2004 年 7 月 20 日 星期二 【晴】

琴晚同完d舊同學食飯, 六個人, 去左扒王之王, 每次去, 都覺得好難食, 今次d人既服務態度仲要奇差, 我差d要鬧人.......一去到我都未坐底, 個女既己經倒水倒到我將要坐落去個位全濕! 乜都冇講過, 抹左兩下就起左... 我頂........!!!
見係阿仇生日, 我算, 唔係就叫經理出黎傾幾句, 之後仲有d衰野, 唔講咁多, 不過以後唔好叫我去, 要去都唔會去返旺角呢間, 我食i am lovin it r唔好?
之後我地去左球埸傾計, 崑講佢由台灣返黎, 再同一個女仔拍拖, 再由兩星期後失戀既經過, 哈, 我當然係為佢作分析及檢討啦, 初戀算係咁啦, 總好過做可憐蟲丫? 嘻嘻! (得罪左好多人)
係呢, 有冇人有關鉦icq呢?

>>July 21, 2004 at 12:59:27 PM GMT+8

2004 年 7 月 19 日 星期一 【晴】

唉, 各位, 呢幾日唔係我冇寫日記呀, 係個server 呢幾日都down左........
阿樑仲話呢個網站會收錢....會員先睇到日記.....如果係真既話, 咁寫日記黎仲做乜呀=.='?
但起馬今日都仲有得寫丫....寫得一日得一日啦。

>>July 20, 2004 at 4:24:27 AM GMT+8

2004 年 7 月 7 日 星期三 【晴】

今日返工後去再阿權新屋, 阿權係我教會裏, 小組既一個組員, 講起就好笑, 我地係查經組, 但係就特別多節目, 嘻嘻......今日去到佢屋企, 我發覺係我一生日中最man的一日, 我地談論音響, 攝影, 無線電及網球, 好開心..... ...........^^
睇見人地買樓, 自己都知道, 真係要儲錢...... 做人真係苦........

>>July 11, 2004 at 4:40:37 PM GMT+8

2004 年 6 月 28 日 星期一 【清涼】

今日放工時, 阿珠同阿坤都上左黎總部, 因為我地一齊去左玩Band (軍樂)。記得中二時同日華一齊去包美達學軍鼓, 仲要係香港四大鼓王之人, 阿權哥仔親自教受^^v! 諗返都己經係好多年前既事囉。
去到時好晏訓, 目冇無情咁緊南哥學野, 唔知佢會唔會覺得我好cool同扮野呢? 佢同另一個佬, 佳哥都讚我打得好, 一睇就知道我有學過, 更係啦, 我間中都有練習下嘛, 加上我去之前更係再練多兩成先去啦, 今日學左一份譜, 等返分隊時帶返去同龍蛇玩下先!
唔知阿珠點呢? 見佢都好認真, 希望佢可以在教會裏打drum set時, 都有d啟發啦! 其實呢個都係我學軍鼓既其中一個原因。

>>June 30, 2004 at 11:12:29 AM GMT+8

2004 年 6 月 23 日 星期三 【晴】

今日放工終於要去剪頭髮, 一路都好想去剪, 因為頭髮已經好長, 又熱, 但大剪我又唔敢搵Phoebe同我剪, 所以真係要去髮型屋喇。去到竟然冇乜人, 幫我剪頭髮個人仲幾好添, 好快就走得喇, 最唔好那個就係洗頭, 係咁用d尖既指甲擦我個頭, 仲問我養唔養? 我真係好想同你講, 我痛呀! 不過整體都好滿意咯!

>>June 25, 2004 at 2:09:36 PM GMT+8

2004 年 6 月 21 日 星期一 【晴】

今日既日記仲未完架, 兩點鐘去到Phoebe屋企, 五點鐘先擦完鞋, 當Phoebe起身時就更係嬲暴暴啦, 因為我七點鐘又要走啦嘛, 我約左仇柏謙(呢度係三個人黎)傾下暑假既學野大計嘛, 地點就係我屋企, 由於大家既要求同目的不一既關係, 最後係變左傾計及玩隨影.... 哈, 如果大家想睇下d作品, 可以搵我! 其實咁樣都幾開心丫? 傾下計影下相, 咁就一日, 時間仲過得好快!
今晚有d唔開心, 因為Alex又遲到, 仲叫埋阿謙一齊遲, 理由係 ─ 道理仔去左約會女朋友, 一定會遲返屋企, 所以私底下兩個遲上黎, 我覺得對我同阿仇有d唔公平!!!!!!!

>>June 23, 2004 at 1:18:58 PM GMT+8

2004 年 6 月 21 日 星期一 【晴】

最近中左擦鞋毒, 本身我擦鞋都有番咁上下功力, 但突然有一日好想自己在擦鞋方面再有突破, 所以就愛上擦鞋。今日係假期, 我去左Phoebe屋企, 帶哂工具同佢擦返工鞋, 佢一拎就拎左兩對黑鞋出黎, 其中一對佢已經冇著好耐, 我問佢你著架咩? 佢話, 你擦靚左, 我咪著囉, 就係咁, 我就擦左兩個半鐘頭鞋, Phoebe在房裏sleeping, 得我一個在廳擦鞋!
首先, 我將對鞋用濕布抹走d塵, 再用牙刷刷走鞋邊既塵, 成條鞋帶取出來, 之後先開始擦鞋, 鞋頭, 鞋跟, 鞋身及鞋帶孔我都擦埋, 咁大個仔都未試過咁擦法! 因為一個人擦既原故, 我諗返起好多少時集隊既片段, 一福一福在腦海擦過... ... 係一d好寶貴既回憶, 亦係神給我既一個召命 ─ 要服待青少年人。
擦鞋時, 亦另我諗起細個打理中級組制服給我既意義, 我細個認為‘散’belt代表一個人既臨時狀態, 你唔係每日都‘散’就代表你集隊時, 條belt一定會令, 你一定要在檢查制服既一個鐘頭前先好散, 唔係就會氧化, 所以你冇得撰擇, 一定要在指定的時間來完成, 呢個就係你既狀態喇! 擦鞋就唔同喇, 唔係發生在一兩個鐘頭就能成事, 要擦一對令立立既鞋, 要放上好多好多既時間, 一對新鞋, 起碼要鞋上數十次, 先有d睇頭, 擦鞋既人又要有番咁上下功力, 擦鞋給我的啟示係, 不停的練習及慮積! 到白帶喇, 話明白帶, 白色就更係好易烏糟啦, 每次用完, 都要用獨立既膠袋放好, 穿上身時, 又要提高警覺, 唔可以整烏糟佢, 白帶教識我做事要細心, 在小事上也要這樣!
講左咁耐, 其實都唔知自己講緊乜, 所以大家睇唔明係正常既^3^

>>June 23, 2004 at 1:01:04 PM GMT+8

2004 年 6 月 19 日 星期六 【清涼】

今朝冇返教會, 其實都係自己計劃好架喇.... 琴晚打機打得夜, sleep時又唔較鬧鐘....十二點幾阿樑打電話俾我, 話同我食飯, 好彩佢叫我喳, 本來我諗住乜都唔食, 就去阿珠個洗禮, 因為我好肥, 諗住食少d, 不過佢叫到, 冇計啦 (其實都唔知幾想食野^^v)
二點二十分, 我地已經到左阿珠受洗既教會, 又叫人兩點半去到, 點知成三點先開波, 佢教會裏面既人, 全部都唔認得我lu~~, 咁又難怪既, 已經係好幾年前同阿珠及佢教會既人去過一次camp姐....哈!
今日去阿珠度, 最大收獲, 就係同佢影左好多靚相啦, 其實我想同佢影靚相, 仲多過去見証佢既受洗....嘻! 再睇埋阿樑部老爺機, 我就知道自已部相機原來係好好, 變焦時快, 冇聲, 又遠, 但阿樑果部.....唉! (我唔係取笑你呀, 只不過係......真係好唔點) 在我高明既拍攝技巧之下, 阿珠當然係變食『獨一冇二』既大美人啦!

>>June 21, 2004 at 2:27:01 AM GMT+8

2004 年 6 月 18 日 星期五 【酷熱】

就快出糧lu~~ , d錢已經用到冇哂, 算唉, 差唔多個個月都係咁架喇!
我d頭髮長左好多, 好唔舒服, 好想剪哂佢, 但又唔想去髮型屋度剪, 點算好呢?
今日唔洗集隊, 所有導師返哂去開會, 開會用既時間已經係整個既集隊時間囉, 溝通真係需要用好多時間, 所以大家未拍拖既, 唔洗太過唔開心。開完會, 當然又係打籃球既時間啦, 今日幾熱, 冇風, 打波果陣, 阿樑叫哂救命, 睇見佢就慘!!!!
之後同左阿樑,Phoebe去食車仔面, 其實之後我仲要去同我家人食野, 但....算啦...冇所謂啦, 同佢地食開心d既... 好耐都冇見過我老豆囉, 今日見到佢喇, 又咪係咁!?

>>June 21, 2004 at 2:07:20 AM GMT+8

2004 年 6 月 17 日 星期四 【晴】

今日有兩件好特別既事...........
第一, 下午食飯時, Phoebe突然話出面有個女仔唔要隻狗走左, 跟住我地一齊出去睇, 見到隻狗仔真係一個人(狗)... ... 佢行左個圈, 之後坐低左, 我地行近佢望佢, 點知佢仲走埋黎我度, 可能係我身上有狗味啦! 返入公司時, 佢仲坐左在公司門口, 向住公司門。我叫Phoebe打去愛護動物協會, 我洗完手時, 隻狗已經走左, 我跑出去叫佢, 佢望我一下, 就走左... 希望佢會返到屋企啦!
第二, 又係下午, 突然有個家長殺上黎, 幫個女買帽, 因為個女唔見左, 但個家長原來係龔啞既...不過佢既面部表情好豐富(仲幾靚添), 最後我地用紙筆溝通左好耐, 先完成呢單生意! 我又要打電話去學校, 同個老師商量賣唔賣俾佢, 又要打電話俾佢個女, 問下佢帶幾號帽... 哈!

>>June 18, 2004 at 9:40:46 AM GMT+8