2005 年 1 月 10 日 星期一 【微冷】

最近無論生理同心理都好唔穩定 ...
上堂會突然之間好眼訓，又會突然之間好精神
尋日會想 drop 中史，今日就想 drop Geog ~

呢 D 生活十分怪異啊 ... ~
就黎考試但係一 D 都唔想溫書
好似唔著緊但諗起又有 D 驚 wor
真係頂你個肺 ~

今日有朋友同我講，如果要佢諗傾訴對象第一個會諗起我
當然開心，不過我會即刻諗下我 ge 傾訴對象係邊個
好好彩，我閃左好多答案出黎
其實自己都幾幸運，起碼我想搵人傾計 ge 時候都有人肯理我
唔知你地唔開心又會唔會諗起我呢 ?

+*+*+*+*+*+*+*+*+*+*+*+*+ Happy Birthday to 阿得 +*+*+*+*+*+*+*+*+*+*+*+*+*+

今日精句 : 搵一個好 ge 傾訴對象難，有一個真心肯聽你傾訴 ge 對象更難。

>>January 11, 2005 at 4:28:58 PM GMT+8

2005 年 1 月 9 日 星期日 【颳風】

今日抱住一個唔係咁好 ge 心情返學
真係心情仍然很爛 ...

依家我都唔係好知自己想點
我淨係知我乜都唔識
返學又返得唔開心 ...

今日派左本身我以為自己得 2 分 ge History Test
點知都有 8 分 ~ 解錯晒題目都算係咁啦 ~
正當我呢兩日好想drop 中史 ge 時候
今日又派左一份幾令人滿意 ge 卷返黎
呀 ... 我就快癲 ga la ... @@

今日精句 : 誰人曾厭棄你，你問問自己他憎你什麼，或是怕你會肚餓。( 鳴謝林夕提供 )

>>January 10, 2005 at 4:26:56 PM GMT+8

2005 年 1 月 8 日 星期六 【炎熱】

大家唔好誤會，我唔係憎呢個老師
而係佢咁樣睇我，令我感到好失望
我依然會尊敬佢，不過我已經心淡了

尋晚見到華仔拎最受歡迎男歌手
好開心，有一點點感動
好一句失而復得
記憶中 ... 我真係好似未試過失而復得
無論如何 ~ 我都愛華仔 ~ yeah !

另一個值得留意 ge 係何韻詩
唉 ~ 真係好慘呀 ~
佢年頭隻《 Dress me up 》真係做得好好 ga ...
無奈地比人掟左去做司儀 ...
叱吒又明明第三變冇獎 ... ><

今日精句 : 唔知一個歌手頒一個自己都好想拎 ge 獎比另一個歌手 ge 感覺係點呢 ? ( 鳴謝阿喱提供 )

>>January 10, 2005 at 12:33:32 PM GMT+8

2005 年 1 月 6 日 星期四 【微冷】

估唔到今日要用呢表情 ...
Happy Friday 竟然可以如此悲慘 ...

今個禮拜好努力咁趕功課，日記都唔想打
仲有面對唔知幾時定好左 ge 測驗 ...
好可惜星期二 ge History Test 我完全理解錯左條題目
自此我就豁了出去 ~ 書都唔溫了 ~

尋日一隻披住人皮 ge 野獸又響我面前張牙舞爪
一個 " 人 " 點解可以咁冇修養 ga ?
枉佢讀左咁多年書 ~
基本人格都冇，讀幾多書都只係讀屎片 ~

今天受了很大很大的委屈 ...
感覺就像被好友出賣 ...
我自問多年來循規蹈矩，尊敬老師
多討厭某老師也好，眾人面前總會比面
今天換來的是一個最壞罪名
以往所做的，七年積下來的，全是多餘 ...
這件事我真的很介意很介意
因為對我來說，被一位老師討厭是一種恥辱
為了見證在九龍塘最大的委屈
我偷偷的用了這年第一滴眼淚來紀念 ...

今日精句 : 在別人背後做的事，最偉大，亦最愚蠢。

>>January 7, 2005 at 8:40:06 PM GMT+8

2005 年 1 月 2 日 星期日 【微冷】

冬天確實係一個唔適合人類活動 ge 日子
遲來 ge 寒流，真係令我呢幾日十分痛苦 ...
呢個假期就係同我張羽絨被相依為命 ...

聖誕假 " 嗖 " 一聲就過左，我係乜都冇做過 ge ...
為左減輕我 ge 罪惡感，尋日好快手咁做左份中史 book report
今日返到學校先知 ... 原來勁勁勁多功課要做，仲要 test tim @@
不過我今日用心再諗，就算比多十日假期我我都係 hea 左佢
有時候就算明知自己揀錯，但比多次機會我揀都依然會中個頭埋去 ...
所以快 D 返學都唔係唔好 ge，可以殺咁 D 懶惰細胞

原來五件衫 ge 威力真係好大 !
奇蹟地我今日一 D 都唔覺得凍 ~
仲鬼打都冇咁精神 ~
但係代價就係個身肥左一個碼 ...

今日精句 : 有時候就算明知自己揀錯，但比多次機會我揀都依然會中個頭埋去 ...

>>January 4, 2005 at 3:41:23 PM GMT+8

2004 年 12 月 31 日 星期五 【乍雨乍晴】

" 我鐘意鄧萃雯，我鐘意何秀蘭，因為係佢地話比我知，拎唔到獎唔代表輸
我有時寧願得唔到獎比人"鄧"我唔抵，都唔寧願拎到獎而人地覺得我唔值 ! "
Wyman 響今晚 ge 叱o宅頒獎禮中得到填詞人獎後有感而發。

一月一號聽到呢句說話，再回望 2004 年，令我感同身受
的確，我係一個好恨拎獎 ge 人，2004 年亦係我 18 年黎拎得最多獎 ge 一年
不過我冇特別開心 ... 因為有時候我都質疑自己究竟值唔值得拎
我終於明白點解當年林嘉欣拎最佳新人好開心，但再拎埋最佳女配角會咁失落
當自己都認為自己未到呢個階段，拎獎可能唔係一件開心 ge 事

04 年最開心，最令我感動 ge 事應該係會考放榜
得到一個自己都估唔到 ge 分數當然開心
但係我最開心 ge，係見到我身邊 ge 人會為左我開心而開心
呢種幸福 ge 感覺好珍貴，真係難以形容

感情生活有 D 不可思議 ...
可以話經歷左好多，亦都可以話係原地踏步
占卜結果似乎亦唔多準
九月至十月，我冇棄舊
十一至十二月，我亦冇迎新
總括黎講，我仍然係一碌賣唔出 ge 淨蔗
不過，我開心 wor ~ 吹咩 ? 呵呵呵呵 ...

因為《 地平線 》...
因為《 龍鳳鬥 》...
因為黃霑的離開 ...
因為一場無情的海嘯 ...
因為 04 年很多很多事 ...
我更加懂得愛人，愛自己。

+*+*+*+*+*+*+*+*+*+*+*+*+ Happy New Year 2005 +*+*+*+*+*+*+*+*+*+*+*+*+*+

今日精句 : 我有時寧願得唔到獎比人"鄧"我唔抵，都唔寧願拎到獎而人地覺得我唔值 ! ( 鳴謝黃偉文提供 )

>>January 4, 2005 at 3:17:25 PM GMT+8

2004 年 12 月 29 日 星期三 【乍雨乍晴】

無須爭拗，喜愛就是喜愛 !
這就是我的 2004 年樂壇小總結

2004 十大我最喜愛歌詞 :

林夕《 小城大事 》( 收錄於 楊千嬅 《 Electric Girl 電光幻影 》)
林夕《 飄流教室 》( 收錄於 古巨基《 大雄 》)
林夕《 如果我有事 》( 收錄於 劉德華《 Coffee or Tea 》)
林夕《 士多啤梨蘋果橙 》( 收錄於 Twins《 Twins Magic 》)
黃偉文《 忘 》( 收錄於 何韻詩《 Dress me up 》)
黃偉文《 沙 》( 收錄於 何韻詩《 Dress me up 》)
黃偉文《 地平線 》( 收錄於 官恩娜《 Original 》)
藍奕邦《 自知之明 》( 收錄於 藍奕邦《 不要人見人愛 》)
劉德華《 娛樂大家 》( 收錄於 梁詠琪《 [ ente'tein ] 娛樂大家 》)
易家揚《 同類 》( 收錄於 孫燕姿《 Stefanie 》)


2004 十大我最喜愛旋律 :

F.I.R.《 Lydia 》( 收錄於 F.I.R.《 F.I.R. 飛兒樂團 》)
周杰倫《 戰爭》( 收錄於 陳冠希《 Please steal this album 》)
周初晨《 白麵包 》( 收錄於 傅佩嘉《 一夜成名 》)
方樹樑《 一拍兩散 》( 收錄於 容祖兒《 9ine 2 5ive 》)
顧嘉輝《 翡翠劇場 》( 收錄於 黃耀明《 明日之歌 》)
伍樂城《 冬令時間 》( 收錄於 Twins《 Such a Better Day (新曲+精選) 》)
劉祖達《 如果我有事 》( 收錄於 劉德華《 Coffee or Tea 》)
林潤明《 一分鐘之後 》( 收錄於 鄧健泓《 新居入伙 》)
方樹樑《 奇洛李維斯回信 》( 收錄於 薜凱琪《 F Debut 》)
馮家能《 世界之最 ( 你願意 ) 》( 收錄於 鄭秀文《 La La La 》)


2004 十大我最喜愛編曲 :

舒文《 沙 》( 收錄於 何韻詩《 Dress me up 》)
舒文《 煙霞 》( 收錄於 容祖兒《 Give Love a Break 》)
王雙駿《 心眼 》( 收錄於 鄭希怡《 Perfect Date 》)
Terence Teo《 同類 》( 收錄於 孫燕姿《 Stefanie 》)
洪信傑《 忽然單身 》( 收錄於 容祖兒《 獨照 》)
F.I.R《 妳的微笑 》( 收錄於 F.I.R.《 F.I.R. 飛兒樂團 》)
Eugene Pao 《 藍、白、紅 》( 收錄於 官恩娜《 Original 》)
張亞東《 我愛你，再見 ! 》( 收錄於 鄭秀文《 La La La 》)
雷頌德／T.Lo 《 紙醉金迷 》( 收錄於 陳慧琳《 Grace & Charm 》)
伍樂城《 士多啤梨蘋果橙 》( 收錄於 Twins《 Twins Magic 》)

2004 十大我最喜愛演繹 :

盧巧音《 刺 》( 收錄於 盧巧音《 花言巧語 》)
容祖兒《 溶 》( 收錄於 容祖兒《 9ine 2 5ive 》)
王菲《 不留 》( 收錄於 王菲《 將愛 》)
陳冠希《 尼古丁 》( 收錄於 陳冠希《 Please steal this album 》)
Ping Pung《 潮爆 》( 收錄於 Ping Pung《 Love & Hate 》)
何韻詩《 元神出竅 》( 收錄於 何韻詩《 Dress me up 》)
黃耀明《 畫出彩虹 》( 收錄於 黃耀明《 明日之歌 》)
官恩娜《 藍、白、紅 》( 收錄於 官恩娜《 Original 》)
鄭秀文《 我愛你，再見 ! 》( 收錄於 鄭秀文《 La La La 》)
Twins 《 士多啤梨蘋果橙 》( 收錄於 Twins《 Twins Magic 》)

2004 十大我最喜愛歌曲 :

何韻詩《 忘 》( 收錄於 何韻詩《 Dress me up 》)
孫燕姿《 同類 》( 收錄於 孫燕姿《 Stefanie 》)
鄧健泓《 阿琴 》( 收錄於 鄧健泓《 新居入伙 》)
官恩娜《 地平線 》( 收錄於 官恩娜《 Original 》)
F.I.R.《 妳的微笑 》( 收錄於 F.I.R.《 F.I.R. 飛兒樂團 》)
楊千嬅《 小城大事 》( 收錄於 楊千嬅《 Electric Girl 電光幻影 》)
容祖兒《 一拍兩散 》( 收錄於 容祖兒《 9ine 2 5ive 》)
劉德華《 如果我有事 》( 收錄於 劉德華《 Coffee or Tea 》)
鄭秀文《 我愛你，再見 ! 》( 收錄於 鄭秀文《 La La La 》)
Twins《 士多啤梨蘋果橙 》( 收錄於 Twins《 Twins Magic 》)

2004 十大我最喜愛專輯 :

劉德華《 Coffee or Tea 》
同一題目兩式歌詞，意念創新，全碟訊息積極正面，具深層意義

容祖兒《 9ine 2 5ive 》
從朝九到晚五為時限，都市感強烈，連貫性曲序編排令專輯完整性更強

鄭秀文《 La La La 》
勇於嘗試，多首作品成功拋開舊影子，具多變的演繹方式，誠意之作

官恩娜《 Original 》
將各首作品的創作者特色演繹得很稱職，亦見歌手個人風格

Twins 《 Twins Magic 》
隨 2003 年逆境而生的打氣產物，以積極人生態度為主題，風格漸趨成熟

F.I.R 《 F.I.R. 飛兒樂團 》
注入大量日本電子音樂元素，每首作品風格各異，感覺卻統一

何韻詩《 Dress me up 》
一人分飾多角，將世界上不同的人物表現得很立體，同時不失玩味

陳冠希《 Please steal this album 》
開創香港樂壇 Hip Hop 路向，與商業元素融和，探討問題層面廣闊

薜凱琪《 F Debut 》
每首作品皆以不同唱腔演繹，全碟感覺統一，釋放少女情懷

Ping Pung 《 Love & Hate 》
青少年心態描畫細緻，將愛與恨推向至極，演繹令人眼前一亮

>>December 29, 2004 at 5:20:58 PM GMT+8

2004 年 12 月 25 日 星期六 【微冷】

通左一晚頂，今朝 9 點幾先訓
一訓醒成 6 點，天都黑埋 ...
十分恐怖 ...

本身今日真係好疲累 ... 但係星期日 ge 關係都要陪下屋企人出街食飯
夜晚睇左一個不知所謂 ge " 頒獎禮 "
突然好掛住以前每逢有頒獎禮就會同 Joanna 一齊討論 ge 日子
唔知幾時再有咁 ge 機會呢 ?

今日上演左一幕真實 ge《 明日之後 》
8.9 級 ge 地震同併發 ge 海嘯，令東南亞國家傷亡慘重 ...
再一次令我感到，呢個世界上有好多人其實都係響唔知咩事 ge 情況下魂歸天國
難保我有一日又係死左都唔知咩事
所以要響度同我 ge 朋友講句 : 我愛你地呀 ~
不過點解我地永遠都係有災難發生 ge 時候先會諗下珍惜眼前人 ge 呢 ... ?

+*+*+*+*+*+*+*+*+*+*+*+*+*+* Happy Birthday to Nicky *+*+*+*+*+*+*+*+*+*+*+*+*+*+*+

今日精句 : 前路要撐下去，就算只得一個人。 ( 鳴謝黃伊汶提供 )

>>December 27, 2004 at 8:22:50 AM GMT+8

2004 年 12 月 24 日 星期五 【炎熱】

尋晚平安夜同好朋友去左食飯行街 ~
其實都係出去同人迫下，感受下聖誕氣氛
不過好老實講 ... 今年真係冇乜氣氛 ~ 大概太熱了吧 ~

今晚好幾位朋友問我幾時搵返個
其實點解係 " 搵 " 呢 ? 刻意搵一個人然後鐘意佢，未免攪笑左 D ~
仲有點解要 " 搵 " 呢 ? 依家有一個我鐘意 ge 人，而我又咁開心，有咩問題呢 ?
愛一個人係一件好開心 ge 事黎 ga 嘛，唔洗喊苦喊忽姐 ~
記得第一次面對 " 朋友一一出閣 " 我內心的確有 D 戚戚然
但係到左今時今日，我會感到好安慰 ~ ( 死啦 ... 心境真係愈黎愈老 ... )
今晚見到你地一相一對，我撫心自問真係半點冇唔開心 bor ~
可能我已經習慣了，咁多年黎如果有幾咁唔開心都係自己攪掂
家陣聖誕節咁普世歡騰 ge 日子難道會令我情緒低落 ? 太荒謬了 ~

今日訓醒覺都未回氣又要出去 lu ~
皆因朋友仔生日，所以要買禮物 ~
之後入左大埔參加他的生日派對 ~
很累啊 ... ><

+*+*+*+*+*+*+*+*+*+*+* Merry Christmas to My Friends *+*+*+*+*+*+*+*+*+*+*+*+

今日精句 : 這是我的決定，就算人家戴著鑽石耀眼許多。( 鳴謝黃偉文提供 )

>>December 27, 2004 at 8:22:09 AM GMT+8

2004 年 12 月 23 日 星期四 【微冷】

今日係學校 ge 基斯麥派對 ~
一早出左門口買野飲比班大食同學
響又一村托到我死下死下 ~

排緊隊 ge 時候見到有個人著旗袍
真係笑到我甩碌 ...
我諗夜晚見到都幾驚 ~

一開始係公佈歌唱比賽結果
自負 D 都不得不講一句 ~ 6A 勁勁呀 !!
最受歡迎男、女歌手、組合都拎晒 ~ 呵呵 ...
好慶幸自己可以同阿敦 & Carrie 合作 ~
同時都恭喜兩位成為本年度九記最受歡迎男、女歌手

之後係 Drama 同 fashion show
好難得有得做 fashion show評判
不過都有 D 矛盾 ... 因為有高 form ge 姐姐參加 ~
老實講 ~ 我覺得姐姐件衫係靚 ge，我都比左好高分
不過老師們唔喜歡我都冇辦法 ... 我已經盡了我所能 ~
這個賽果恐怕又令我比人詛咒了 ... @@

上到班房玩左 D 我精心設計 ge 遊戲 ~
吹波實在令遊戲更富娛樂性 ~
其實都係大家食下野 ~ 玩下派下禮物咁 ~
最後派剩一盒好多 ge M&M
我見我平時作孽太多 ~ 所以拎左去派街坊 ~
原來派禮物係好開心的 ~ 哈哈 !

今日精句 : 有你在，令我可輕鬆的去唱。( 鳴謝劉德華提供 )

>>December 24, 2004 at 8:28:37 AM GMT+8