2004 年 2 月 6 日 星期五 【乍雨乍晴】

依家 ge 氣溫係攝氏 9 度
我真係唔明點解香港要咁凍 ~
日日都係咁 ... 好折磨呀 ....

今日全日都離不開英文同埋豬扒飯 ~
朝早返左去英文補課
跟住返到屋企聽左兩隻英文 CD
好細心咁逐隻字睇逐隻字查
有少少疲累 ~
夜晚食飯係豬扒同埋飯
但係我食食下 ge 途中先醒起
原來中午果陣先食完兜焗豬扒飯 ...
Oh .... 我依家個腦有好多豬扒 ...

今日精句 : 睇三級片同飲食節目 ge 共通點就係有得睇冇得食 ( 鳴謝某 IQ 題提供 )

>>February 7, 2004 at 4:36:08 PM GMT+8

2004 年 2 月 5 日 星期四 【乍雨乍晴】

嗚 ... 今日我 ge 病情更加嚴重
除左咳之外仲係咁流鼻水
攪到我 " 伸 " 左 4 包 tissue ...
依家我人中一帶 ge 位置好痛 ...

我今日就係同如湧泉泉流出黎 ge 鼻水搏鬥左一日
終於響第三堂 ge 中史倒下 ~
跟住就係連續五堂 ge 英文 ~ 真係好 ~
呵呵 ......

今日精句 : 飲 " 嘉士伯 " ~ 憑 " 積分 " 換 " 米奇 " ~ ( 鳴謝小玉修正 )

>>February 7, 2004 at 7:55:45 AM GMT+8

2004 年 2 月 4 日 星期三 【乍雨乍晴】

好 ... 鬼 ~ 死 ~ 凍呀真係 ... !!!
嚴寒再加埋淫雨霏霏 ge 日子真係 ...好討厭 !!!
咁凍 ge 日子仲要人返學 ... 真係唔人道呀 ~
呢兩日我都病病地 ...
久違了 ge 咳嗽終於都黎左拜候我 ~
個喉嚨又痕又痛 ... 痕到我好想伸隻手入去 " R " 呀 ~
又唔敢太用力咳 ... 痛死了 ~

今日仲衰 tim ...
已經病 ga la ~ 仲要加埋遲起身 ...
我真係掙扎左好耐先決定返學
落到去 ... 發覺冇帶遮 ~
唉 ... 竟然要一個病人 dup 住雨咁衝返學 ...
我真係唔識形容有幾咁無耐 ~

不過今日派中文作文
比蓮姐 ge 評語讚到我飄飄然 ~
真係第二個讚都冇咁 high 呀 ~
仲話我個總結發人深省
我竟然感化到佢 ~ 呵呵 ...
我得閒應該寫返篇《 諫蓮表 》比佢先得啦 ~ keke ...

今日精句 : 花咁多錢去買 SK2，不如將果舊錢袋響袋仲開心 ~ ( 鳴謝張 Sir 提供 )

>>February 5, 2004 at 1:09:25 PM GMT+8

2004 年 2 月 2 日 星期一 【乍雨乍晴】

呵呵 ... 繼 LL 之後，又一位精神偶像啦 ~
大家歡迎 WW ge 誕生 ~
估唔到我同我呀妹 D taste 都幾唔多呀下 ~
今晚我同佢談論呢個問題講到眉飛色舞 ~
仲知道有咩人響低 form 有知名度
原來 ... 我都有 D ga ~ 呵呵 ...
不過都唔夠我 D 朋友仔勁 ~

死啦 ... 好凍 ... 喉嚨又痛 ...
好有衝動聽日請假呀 ~
呀 ~ 有 D 野要提醒大家
如果發現自己或你 ge 伴侶有病
就唔好打咁多車輪啦 ~ 呵呵 ...

今日精句 : 我偶像真係醜樣得黎又非常之咁靚仔 ~

>>February 3, 2004 at 3:22:58 PM GMT+8

2004 年 2 月 1 日 星期日 【炎熱】

Sport Day ge 後遺症真係多 ~
繼有我喉嚨撕裂之後，今日有好多同學仔都冇返到學
個個一係病下病下 ~ 一係損手爛腳 ~ 真係陰公 ~
都唔知點解 Sport Day 之後會冇放 ...
唉 ~ 無良學校 ~ !!

放學見返好耐冇見 ge 朋友仔 ~
我地真係好似好耐好耐冇見啦 ~
唔知點解，果刻心情好難形容 ...
係久別重逢丫 ? 定係勾起以前 ge 回憶呢 ?
我知我地的確錯過左好多野
結局同預期中完全唔一樣 ...
不過當我今日見返你
我真係好開心 ! 開心到唔知講咩好 ~
擁抱好朋友 ge 一刻，好溫暖 ...
前所未有咁溫暖 ~
話別 ge 一刻 ... 有 D 唔捨得 tim ...

今日精句 : There will be the answer , let it be ( 鳴謝黎 Sir 提供 )

>>February 2, 2004 at 4:28:35 PM GMT+8

2004 年 1 月 30 日 星期五 【微冷】

首先要多謝安格斯同學 ~
好好人咁送左張 " 魔幻廚房 " ge 飛比我 ~
所以呢，我今日就響好多人話唔好睇 ge 情況底下去左睇呢齣戲

個個都話唔好睇，當我睇完套戲我明白點解 D 人會咁講 ~
首先，呢齣戲唔係咁商業，其次係佢故事性唔強
不過我倒覺得齣戲幾有趣 ~
有趣 ge，唔係在於佢 ge 劇情
而係在於對人，尤其係女性 ge 描寫
戲入面出現好多好多 ge " 人 " ，例如吳彥祖、黃秋生、馮德倫等
其實就係反映左呢個社會上，有好多不同 ge " 人 "
但係呢 D 完全唔同 ge 人，又會好自自然然咁走埋一齊
人來人往，十分寫實，現今社會亦正正就係咁

至於女性方面 ge 描寫就更加深入，更加有趣
戲中有提及好多愛情方面 ge 觀念
所以會好似睇緊一本小說咁
可能咁樣 ge 表達手法香港人唔係太接受掛 ~
但其實好多幕都絕對值得去再細味一下
而其中一幕以眾人食大閘蟹比喻唔同人 ge 性習慣亦十分抵死 ~ !

總括而言，" 魔幻廚房 " 將人與人之間 ge 關係刻劃得唔錯
而三位女角 ge 人物性格描寫，特別係 Maggie Q 飾演 ge 傅薇相當有趣
人靚景靚，拍攝鏡頭亦見水準，十分賞心悅目 ~
但係有一樣野一定要彈 ge，就係配樂方面 !
本來選曲係值得一讚，不過落歌 ge 時間掌握實在係太差 ( 慕容優與傳佑相遇幾幕除外 )

好多時睇戲又好，聽歌又好，好多野都係咁
都耍睇下你抱一個咩心態去睇佢
我諗，呢個就係" 魔幻廚房 "未獲好評 ge 原因

今日精句 : 煮野食同造愛一樣，要先清楚對手 ge 特質先可以發揮到佢 ge 最高水準 ( 鳴謝" 魔幻廚房 "提供 )

>>February 1, 2004 at 5:45:48 PM GMT+8

2004 年 1 月 29 日 星期四 【炎熱】

好多人都問我點解唔玩陸運
其實我唔係好識答 ...
我唔係吝嗇我 ge 力氣
更加唔係因為我唔愛社
而真係有太多太多原因令我唔想再參加呢 D 比賽
我細個果時真係好鐘意運動
鐘意 ge 程度同依家鐘意音樂差唔多
近呢幾年我咁憎當然係有 D 不愉快 ge 原因
既然係不愉快，倒不如唔好提 ~
希望大家都唔好追問 ...
因為我真係會啞左，唔識答你 ...
相信有緣 ge 話大家就會自自然然知點解

就係咁，我今日就全程投入響 cheer 入面
亦都因為咁，我依家個喉嚨痛到就快撕裂 ... 唔敢出聲講野 ...
其實我都唔應該嗌辛苦
因為其他人真係為左 cheer 努力過我好多好多
不過我今日真係盡晒力咁嗌同埋叫人嗌 ga 啦 ...
雖然最後 cheer 都輸左，但係拎左全場總冠軍都抵返晒啦 !
呵 ... 今日係我第一次有得"猛"車邊影社 ge 相 ja ~ 好高興 ~ !!

不過高興都要付出少少代價 ...
唉 ~ 比人鬧 ~ 激死我啦 !!

今日精句 : 唔開心 ge 野最好就唔好提，必要時最好忘記埋佢，忘記唔到都要扮唔記得

>>January 30, 2004 at 2:15:53 PM GMT+8

2004 年 1 月 28 日 星期三 【微雨】

呀 ... 大獲啦呢次 ....
我依家個喉嚨好痛呀 ....
都係今日個 Sports Day，嗌到我傻 ...
我真係出盡力嗌 ga la ... 不過都唔夠大聲 ~
只怪我天生把聲柔情似水 ~ 呵呵 ...

本來今日都真係好唔想返
朝早又凍，又要著 PE 衫 ... 核核突突咁
不過橫掂都要返，索性投入 D
咁先冇咁悶，不過我個喉嚨就慘啦 ...
之後去左九龍城陪佢地練 "啦啦"
其實我真係覺得幾好 ga bor !
第一都唔係冇機會
不過啦啦隊真係好睇o岩唔o岩評判口味 ~ 好難估
祝 Coral 好運 !!

今日精句 : 真係唔可以諗住個個都接受到你，縱使係好朋友。

>>January 29, 2004 at 4:08:09 PM GMT+8

2004 年 1 月 27 日 星期二 【颳風】

Hello every body ~
我終於都回歸日記啦 ~
好感動呀 ~

今日我用左大量 ge 元氣黎同我部腦施手術
大家冇睇錯 ~ 我亦冇打錯 ~
的而且確係我醫返好我部癱瘓左 ge 電腦 !
不過我今日真係好驚 ....
我好驚會醫唔返好佢 ....
唉 ~ 我份人就係咁 ~ 乜都驚一餐 ...
有時我真係覺得自己好冇用
做任何事都畏首畏尾
好似真係未試過向住目標勇往直前
今日都係一樣，我真係好叉驚
攪左好多次都唔得 ... 又插錯掣又整漏野
縱使依家部腦都仲有 D 後遺症
佢比我整到佢啞左 ...
唉 ... 原因不明 ........

仲有樣野我一定要講 !!!
我都唔明點解呢間學校好學唔學 !
學人放少幾日假 !!
呢兩日我返學 ge時候一個學生都見唔到 ~ 真係好無奈 ....
所以今日我詛咒左執行放少幾日假 ge 人好多次
哼 ... 我詛咒你 .... 我詛咒你 ....
聽日仲有陸運會 ...
唉 ~ 一萬個唔想去 !

p.s. 多謝一直替我電腦頌經祈福 ge 朋友仔 ~ 仲有今日幫我鑑定佢病因 ge 靚仔 !

今日精句 : 有時你幾驚幾想人幫都冇用，最後原來都係要靠自己 ( 鳴謝病榻中 ge 電腦啟發，並祝早日康復 )

>>January 28, 2004 at 3:17:53 PM GMT+8

2004 年 1 月 25 日 星期日 【乍雨乍晴】

首先要多謝阿寶先 ~
多謝你幫我部垂死 ge 電腦祈福 ~
老實講，佢依家仲未康復
我打到日記都係多謝 Stella 拔刀相助
感激 !!

呢個假期我用左好多時間響大陸
做 ge 野都係食、食同埋食 ~
同完呢個食，又要同果個食
除左食之外我都好似真係咩都冇做過 ...
不過食左咁多餐，心情都唔同
原來同自己鐘意 ge 親戚食飯真係開心好多
好少我會食到有幸福 ge 感覺 ~
今個新年都有一次咁多啦 ~
我仲記得阿甄有日日記 ge PIZZA 理論
真係好好 ~ 我今次都有咁 ge 感受

相信睇過《 行運一條龍 》ge 人都應該記得吳孟達講過一句 " 年初四咁樣 "
年初四係一個人響一年之中最樣衰 ge 一日
皆因果日假又放完 ~ 錢又用晒 ~ 工又要返 ~
唉 ... 聽日就要返學啦 ...
我諗我應該係年初六咁樣至o岩 ...

*+*+*++*+*+*+*+*+*+*+*+*+ Happy Birthday to Edfeel *+*+*+*+*++*+*+*+*++*+*+*+

今日精句 : 真正美味 ge 食物唔係在乎果樣係咩，而係在於同咩人食

>>January 26, 2004 at 4:11:13 AM GMT+8