2004 年 6 月 18 日 星期五 【晴】

包糉日

試下包糉, 當然唔掂啦, 貪玩je~

>>June 20, 2004 at 4:32:14 PM GMT+8

2004 年 6 月 17 日 星期四 【暴雨】

超級氣憤一天

好嬲呀, 約咗人4點係CWB等, 諗住睇Troy, 食晚飯已經會遲到啦, 點知, 佢仲要我係CWB到等咗成個鐘, 5 點先出現, 每次都話, 2 個字後到喇, 我黎緊喇, 頂呀, 整整1 個鐘, 好可惡~好意思叫女仔等你成個鐘, 我都未試過等人咁耐, 你真係威啦!!嬲到爆炸~

小巴黎吃飯, 吃得好滿足, 又平, 珍惜同屋企人相處ge 時間, 我係身在福中知道福.
我買一件衫, 阿媽比錢, 阿媽買一件衫, 輪到我比錢, 我話大家亙送禮物.

>>June 18, 2004 at 5:16:41 PM GMT+8

2004 年 6 月 16 日 星期三 【晴】

重要一天

本以為之前見份工會無消息, 點知, 今朝打黎叫我second in, 以為要考typing, 英文咁啦, 去到, 就同boss 傾, 佢話講番公司狀況, 同傾薪金, 咁我個心就暗暗笑, 90%請我~~咁佢真係請我喎, 仲好好咁比我遲一個星期返工, 因為下星期我要入camp嘛, 比咗錢, 唔去, 唔抵. 我話到時一定早到, boss 仲講笑, 細細聲話, 唔使咁早, 皆因無咩人會早返!! 好興奮打俾阿爸, 因為之前比佢睇死~ 份工請我, 不枉我搭的士上去呀!!Perfect~~
開心咗一陣, 再諗諗, 其實我想讀Full time hd, 不過, 話之理, 做咗先算!!
今日阿爸抵不住睇波誘惑, 申請有線, 對我地有好, 有不好, 好:多野睇, 不好:霸住部電視, 但係對佢就唔好喇, 掛住睇, 無精神返工.
多謝各位朋友恭喜我, 希望大家都揾到份好工啦!
我依家都睇緊英格蘭VS瑞士, 都幾好feel喎, 英格蘭入波, 阿爸同我都大叫!

>>June 17, 2004 at 4:49:03 PM GMT+8

2004 年 6 月 15 日 星期二 【陰】

我阿妹講大話, 又話睇咗"大事件"(皆因佢有兩張free ticket), 點知, 係無睇ge, 佢話怕我搶咗佢d 飛, 所以騙我睇咗, 今日last day, 男朋友又唔得閒, 先比飛我! 好快咁約Cyrus, 佢鍾意Kelly, 就同佢睇, 我鐘意邵美琪, 雖然戲份少, 但係精! 有件瘀野呀~, 睇戲果時, 已經肚餓, 點知係場最靜ge 時候, "召一聲", 唔係打鼓聲喎, 頂, 超瘀呀, Cyrus 實聽到啦~睇完出去旺角南瓜屋食飯, 今日d飯特別漏, 半碗都食唔到! 食完飯再食New Zealand雪糕, 橙味朱古力好味, 三溝果隻夠童真!

阿妹今日留係屋企睇"再見蛍火蟲", 佢冷血都會喊??

電台好攪笑, 佢話姚明d精子會唔會長d?(皆因佢高), 仲有姚明阿媽生佢咪要好耐先生到佢出黎?

>>June 17, 2004 at 4:20:23 AM GMT+8

2004 年 6 月 14 日 星期一 【乍寒還暖】

非常, 完全無煩惱的一天

打扮靚靚去食buffet, 先去海運, 皆因要睇泳衣嘛, arena 定係手掌好呢?
好肚餓咁行去富豪九龍酒店, 先掃熟食, 三文魚, 出咗兩次到啦, 覺得唔多款, 好似第五街多野食d喎, 全場第一焦點, 高妹男友+高妹, 佢地呢一pair, 你一啖, 我一啖, 見到都眼冤, 好笑(原來男朋友係度, 高妹都好粗魯架, 但係無打男仔) ! Apus, 阿風, 阿雙好靚, 睇得出打扮有心思, 靚爆鏡~全埸高潮, 當然係, raphael 的核突甜品 and "i f" 疑雲, 有咩理由咁似樣ga? 哈, 不過唔係真的, 我有85%肯定felix 女朋友唔係iris!!
食完幾個女仔去行街, 我就買咗3 隻碟, 再見蛍火蟲, 新紮師妹, 楊千樺concert, 平到飛起, 最貴果隻都係15蚊, 我真係覺得好睇先買, 要儲起好作品.

拖着疲乏身驅返到屋企, 立刻沖涼, 點解d人話我把聲唔同咗呀? 我知喇, 你前2 個星期打俾我, 我就死屍咁, 考試嘛, 家下都考完, 梗係開心啦~

>>June 15, 2004 at 6:32:26 PM GMT+8

2004 年 6 月 13 日 星期日 【晴】

貪食之禍

午餐:米粉+檸檬茶
下午茶:蛋卷+咖啡

就咁出事喇, 酸同咖啡, 溝呀, 攪到想嘔, 一路睇Mona Lisa Smile一路暈. 睇得我勁辛苦, 又要追英文字幕, 真攞命. 今日睇咗兩套戲, 睇得暈駝駝的 Mona Lisa and Love Actually, Hugh Grant型, 佢有種中年男人瀟灑, 仲之佢ge一舉一動, 都令人愛死啦!

明天成班人食buffet, 記憶中之前攪ge 活動都無咁多人, 21個人喎, 所以我好期待, 食完buffet, 唔知仲有無節目呢?

>>June 14, 2004 at 3:44:51 PM GMT+8

2004 年 6 月 12 日 星期六 【晴】

早上7 點先完結麻將局, 阿妹食十三么, 係咪真係咁勁呀? 不過食阿爸, 不孝!

正一無覺好訓, 今日工人姐姐黎探我地, 自嫲嫲走咗, 有2 年未見過佢喇, 我記得, 以前我一放學, 佢就煮麵比我食, 幾好~家務都唔使我做.難得佢黎, 阿媽仲捉住佢, 整野食, 因為佢煮野好叻, 好啱胃口, 人地放假, 咁都唔放過, 唉~~

夜晚去探姑媽, 佢搬咗愉景新城咁耐, 我第一次上去, lobby雖然細, 但好有氣派, 再參觀表姐, 哥房, 表姐正一LV迷, 記事簿, 銀包, 袋, 嘩, 放係間房d 野都有成萬蚊, 學阿媽話, 揀男朋友, 要有錢, 錫自己先好! 到表哥, 傳聞佢個靚女朋友, 終於見到(張相), 如果見到真人就最好啦~

今日聽咗4張新碟, 本人最愛劉浩龍, 張韶涵, 傅珮嘉. 劉浩龍歌真係句句入肉:
男友　是新的好
明知爭不到　情願不乞討
成年人胸襟　舊情人身份
有天都變陌生

>>June 13, 2004 at 5:28:01 PM GMT+8

2004 年 6 月 11 日 星期五 【晴】

已經是零晨2點鐘, 我屋企仲大把人打麻將, 啱先幫阿爸打, 兩鋪都清一色, 靚到食唔出. d人又勁, 係咁輸自摸, 到阿妹打(因為我打咗咁耐都食唔出), 新人上場, 通常都旺, 點知, 第一鋪就自摸, 第二鋪仲勁, 字一色, 真係2 鋪翻身. 好似話會打通宵, 死喇~

放假日子我未覺得悶, 因為我太多碟要睇, 今日睇完"中計", 唔通真係"財散, 人安樂"?

>>June 12, 2004 at 5:55:14 PM GMT+8

2004 年 6 月 10 日 星期四 【晴】

八點早起

番去tradelink, 求其到死, 同高妹玩, 佢呢個人就動手動腳, 我就同佢打咗一陣, 知道唔夠打, 就係咁寸佢, 果然每人都有不同長處! 成班人上完堂, 就去唱k, 搭地鐵, 我地好嘈呀, 但係自己有把口, 可以講野, 梗係盡情講啦, 去到Green Box, 正呀, 裝修靚, 新歌多. 唱到發悶, 眼訓, 走~

番到屋企, 煮食, 立刻訓喇, 連落街食飯都唔制, 到成家人食完番黎, 爸媽又問我有無消息, 今日都無, 實唔請你啦. 死仔爸, 睇死我!

六合彩開我生日呀,,勁!!!!!!!!!!!有2注都中2 個字, 比多1個字都好呀, 打個和~不過中大獎會折福, 唔中都好事, 中就最好啦~

>>June 11, 2004 at 5:28:54 PM GMT+8

2004 年 6 月 9 日 星期三 【晴】

各位同學果然聰明

係呀,,,記得做咩喇, 就係見工, 阿爸點我, 令我搭錯車, 遲到2 個字, 著住對high heel跑, 仲要斜路, 狼狽到死, 好彩, 見我果個好好人, 話唔緊要, 今次見工都幾順利, 不過佢d問題好睇自己諗法, 例如: 「你點解讀呢個course?」,「你對香港IE點睇呀?」問咗好多野. 最緊要係我開價7000蚊(預佢壓價), 佢問我, 你無經驗, 點解7000蚊呢? 我就答:「其實薪酬方面, 你可以睇我工作表現再renew.」, 第一個見我果個人唔係boss, 所以要見boss 先走. boss 就長氣, 講好多merchandiser要做gei 事, 不過我係有得益ga, 分享人地經驗, 就算佢唔請我, 我覺得都賺咗~

番到屋企, 即刻話阿爸, 點我搭錯車, 遲到! 阿媽阿爸都話我開價高, 媽就話:「大學生都無咁高人工!」爸話:「你獅子開大口!」, 唉,,,我係有人指導, 開呢個都無問題ga. 唔會有錯的!

明, raphael, 大家都知咩事, 心照啦, 呵~

>>June 11, 2004 at 4:58:43 PM GMT+8