2004 年 6 月 14 日 星期一 【晴】

今日個上身發作... 好痛, 好痛... ... ... ... =.='

>>June 16, 2004 at 9:23:22 AM GMT+8

2004 年 6 月 13 日 星期日 【乍暖還寒】

放工後, 同Phoebe睇腳, 睇完腳, 我約左龍蛇去警察會做運動, Phoebe神積地跟我一齊去, 玩左九個字, 划艇、跑步、器械及75下掌上壓, 最金都係最後果75下掌上壓, 在龍蛇的『指導』下, 我竟然被75下既掌上壓活生生的K.O左... ... 道理仔光輝的歲月已經過去左, 從今時直到永永遠遠, 阿們。

>>June 16, 2004 at 9:23:08 AM GMT+8

2004 年 6 月 11 日 星期五 【晴】

今日好開心, 因為對鞋係咁耐以來擦得最光亮的, 唔係黎隊長『幫』過我擦隻鞋, 我都唔洗用到火黎擦鞋, 就係咁, 我用左我十年的功力及用火後, 我呢對藝術品就誕生左喇!
今日集隊好開心, Phoebe買左一隻叫做超輕土同初級組玩, 每人都做左個蛋糕, 佢地做得好靚, 我仲同佢地影左好多相, 哈哈哈哈哈... Phoebe, 你咁有頭腦, 又聰明, 如果冇左你, 你話成班初級組係咪好慘呢?
集隊後, 今日又打籃球, 仲打全場添, 今日個氣份好特別, 每個人都好暴力, 我覺得好似打Boxing多D, 以我的分析, 有兩點, 第一, 我地係全埸七打七, 共十四人。第二, 有三個重型武器, 分別係阿Ben, 關及廣。之後一齊食飯, 所以好夜先返到屋企, Phoebe就更加啦!

>>June 16, 2004 at 8:57:15 AM GMT+8

2004 年 6 月 10 日 星期四 【晴】

今日放假, 一早就去到日華屋企家裏, 佢話我已經兩年冇去到佢家裏拜年, 即係話起碼兩年冇去過佢屋企... (朋友) 去到佢間屋, 好多初中時代的回憶出哂黎, 中一, 二時, 成日走去佢度過夜, 打機打天光, 再落去打波, 宜家諗返, 都覺得自己好勁, 以前既回憶真係好寶貴...現在百感交雜呢?
傾左一陣, 我同我細佬, 日華就落左去下面個球埸打波, 好曬, 返到屋企先知道曬傷, 宜家好鬼痛呀!

>>June 13, 2004 at 11:05:07 AM GMT+8

2004 年 6 月 9 日 星期三 【晴】

今日放左工, 同阿柏等人去左食飯同睇戲, 因為阿柏生日! 去到時, 見到阿柏黒哂面, 佢話走下一個, 走下一個, 算吧啦, 你估仲係讀書時代咩? 個個放左工都好累, 甚致佢地可能未放工等等, 邊可以話出就出黎丫?
其實每次同佢地出黎都算開心, 但總係欠左d野, 食飯, 行街, 睇戲, 唱k, 揾個公園傾下心事, 表面看, 做左好多野咁, 但離開後大家得到咩呢? 對你, 對我的生命有甚麼改變呢? 能夠因為每一次的見面得到鼓勵嗎? 等等等等....
我要同我的舊同學講, 你們要起來認識神, 服侍神, 要對自已的生命作出重整, 嚴緊過每一日! 呢個係神的戒命, 亦係世人尋找生命義意的唯一出路!

>>June 13, 2004 at 10:53:33 AM GMT+8

2004 年 6 月 7 日 星期一 【晴】

今日放左工, 去左探業仔, 佢其實只係住在我公司樓下, 但我成日都冇去探我呢個親戚! 剛剛中七考完試, 聽完佢講做暑期工既經歷, 真係好苦, 佢阿媽又俾說話佢聽, 又話佢冇錢帶返屋企, 咁大個人仲問阿媽取錢, 見到佢咁, 就諗返起我自已, 幾年前既我, 其實咪同佢差唔多!
在他屋企裏面, 同業仔談論的, 多數都係佢同佢死黨打波既威水史, 同一般年青人一樣, 死黨就是一切, 不過我相信會過渡的, 人大個左, 就會發現更多身邊的事物, 人物等。

>>June 12, 2004 at 4:56:08 AM GMT+8

2004 年 6 月 6 日 星期日 【溫暖】

今日放工之後好忙, 首先要同Phoebe去睇腳, 睇完就食野, 食完野就上左我度, 上到黎就煲葯, 跟住我仲要練結他, 因為聽日公司禱祈會我會分享詩歌, 練左好耐........(因為Phoebe成日搶左我本書仔, 唱其他歌俾我聽=.=') Phoebe食埋葯, 都十點幾咯! 但今日好開心, 同Phoebe一齊真係幸福喇!
(再一次嘔)

>>June 8, 2004 at 3:25:34 AM GMT+8

2004 年 6 月 5 日 星期六 【晴】

今朝當然冇返教會啦, 12:45就返到總部搬野, 六點幾鐘就收工, 其實都唔知已經有乜好做, 只知道自已留左好多汗。
放工時, Phoebe唔記得左我要教阿樑結他, 嬲暴暴走左... 真係唔公平, 平時我唔記得佢講過既, 佢都嬲我, 今日到佢唔記得左我講過既野, 結果都係佢嬲我... 不過算啦, 鬼叫連續兩個星期日都要返工咩! 我知道佢好快就唔嬲既, 唔係我又點會撰佢做我女朋友呢^^(嘔)?
阿樑吸收得好快, 都唔洗我點盡心盡力教佢, 已經彈得唔錯, 多數同佢有音樂底有關啦, 少年軍敬拜隊有望喇!

>>June 7, 2004 at 5:43:59 AM GMT+8

2004 年 6 月 4 日 星期五 【晴】

琴晚俾我阿媽激完之後, 仲點會咁快訓得著丫?結果三點幾先訓, 今朝八點幾又要起身返工, 放工之後返分隊集隊, 集隊後又打籃球, 打到好累, 不過冇好似之前咁痛囉, 可能做返多左運動啦。食埋飯, 返到屋企都好夜囉, 打左一, 兩鋪幾, 個人已經冇哂感覺同力, 就係咁樣訓著左......

>>June 7, 2004 at 5:35:57 AM GMT+8

2004 年 6 月 3 日 星期四 【微雨】

上帝俾我的考驗真係唔簡單, 點解d女人咁鐘意激我, 今日下午食飯前俾個女同事激到我食飯都食唔落, 諗左好耐先諗得通。放工之後去左Phoebe屋企, 十二點幾返到屋企時, 發現廳的地上有少少紙碎 (Tuby咬的) 再望, 原來我既房門都打開左...本來放在bed上的歌紙都在地上, 還有一些紙碎... 當時我已經怒火中燒, 再見到桌上有本詩歌集, 係Phoebe借俾我的, 封面有一半被咬爛, 我打俾我阿媽, 我阿媽同我講佢今日帶左朋友上黎, 個朋友怕狗, 所以放左入我間房... 我發我阿媽脾氣, 佢cup我線... 之後我打到Tuby pk! 點解又係女人, 我阿媽又係人, Tuby又係女人(狗) 我係咪前世欠左d女人!
其實婆婆返左大陸之後, Tuby日日都一個狗在家裏面, 隔日就作反一次, 總之就咬到成地都係野, 我已經打左佢好多次, 佢都係唔改, 我每次打佢時, 都會想返起以前我阿媽打我, 我會幻想我阿媽打我時, 好討厭我, 覺得我係負累等等... 當初我收養Tuby係因為Rita個姐夫成日打佢, 好討厭佢, 宜家我成日打佢 (打到佢Pk) 亦都好討厭佢, 咁我當初點解要收養佢呢? 呢兩日我會決定俾唔俾隻狗人 (好大機會我會俾人或俾返Rita)
我覺得自已唔係好適合養狗, 人地會俾狗上bed sleep, 週圍咬野都只係鬧兩句, 又唔捨得打狗, 但我就唔會。我又會諗, 我養狗係點, 我第時又會點對我既仔女, 夠究我會唔會對d仔女又打又鬧, 又好惡, 又好少時間陪佢地, 又好少包容佢地呢? 我諗我會, shit!!!!!!!!
點解我永遠都唔可以同我阿媽關係有改善....我有努力, 但失敗。之後我阿媽有再打電話俾我, 佢當然係諗到一d更加難聽既說話黎回贈我啦, 咁我都當然係慣啦, 都二十年咯。但原來佢都只不過係鎖住左Tuby半個鐘啫, 咁佢都咬爛我本書, 你話佢係咪低我打到佢Pk吖? 不過陸秀霞都係唔低幫, 佢走之前都可以幫我清左個案法現埸掛? 我覺得我唔單只從來冇被我阿媽肯定過, 一次都冇, 在呢件事上, 仲好唔尊重我!

>>June 4, 2004 at 6:20:28 PM GMT+8