ　ｍａｔｃｈ

但願往後的１６強８強４強賽事
不必加時不必射１２碼就能分勝負吧
別對球隊們太殘忍
對我們這些球迷也別太殘忍了
盞看後心有戚戚然

>>June 25, 2006 at 9:49:43 AM GMT+8

2006 年 6 月 23 日 星期五 【晴】

簡直好似參加３項鐵人賽咁
作晚在ａｄａ家通頂看意大利ｖｓ捷克，日本ｖｓ巴西
跟住晨早買個靚早餐返工再ｏｔ到８點
再返屋企做ｆｒｅｅｌａｎｃｅ做到２點幾
跟住法國ｖｓ多哥就開波了
睇到５點即瞓．．．．．．整個星期下來．．．．．．終於可瞓個靚覺

通過頂後，回到公司
看到桌面的咖啡及ｓａｌｌｙ遞來的玻璃瓶
發覺同事對我好好架
迴光反照～精神爽利地衝衝衝

我知唔應該咁貪心睇咁多場的
但唔睇又唔甘心～～成日心思思
最衰適逢公務繁重～俾啲咩咩香港版、澳門版、國言版互動課本壓得透不過氣
如果唔係～好想好想請日假啊
星期二同ｓａｌｌｙ上了第１堂的ｄｒａｗｉｎｇ
用ｉｎｋ～好好ｆｅｅｌ啊～
渾然忘我咁拿住支筆喺度喪排線
冇得用鉛筆起稿～錯咗只能補線不能擦～這個好啊﹗
２個幾鐘都未完成
老師話我支筆ｔｏｏ　ｆｉｎｅ了
咁又係，畫一條線等於人地畫三條

真係好減壓啊
好似啲「釋放自己釋放自己」ｌｅｓｓｏｎ咁～～嘩哈哈哈哈




〔巴西ｖｓ日本〕
個肥佬呀～對克羅地亞唔見佢咁精神，對澳洲唔見佢咁進取～玩嘢呀？
好多同事一知啲國家隊會出ｂ隊就話唔睇啦
其實ｂ隊都有ｂ隊既嘢睇既～佢哋會好拼搏咁爭取入球爭奪正選的位置
同埋佢哋入咗球後的表情反應會比起打開正選的爆笑得多～我就最鐘意睇人哋慶祝入球啦
今場就有個可愛但冇入波的羅賓奴
（今天聽到細ｓｏ講場外的卡路士呀……如果係真既……對佢太失望了，希望不是吧）
日本隊失了４球～如果以川口上仗的水準～起碼有２球係有機會救到的

〔意大利ｖｓ捷克〕
意大利有時真係傻傻地～唉﹗
不過佢的第２個入球睇到我目瞪口呆～半場冇人的～雖然給這個恩沙基入了
但我好唔鐘意佢呀﹗
這球太獨食了～同埋，最重要既係……
隊友攬住佢同佢慶祝，佢ｆｉｎｇ開人既～哼﹗

>>June 24, 2006 at 9:57:18 AM GMT+8

2006 年 6 月 20 日 星期二 【晴】

開始累了
又亂了～呵呵
一大堆大名～邊個打邊個呢？

〔日本ｖｓ克羅地亞〕
日本比起第１仗信心增強了～少了埋門時的猶豫
中田英壽的２次遠射亦令人覺得日本積極了～可惜下半場大家都跑到筋疲力竭～腳底下溜出去的球也不追了
唯一覺得３都主的體能較好～稍有活力
這個日本國家隊的後衛不時攝位上前自己射門，當你恰緊眼瞓之際，見佢又出現喺禁區兩側～都會醒１醒
呵呵～佢未免谷得太前了～不過對於日本這隊非進攻型的球隊
３都主確係不可多得的人物
ｋａｊｉ應該就是加地亮吧～
川口能活係今屆世界盃第１個救出了１２碼的門將～嘩﹗嗌到喉嚨痛﹗拍到手板腫啦﹗

〔巴西ｖｓ澳洲〕
雖然失了２球，但澳洲的後防其實不俗的
尤其在上半場，往往令在前方搵食的卡卡、朗拿甸奴冇晒符
巴西在決賽週的第２場賽事～朗拿度仍未睡醒
巴西在決賽週的第２場賽事～仍未看到卡路士的招牌罰球～好恨睇啊～碧咸的也是

〔法國ｖｓ南韓〕
１直很替法國隊擔心的～法國隊有的是技術冇的是體力活力
而南韓剛巧有的就是體力啊～個個都有不攰之身
加上，比起體力，南韓有更多的是運氣
是場和了～法國仍是讓人擔心的法國啊～
不過法國仲有一個優勢既～就係個個手長腳長ｍｏｄｅｌ身型～呵呵
有頂頭鎚優勢啊～
哎也﹗施丹今場得了第２面黃～唉﹗見到喜歡的球星得黃牌就心都震了
何況這是第２面～
試試往好處想吧～大家都說少了施丹的亨利會大放異彩的
亨利～要俾心機啊﹗

〔瑞典ｖｓ英格蘭〕
奧雲２分鐘未到的傷出，實在令人措手不及
至於另一正選前鋒朗尼真係核鬼突～俾人換出場後，整個發脾氣掟鞋過程俾人影到晒
唉﹗太唔成熟了～
呢場賽事的祖高爾喺初段已鋒芒畢露～頻頻威脅瑞典的後防
並入了個全場最靚的入球～又一令人回味的１段

〔葡萄牙ｖｓ墨西哥〕
比賽初段，葡萄牙好似練波咁，差下差下到６分鐘就無端端入咗
雖是真心的希望葡萄牙晉級
但此球入得如此這般輕易～一啲輕奮感覺都冇
同上一仗迪高６０幾分鐘時的入球差遠了
娛樂性爆發華而不實的ｃ朗又冇出，想再看看的迪高又唔見人
費高個腮好似好番好多啦
看了十多分鐘就閃了
不過都要順帶偷偷支持墨西哥的門將山齊士／桑切斯一下～因為那次看到他哭我也有少許想哭呢

>>June 24, 2006 at 8:04:09 AM GMT+8

2006 年 6 月 16 日 星期五 【晴】

ｓｕｒｅ啦，好ｓｉｒ

相信本屆ｗｏｒｌｄｃｕｐ紅的不是某某隊的球星～而是ｇａｔｓｂｙ人
爆笑啊

原來迪比亞路的普通話名字是皮爾諾

〔葡萄牙ｖｓ伊朗〕
呢場係睇得最興奮的一場，上一場的葡萄牙賽事沒看已覺遺憾，看精華見費高扭波扭過安哥拉後衛助攻，攀成１：０，更覺遺憾。
希望葡萄牙贏的原因如同希望法國嬴的一樣，好想有費高和施丹的國家隊的路走遠１點～
畢竟他們的機會可一不可再了
這場，葡萄牙所得的２球，費高都係功臣來的；迪高的一球係費高助攻的，不過迪高射得超級靚要速度有速度要角度有角度笠死門將亦是不爭的事實；６０幾分鐘有起色了～冇怪乎我想嗌到失聲～提起了６０幾分鐘的心稍稍定下
第２球，是費高在禁區被侵犯而得的１個１２碼；由ｃ朗拿度施射而入的。
呢場賽事入面，費高被侵犯咗好多好多次啊～不停見佢跌低起身跌低起身～睇到我動魄驚心
你唔可以受傷架﹗
其中一下真嚇ｃ人了～死人頭成隻釘鞋踼落塊面度～費高個腮腫了～
ｃ朗真係個不折不扣的小朋友～太ｋａｗａｉｉ了～不過佢忟憎都啱既～全程俾人ｍａｒｋ實晒～到佢射入一球１２碼～豁然開朗～太爆笑了～奈何他的個人主義實在應收斂１下
伊朗的防守其實做得相當之出色的～往往化解了ｃ朗的威脅，門將不致於承守很大壓力～保列達的冇威脅性射門更唔在講～
所以唔明白到底墨西哥點樣做到喺伊朗度得３球

〔意大利ｖｓ美國〕
呢場波實在太戲劇性了～上半場意大利先入１球，冇幾耐美國憑意大利的烏龍球攀成１：１。
和波後１分鐘都唔夠意國４號仔因個手肘撞到人流蚊飯被紅牌區逐。
唉～意大利慘了～點知～形勢卻又峰迴路轉，今次到美國４號仔剷人小腿～又１紅牌
到後來唔記得幾時，美國再收１紅牌。
嘩﹗成場波少咗３粒人～９粒迎戰１０粒～嚇ｃ人～不過唔好以為形勢會一面倒
今晚真係要俾個叻美國隊～咁都仲可以力保不失～
托迪被換出冇幾耐，迪比阿路就落場了～迪比阿路的出現令成隊意隊都好似唔同咗咁
對美國後防造成好多威脅～看得出來～迪比阿路真係好努力啊～佢出場之後，就無間斷咁聽到佢個名～未再得１球實在遺憾

>>June 18, 2006 at 10:33:43 AM GMT+8

2006 年 6 月 15 日 星期四 【晴】

世盃令人忙碌起來
每場賽事連中場休息要看２個鐘
這個星期花了很多個２個鐘
睇到個腦都成日塞滿草～足球場的草皮


〔墨西哥ｖｓ伊朗〕
不小心看到完場時，各墨西哥球員眼濕濕撲去攬住門將桑切斯，我就暗自決定要支持墨西哥一下。

〔澳洲ｖｓ日本〕
令人失望的日本隊，像患了射門恐懼症，埋到禁區都唔射，猶豫不決，要等到澳洲回晒防先射個預咗俾人攔截到的球。川口能活好嘢啊﹗撲救了好驚險的幾球，拉盡身先救到的波～你唔好理佢之後輸咗３球啦﹗淨係回味撲地拉盡身拍出的敏捷身手就ｏｋ啦﹗
另，中村俊輔果然係焦點所在。
賽前對日本隊係充滿信心的，因為佢多人到連上屆的小野伸二、稻本潤一都攝唔到入去打正選～諗住，實掂啦～人滿唔係患來架嘛～點知～～

〔法國ｖｓ瑞士〕
好一場悶波～冇速度冇威脅性射門～冇得睇巴夫斯表演。施丹總給人壓場的感覺，走出來像是天生的隊長～雖然變悶了～得了１黃牌啊～你要小心啦﹗

〔巴西ｖｓ克羅地亞〕
卡路士果真是最抵用球員～攔截見佢，中場傳送見佢，射罰球當然唔可以少得佢。上一秒見佢喺自家門前攔截球球，下秒已見佢起勢跑去中場～ｗｏｗ﹗３ｘ歲人了～還是這麼有活力。
睇到朗拿甸奴和卡卡並存的一場～究竟分開好？還是合作好？
朗拿度在幹甚麼？跟我一樣開始恰眼瞓了嗎？

〔西班牙ｖｓ烏克蘭〕
４：０的戰果，回味咗西班牙入的第４球兩日。禁區內外塞滿雙方１０幾個人，西班牙１傳１傳１傳１傳１傳１～喺咁擠迫的環境下短距離傳送，冇甩過腳，最後那個１一射～４比０；默契好得沒話說。被嘉燕點出的３金童︰費蘭度托利斯、路爾斯加西亞、韋拿也好得沒話說。
舒夫真高很不好受的，應該。不要落井下石啊﹗
沒機會看卡斯拿斯表演。

〔英格蘭ｖｓ千里達〕
賽前的焦點在高佬泉，上半場的焦點也在高佬泉＜在於他上半場的敗家，射門準確度只１０％。從來都不覺得他的身形是他的優點。上一役對巴拉圭，近龍門位置想鈎回被撞開的一球，用他超乎常人的幼的小腿一伸，掂都掂唔到個波，佢就好似唔了解自己隻腳的長和幼咁，以為有啲腿肚肥肉會接到波，可惜～你冇架～得條骨。
雖然佢下半場接應碧咸妙傳頭鎚入了１球，但，碧咸的功勞大啲啫～
這場波也有１下令我回味了兩天；已半入了英格蘭空門的一球，被泰利一下倒掛挑番出來。
我決定喜歡泰利了～
在他身上看到這句︰ＩＭＰＯＳＳＩＢＬＥ　ＩＳ　ＮＯＴＨＩＮＧ
坦白說，我是很支持千里達的，開場前看到碧咸和約基聚舊的畫面～好和平的感覺。
千里達少了想像中的粗野，倒給人很君子的感覺，球隊又充滿活力，有打不死的精神；之前和咗瑞典已令人另眼相看。
第１次入決賽週的球隊，臨完場８０幾分鐘，喺死角兩下扭過英軍後衛，傳中，入咗。
可惜～越位半步
未能射入千里達史上，世界盃決賽週的第１個入球。
全場的英格蘭粉絲都為這球可惜～可見，千里達的人緣不俗啊

〔瑞典ｖｓ巴拉圭〕
只看了精華～很精彩的球賽啊～不過唔知係咪因為ｃｕｔ晒的悶位～巴拉圭被救出的１球跟泰利的一球有異曲同工之處，可惜忘了是哪位～賽果真係唔可以太早下定論～８９分鐘，龍格保一個彈地的頭搥，令巴拉圭得０分～呵呵～

〔阿根廷ｖｓ科特迪瓦〕
想不到一面倒成咁～溫過書後，要留意基斯普、列基美+路易斯干沙利斯，同埋報紙話下半場會被派出場的美斯。
就好似朗尼咁，下半場中段，鏡頭一影住美斯，就換來全場的歡呼聲。年紀仲細過我細妹的美斯～咁淡定咁有自信～勁～喺外圈跑去接應隊友的一球，仲快過喺內圈跑的科特後衛，一射，救都救唔到了
難怪馬勒當拿咁喜歡他～不過我不喜歡馬勒當拿
上半場阿根廷只６次射門，但就４次中目標，造就３球入球
下半場再多入３球～都唔完全關阿根廷射門具威脅性事，而係科特個門將太唔掂了～有門將等於冇門將～唉～多得你

>>June 17, 2006 at 10:13:32 AM GMT+8

2006 年 6 月 9 日 星期五 【晴】

好搞笑～有呢個３娘教子的局面
希望好好味味啦～

夜晚喺元朗搵唔到睇波地點
裝到英格蘭得了個老烏～心急ｃ人了
焦急到
同４隻狗同處１室也在所不惜
幸好啲狗狗不是８個熱情
不過５個也夠嚇人了
最終都睇到～下半場
第１次賭波
巴拉圭只係輸咗１球姐
但我就輸咗２球，ａｄａ也是
ｆｉｏｎ就輸咗３球～呵呵
嚟緊既日子，辛苦了
想不到我也要成為徘徊於請假與不請假之間的人
下次要睇既就係法國ｖｓ瑞士，同巴西ｖｓ克羅地亞
直踩５個鐘～辛苦晒
難得大家又一齊咁癲

>>June 11, 2006 at 3:13:10 AM GMT+8

2006 年 6 月 8 日 星期四 【颱風】

星期５
又黑雨又紅雨又黃雨～啲雨真係多顏色
德樹古道大塞車
我哋都唔敢搭車去青衣城
容乜易放工時間先返到嚟
間住水去淮海匯～一腳濕晒
放工買定薯片嘢飲同優豬良品的「睇波豬選」～芒果乾小姐
夜晚捱眼瞓看了德國ｖｓ哥斯達黎加
德國隊最靚仔的仍是奇連士文啊～呵呵
所謂的青黃不接是指這方面吧～再呵呵
６分鐘入第１球～太兒嬉了吧
幸好哥斯扳回１球～哈﹗一面倒的賽事唔好睇既
好眼瞓啊～他們中場休息時
我也中場休息眠了個廿分鐘
聽日可以拎張ｇｅｒｍａｎｙ（我手上的唯１１張）去麥記ｌｕ～

給好兒的︰努力向前衝～像有金鐘罩～像有金剛炮～殺敵過河 ～～～
（這首歌聽得人好開心啊～）



星期４
哈．．．今日全日ｃｈｅｃｋ　ｐｒｏｇｒａｍ寫ｆｅｅｄｂａｃｋ寫得太投入
唔係８個趕的工作都做到７點至走
雞緣巧合之一就同油雞脾返元朗行街
收穫豐富啊
青ｂｂ的顏色幾趣喎
誤打誤撞仲去咗區區樂悠遊介紹的炒冰店吃甜品
要ｒｅｌａｘ下來了
今日好似星期５啊



星期３
晨早回到公司印錄音稿
８點就同嘉燕避過一群群的上班人
出發
早咗成個鐘
就用咗成個鐘坐喺義順嘆番個早餐
今次的錄音出奇的順利～
少咗好多啲別音字、翹口句
ｙｅａｈ～一切都太順利了
瘋癲了２個星期～今日已過了低潮
如同ｐｒｅｓｅｎｔａｔｉｏｎ完畢的感覺
搞了２星期令人沮喪的ｓｃｒｉｐｔ後
餘下的ｃｈｅｃｋ　ｐｒｏｇｒａｍ變成多麼美好的差使
雖然尋晚只瞓得３個鐘，下晝都金精火眼ｃｈｅｃｋ　ｐｒｏｇｒａｍ
今日仲去埋價真盞入貨添
買到ｄｅｎｉｓｅ介紹的ｃａｒａｍｅｌ　ｗａｆｅｒ
ｃａｒａｍｅｌ～ｍｙ　ｆａｖｏｕｒｉｔｅ　ｆｌａｖｏｕｒ
今日去咗ａｒｔ　ｃｅｎｔｒｅ上老師的班
得我１個舊同學
十幾個新同學不時裝我寫字
好驚～搞到我手都震
見到包氏今期有個ＭＡ班的畢業作品展
逛了逛
自我、抽像到難以理解～
已經唔係用靚唔靚去評價
也許是某種感覺的表現力吧～
不過
我真係唔明白

>>June 10, 2006 at 6:34:45 AM GMT+8