2005 年 11 月 5 日 星期六 【晴】

問卷調查

各位好友，這個日記簿已經差不多有兩年了，今晚好想問大家幾個問題，可以用一點時間在這裏留言給我作回應嗎？

1. 我的日記會唔會太悶呢？
2. 看我的日記時，你們的感受多數係.........? 好笑？好感人？有共嗚？其他？
3. 你們有認識我多一點嗎？我係一個點既人？
4. 還有其他想和我說的嗎？

期待你們的回應！

>>November 5, 2005 at 4:58:34 PM GMT+8

2005 年 11 月 4 日 星期五 【晴】

貨不對辦

好一陣子 (可能都有幾個月吧) Phoebe的情緒都很起伏，多數係早上很好、下午一般和晚上很差。有時我也會被她的低落情緒打沉......有時我會想，係因為我未找到長工？我又經常胡思亂想。

剛剛Phoebe在家中又一次情緒低落 (係，差點唔記得講，每次情緒低落時還會帶點攻擊性) ，於是我一個人走了去林村河跑步，一來可以逃避，二來可以練跑，今日跑左35分鐘，昨日息休了一天，對腳冇乜事喇，跑條新路時間又過得特別快。

我係成年人嗎？任何一個人問我，包括老豆、Phoebe、睇住我大既阿Sir、Madam等等，我都會答佢：「我覺得自己已經係！」但我只不過係剛剛做左冇耐成年人........有些時候深深處仍缺乏自信... ...我開始在腦海裏計劃自己的家庭，但那幅美麗的圖畫實在太遠了，現在我只有自卑和無助。求神？此時此刻我實在沒有這麼大的信心祈求。各位，如果你們受感動的話，你們為我求吧！

有時我會要求和Phoebe一起禱告，多數都換來一次又一次的拒絕，好彩的話就會有我開聲禱告，印象中只有一兩次她有開聲禱告。我很失落，因為我未能感到她是我的同路人。

>>November 5, 2005 at 4:50:13 PM GMT+8

2005 年 11 月 3 日 星期四 【晴】

博物館

因為工作關係，今朝Phoebe一早就要到屋企附近的大埔火車博物館，我部佢一齊去，帶左相機影左少少相，天氣很好，中途發覺那裡係個影人像的好地方，他朝有一日我有足夠器材，一定會再去影相！一個鐘不夠我們就起了，但卻相當愉快！感謝神！！

http://www.fotop.net/sungs/fire

>>November 4, 2005 at 10:36:22 AM GMT+8

2005 年 11 月 2 日 星期三 【晴】

今晚到最後我都係推左同日華跑步，因為對腳真係唔係好聽話.............唉！

>>November 4, 2005 at 10:32:56 AM GMT+8

2005 年 11 月 2 日 星期三 【晴】

又一個45分鐘

今朝一早約左小野跑步，如題啦，我又跑左45分鐘，中途有一種想死的感覺，俾前兩日跑都要辛苦，明天要俾肌肉休息一天，唔跑住，今晚約左日華再去跑，都唔知跑唔跑到，不過點都去左先啦！

之後同小野去左玩個馬嬲架，佢一玩就玩到，但我重係玩唔到，真係要練下.........呢幾日舉重舉到我背脊好痛，真係要好好休息...............半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！半馬！

>>November 3, 2005 at 3:36:32 AM GMT+8

2005 年 11 月 1 日 星期二 【晴】

45分鐘

今朝一早就去左練跑，又係中港城，仲跑左成45分鐘添，返到屋企又要與下鐵，累到爆呀，明早約左小野一齊去！

晚上心血來潮，打電話約日華返教會jam下歌，亂咁玩，多數唱詩歌，幾enjoy呀！

>>November 2, 2005 at 2:29:47 PM GMT+8

2005 年 10 月 31 日 星期一 【晴】

半馬

前日收到衛Sir的電話，佢話Miss曾、彭Sir同岑Sir都報左名跑渣打半馬拉松，佢自己又報左全馬，問我點？記得上年我話Miss曾跑半馬的話，我就跟佢跑，所以..........我講得出就要做得到！

今朝一早就去左中港城跑，跑左半個鐘，感覺得好，唔太累，可能最近做多左運動，報左半馬真係唔係講玩，唔練既話，可能行到行唔晒，我呢d好愛面子架嘛，嘿嘿....大家俾心機練呀！

阿樑，五分鐘前我收到你的朱古力喇，好開心呀，多謝你！食緊中.....^^ 你都要做運動呀，我怕你返黎唔認得我呀，到時我實會大隻過宜家！^^v

>>November 1, 2005 at 6:24:38 AM GMT+8

2005 年 10 月 28 日 星期五 【晴】

有關音樂

阿樑買音響，Danny先俾錢，套音響先放在我家中聽，原來世界上真係有咁大隻甲拿隨街跳架！哈哈！

尋日終於有時間砌機，砌砌下先知原來係唔包喇叭線，馬上走落泰林買，買左最粗果隻喇叭線！

整好喇，點解d聲咁差既？原來係部國產vcd機d聲唔得，於是我羅返部onkyo機出黎博，但讀cd果度壞左，只能聽md，於是又要羅返晒D MD出黎聽，死未！

我愛音樂！其中一個原因係--------------------------音樂好像我人生回憶錄內的書籤，一個又一個的小書籤插入不同的頁數內，又會在不知不覺間讓我發覺，那麼我又會細心重看這本自己的回憶錄..........MD事件係其中一個例子，聽MD已經係中學年代的事，宜家已經過時，那些MD大部份是自已錄的，有些是中學同學幫我錄的，有一隻係廖肥錄給我的，錄好的MD要加上一張貼紙，再寫上每首歌的歌名，大部份是阿珠幫我寫的。

那些陳年MD讓我最震撼的有王菲的多得他、Di-Dar，張學友的雪狼湖。我一邊聽，一聽感受著自己已經忘記了或改變了的愛情觀，回憶著從前那個單純的小男孩。

在這裏我可以用文字表達多少呢？很少，但我知道你們會明白，因為你們也會有類似的經歷。

>>October 29, 2005 at 3:15:35 AM GMT+8

2005 年 10 月 24 日 星期一 【晴】

以馬內利團契

星期日崇拜後，我第一次參加教會的青少年團契 ----- 以馬內利團契。計埋我共有七個團友，我第一個感覺係，嘩！好似少左d人咁喎，唱下詩歌，好快就到左分享既時候，我和牛雄都出黎做左野一段時間，其餘的都係大學生，聽到一個又一個的分享，大家都說唔知一兩年後做乜野工好，好冇方向，我同牛雄又係.......都唔知想做乜好，到導師分享了，阿餅 (她形容自己係將踏入中年，她是一個兒科醫生) 也說想轉工，唉.......原來個個都一樣！最後用左20分鐘祈禱我們就散去了。

第一次團契，感覺算唔錯，我想唔到有乜咁吸引，但我會賞試繼續返，因為我想識多d教會既年青人，我想在教會裏多一點分享，多一點聽別人分享，想過多一些教會的生活等等，還有好多原因...但唔係好識講。

>>October 25, 2005 at 1:13:19 PM GMT+8

2005 年 10 月 21 日 星期五 【晴】

打鼓的日子

因為星期四大偉小組 (教會的其中一隊領詩組) 練歌時，阿權未能出席，所以變左我打鼓，本來我可能會彈結他或唱歌。感謝主當日練歌好順利，音響好快就tune好，又係我練咁多次歌裏打鼓打得最開心的一次，但竟然四首詩歌中一首快歌都冇。

到了今日崇拜，我一早就起床，又好早返到教會，崇拜到了，我所打的鼓比練習時還要好！崇拜後，有很多人讚我打得好，分別有阿Yiu、阿Paul、Sarah、正文同Danny，今日真係好開心，其實兩三年前我已經很想加入大偉小組，到最近已經淡忘了，但竟然又在最近加入了大偉小組，神的時候真係黎得奇妙，哈哈！

如果幾年前我已經入左大偉小組，可能我打的鼓又冇今日咁好，那麼可能就再冇機會在大偉小組打鼓，但今日我才加入，情況就不同了。

>>October 25, 2005 at 1:01:23 PM GMT+8