2003 年 1 月 11 日 星期六 【晴】

雖然尋日好累, 但係今日星期日, 要十點起身返崇拜, 呢排都幾好, 冇o的眼訓唔想返o既感覺, 仲要早到喎, 謝謝主!! 返到去見到天慧, 好乖呀, 考試都願意返崇拜。今日係迪迪講道, 迪迪講道都幾搞笑, 成日講o的笑話, 不過咁樣就會留心去聽。

完o左之後我又唔駛開分區會喎, 就同o左幾個都唔駛開分區會o既馬騮, 開強同嘔飯去食飯, 馬騮佢地班男仔又三點去踢波喎, 同嘔飯諗緊下晝有咩做之際, 佢地兩個就話兩點去射波(係籃球), 我地兩個冇野做o既就梗係去啦, 不過要上一上開強屋企等埋馬騮返去換衫and爆X(自己諗啦), 等o左半粒鐘成兩點出發, 開強屋企有隻好巨型o既winnie the pool, 勁可愛。雖然我都好耐冇打波, 不過射八呎位真係幾準ga, 只限八呎馬騮話, 佢地兩個打波已經不復當年lu, 懶之過。射多兩射其他人都o黎到, 要開波lu, 不過係踢波, 我同嘔飯兩個觀賞o左一陣……覺得好無聊, 決定走人。跟住就周圍行, 行到邊就食到邊, 食o左好耐冇食o既紅豆餅呀, 好開心, 行到無聊就上圖書館hair o下, 落到街轉個頭就同一時候撞到唔同o既中學同學, 都幾搞笑, 好似3B集會咁。

返到屋企, Chili就打o黎話聽日要返去開Newsletter會喎, Ooo…真係要輪到我喇, 仲諗住佢地之前都冇搵過我, 可以唔駛做添, 原來原來…唔係ga!! 不過, 都冇得揀, 仲要係6:30pm, 即係點都要返hall訓。

本來諗住o係屋企睇鬼眼(不過之前都睇過), 轉個頭嘔飯就打o黎問我睇唔睇碟, 我呢個放假中o既人就梗係去啦, 不過食埋飯落去都八點幾, 買o左o的波蘿上周文屋企, 今晚o既觀眾有嘔飯, 開強, 學文, 昌仔, 我同埋屋主周文, 睇o既呢就係”賭神2002”, 套戲勁白痴, 張家輝做(地獄黑仔王), 都幾搞笑, 可惜丫, 馮德倫把聲竟然係配音, 如果唔係會更好, 但係一班Friend睇呢o的戲就最好。返到屋企都十二點幾, 同細佬睇o下陣魔戒一都真係頂唔順……訓著o左。

>>August 8, 2004 at 8:05:53 AM GMT+8

2003 年 1 月 10 日 星期五 【晴】

今日媽媽話要油油喎, 勁驚, 唔係搵o的咁o既野o黎搞呀!! 放假, 想走都走唔甩!! 但係…佢下晝先油, 我兩點要返教會幫F.1妹妹溫習, 咁樣…我就可以甩身, 嘻嘻!! 但係之後諗返, 咁走o左好似唔係幾好咁……唉!! 有少許內疚。

好啦, 返到教會, Oooo…原來阿迪唔係一齊同佢地溫, 不過都仲有個新o黎o既實習神學生阿文同我一齊, 嘩, 第一眼見佢仲以為佢同我差唔多年紀, 傾落先知佢係神學生, 大我成xx年, 真係睇唔出。之前都冇乜接觸佢地幾個, 所以都唔知點同佢地開始好, 鬧又唔係, 任佢地又唔係, 有一兩個又唔專心溫喎, 算吧啦, 只要佢唔嘈住人就算。不過其實都冇咩問題o既, 係真係唔知點令佢地專心溫書o者, 佢地比我Form1已經勤力好多, haha!! 原來佢地好鐘意講學校o的野, 好彩呢o的我都有得講o下, 都好, 可以同佢地玩o下。

返到屋企媽媽仲未搞掂o的野, 勁亂, 我阿妹又唔幫手喎, 局住要幫執野, 其實都真係唔係好想, 媽媽連飯都冇熟, 唯有打電話俾爸爸叫佢買飯, 執執執…執到十點幾先搞掂…唉~~辛苦大家!! 好累好累, 都係早o的訓吧。

>>August 8, 2004 at 8:10:35 AM GMT+8

2003 年 1 月 3 日 星期五 【晴】

要到最後一日喇, 今日呢, 都係要九點起身, 今日俾尋日更掙扎, 因為尋日實在太鬆弛, 訓得太好。

今日副團Sherman會續繼帶我地食好野, 係”好好味意粉”, 去到一個商場入面o既美食廣場, 呢度真係好多野食喎, o的串燒都係10蚊3串(好大串ga), 小籠包都係12蚊一籠(有12個ga), o個間Sherman哥哥介紹o既好好意粉都幾好食ga, 但係又唔會有o個種唔食唔安樂o既感覺lor, um…但係呢度o的野飲就麻麻喇, o的椰皇都唔清甜o既, 紅豆冰o的豆又鬼咁硬喎, 我諗係因為廣州人都好少買野飲o既關係啦(都算貴ga)。丫, 仲有係o的半湯餃, 咬落去o既時候一個唔留神就會噴晒o的湯出o黎, 我同Simon都乃野!!

食完野就搭地鐵去廣東車站買o左3:37pm o既火車返深圳再返轉頭去體育中心玩賽車, 唉!! 原來個賽車場係室內, 幾細ga, 仲要渣o既係普通引擎推動o既無蓋”卡丁車”, 同我原來諗o既係方程式賽道and方程式車都有一段距離, 冇得影o的好型o係車度舉起母指o既相添, 但係都要30蚊8分鐘呀。

初初見到o的人玩都好想快o的落場煉返轉, 好似都幾快咁, 但係又驚會狂撞車喎。好啦, A4佢地玩先(得八架車), 嘩, Simon呢個有經驗o既車手由頭帶到尾, 做出最快o既圈速and最多圈數, 最慢o既當然係……唔講lu。輪到我地女子組, 一坐上車都已經覺得好好feel, 好想快o的開車, yeah~開車lu, 速度都幾快o下ga, 一隻腳俾油, 一隻腳踩break, 好鬼正, 原來我鐘意賽車ga!! 有一個彎位超正, 當你用最貼轉到左內彎再即刻要轉右彎, 而你又轉到o既時候, 你就會覺得自己好勁, 好興奮!! 其實頭o個幾個圈都渣得唔錯ga, 冇撞過車, 仲做到女子組最快圈速。但係中間o的圈唔知發咩癲, 差唔多個個圈都撞一次, 好彩o係後面o的圈都穩定返, 順利咁返到終點, 好野!! 大家玩完第一轉都好似唔係好夠皮咁, 咁就決定八個一齊玩多一轉, 八架車o係咁細o既場入面片o黎片去, 就梗係容易發生意外---撞車。 o係入一個彎o既時候, 本身覺得入得好靚ga, 就係呢個時候, 阿傑殺到, 仲撞o左我埋石磗, 嗚~實在太過份喇!! 至於Emmily, 撞車係平常事, 仲係要抄埋o的急彎, 打橫爛住半條路, 之後o黎o的車全部都撞一撞佢架車先走, 哈哈, 連o的工作人員都唔敢埋佢身。之後又係o個個難度彎, 今次好成功好漂亮咁過o左阿傑, 超興奮呀!! 玩完兩轉之後都夠晒皮lu, 冇乜o既, 撞瘀o左兩個膝頭咁啦, 玩完成身都好似好污漕咁。

鍊完車諗住去書展兜個圈ga, 但係頭先逗留o係賽車場太耐, 兩點幾先走, 咁咪冇得去書展lor, 要行返去搭地鐵去火車站。就係出賽車場o既時候, 見到有1蚊棉花糖and 1.5蚊冰糖葫蘆(6粒), 超抵呀又!! 阿傑見到o的入口即溶o既棉花糖簡直係發現寶咁怒”Chur”, 好慘!! 見到佢大家連自己o個支都俾埋佢食。冰糖葫蘆好好食呀, 之後見到有檔仲係1蚊7粒, 仲要多o的糖漿同好食過之前o個間, 同Emmily兩個係咁食。冇幾耐又見到噹噹糖(1蚊條), 又同Emmily各買一條, 又係好好食呀, 勁低, 今日我地兩個做o左尋日o既阿宇同阿齊。呢條街都幾多野賣ga, 轉個頭又俾我地見到一檔賣o的好似吊咀咁o既飾物, 上面有一個單字, 大家都有個共識---手信有著落喇!! 本身呢檔野一個人都冇ga, 但係經我地一班圍住找自己個名, 當堂好似有金執咁, 行過o既人都過o黎`Eo下, 好搞笑, 個老舖都真係要多得我地啦!! 不過, 都買唔齊o的手信, 又趕住搭火車喎, 見到有個名咪買lor, 所以有o的朋友仔都冇ga, 下次補返啦!!

#不順利事件之六︰趕唔切搭3:37pm火車。由於大家太投入搵自己個名, 完全冇為意係趕緊搭火車, 到醒覺o既時候已經係仲有唔夠20分鐘就開車, 仲要搭兩個地鐵站先到喎, 都唔知點解明明由廣東車站去賽車場係一個站, 但係而家要兩個站先到火車站喎!?? 稀奇稀奇!! 搞到我地失晒預算。一路趕都冇諗過會搭唔到呢班車, 買o左飛仲係70蚊, 搭唔到都唔知點算, 所以大家一出地鐵(仲有4分鐘)就以9秒9 o既速度飛奔上去, 上到去都o岩o岩好---閂閘, 點知原來係要4分鐘之前上車。o下!! 我地真係搭唔到呀, Oh～My God!!

不過都好彩, 我地可以搭下一班(唔駛加錢呀), 但係爆晒, 要坐地下, 行過都望o下我地, 好似坐霸王車咁。

好喇!! 到最後一站……深圳~K骨, 搵o左間30蚊一個鐘(ok平喎), 多人~K兩個鐘仲係50蚊添咋, 好抵呀又!! 我地可以分兩間房, A4一間, 4個女仔一間, 呢間野有衫換ga, 佢o的門有窗喎, 仲要有玻璃睇到隔離房, 但係個茅廁實在遠, 唯有叫o的服務員o係門口擋住班雄性生物行過, 閃閃縮縮o係間房度換, 搞笑!! 呢間o的人都~K得幾好ga, ~Ko既時候真係好舒服, 最鐘意就係幫我”拍嘞”咁鬆骨, 正!! Emmily同個服務員好鬼好傾, 成程吹水, 勁好笑!! 講講o下講到話~K阿齊o個個肯定會嗌晒救命, 好似~K緊舊石頭咁, 哈哈!! 不過呢, ~Ko個陣的確係好舒服, ~K完之後又要揹返o的重野, 其實……都冇咩分別!! 但係都好滿意呢!!

#下順利事件之七︰阿宇唔見o左個電話呀!! 就o係大家搭火車返香港回味緊廣州之旅之際, 阿宇就話佢唔見o左個電話, 搵極都搵唔到, 而呢個Emmily又話曾經見過阿宇拎過個電話出o黎喎, 阿宇就死口話冇。究竟……Emmily見到o個隻手係咩人o黎o既呢? 係唔係就係扒手呢? 到宜家都係個謎!! 好慘呀阿宇, 個電話新買仲要係勁鐘意!!

去到九龍塘同Emmily食完野就返屋企lu, 即刻覺得香港食野好貴!! Um…對於呢次廣州之旅, 我都好滿意呀, 雖然係就係有o的唔順利黑仔野發生, 但係往好o個方面睇, 今次無聊學會活動咁先難忘, 哈哈!! 的確呢三日都好開心呢, 好特別呀, 好想將遇到o既野都寫底, 唔知幾時先可以大家一齊再去旅行呢!!

>>August 8, 2004 at 7:57:40 AM GMT+8

2003 年 1 月 2 日 星期四 【晴】

好喇!! 到o左第二日, 好彩冇落雨咋, 如果唔係今日o既從化溫泉實泡湯啦。為o左爭取時間, 即使大家極眼訓, 都要九點起身, 估唔到尋晚死都話唔去浸溫泉o既阿齊今朝竟然話去喎, 真係一時一樣。

今朝由副團Sherman帶大家去食靚粥, 每人一碗粥之餘又叫了腸粉, 大陸o的腸粉好特別, 成個奄列咁o既樣, 不過味道就真係…香港好o的。個個食到勁飽都係101蚊咋, 超抵食!!! 食完野就兵分兩路, Sherman帶阿齊, Chili and 阿傑去買泳衣泳褲; 我, 阿宇, Emmily and Simon就負責周圍行下。四條友諗住好快買完野冇野做啦, 點知條街勁多野行, 睇o下漫畫, 睇o下VCD, 食o下栗子(好好食), 又俾我地發現o左5毫子沐浴露and洗頭水(2合1+護髮), 沖一次都係一蚊雞咋!!

行下行下就咁50分鐘喇, 搵返Chili佢地, 佢地四個返到o黎完全冇晒表情, 好似冇乜反應咁, 同Emmily兩條友勁驚, 唔知佢地頭先發生乜事。上到去從化o既車終於有o的起色, Sherman同阿傑成程都有講有笑^_^, 好彩好彩!!

兩點幾先去到從化康沐園溫泉, 門口有個池用溫泉水烚雞蛋, 好得意ga!! 每位$118, 入面o的設備幾ok呀, 沖涼, 毛巾, locker, 風筒乜都有, 仲有一件暖暖o既袍。雖然係唔俾著T-shirt落水, 但係我地唔理得多, 著埋先算, 閃閃縮縮咁落去溫泉區, 第一次浸泉, 好期待呀。呢度都有十幾個泉ga, 我覺得最好都係當歸同花草泉, o的味濃濃, 唔錯唔錯。

#不順利事件之三︰浸浸下A4就話要去玩凍水之滑梯, 又話要鬥快落到去, Oh~就係咁樂極生悲, 阿傑由於落到去抵受唔到冰凍o既水, 好快咁走o既時候就”扇”腳, 舂o左埋圍邊o的石度, 撞爆o左o的牙肉, 係咁留血, 勁驚!! 即刻同佢去醫療室止血, 止o左好耐, 有一隻門牙鬆o左長o左出o黎, 要等到返香港先有得整, 搞到佢再食唔到廣州o的好野。下次你地都係唔好玩得咁癲喇!!

之後就去浸o下牛奶泉(臭o既), 咖啡泉(冇味o既), 蘆薈泉(怪怪咁), um…都係中葯o的泉最好, 丫, 仲有露天o既牛朗織女泉, 好得意。呢度o的服務員會幫我地除袍ga, 佢地A4著o左o的袍勁似o的大少(敗家仔)。浸浸下有話唔俾著T落水, 咁咪同Emmily and Chili去沖涼換衫lor, 勁舒服!! 沖完涼就去嘆返個靚咖啡(免費)食下飽, 好捨意, haha!! 等埋佢地幾個沖完涼都成七點, 要去搭車返廣東lu。

#不順利事件之四︰好啦, 諗住返到廣州去長壽路食野啦, 本身預到個時間o岩o岩好, 好衰唔衰, 架死人車o係半路死火喎!! 等下一架車, 個死火司機都癲ga, 都爆晒仲叫我地去, 又會迫到我地八個人啦, 唔上又話我地好唔上, 上到至得ga!! o係公路度又勁難截車喎, 搵到架Van仔又話要100蚊肯送我地去麗都廣場, 大陸o的人真係好狗呀!!

#不順利事件之五︰真係黑開有條路, 去到長壽路o的舖頭都閂o左九成, 未兜夠一個圈頭先架Van仔司機就返o黎搵我地, 話我地俾佢張100蚊係偽鈔, 要我地換返。唉~都唔知幾時俾張假野混入o左, 當黑當黑!!

但係呢, 咁都對我地o既心情完全冇影響, 照食!! 街邊o的粟米勁平呀, 1蚊條, 又靚又大粒, 大芋頭同番薯都係1蚊個, 呢度o既臭豆腐仲要係1蚊5件, 抵呀!! 我地搵o左一間粥粉麵飯都有o既飯店坐底, o的煲仔飯都係7蚊窩(三人份)咋, 粥4蚊, 乾抄牛河都係10蚊, 超級咁平, 當堂覺得今朝o個餐好貴!!

由於太晏, 成十一點幾先食完, 條街o既舖頭已經摺晒, 想食o下街邊野都冇, 咁就直接打的去保齡球場。原來愈夜愈貴, 要10蚊一局, 仲要租3蚊鞋, 不過個保齡球場都ok丫, 雖然唔係好大, 但勝在少人玩, 咁我地就可以佔據幾條line喇。第一回合Emmily胃痛退出, 淨低我地七個, Simon超勁, 由頭帶到尾贏晒, 不過好彩我都唔駛包艇。第二回合Emmily頂唔順…..要重出江糊, 咁我地就分組比賽, 我and Simon, 齊and Chili, 字and Sherman, 傑 and Emmily, 結局由於有Simon坐陣, 我軍不至於覆沒, 都有個第二, 哈哈, Simon好野!!

激戰完一輪都點幾, 又冇咩其他浦點喎, 最後決定返屋企訓覺, 返到去立刻進入睡眠狀態, 柯南都睇唔晒就訓lu。聽朝都係要九點起身呀, 而目標係賽車。

>>October 11, 2004 at 2:03:25 PM GMT+8

2003 年 1 月 1 日 星期三 【晴】

無聊學會廣州之旅今日起行喇, Yahoo～ 為o左有抵o的o既感覺, 所以就約o左晨早九點o係上水火車站集合, 我地有七個 Exco 加一個 Member = 八個人(因為副團 Sherman o係廣州o既屋企可以最多訓九個人)。由於前日去完camp o的衫尋日先洗, 尋晚又未夠乾喎, 局住今朝仲要更早起身執野…極痛苦!! 仲有, 從未搭過火車去上水o既我完全唔知點預時間, 結果當然係冇遲到啦(遲過9:10am到一分鐘一蚊呀), 反而早到四個字, 但係竟然有人仲早到過我, 就係阿宇喇, 早到八個字, 贏晒!!

#不順利事件之一︰8:15am 打俾 Emmily, 絛友仔竟然唔知醒, 而家先起身, 鬼咩, 佢竟然較o左六點起身, 點會起到至得 ga!! 最後9:45am先齊人, 俾預期遲o左少少咁啦。好彩搭車無聊打俾佢咋!!

去到羅湖, 照計劃去羅湖商業城嘆返個靚茶先, 去o個間XX軒(唔記得個名lu)。 嘩!! o的蝦餃燒賣o的蝦好好好大隻呀, 又大又紅, 勁好食!! o的腸粉又夠的色喎, 晶凝通透。o的點心好好食呀, 食到好飽, o的 service 又好喎, 但係個價錢就同香港差唔多lu, 都食o左三百幾蚊。不過由於有 Emmily 呢個大股東o既關係, 大家可以夾少o的, 呵呵!!

下一站係”歡樂谷”, 搭去o個架Van仔十足十架”黑車”咁, 深圳o的人的確係好恐怖, 個個都好似對住o的外地人虎視眈眈咁, o的車又o係條街度左片右片, 撞死都唔知咩事。點幾去到啦, 入場費都要$120 ga, 入面都唔係太多機動遊戲, 不過呢, 都係香港玩唔到。第一樣挑戰o既係”太空穿梭”, 同跳樓機差唔多, 但係呢個就係極速向上, 見到o的人玩, 以1,2秒o既時間由最底去到最頂, 再跌返落o黎, 見到都驚呀, o的凳o既皮又甩鬼晒喎, 勁唔安全咁o既樣, 都好難唔驚喎!! 坐到上去真係有o的餚底, 驚緊自己等陣會有咩感覺, 升上去o個下勁驚, 但係落o黎反而冇乜野, um…都係Ocean Park個跳樓機好玩o的。

跟住玩過o的激流啦, 根本唔買雨衣玩一定濕晒(著o左照濕), 癲晒!! 根本就係倒水落架艇度, 但係都係好玩o既。然後玩o既係吊腳過山車, haha!! 特登同一個同我一樣會勁驚勁嗌o既Emmily一齊坐, 兩個叫足全程, 我記得有一幕係倒轉o左爭開眼, 見到我頭頂就係個湖, o的頭髮長o的都濕呀真係; 而另一幕係個頭向天o既事候, 見到眼前一片空白。都好, 仲見到最精彩o既兩幕, 我地仲除埋鞋玩, 冇乜o既, 玩o既時候會覺得涼o的lor, 之後玩個o的都冇乜特別話會好驚。丫, 後來發現有得玩碰碰車, 上次玩已經係小學o既時候, 其實一路都想再玩ga, 估唔到o係呢度玩到喎, 八個上到車就即刻搵人撞, 亂咁鏟埋去, Emmily自然成為非Maths人o既受害者, 七國聯軍攻擊一國, 勁搞笑!! 不過玩得兩分鐘, 實在太少喇。

我地仲有玩o左隔離個波波池啦, 真係10年都冇玩過, 入到去一拎起o的波就係咁dum, o係上面o的層仲有o的炮, 見到有光頭 or 肥仔行過就發炮射佢, 極搞笑!! 一班大學生玩波波池原來係可以咁好玩。其實歡樂谷都幾 ok ga , 比我想像中好啦, o的佈置又幾靚 ga, 但係始終都覺得o的顏色好沈, 好似冇乜光彩咁, 一貫大陸o既作風。

六點幾離開”歡樂谷”, 搭車返火車站, 呢云架車冇咁黑, 係o個個價就係o個個價。我地搭7:30pm o既火車, 第一次搭內地火車, 仲以為係o的冇冷氣呀, 好舊呀, o係窗口度可以掂到送車o既人o既手呀呢一類<<背影>>o既車。 原來唔係, 係架ok乾淨, ok舒適, 唔會噴煙o既高速列車, haha!! 大約一個鐘到呢就到o左廣東, 幾快ga都, 落車凍o左好多呀。跟住就要去Sherman家, 原來呀, 廣州有地鐵ga, 真係估你唔到呀, 仲同香港o的差唔多, o的票仲搞笑, 成個大餅咁, 一個唔覺意真係會轆o左落路軌, o個時喊都冇謂!!

Sherman屋企o係12樓, 有三間房啦, Sherman有自己一間房ga, 仲要係好大, 張床又大喎, 超正!! 如果香港有間咁o既房就好lu。Sherman媽媽and MaMa都o係度呀, 諗住同我地食餐飯, 可惜見唔到Sherman爸爸, 可惜可惜!! 我地搭的士去XX酒家(又唔記得)食飯, 叫o左好多呀, o的野食好新鮮呀, Service又好喎, 嘩, o係香港邊有咁易搵到呀!! Haha, o係家長面前, 阿齊收歛就不在話下, 阿傑更90%時間沈默, 呵呵!! 多謝Sherman媽媽請我地食飯, 請我地食飯都大出血lor, 多謝晒!!

#不順利事件之二︰落雨。完全估唔到今晚會落雨, 落雨連想去玩o既意慾都淋熄埋, 去到北京路十一點幾, o的舖頭又閂晒門, 想買野食又買唔到, 仲要落埋雨咁麻煩, 街邊檔都唔開啦。

不過最後都食o左串魚旦and飲o左珍珠奶茶, 套餐加埋都係5蚊咋, 勁平呀!! 阿宇買臭豆腐仲要係1蚊4件, 勁抵食!! 由於落雨, 大家都冇乜mood又”支力”喎, 食完野都返去沖涼訓覺, plan o下聽日o既行程, 聽日將會去浸溫泉呀!!

>>October 11, 2004 at 2:02:12 PM GMT+8

2002 年 12 月 31 日 星期二 【晴】

本來呢, 今日約o左子敬同Pig Pig 睇魔戒首部曲o既, 但係一o黎唔知醒啦, 二o黎原來今日約o左廣州之旅o既同仝開緊急會議商量個 schedule, 仲要係兩點半喎, 咁子敬打o黎o既時候就話唔去lu。Oh!! Sorry ar!!

一路 plan plan plan, 都 plan o左成兩粒幾鐘先 plan 好, um......個行程都幾好, 幾滿意呀, 全部都係食同玩, 最想就係玩賽車, 肯定會好刺激呀!! Sherman 屋企o係廣州有屋呀, 所以呢, 我地可以慳返o的住宿費, 淨係要俾食同玩 and 交通, haha!! 都幾好丫。

而家勁驚廣州會好凍呀, 又唔想帶咁多衫喎, 咁論盡, 仲要九點就o係上水集合喎, 好癲呀!! 去玩都要咁早去!! 但係又覺得咁先值喎, 呵呵, 聽日肯定會勁眼訓呀!!

>>March 18, 2009 at 4:21:39 PM GMT+8

2002 年 12 月 30 日 星期一 【晴】

由於尋晚唔夠訓, 咁所以今日都遲o左少少起身, 7:20am 啦, 好彩都仲有時間靈修, 太好喇!! 其實如果係我想做o既野, 我都係會做到o既!! 咁以後就要生生性性靈修喇!! 靈修o既感覺真係好舒服, 朝早靈修o既感覺真係唔錯呀。其實, 我地行得走得, 睇得講得......都唔係必然o既事, 之前我都唔覺有咩特別, 但係呢o的我地已經擁有o既野就已經係我地o既恩賜, 唔應該輕看。

今日都係 Dr. Leung 講道, haha, 佢真係有佢o既一套, 佢話基督徒應該當神係 constant, 幫助我地去處理生活上各種o既 variables。講到呢度, 話晒都係一個 Maths 人o既我當然會明啦, 哈, 講得真好!! 成日都俾外界o既野影響, 對神o既信心都因為咁而 always changing, 其實我都唔希望係咁。

呢三日o既camp, 俾o左好多衝激我, 舊年立志做唔到o既事, 就等我o係2003年去完成佢啦。

丫!! 今日係31/12, 一年o既最後一日, 但係我冇去咩咩倒數, 反而返o左教會o既除夕感恩晚會, 我覺得我知醒返除夕感恩晚會已經係要感恩啦, haha!! 感謝神o係呢一年裡面都仲係好愛我, 講真, 神冇離棄我已經係一個好大o既恩典啦!! Yeah~ 完o左之後去o左迪迪屋企食壽司, 睇返佢同幗慧結婚o既VCD, 迪迪真係好緊張喎, haha!! 未見過。睇到連倒數都唔記得, 搞笑!!

>>March 18, 2009 at 4:22:11 PM GMT+8

2002 年 12 月 29 日 星期日 【晴】

營刊o既 schedule 要7:00-8:00am 靈修, um......我都好乖呀, 真係咁早身靈修呀, 但係我的同房比我更早, 好勁呀!! 至於阿 Fat, 就叫極都唔捨得起身, 唔鬼理佢喇!! 今朝靈修, 的確, 俾我好多反省, 每一條問題對我o黎講都好到肉, 一路都忽略o既問題又再次得到提醒, 希望以後o既日子我都會記得我有呢o的反省。

食完早餐聽Dr.梁家麟講道, 我真係覺得佢講得好好, 佢有o的個人好特別o既見解, 而且好吸引到人去聽, 佢講o既野帶俾我呢個信息:"學習以單純o既信心去信靠神"。真的好希望我都可以擁有.......單純o既信心!! Dr. Leung夜晚講ｏ既, 將我對事奉o既心態有點改觀, 其實我地跟本就唔需要好叻, 好有天份先可以事奉, 每個人都有佢獨特o既角色, 的確, 事奉係會令信仰o既生命更興旺, 事奉係一件開心o既事。

o係工作坊(一), 我叫自己去立志, 要學習放手身邊忙碌o既事情, 唔俾時間物件掌管我o既生活。都o岩o既, 平時返學俾好多藉口自己唔去靈修, 而家呢, 我就要學習去放手喇!! 以信心踏上啦!! 而工作坊(二)就提醒o左我, 要傳福音, 首先要做好自己o既生活見證, 我諗, 我可以做得更好!!

聽日係阿冰生日呀, 咁我呢, 就同阿珊 and Shirley 出去百佳買蛋糕壽司返去Hall 同佢慶祝生日, haha, 阿冰好似好驚訝咁呀, 佢仲講o左佢o既生日願望.......!! Yeah~我地宣道會大食堂又再發揮大食本色, 將所有野食晒, 呵呵, 呢兩日都真係係咁怒食野!! 肥死 lor!! 後來同阿珊又拍o左好多好低能搞笑o既video, 同埋狂影白痴相, 玩到成十二點先返去沖涼, 哈~今日的確好開心呢!!

>>March 18, 2009 at 4:23:21 PM GMT+8

2002 年 12 月 28 日 星期六 【晴】

今日入宣道區聯會搞o既Camp, 主題係"生命復興, 使命承擔"。切頭報呢個Camp都係諗住sem break溜溜長, 放到2月4日先返學喎。咁o岩阿Pig, 少麗佢地都去喎, 咁咪諗住一齊去 lor, 話晒都有伴丫嘛!! 其實去之前都知道呢個 camp 唔係玩 ga la, 咁但係我都好樂意參加呀, 因為好難得會有o的咁大型o既基督徒o既camp, 有成三百幾人ga。

我地堂會都有15人去呀, 一齊到烏溪沙都已經五點幾, 原來大會係會將同一間堂會o既人分散去唔同o既組, 不過呢樣都估到ga la, 但係就估唔到佢連房都要分別有唔同堂會o既人個喎。Haha, 咁都好, 可以識o下其他堂會o既人, 聽o下其他堂會o既人o既分亨。仲有, 好彩我都可以同Fat Fat一間房, 雖然有4個清林堂o既姐妹一齊住。

今晚聽第一堂道o既時候都真係有o的眼訓, 所以聽到o既野都唔係好多......唉~~浪費晒!! 諗返我的確係唔o岩, 咁唔專心。搞到之後分組分亨o既時候都唔知講o的乜好, 冇鬼用!! 由於camp 係6:00pm 食飯o既關係, 未天黑就肚餓返啦, 所以呢, 之後完o左o的 function 出o左 camp site 去食宵夜呀, 一班人一齊去食宵夜好開心哦!!

>>March 18, 2009 at 4:24:39 PM GMT+8

2002 年 12 月 27 日 星期五 【晴】

唔駛去 wild camp 咪o係屋企抖o下 lor, 還掂聽日又去宿營喇, 但係好似唔夠衫俾我玩三日喎, 咁點算呢, 唯有返 hall 拎返o的衫啦。

今日我媽媽同我阿妹 and 細佬去 Ocean Park 呀, 其實我都唔係好想同佢o地去, 又諗住返 hall 拎野喎, 咁就冇同佢地去喇, 都好o既, 慳返一個。所以我就可以o係屋企怒訓, 訓到起身睇埋千嬅o既音樂特輯錄影帶就返去教會開組, um.....有兩個星期冇開組啦, 睇返今年年頭定下o既目標, 的確好多都做唔到, 真係慚愧!! haha, 好, 下年要努力o的, keep 返呢o的目標。

哼!! 原來 Winnie 今晚返o左 hall 喎, 佢呀, 竟然唔話俾我知佢會返 hall, 都係阿怡話我知咋, 仲話以為我唔會過夜所以唔打俾我喎, 超~~~~

算把啦, 都係快o的執好晒o的野聽日入 camp 把喇, haha, 又有得玩 and Training, 31號返o黎再見啦!!

>>March 18, 2009 at 4:25:25 PM GMT+8