2004 年 6 月 29 日 星期二 【清涼】

琴日臨收工既時候，知道今日返公司之前要去晒草灣幫老細拎文件
都知道唔方有好野發生，果然真係俾我估中．．．
由係屋企出門口至抵達公司，我用左差唔多２個鐘，而我個飯盒就陪我曬足２個鐘
當然我個飯盒抵擋唔住咁熱既天氣而死左
而我當然唔知道，ｌｕｎｃｈ既時候食左．．．
之後，成個下午就不停肚痾肚痛，好辛苦＞＜

放工之後即刻買左速治靈，跟住出油塘幫老細拎文件
返到屋企個肚仍然好痛，攪到我死左係張床度
跟住原來發現我已經唔係肚痛而係胃痛
因為我之前連續食左２粒速治靈，個胃頂唔順
＊點解我可以咁黑仔？？！＊

>>July 2, 2004 at 11:01:09 AM GMT+8

2004 年 6 月 28 日 星期一 【清涼】

一返到公司就知道要幫老細去柴灣拎野，好震撼．．．
之後仲要拎住佢件野同佢攪中國簽證，仲驚訝．．．
我又唔知去邊度拎，而且更加未整過中國簽證，點算？？？
另外，知道要係２點前去到中旅社，攪到我真係勁趕
１１點幾就即刻飛出公司，閃去柴灣，跑去尖咀
去到中旅社真係勁樣衰．．．
不停問個櫃台哥哥問題，好似岩岩落黎香港，咩都唔識
之後又勁打電話俾老細，因為張ｆｏｒｍ既問題我唔知點寫好
攪到２點，個櫃台哥哥要出去食飯，我都未整好
不過佢就勁好人，食飯前特登走過黎同我講
「我宜家食飯啦，你有咩事就問我地其他同事啦～」
返到公司，連飯都未食，真係覺得自己好慘．．．＞＜

夜晚就出左銅鑼灣食壽司＆雪糕，好好食呀～
仲有粉紅色手鐲，開心開心^^

>>July 2, 2004 at 11:05:51 AM GMT+8

2004 年 6 月 27 日 星期日 【清涼】

呢個禮拜好坎坷，得一日假期ｊａ．．．
一起身就即刻走出街，約左ｋａｔｙ行街呀～
但估大家都好似冇咩ｍｏｏｄ，行左一陣就覺得好累（最低限度我覺得好累）
睇到閃兔出左手提電話既貼紙好靚，但我部電話唔用得，灰．．．＞＜
本來今日出黎行街，係想買返我條泡泡褲，點知買晒啦．．．
之後就坐低左傾計，其實我地好似傾計仲好過睇野
最後阿ｖｉｃｋ黎到就接走左ｋａｔｙ
＊不如我地下次直接搵個地方坐低傾計仲好啦～＊

返到屋企仲好早，所以就去左搵阿寶拎返我把傘，仲諗住買閃免袋
去到鋪頭但係就偏偏搵唔到，好失望．．．（點解今日想買乜都買唔到？）
突然之間，阿寶竟然同老板傾計，原來佢係識個老板架
哈哈，之後個袋仲有得平添呀～～
你好似冇啦啦變左人肉優惠券，不過之後買野就會平ｄ啦～

好緊張好緊張．．．
佢好似好惡，但又好似唔係好惡咁
雖然之前見過，但個感覺就唔同左

>>July 2, 2004 at 9:57:05 AM GMT+8

2004 年 6 月 26 日 星期六 【清涼】

放左工就返屋企等阿寶
大約八點半度就去搵佢
之後我不停咁睇「漂流教室」
今次係我第二次睇呢套漫畫，第一次睇既時候好似大約讀緊中一中二
因為ｏ個時仲係好細個，所以就覺得呢本野勁駭人，睇完之後仲發惡夢．．．
好驚好驚．．．＞＜
當然今次睇冇咁驚，但我仲好記得我當年睇既感覺呢

呵呵，有人輸左要拎傘～

>>July 2, 2004 at 9:38:45 AM GMT+8

2004 年 6 月 26 日 星期六 【清涼】

《天蠍座》

好野：
你是一個很忠心及信得過的朋友！十二星座之中以口密計，你都算數一數二！
你份人愛恨分明，他敬你一尺，你必定敬回十米！
你的直覺很強，洞察力亦不弱，很多時都能看穿別人的心，好厲害！
工作方面，你有堅毅不屈、深思熟慮及查根究底的精神；做事有條理又勇於承擔，所
以乃老闆信心之選！
感情方面，你天生便是性感女神，性感得來又熱情，在自己都不為意的情況下，已經
將身邊的人迷倒。
你可算是一個專一的人──當你遇到你認為值得愛的人時。
但你吸引的外表，通常都會惹來不少狂風浪蝶，定力足夠與否，完全視乎個別情況！


衰野：
悲觀很多時是你的致命傷！
除此之外，你份人太神經質、疑心很大、小氣、容易妒忌又好勝！
可憐的是你太過愛恨分明，只要你認為他有負於你，定必死無全屍！
做事太過理直氣壯，太過主觀，你認為是對的，就算錯了都要死撐到底！
感情用事是 你的強項， 衰心軟是你最常犯的錯誤。
多情的同時，更嚮往一段段的地下情或畸戀。
遇到這些情況時，通常你的口是心非性格又會出現，但請撫心自問，有點被虐待狂的
你，有時挺享受這種「得不到的愛情永遠是最偉大的！」變態感覺，陳小春的＜犯賤＞
最配合你深情！

都好中我呀．．．

>>June 26, 2004 at 3:34:30 PM GMT+8

2004 年 6 月 25 日 星期五 【清涼】

對眼腫到成隻蛋咁，好痛好痛，唯有戴眼鏡．．．好唔慣

成朝完全係體力勞動，爬上爬落整個書櫃
攪到好耐最後都整好，不過對手就好累
之後就呆坐，發夢．．．
仲有成朝都望住個電話，哼＞＜

夜晚，完全係口黑面黑
去左又一城，我完全提唔起勁行街，好敷衍咁行左一陣
之後返左去慈雲山明記，好回味好回味．．．
好瘋狂咁一齊食左一盒牛奶公司雪糕，咁大個女都未試過
返屋企．．．

希望你真係清楚知道我既諗法，有野就記住要出聱
否則你唔講，我真係唔知
我記得你今晚同我講過既野
另外，我希望以後大家都會開開心心，我真係唔想再喊

>>June 26, 2004 at 10:47:04 AM GMT+8

2004 年 6 月 24 日 星期四 【清涼】

老細正式返黎開工，攪到我忙到就黎死．．．
最無奈既就係我竟然要幫佢整返好個書櫃
我對呢樣野完全唔曉架＞＜
難得放工都要幫公司買野整個書櫃，唉．．．
累到嘔，連夜晚阿哥叫我出街，我都冇氣力
阿哥返黎後第一日同佢食晚飯，感覺好攪笑又有ｄ唔慣呢

夜晚，唔開心唔開心唔開心．．．
每日我都好努力好盡力，希望可以做到最好
但你好似唔知道，感受唔到，睇唔到
究竟係你定係我出錯？
喊左好耐好耐，我真係好累啦．．．

ｉ　ｊｕｓｔ　ｗａｎｔ　ｔｏ　ｂｅ　ｓｉｍｐｌｅ
難聽既說話，以後都唔好再講

>>June 26, 2004 at 10:49:11 AM GMT+8

2004 年 6 月 23 日 星期三 【清涼】

老細今日會由漢城返黎，死啦，我聽日冇得玩啦＞＜
朝早媽媽打電話俾我，約我今日去佢屋企食飯
哈哈，我差ｄ都唔記得左添，我地都有成２年冇見，好期待呀～
今日既我仍然都係好ｈｅａ，咩野都唔想做呢．．．

媽媽原來住係我公司對面既康華園，所以我放工行兩步就到，好方便～
一見到佢既時候，佢好似瘦左，而且又唔肯戴眼鏡，不過整體黎講都冇變
上到佢屋企，佢既２個好可愛既仔仔都好開心咁歡迎我
佢地一個２歲，一個４歲，個樣同佢地爸爸好似～
唔知點解，大仔佢唔理係我既面或者咀，都不停錫落黎，好攪笑呢
而且有時仲要我抱佢，玩騎膊馬，總之就不停玩
而細仔佢就唔知點解仲未識講野，只係講一ｄ好奇怪既發音
不過佢中文同英文都識聽，勁～
今晚有好多「食送」，而且仲好好味添～
最開心就係有湯飲，係紅蘿蔔木瓜雪耳南北杏，正！
食到激飽，媽媽同佢老公就開車送我返屋企
真係好多謝你地今晚請我上黎食飯，ｔｈａｎｋｓ
下次你地黎我屋企既時候，我就請返你地食野啦～

因為之後約左阿寶，所以就即刻返上屋企諗放低ｄ野先
點知當我係屋企門口既時候，突然有個好長頭髮既男人開門
而且仲俾我見到佢對好多毛既腳（好嘔心．．．）
佢仲要好串咁話「搵邊位呀～～？」我聽完即刻呆左，佢就即刻「山」埋門唔理我．．．
究竟係我入錯門口，定係屋企突然多左個怪男人？？？
之後我再諗，就知道佢係邊個！
佢就係我阿哥呀，超開心囉～～～
佢冇啦啦今晚坐飛機返黎，諗住俾個驚喜我地，哈哈，我地真係估唔到，好驚呀～
佢宜家個頭好似做賊咁，頭髮勁長
之後佢就話要落埋樓下，見下阿寶，哈哈，咁咪一齊落去囉～
而且我仲好衰咁諗住嚇下阿寶，嘻嘻．．．

點知阿寶一見到我拖住個男仔，就成個人呆左傻左
當然我見到個勢唔係好妥，就即刻介紹啦～
阿寶知道佢係邊個之後即刻冇事，真係唔好意思呀，我諗住玩下架ｊａ．．．
我地３個之後就坐左一陣，阿哥佢勁ｃｈｅａｐ囉
冇啦啦整走左我隻鞋，攪到我冇鞋著住咁去拎返，衰人！

佢冇啦啦返左黎，我又要訓「騎樓房」啦，唉．．．

＊既然都清楚大家心意，就唔好再假設將來未知既野，好唔好？＊

>>June 24, 2004 at 11:55:21 AM GMT+8

2004 年 6 月 22 日 星期二 【清涼】

大約２點幾３點就出左將軍澳我表哥度玩狗
小賊佢宜家肥左好多呀，由一隻狗變左做一隻羊．．．
其中，最好笑既就係我表哥捉住左小賊既前腳，要佢只係用後腳黎行
但係佢行既時候個樣好似同我表哥跳緊舞咁
個樣又邪惡又抵死，笑到我眼水都出埋～～

之後就去左新城市度行街買野
夜晚就同親戚一大堆人去左大排當度食，８個人都係二百幾蚊ｊａ～
食到好肥好肥咁返屋企．．．

＊因為之前都冇聽你提起過，所以覺得有ｄ震驚同唔開心＊

>>June 23, 2004 at 11:47:37 AM GMT+8

2004 年 6 月 21 日 星期一 【清涼】

今日係公司仍然非常開心，因為我老細仲係出ｔｒｉｐ未返，正呵～～
１）１７～１９／６　馬來西亞－吉隆坡
２）２０～２３／６　南韓－漢城
但係佢好快就返黎，我就快冇得玩啦．．．

今日我４：３０就閃左，要去炮台山幫鬼佬換ｐｒｉｎｔｅｒ舊墨
其實都有少少唔好意思，因為我都拖左好耐先幫佢換，希望佢唔好介意啦
去到炮台山都唔知乜野地方，成個白痴仔咁拎住張地圖黎搵
而且天氣又熱，舊ｐｒｉｎｔｅｒ墨又重，好辛苦呀＞＜
去到維修公司度，等左好耐，佢地先理我
佢俾返張收據我既時候，竟然寫錯左我個名，灰．．．
攪好晒都成５點九，所以就唔再返公司，直接拎埋舊野去染頭

決定左染一個紅色既頭，但唔係成個頭都染晒，只係染頭髮既最底層
唔知你地見到既時候覺得點呢～
就黎染完既時候，你竟然都係佐敦
哈哈，你係第一個見我個新髮型既人，唔知你覺得點呢？
我相信天使會永遠留係我身邊，我亦相信你講既野
＊我真係好驚呢．．．＊

染髮既時候，髮型師同我＆另一個女仔係度傾計
話題環繞住女仔應該守身如玉，唔好咁快同人發生性行為
髮型師哥哥話，男人係一種好奇怪既生物
佢地會好介意自己鍾意既女仔唔係第一次，認為佢地會成日出去玩，唔專一
另外，男仔仲會覺得自己唔係第一手，會唔鍾意，甚至會揀過第２個
髮型師哥哥仲話－－－「男人玩多ｄ好，女人就唔好玩咁多」

呢番說話如果由我父母同我講，我真係當佢地講廢話
但唔知點解，呢一刻，我真係好留心咁聽
男人個腦究竟諗緊咩？好難明．．．

>>June 22, 2004 at 1:17:05 PM GMT+8