2003 年 10 月 5 日 星期日 【微雨】

尋日終於買左祖兒隻《SHOW UP!》，好正呀！成隻碟都係以快歌為主，都keep到水準架。呵呵，話時話啦，祖兒係事業上既「宿敵」Gigi都係呢排出左隻《我想我唱》喎，又黎一番銷碟惡鬥啦。講返隻《SHOW UP!》先，原來今次用左Ｄ先進科技既，咩防盜拷CD喎，即係話防盜版果Ｄ野啦，又話咩情況下播唔到、又話咩機播唔到，唉，總之煩啦，如果張隻ＣＤ放落部電腦度播，佢會強行要你用佢隻碟既PLAYER播既，真係丫......

唉，JUPAS JUPAS JUPAS......好煩呀......

>>October 5, 2003 at 12:49:13 PM GMT+8

2003 年 9 月 30 日 星期二 【晴】

哈哈，可能因為聽日係放假既關係，今日勁有holiday mood呀！
frankly，我今日一d野都冇做過呀，功課冇做，書冇溫，原本諗住free lessons做下功課扮乖仔架嘛，點知受唔住引誘，去左玩電腦同睇雜誌。
anywayz，今日心情都幾好，maybe係希希既【無間道II】今晚就上畫同埋祖兒隻新碟【SHOW UP!】都係今日推出，雙喜臨門既關係卦。
點都好啦，我今晚就約左濤濤睇【無間道II】勒，所以唔講啦 ^^



>>September 30, 2003 at 6:32:09 PM GMT+8

2003 年 9 月 28 日 星期日 【晴】

唔......尋晚好激，同媽咪傾計都可以由晚上11:30傾到成凌晨4點！我地無所不談，真係夠晒犀利，簡直厲害呀！呢件事令我諗起我2年前o係澳洲既最後一晚......果日係我係Frankston (墨爾本隔離既一個市鎮)既最後一個晚上，果日之後，我就飛返黎香港啦，係果一晚，我同我個homestay host mother傾計傾左成晚，我地一路開住部電視，由做緊"the last show"（即係atv既”大衛牙擦騷")傾到"telefishion"（即係又係atv果個"魚樂無窮"呀），由12點都未到，傾到凌晨成5點幾，好勁！Linda (my host mom)話既然已經成5點就快天光，就打算同我上山去睇日出呀！結果我地5點幾換過套衫，執返個樣，帶左少少野食，咁就駕車上山啦，清晨既Frankston好寧靜、好舒服，我地沿住條公路駛到去一個小山丘上面，果度已經企左一對男女等住睇日出啦，冇耐，個太陽就升起啦，微弱既陽光映照著成個frankston，好靚，frankston係一個海濱小鎮，當陽光斜照落個大海度，漁光閃閃咁，令人陶醉！睇左一陣，我地又駕車落返山，駛去mornington (frankston旁的一個小鎮，出名企鵝），我地via一間drive-in McDonald's（香港冇架，所以好新鮮），係果度我地坐係架車入面，同個staff講要食d乜，跟住，佢就會係個窗度遞ｄ野食畀你，唔......係勒，澳洲既McDonald's係冇香港既咁多個餐畀你揀、冇咁多花款、冇咁多野食、同埋貴DD既。我地著D McBreakfast放係後座，就駕車去到mornington既海旁，果時仲係6點幾7點，好寧靜、好舒服、好寫意、好soft.......（唔知點形容啦），我地就拎d breakfast出來一邊望海、一邊食、一邊傾計，view同feel都同樣咁正!!!......（好懷念呀!!!!講到有D想返澳洲避世添!!）

尋日係中大同城大既information day，我又冇去，因為要補習補習補習......連toowei問我join唔join佢去中央溫書我都話唔得啦，我發覺原來都幾趕架喎，3點半左右係cwb放，5點要係tst度出現，時間唔拖唔水咁，做野又做唔到ｄ乜，街又唔行度多條，但又唔係話真係時間好少架咋喎，煩......

講返今日啦，由於尋晚咁夜訓，我今日就成２點先起身，原來toowei已經去埋中央溫書啦，唉，見人地咁勤力，自己仲係咁鬼懶，自己又唔係叻過人喎，A-LEVEL實收得檔囉.......灰.......
學Eric話齋，成日同自己講要勤力ｄ，但最後都受唔住引誘而冇做到or半途而廢，唉，同佢一樣，好憎自己添.......

睇左toowei同noble既diary，兩個都係寫同一樣野，but觀點唔同，容我係度講下我點睇啦.......
我覺得呢個世界係幾黑暗既，人同人相處真係要好有skill，所謂既skill就係圓滑，但圓滑絕不等如奉承、世界仔、虛偽，呢幾樣係好唔同既野黎：圓滑係識做人、識處世、知道咩應該做咩唔應該做、咩應該講咩唔應該講，通常圓滑既人係社交方面都有相當既成就；但奉承就係專擦位高權重既人鞋咁解，奉承係絕對唔受到人既歡迎，反而仲會遭人白眼，通常呢ｄ專奉承別人既人就會被諭為狗，我估大家都知係ｄ咩來；世界仔係係人都擦，唔理對方係位高唔高、權重唔重，總之就逢人就擦，但呢ｄ唔叫做圓滑架，世界仔係會畀人恥笑，但未至於要遭人白眼既地步；虛偽者假也，人假，一睇就知，笑面虎就係好typical既例子，我諗唔駛我多講，大家都知咩叫做虛偽啦。做人要有性格，係，做人應該要堅持自己既原則，但做人太有性格，即係話太自我中心，咁樣只會招致失敗同埋會好乞人憎、好難相處。適當既時候要有自己既主張、自己既原則，但唔好過份，呢個係成功之道。如果別人在我背後說三道四、講我是非、講我壞話，我知道呢個係無可避免的，把口生係人度，我無能為力去控制人地講乜，咁咪算囉，係人都會畀人話架啦，我只在乎佢地講既內容有冇刻意地去詆譭我、數臭我、講大話屈我、無中生有，如果係有既，我係絕對唔會放過佢，同樣我一定會澄清，冇既，咁就算啦。人地同我講人地既事，壞話又好，咩都好，我係唔會同其他人講，我認為人地講嗟，係咪事實我都唔知，做咩要做八公，係度學人說三道四呢，我係唔會同其他人講，包括主角在內。雖然我都好想知道人地係我背後點樣講我，我都係好想知道，好希望會有人話我知，但知左又點呢，唔講都講左啦，有時我都覺得自己幾矛盾。

>>September 28, 2003 at 8:03:20 PM GMT+8

2003 年 9 月 24 日 星期三 【陰】

仲係好唔舒服，但無謂請咁多日假啦，所以我今日返左學
一返到去，勁多人問候我囉，突然之間好warm添，邊個關心我顯然而見，多謝晒你地既關心呀
雖然我返左學咋，但我拎正牌唔駛上PE堂架，好野，仲可以拎正牌係堂上食野添...送藥丫嘛...
去TUCK SHOP度買三文治送藥啦，竟然TUCK SHOP老闆知我病喎，話：「你唔舒服丫呵？頭先有個同學黎幫一個同學買三文治送藥，中七架喎，唔知係咪買畀你呢，我叫佢遲d再來買，咁你係自己買定幫人買呀?」，我：「自己呀」，老闆：「哦，咁可能佢係買畀你啦!」．．．雖然唔知實情，但個心WARM得一陣陣，如果真係有咁既事，果個會係邊個呢?
今日有人八左樣料畀我聽，係講尋日我冇返學既時候發生D咩事。
中化堂，派實用文，Miss高舉我的實用文問邊個好朋友可以幫我拎，正當大家猶豫之際，Jerry就已經即刻彈起身行出去幫我拎啦，真係夠晒老友，真係唔話得啦，Jerry!!! ^^

>>September 24, 2003 at 9:43:56 PM GMT+8

2003 年 9 月 23 日 星期二 【陰】

今朝起身好暈，所以冇返到學啦。
Ris晨雞咁早icq我，力行聳容我請病假喎，哈哈，我真係請左一日病假呀，係咪好聽你話先?anyway，係度多謝呢幾日關心過小弟既朋友仔先 ^^""

雖然話請左一日病假咋，但對我D功課進度係毫無幫助架，我一樣都未掂過呀!!!
無計啦，病到溫溫鄧鄧咁點做喎!!!!<<<<<<<<<藉口 ^^""

>>September 24, 2003 at 9:29:37 PM GMT+8

2003 年 9 月 22 日 星期一 【暴雨】

今日仲係好唔舒服，但都要頂硬上返學，唯有戴住個口罩囉。但係呢個時勢，戴住個口罩又真係幾ODD既，D人會望你囉。

返到學校，勁多人問我做咩戴口罩(well，我唔知點評論呢D問題好)，有D聰明D既就會問我係咪唔舒服呀，應酬真係多......

放學頂唔順，一定一定要去睇醫生，醫生見到我既病況居然嘩嘩聲，話好嚴重喎，其實係嚴重喉嚨發炎+傷風，佢話要落重ｄ藥喎 ><"""""

>>September 24, 2003 at 9:23:24 PM GMT+8

2003 年 9 月 21 日 星期日 【溫暖】

好唔舒服呀，尋日已經覺得個喉嚨勁痛、又榷架啦，今日仲衰ｄ，覺得成個人好罄、喉嚨痛+榷就不在話下啦，仲要係feel到係喉嚨發炎、好似出血咁，因為有ｄ咸味，擦牙時仲吐左ｄ血出來添，大鑊啦!!!仲有呀，個頭有ｄ暈、鼻有ｄ塞，好驚係SARS變種呀我，OR係登革熱....總之好似大限將至咁，TOUCHWOOD!!!!!!!!!!

尋日係浸大同科大既INFORMATION DAY，我雖然人冇去，但就托左PARENTS去錄音，哈哈！冇計啦，尋日開始既EVERY SATURDAY，我都全日用晒來學琴AND補習.......=.=""".......真係.....我都唔知講咩好........

唉，好灰呀，好驚冇OFFER呀。NOW諗緊BAND A放UST既BBA（THX ERIC FOR THE INFORMATION AND GUIDANCE!)，BU既NEWS，同HKU既NEWS(BUT呢個好RISKY，因為仲未知開唔開得成！）。唉.........REALLY........
唔知講咩好啦..........

尋日學琴，我個PIANO TEACHER問我O係邊間讀，我叫佢估，佢竟然估喇沙禾，哈哈！^^""""

(今日收到個消息，就係話明報既Jannus唔做啦，唉，真係好sudden同有D唔捨得佢添，話晒佢都畀左咁多機會我，多謝都未來得切，咁就走左啦，唉，有D內疚 ><)

>>October 15, 2003 at 7:56:15 PM GMT+8

2003 年 9 月 18 日 星期四 【晴】

唔知做咩，今日搭地鐵，o係金鐘站有個年約廿幾三十、染左一頭啡髮、身穿畢挺西裝既男人，走左入黎，原本都唔係話ｄ咩特別事，但係佢企係我面前，一直咁望住我，我有ｄ唔耐煩，就望返佢，佢戴住一副橙色既太陽眼鏡，都幾好樣咁既，我冇望佢，DUP企頭，冇耐，佢又唔知做咩，係度哼歌，哼左幾粒音，我又望下佢，佢冇再哼，我又跟住唔理佢啦，冇耐，佢又唔知做咩咁bak左一下手指，又幾響咁喎，我又望下佢o係度發咩癲，佢o係度唔知笑d咩，我覺得呢個人都有ｄ問題架啦。我係天后站落車，企係門口，等住可以方便ｄ落車既時候，果個男人突然呢，又行黎我隔離，唔知係逼得滯定係咩，我feel到我既手臂好似畀人摸左一下or whatelse，o係同一時間，佢鐘左埋黎，係我耳邊發出「唔」一聲.......跟住就ar左o係我前面，當然就梗係變左佢出先啦，搭電梯，佢無啦啦寧返轉頭，o係度傻笑.......呢個世界認真多呢ｄ咁既怪人，我都唔知佢又ｄ咩意圖，淨係feel到好驚，真係唔知發生緊咩事，非常之咁無奈....... ><""""

>>September 18, 2003 at 7:47:38 PM GMT+8

2003 年 9 月 16 日 星期二 【乍寒還暖】

已經好多日連續咁不停落雨啦，仲要次次落親都唔野少，但就硬係掛唔到黃雨，所以我都唔奢望會掛紅雨而唔駛返學架啦，咪唯有冒著逗大的雨點返學、食lunch、放學咁囉，我對鞋就真係慘囉，畀ｄ雨水搞到佢......好似發左霉咁，白色一撻撻，我估係ｄ水漬掛，總之我用極鞋油擦擦擦都好似冇咩用咁...><"""

尋晚通頂呀，咪就係為左份sch mag囉，今日真係「精神崩潰」呀，我指唔係發癲咁解，而係我已經（支力）到不似人形，再加上尋日上PE做FITNESS（唉，竟然就係係上PE堂時冇雨!!!），簡直就係節磨，成個人好似散左咁，唔只個軀殼喎，連個魂魄都好似唔係好齊咁，好在今日勝在空堂多，可以休息下，但實情呢，我竟然冇休息到囉，去左睇今日派既果本2004 JUPAS GUIDE，唉，JUPAS野，太深奧、太煩啦，睇完我都唔明，係時候要找D EXPERIENCED既friends幫下手勒！睇返果本野，原來UST既INFORMATION DAY係9月20日禾，唔，我諗我都係去唔到啦，星期六，補習呀、學琴呀咁，FULL晒，算啦！仲有仲有，原來我都合資格去參加果個咩「自薦計劃」架喎，咁都好d，萬一咩冬瓜豆腐，都仲有少許生機丫！Ah yes！除左睇果本JUPAS GUIDE之外，仲做埋功課，而家諗返都有d「不可理喻」，點解咁(支力)都唔去訓下呢，仲走去勤力喎，都唔似我既一貫作風，都唔知癲咩！～

今日派返上個星期既UE WRITING TEST，嘩，我有8+呀，差D就上到9架啦，呢個係2000既PAST PAPER，希望我出年既A-LEVEL EXAM都有咁既成績或者更好啦！

CHECK EMAIL，有d好不可理喻既野：
「更新
-Updated on 2003/09/16 位置: 免費會員 第 4 項
Form:
4. 如閣下在連續 30 天沒寫日記，本站會向你所提供的電郵地址發出一封警告信，而如果用戶在收到警信後的 10 天以內仍然沒有寫上任何日記，本站會立即刪除閣下的戶口，不會再儲存任何閣下戶口及日記資料。
To:
4. 如閣下在連續 14 天沒寫日記，本站會向你所提供的電郵地址發出一封警告信，而如果用戶在收到警信後的 7 天以內仍然沒有寫上任何日記，本站會立即刪除閣下的戶口，不會再儲存任何閣下戶口及日記資料。」
有冇搞錯呀，真係好離譜呀，唔係日日都得閒寫日記架嘛！唉，過份得滯呀！～

>>May 5, 2004 at 3:44:01 AM GMT+8

2003 年 9 月 12 日 星期五 【酷熱】

嘩哈哈！今日我終日與床為伍，冇計啦，真係好謝呀我，唔趁假期訓返夠本簡直就係對唔住自己！

聽新聞講，今日既空氣污染指數好高呀，難怪啦，我一望出街，乜咁矇架，就好似落左一層薄紗係自己對眼既前面咁。唔理咁多啦，繼續訓先..... ^^""

>>September 12, 2003 at 8:36:10 PM GMT+8