2003 年 7 月 31 日 星期四 【晴】

《遲來的生日禮物》

今日如常去洗傷口，姑娘包紮得真係好喇，唔痛之餘仲令傷口好舒適。多謝姑娘~

好舒服咁訓晏覺，打機，煮飯，睇電視，打機...

媽咪買左個 mp3 比我做生日禮物...受寵若驚，而且好慚愧，因為我直到今晚收到份禮物之前我都仲埋怨緊佢偏心...埋怨佢淨係買生日禮物比家姐同細妹....多謝媽咪，對唔住呀！

>>August 1, 2003 at 5:37:37 PM GMT+8

2003 年 7 月 30 日 星期三 【晴】

今日一早起身比Tommy陪我去洗傷口，竟然唔痛...姑娘話要洗一個禮拜...
之後心血來潮返去練 band，比人用懷疑o既口吻問我o既傷勢，好難受...唔係想關心我不如唔好問啦，朋友。
本來唔打算比亞媽知我踩單車趺親，之後發覺無得暪，諗住呃佢話落車跌親.....點知....佢問：「你踩單車跌到咁呀？」我無可奈何答：「係....」
點解我唔早一步叫亞妹唔好講我尋日去踩單車喎.......

>>August 1, 2003 at 6:08:36 PM GMT+8

2003 年 7 月 29 日 星期二 【晴】

《悲慘日記》

我今朝約左Tommy八點半去做智能身份證，本來起到身架，不過又訓返，結果八點三十一分Tommy打黎我先醒，最後就遲大到喇。由於未訓醒，把聲好難聽，我就話：「我把聲咁難聽，一陣間可能唔比我影相。」然後我就模擬到時o既情景：「你把聲咁難聽，無得影相呀!揀個公仔代替啦~」然後Tommy就潑冷水：「乜你未訓醒都咁無聊o既！？」

係喎，乜我未訓醒都咁無聊o既！？

上星期六比人偷左銀包，今日去補領智能身分證，又幾好玩喎…不過$395一定比個身分證更好玩。

下晝去踩單車，大炒車！左腳膝頭無左一塊2”x1.5” o既皮，右腳膝頭瘀晒，下巴擦損左，左手擦損左。先係左腳膝頭落地，左手試圖撐住保護塊面，比架單車壓多一下，下巴落埋地，右腳撞埋架車…瘀晒。

咁岩附近有救護人員救緊人，順手幫我包紮。今次係我第二次上救護車…佢幫我是但洗下傷口，我好好奇咁問：「點解唔痛o既？」佢話：「咁代表你忍得痛囉。」包好之後踩多兩個鐘返去交車，幾勁呀。

交完車發現傷口滲左好多血，比Tommy威迫之下唯有去威爾斯急症室求醫，被斷/定為半緊急，等左好耐好耐，照x光，洗傷口，護士話「好痛個喎!!!」佢第一下搽落黎，我就本能咁「雪」左一聲，佢問我痛唔痛，我就話：「唔痛喎」。跟住佢就話「無左塊皮應該好痛個播~~~」，跟住佢就再係咁卒，我就痛死喇！佢話因為我個傷口有污糟野…痛到無命！然後佢仲開左張紙叫我日日去洗傷口，大鑊喇，仲打左支破傷風針，不過之後仲要去打多兩支。又無左$100，

兩日前先因比人偷左銀包上差館，而家又入醫院…


>>July 31, 2003 at 3:17:42 AM GMT+8

2003 年 7 月 26 日 星期六 【晴】

今日同班朋友仔去BBQ，玩得好開心，不過個cost 控制得唔好我難辭其疚...

樂樂太瘦喇，健康 d 一定會更得意...我話過要整馬豆糕比樂樂食架...不過仲未

同大家玩水，玩浮床，石澳d沙真係好得，又淺水喎，淺水灣？執笠啦....
豬展對C Poon話：你再攪我，除你件衫架....
我地：嘩~....(起哄....)
豬展意圖狡辯：我話佢頭先o個件呀...
我地：唉~....(起哄....)
睇唔出莊庭皓個人細細粒，d 腳趾咁肥個喎，好得意呀

>>July 27, 2003 at 4:59:33 PM GMT+8

2003 年 7 月 25 日 星期五 【晴】

o係旺角比人扒左個銀包，失去左百幾蚊現金、個人八達通、身份証、捐血証、Shirley送的美金coin、過氣Prefect章，〈我一路都只係好激氣同唔開心，直至Tommy提醒我我個章都o係銀包，我就忍唔住喊喇...〉。

給可惡的扒手：

人渣，你父母養到你咁大你走去做小偷，你對唔對得住佢地呀？人同禽獸本來o既差別只有好少，但人會自覺將之擴充。而你，同禽獸無乜分別，因為你唔識報父母養育之恩，而且無廉恥可言，你唔只帶比我好多麻煩，你仲丟盡你父母o既面子。你最好係因為有苦衷先去做賊，如果係咁，我當做善事，並就以上o既言論向你道歉，反之你將會係一個連螻蟻都睇唔起o既人...螻蟻只係偷生，不過你係偷人地銀包...你點填自己o既"職業"呀？

>>July 27, 2003 at 4:31:49 PM GMT+8

2003 年 7 月 21 日 星期一 【晴】

今天是沒有他的第二日。
我一直都諗住今晚唔洗返工先揀今日返架...┼點知全日都無收到電話叫我唔洗返，唯有死死地氣咁返工。
返到去發覺有四個45-54歲男士，(最難做)，得兩個人返工。今日放工後又無得打電話去曬命，我一心諗住今日交白卷算數，我無乜大志架。點知後來supervisor 比我地做35-54歲男女，咁就做到兩份，兩個都好好人架，仲可以早30分鐘放工添。

>>August 26, 2003 at 4:19:24 PM GMT+8

2003 年 7 月 20 日 星期日 【晴】

嘩，尋晚發惡夢呀，夢見自己比個好朋友追殺....逼住著 d 好老土o既衫掩人耳目。
尋好夢 夢難成 況誰知我此時情 ─ 聶勝瓊
今日，是沒有他的第一日。好悶，有 d 唔開心...我想去街呀
照舊，睇住本《人性的弱點》，都好似學到 d 野架。

>>July 21, 2003 at 3:54:34 PM GMT+8

2003 年 7 月 18 日 星期五 【晴】

今日o既天氣比我想要o既好得多，而且過多....
一早起身，一大班人去踩單車，好曬，不過我早有準備...戴帽，裡面加個布頭巾吸汗。
由大埔墟踩到大圍，再返沙田交車....."女子 支力 口牙！！"好辛苦，坐到pat pat好痛，而且攪到滿山傷兵。飲左好多水，起碼2.5公升。幾個人去沙田新城市廣場換左件臭衫，再meet返踩返大埔o既人，去大排檔食飯。嘩，好耐無咁大班朋友一齊食飯喇，食左勁多野，開左支啤酒...得我飲？.....我無醉....我....無醉.....哈哈,不過就飲得太多野喇.....
我今日破例沖熱水涼，因為 d 手腳好痛，要舒緩下，再勁搽安美露，而家好似比火燒咁呀！
今日回程o既時候最白係我，哈哈，又無曬傷，做足準備當然唔同啦

希望今日受傷o既人快d好返啦，見到你地我都痛呀。

>>July 19, 2003 at 3:28:49 PM GMT+8

2003 年 7 月 18 日 星期五 【晴】

今日無帶身分證出街....今日工作效率比尋晚跌左50%，不過收入只係跌左38.9%，賺晒

>>July 18, 2003 at 5:00:19 PM GMT+8

2003 年 7 月 16 日 星期三 【晴】

今日去city u interview，早左135分鐘到....呆坐
對答彷如傻仔...睇怕都凶多吉少....原來係 Mgt science 叫我去interview...本來毫無頭緒，好彩尋晚Tommy幫我手搵線索咋，佢當正係自己interview咁，好落力、好緊張咁......搵到一點幾，今朝又六點morning call 我.....好感動呀！

今日 lunch 食韓燒，今次無放火喇~粉絲好好味....泡菜...正呀

夜晚返工，超水準，放工好肚餓...7-11都無野食o既

>>July 17, 2003 at 4:09:20 PM GMT+8