2003 年 9 月 16 日 星期二 【晴】

衰 Duncan！「我女朋友好少器，靚 d 都唔可以做朋友....所以我同你就可以做朋友喇。」

我做左一個超越國際水平o既 information system黎管理我o既財務。係一個有 cash and bank column o既 Cashbook，會自動計 total 同埋 Bal c/f 架。

今日返工得我一個人，有勁多quota，但係今日要埋field，不過supervisor同我講佢同上頭單左聲今個星期埋唔到架喇，叫我盡量做，我見反正都返左黎，就努力 d 賺多 d 錢啦，結果就做左七份喇。今日又因為食(係為食)而走左班車...

>>September 17, 2003 at 4:53:43 PM GMT+8

2003 年 9 月 14 日 星期日 【晴】

唔開心呀！

想知邊 d 係好人？全心全意咁對佢兩個禮拜就知

社會各方都批評現代學生英文水平下降，仲驚釘唔死我地咁...我承認現代學生英文水平的確唔高，而家o既英文強者的確比以前o既英文強者遜色。不過我有個問題，而家o既考試制度只要求我地做到咁多，而我地o既老師又只能教到我地咁多，咁社會想要求我地有幾多呢？我地老師o既英文唔通同好耐以前o既老師一樣？係去到而家呢代先一落千丈咩？既然師資唔同，評審標準都唔應該一樣，你試下用二十年前o既高人工請而家o既工人丫，菲傭都唔show你啦

點解唔話教育質素下降而話學生英文水平下降？我地 d 英文唔係好掂o既老師係邊個教出黎架，火星黎o既？咪係而家批評我地o個班上幾代o既英文強者囉。責任無得推卸架，你一半我一半咪算囉，係都要推落 d 學生度，盞比人笑乍


>>September 24, 2003 at 4:20:23 PM GMT+8

2003 年 9 月 13 日 星期六 【雨】

尋晚學玩國際象棋，我都唔算好水皮o者。好想去 K 呀，喂約我丫

本來想去行下街架，不過又落雨，又做唔掂份 econ功課...衰 econ，執笠啦！幾經辛苦，終於做完，用 Excel做架，順手練下丫嘛

原來 d 頭髮都已經好長喇，好想剪到好似以前咁短...又唔太捨得...
咁難得做完 econ，又無人陪我玩...好悶呀



>>September 14, 2003 at 4:02:58 PM GMT+8

2003 年 9 月 12 日 星期五 【晴】

今日晨早起身返 City聽 Talk，好眼訓，訓著左好幾次。同Chris食飯，之後上七樓玩康樂棋，我地大家都唔識點 set 張檯，雞手鴨腳咁攪左好耐好耐，笑死...最後搵兩個型男黎幫手，成功！玩左兩舖，慘敗！Counter o既阿姐突然走出黎：「靚仔靚女呀...」我仲以為 Chris 比左錢佢，派佢黎讚自己添。阿姐繼續講：「你地知唔知文康署個網址呀？」我以我一貫友善而且禮貌o既態度去幫佢將康署個網址加左落"我的最愛"。

其實我本來可以走架喇，不過約左Kenny去旺角又未夠鐘，所以﹝'hε﹞下先，咁Chris同學又好好人咁留低陪我。我地去 Run Run Shaw Library，搵 VCD，我地發現左 d 三仔，當我地o係度談論o既時候，有個清潔阿姐經過，用 d 好鄙視o既眼神瞥左我地一眼...無辜呀！

結果都同唔到 Kenny 去街，因為佢要 OverTime。

返屋企訓晏覺，發噩夢，我夢見自己不停咁將一個女同學﹝我一 d 都唔憎佢架﹞o既頭撞向 locker，而且呢個片段不斷重複，好驚呀！我點解會咁架？呢個女同學成頭都係血，但係佢仲對住我好詭異咁笑，我當時都係因為咁所以先咁對佢。醒左之後成個人呆晒，好恐怖呀

>>September 13, 2003 at 2:37:03 PM GMT+8

2003 年 9 月 11 日 星期四 【晴】

今日好灑脫咁返工，乜都無帶...

今日係公眾假期，所以返1830-2015，平日係1900-2030，即係蝕左 15分鐘啦！唔抵！不過今日無supervisor，所以我自我休息左好耐好耐...咁咪抵返晒囉...唔好以為我咁懶實做得好少問卷喎，我破左自己紀錄，做左五份，平均時薪達$57.86，如果計 salary per net working hour，應該大概係$80。哈哈哈哈哈....不過都唔夠買本Account書啦

開開心心咁歸家，食飯，睇"美麗在望" o既低 B ending。

>>September 12, 2003 at 4:43:25 PM GMT+8

2003 年 9 月 10 日 星期三 【晴】

上最早o個堂 lecture，放學...好無聊呀，等埋 Chris 食飯，搵埋Konnie去傳說中o既藍山影印， 叫低 B Chris 去問路：「呀小兄弟，請問邊道有得影印呀？」「咁多位老細，邊道有得影印呀？」低B 仔，映衰我呀！憑住我地o既智慧，安全抵達。

低 B Chris 上堂，等我好人 d幫你印 CCIV d 野啦，反轉左印，印左十張白紙，三蚊架！好彩唔係我比錢o者，哈哈哈哈

印完鎖返 d notes入Chris 個 Locker....如果我鎖埋張八達通入去，低 B Chris點返屋企呢？再等埋佢上個 lecture，比返張八達通佢。明明放左學都o係學校留左七個鐘。功成身退，去街。

同Tommy去維園，勁多人，去得o既人都已經豁左條命出去....唉，我，死蠢，去做乜丫？

離開人羣，去草地碌下。無火玩，得支爛鬼塋光棒...其他玩塋光棒o既成年人都"充滿童真"，笑死呀，哈哈哈哈！最驚歎(嚇)o既係竟然有人玩長生燭---即係如果有人過身，其家人放o係屋企門口燒三日三夜o個d好長o既蠟燭。碌到十二點幾，走人...完全無製造垃圾，連膠台布都係可再用o既，I am proud of us. 餓死，去食宵夜，打的，返屋企。

>>September 12, 2003 at 6:09:36 PM GMT+8

2003 年 9 月 9 日 星期二 【晴】

今朝起身前發噩夢....夢中我地有十幾個人o係巴士上面，其中有個係上帝，拎住三支火柴，佢話我地當中會有三個人要死，佢擦著第一支，當火柴熄滅，其中一個人就隨即倒地....我當時好驚，上帝叫我負責擦著第二支火柴，我有預感今次死o既係我，我唔想擦，但隻手不受控制咁伸左去拎支火柴黎擦，火光熄滅，我就眼前一黑，無晒知覺。如果死亡o既感覺只係咁，都無乜好怕...我只感覺到無晒力，見到o既野好似熄電視o個下咁....個人好似無左電咁....個感覺非常短暫，之後就無晒野喇。一 d 都唔似發夢...隔左一陣，我再次聽到野，上帝同我講：「其實本來要死o個個唔係你架，你做乜同人換丫...」我好後悔....我本來只係好心同另一個女仔交換左一樣野....不過究竟係咩呢？我好唔甘心....就o係呢個時候，電話o既鬧鐘叫醒左我，我終於可以離開 d 咁恐怖o既感覺，好彩，活著多好

不過個夢令我全日都好不安

低 B Chris今日話我衣著似男人...原來佢都好為食架

今日返全日，不過唔太辛苦。今日要返工，我其實好唔想返，因為星期三要埋field，好難做。打電話比supervisor.....要返....我揀星期三都係想唔返工之嘛....不過我今日mood到，好勤奮。今日 quota 有十份，共有四個人返，我做左三份，大家 total 做左九份，最後一份大家唔肯做，lur 住要放工...好野，早左一個鐘放。平均時薪 $49.2。我真係訪問界o既翹楚....哈哈哈哈

我唔記得我兩個好友o既生日，呀！！！我罪該萬死呀！對唔住呀，補祝九月七日生日o既佳佳生日快樂，九月九日生日o既琴神玉樹臨風。




>>September 10, 2003 at 4:40:07 PM GMT+8

2003 年 9 月 8 日 星期一 【晴】

唉，雖然今日返下晝，不過都要一早起身，去打第二支破傷風針...好痛呀，上次都痛左一個禮拜呀。【生活小常識】一般黎講，打針分三種，一〉打落表皮層，二〉打落肌肉，三〉打落血管。今次我咁痛係由於破傷風針係打入肌肉o既，亦即係最痛o個種。由於 d 藥打入肌肉，谷脹 d muscle，再好慢咁散開晒，所以會痛好耐，而且痛o既範圍會越來越大。順帶一提，打入表皮層係最唔痛o既，因為唔經muscle；而打入血管原則上唔係好痛o既，但因為要經muscle，就會有少少痛，不過好快就散架喇。

返學，早左，搵Chris食飯，無人聽...得一個人唔食lu，去locker拎餅食，拎完又收到 Duncan電話喎，好野，有人搵我食飯。

上 MIS，幾好玩丫。上普通話，覺得自己好似小學生....比Brian笑死，佢話學普通話用黎同朋友傾計，老師問佢係咪有好多朋友講普通話，佢又話無

今日Chris同學一見我就話我唔同左樣，唔係掛，莫非我靚左...其實我都唔覺自己有potential靚喎，哈哈，who cares？我有內涵！推廣口琴藝術，同學，認真 d 啦，拍子好重要架...dental check，唔記得帶牙刷，仲想等牙醫讚我添。無蛀牙，要洗牙...無可能，我無理由有牙石架喎，我唔信，我唔信...book左九月三十號同Chris一齊去。Chris要補牙呀，哈哈哈，污糟仔，哈哈哈哈...

同Tommy食飯，佢買左奇華o既豬仔餅比我，好野，原來無細個o既時候咁好食喇，不過我都好鐘意個籠。其實十五蚊買隻咁o既野太貴喇，如果唔係我一早買左啦...﹝我慣左打日記打到咁上下就save一次，"有 d 人"見我未提呢件事就扭計喇，世風日下﹞我死都唔信Tommy講皮蛋酥唔好食，因為食野好主觀o既，所以我不顧一切咁買左一個，而且一返到屋企，唔理幾飽都咬啖先，cher~執笠啦，真係唔好食o既。包起佢，聽日再試過

去又一城o既「廸士尼 Land」，會長不禁驚嘆：「豬仔，你點解可以咁得意架？」

我隻手痛到連沖涼都有困難

>>September 9, 2003 at 5:06:43 PM GMT+8

2003 年 9 月 7 日 星期日 【陰】

早堂...我最早，八點返去開 locker...上MS lecture，一頭霧水，下次我要mark住Stephen！！我最醒目，特登帶包餅比你地架！衝去買EN書，再趕去上EN，差 d 恰著左，break o個陣訓到昏迷左...再趕去上AC tutorial...放學，yeah~

去同7C幾個同學仔食 lunch，好野，有grad book

呆坐等 Chris 同 Duncan 放學...做AC功課先...約左Chris下星期一食早餐。Chris個女朋友真人比相靚好多。佢仲用PIGLET銀包架，有品味！(咁無理由揀Chris架喎...睇黎Chris仲有好多內在美)，哈哈哈哈哈哈...

返工，為食之過，遲左一分鐘。做左成晚都唔夠買本EN書...好灰呀。打電話打到差 d 訓著...公司請著我真係....一大損失...我今日無mood，不停咁同其他人傾計...不過無左我又係一大損失，我mood到o既時候都幾勤力架。

我今日拎左我第一張信用卡喇~

夜晚睇完grad book，好懷念7C...

>>September 9, 2003 at 4:08:42 PM GMT+8

2003 年 9 月 6 日 星期六 【乍寒還暖】

我今日好勤力，做左Account workbook exercise 1同埋 MS o既功課

一開 ICQ，見到個message：
「你係咪遲d會影印ms本書呀~~?幫我影埋ya~~~仲有XX同XX都要~~~唔該哂你先~~~有咩事call我」

咁算咩意思呢？你係咪唔係好正常呢？(婉轉 D...)你會唔會以為加多幾個「~~~」就會睇落友善 d 呢，你又會唔會以為唔該左我我就一定要應承你呢？本來印多一本就完全唔係問題o既，不過你似乎唔係好清楚本MS書有幾厚喎。我完感受到你係order緊我做野囉。做唔做好人係由我決定架
如果你係我，你幫唔幫佢？

原來Kenny唔開心...對唔住呀，o係你最唔開心o既時候我竟然唔o係你身邊，我真係枉為人，希望你快 d從悲傷中站起來，唔開心時可以搵我架，任何時間...對唔住

教人做功課，有益身心，對住Konnie我係好人

我係低 B 妹？唔係掛

>>September 7, 2003 at 4:23:21 PM GMT+8