2004 年 9 月 16 日 星期四 【晴】

正正式式咁返學都返左一個星期零兩天，但我好似仍然未有心理準備返學咁，或者係因為太耐冇返學有ｄ唔慣，又或者可能係大學生活比起中學生活好似輕鬆得多（遲返早放），感覺唔係好似返緊學咁。日日搭車，見到好多著校服既學生，原來自己都已經咁快咁大個仔啦，冇得再著校服呢家野，真係有ｄ唔捨得。尋日阿chris先講，佢話佢上到lower 6，對拔萃既sch spirit感覺強左好多，佢估到佢upper 6 grad既時候，會好唔捨得，可能會喊添。其實真係見到人地著校股返學，自己已經冇得著，feel到自己老左好多，冇左份童真咁，有ｄ唏噓。

十四日(星期二)果日上counselling，講咩叫「成長」，阿禮(細o組爸sit堂)問我有冇覺得自己成長左，我真係唔覺得自己有所謂既「成長」囉，真係唔覺得自己係大個左。係堂上，d人不斷好強調話挫敗會令人成長，更可以說是令人成長的特效藥，我自問挫敗都夠多啦，但又feel唔到自己有所成長喎。lecturer話，唔係人人都feel到自己有所成長，正因佢地缺乏左self-awareness，我估我就係冇左呢種自我意識啦。阿禮爸爸話可能因為我係「獨生子」，所以有咁既問題勒。

雖然話上左短短一星期多些少的堂，但開始多野做啦，有功課做，聽日就要交800+字《我對生命的看法》，真係諗唔到點寫會好ｄ，最驚就係會離題囉，條文題咁空泛。

9.12立法會選舉錯漏百出喎，先有唔夠投票箱，後有英華女校票站排長龍overrun到11pm先閂門，再有爆出小西灣票站曾有15分鐘時間監票人同警察被逐離開票站，接著又有點票點到3:30am，資料再冇update，亦都冇人出來講發生左咩事，最後又爆出兩個功能組別有效選票數目高出實則發出選票數目，最嚴重者多出202票！anywayz，今屆立會都會幾好睇啦，相信仲正過睇台灣立法院啦，因為長毛同大班都入選左做立會議員，長毛當選後仲即刻起程遊行去政府總部投訴選舉過程混亂，今次佢終於可以入政府總部仲獲高官接見添！如果曹宏威同阿牛都入埋去，咁就真係激囉！

p.s.:今日晏晝係利舞台muji撞到austin，又吹左一輪水啦。

>>September 16, 2004 at 5:25:51 PM GMT+8

2004 年 9 月 9 日 星期四 【乍寒還暖】

經過細O同大O既洗禮，我仍然感覺唔到自己係一個「大學生」。事實上，呢種感覺係我中六時都有過，就係完全感覺唔到自己係一個預科生。

原本昨天係正正式式上課的第一天，但當我一返到去，先知道教我地Psycho既Lecturer Grace Ip病左冇返，我坐係個lecture hall一陣，咁就打道回府勒，真係徙晒我ｄ時間同車錢，爆無奈。我大學生活的第一堂就係咁cancel左啦......

今日又返學，好彩教english usage果個lecturer Maria Chan有返，佢勁好人添呀！佢主動問我地有冇day-off，知道我地冇之後，就主動話不如同我地試下調時間，令我地有一日day-off，最偉大既係佢寧願自己連踩５堂，返9點，都希望令到我地有一日day-off，真係好nice，認真唔話得啦！見到有個咁錫我地既lecturer，我地都唔希望佢咁heavy，叫佢算啦，踩５堂太harsh啦，但佢依然話唔緊要，佢教多一兩堂換我地一日day-off，係好worth-doing喎。如果真係成事，真係唔知點感激佢啦。

畀劉浩賢跣左一野，佢話大O唔會有細O咁變態架，結果唔係囉，相對之下，我地個細O正常好多。不過兩個O CAMP都係好玩既，只要係你玩得咁就得架啦。係呢２個CAMP入面，識到唔少人，真係達到去O CAMP既目的，自己亦都唔駛也也烏，乜都唔知唔識啦，而家起碼有唔明唔知唔識既，O CAMPS果兩班兄弟姊妹同組爸s組媽s會幫下我通知下我一聲囉。去o camp係值得既！

p.s.: 1)西貢青協賽馬會戶外訓練營，真係五星級campsite呀，下次搞camp，首選果度呀！
2)大O介紹學聯果PART激正，真係好似有班差人就來掃場話我地「非法集會」呀，果個浸大學生會PRESIDENT真係激似D咩指揮官。by the way，學聯八樓樓主(即社會運動資源中心總負責人)幾似劉浩賢，哈哈。

>>September 16, 2004 at 5:26:42 PM GMT+8

2004 年 8 月 26 日 星期四 【驟雨】

大學聯招放榜之後的第16天－即今天－下午5時48分58秒，我的手提電話鈴聲響起，我立即關掉播放著流行歌曲的電腦揚聲器，急不及待拿起放在電腦桌旁的手提電話，一看來電顯示著一個27XXXXXX的電話號碼，心裡滴沽著是誰的來電，便自然地按下接聽按鈕，電話的另一旁傳來一把女聲：
「喂，麻煩找劉正言呀。」
我回應：「我是。」
對方：「你好呀。這裡是香港城市大學來電的。你是否早前在JUPAS的BAND A CHOICE選了我們的Associate of Arts Translation and Interpretation呀？」
我：「是啊！」
城大：「我們的Associate of Arts Translation and Interpretation現在給你offer，請問你有沒有興趣讀呢？」
我心裡暗笑：「是否遲了點？現在才通知我有offer，我知道城大AATI下星期一便正式開課，現在才通知我，是否有點那個？似乎沒有誠意取錄我般，況且這只不過是副學士OFFER，我現在已經貴為心理學學士生了，何需貪婪你的小惠副學士而捨棄我的正室學士呢？」正因如此，我決絕地回應了她一句：「沒有了。」。她也好像不好意思地說：「哦，沒關係。再見。」。
拒絕了大學聯招的OFFER，心裡一頓冷笑，很想告訴八大，當初你們不肯取錄我，現在才給我小恩小惠，那麼的沒誠意，而且完全沒有顧及學生的前途選擇權，如此繼續這種收生方式，對學生對大學對香港未來也沒有好處，煩請各為培育香港社會未來棟樑的大學反省反省，檢討自己一系列的收生政策，包括屢遭非議的拔尖計劃。香港一天還有拔尖計劃，香港未來一定流失更多人才。拔尖計劃原意為留著所謂尖子生在港升學，可惜，既然你覺得他們是尖子生，外地大學也會同樣認為他們是尖子，外地名大學也會取錄他們，在這情況下，尖子生也會選擇外地名大學而捨本地大學，這還能留著尖子生在港升學嗎？另外，會考考得好，高考也一定會考得好嗎？我想未必。那，這豈非違反公平競爭乎？這是正確的教育理念嗎？拔尖計劃害了不少高考成績中上的中七畢業生要淪為副學士生或私立大學學士生，甚至乎有些連任何專上教育的學位也上不到，要報讀沒有保障的私立副學士，跟一些真正成績強差人意的一班一起受教育。香港教育，一味只顧拔尖補底，那來照顧一下中間的一群？會考如是，大學聯招如是。我們進學校受教育的確是求知識，而不是求分數，教統局深明「求學不是求分數」的道理，但為何香港現行的教育制度明顯地是「求學－求分數也」？無論成績所謂優秀的，還是成績強差人意的，升學仍然無憂，反而成績中游的，卻像棄嬰般給人唾棄，變成高不成低不就，不知向前行還是原地踏步，明明成績不是太差，卻因升學問題被人看作香港教育下的「失敗者」。香港現行的教育，人格培育以至全面的教育通通欠奉，只會造成所謂「尖子」囂張，「中產」沮喪，"BOTTOM"自卑，人人只顧向分數看（是被逼這樣做的），其他成就卻統統被忽略，簡直是跛腳盲眼教育！我不敢奢望「明智」的教育領導單位會作出任何改善，因為任何人在香港教育制度的培育下，均變成徹底的垃圾（當然有些例外），所以也不會有甚麼的一番作為了！

>>August 26, 2004 at 6:49:20 PM GMT+8

2004 年 8 月 19 日 星期四 【溫暖】

尋晚同阿寶傾緊搞reunion野既時候，望一望個月曆先知，原來我個細O的第一日係農曆7月14，勁驚，都唔知係咪organizing committee玩野，特登揀果日，仲係要去梅窩銀礦灣戶外康樂營（一個1955年建成既營舍，仲要梅窩出晒名有疆屍），真係驚到我唔想去。

原本話想搞個reunion係8月28既，但礙於果日係lunar 7.13，萬一玩夜左，就唔係咁好，就改左係8.26/8.27是但一晚先搞。話時話，搞reunion係我提出架，哈哈！

今日我就負責打其中一d group member既電話，大家都傾左幾耐下，好多好多野講，話題簡直多到停唔到口，我一直都話架啦，我地Group One真係好岩key，個個都咁岩咀形。尋晚其實同阿寶約好左，一於「玩人」，扮ｄ大組織打去，睇下佢地中唔中招，結果，我打咁多個，中晒咁多個，原來我扮野都幾叻喎，睇來，我唔駛要企下尖咀海旁大嗌「我係Alvin」啦！講開，我地組真係個個精英呀，搞到我好似係最屎果個添，congrat to all our gp mates!!!! KEEP IN TOUCH!!! 果晚reunion，實行玩癲d，我真係miss all of you so much ar!!!!

>>August 19, 2004 at 6:10:17 PM GMT+8

2004 年 8 月 10 日 星期二 【清涼】

我都好耐冇寫過diary啦，今日係時候寫寫。

8月2，去左大埔->沙田，踩單車，好耐都冇咁踩過啦，變左好多，馬鞍山變得最犀利，記得上次咁踩法已經係中三度。

8月4，過大海，去左去年未去過既澳門地方，好似路環呀、松山呀咁，今年玩得比較充實。

8月8，因為8月2果日驚覺馬鞍山變得好快，有感好耐冇去過行下，結果去左行。

8月9，多謝入左HKU既Leo既巴西燒烤，同日，我得悉樹仁收左我讀輔導及心理學學士學位。

今日，9點拿拿聲睇jupas放榜，睇完之後，有ｄ想喊，我真係好失望，appeal已經係零希望，算啦，冇緣就係冇緣，記得年頭去問黃大仙，佢話我入唔到HKU架啦，大學都叫入到既，中晒！今年個ALEVEL我真係試左好多我未試過而且以前唔會相信會係自己身上會發生既事，我諗，呢Ｄ係整定既，我要做既，已經做晒，而家既結果唔到我話事，含淚面對現實啦。得悉好多摯友都獲得好好既OFFER，真係要恭喜下佢地，esp.喬烽for ust quantitative finance，希望你地入到勁U，都唔好唔記得我，唔好遺下我呀。

心入面，不斷響起呢首歌，實在好岩FEEL，講晒我既心情：

歌名：戰爭
歌手：陳冠希

作曲：周杰倫
填詞：陳奐仁／陳少琪／MC 仁
編曲：陳奐仁
監製：The Invisible Men

打　我而家就去打仗
打　屬於我自己o既一場仗
假若現實世界根本就係一個戰場
咁一切現象係咪一堆殘酷假象
假如現實要我去打一場假仗
打住乜o野旗號　打一場點樣o既仗
打得唔好我o既生命就此劃上句號
問得唔好我應該問生命一個乜o野問號
問我悲哭聲可以有幾多幾多
問我童謠用乜o野號角可以吹乜o野悲歌
歌舞昇平o既世界幾可聽到凱旋歌曲
曲終人散o既時候只有剩低幾個幾個
我問我　我o既戰友係咪就係我一個
我為我o既生命戰鬥　要我保衛我
我話我　進一步退一步　我都難過
我想我放棄　我唔再識分對錯

成日顧前顧後　想不透行左轉右
是我打的仗自作自受

(國語rap)

＊成日鬥前兜後　想走都難自己走
　有傷口有時得手有時失手　我都要受
　成日顧前顧後　想不透行左轉右
　是我打的仗自作自受＊

世上某d角落每日都有戰爭發生
每人都參與　每人都有內心鬥爭
危險o既係戰場上槍林彈雨　血肉橫飛
危險o既係支咪加唇槍舌劍　口沫橫飛
呢首歌係一場戰爭
三個獵肉者　你同我同佢邊個
可以選擇做旁觀者
無人會鍾意見到遍地死者
無人會鍾意做戰地記者
唔想知道乜o野叫做戰爭罪行
剩係知道呢度法律唔保障所有o既人
自己做軍備競賽　自己打自己o既仗
自己俘擄自己　自己混自己o既帳

成日要名要利　衝衝衝從未識死
再不分戰場屋企愛人知己　我想勝利
行或企如戰地　很想死而未敢死
是我想得太盡　要爭氣

Repeat ＊

>>August 10, 2004 at 10:34:42 AM GMT+8

2004 年 7 月 29 日 星期四 【颱風】

今朝個黃雨都算長啦，由凌晨兩點幾直踩到朝早十點九。諗返起尋晚都算好彩啦我，返上屋企執過下野沖埋涼大概都係半個幾一個鐘度，出面就即刻橫風橫雨閃晒電啦。

尋晚去左睇拔萃中劇搞既《飛蝴蝶　到此一遊》(重演)，水準好好呀，曲詞編監導都係拔萃仔自己一手包辦，咁當然演員就有ｄ外援既。阿Chris飾演既飛叔角色，哈哈，幾頂癮喎，演到真係成個中年阿叔咁，哈哈！～～
記得有一節呢，就係列隊唱歌咁既，咁岩得咁橋，阿Chris就係對住我唱既，搞到我鬼咁尷尬，哈哈，佢就好專業，眼都唔轉咁望實我，救命，我就係咁周圍望，費時畀咁大壓力大家，嘻嘻。
至於Geoffrey，雖然戲份唔多，但都算演得唔錯啦，嘻嘻～

講真，如果今年再出soundtrack，我會考慮買架，d歌真係唔錯囉~~


>>August 10, 2004 at 10:44:41 AM GMT+8

2004 年 7 月 23 日 星期五 【晴】

今朝約左喬烽去睇戲，我爭dd遲到，真係唔好意思，一衝入戲院，好彩仲係播緊trailer，但岩岩坐低就即刻播啦，真係真係夠晒好彩，話晒呢套咁正既《太極旗飄揚：生死有情》真係睇少一秒都唔得架！

套戲真係超超超正，我畀分一定畀A++，98分，扣左果兩分就係因為D斷手斷腳爛肉實在做得太似太真，有Ｄ嘔心，see？連「扣分」既都係咁正咁專業既製作，真係抵睇（因為早場$25）！

《太極旗》唔似一貫荷里活戰爭片一味大美國主義，講美國人道，吹噓自己，《太極旗》講既唔單只係1950年6月25日開始打左3年既殘酷韓戰，仲講親情、友情、愛情，最明顯不過亦都係電影主題之一就係兄弟情。殘酷戰爭片帶出濃厚溫情，真係好令人感動心動。我真係咁大個仔第一次睇戲睇到真係喊左出來，係滴晒眼淚果隻，唔係誇張，係真係好感人！我未試過真係一套片真係可以令我喊到出來，至多都係眼濕濕。《太極旗》完全做到荷里活大片效果，邊個話亞洲片垃圾，亞洲片一樣可以做出水準，相反，歐美片唔一定套套係水準之作！《太極旗》我真係極力推薦！我諗我真係遲ｄ會買返隻《太極旗》DVD作收藏。《太極旗》becomes my most favourite！哈哈，鍾意呢套片既程度勁過《黑鷹15小時》。

睇左《太極旗》之後，越來越加鍾意元斌。靚仔之餘再加真係好有演技，真係做到果個效果，簡直係優質演員！我最鍾意果幕元斌飾演既振錫(弟弟)因為見到曾幫佢大佬(振太：張東健飾)殺北韓將領既軍中同伴被北韓軍殺死，遺下妻兒，想起哥哥經常只為自己(振錫)可以安全回家而自動請纓做危險任務，卻沒理他人安危家庭下，心急之致，既悲又憤狂罵他哥的時候。當時元斌真係做到好真，熱淚盈眶，但又充滿憤恨既眼神，真係做得好好，比起香港果ｄ所謂影帝，演技唔知好多多幾百倍，香港電影人唔該檢討下啦。



>>August 10, 2004 at 10:53:20 AM GMT+8

2004 年 7 月 18 日 星期日 【晴】

呢半個月，我既心情真係好波動。
可以由高峰急速滑落到低潮，亦都可以由低谷直衝雲霄。
在這數天，我學懂的是：面對現實，接受命運。
其實有時唔到我唔去面對、接受，而係為世所逼。

7月7日，濤濤同喬烽同我補祝生日，去左尖東ceo neway，真係幾正喎，有獨立廁所。果日好大雨下，濤濤又旨意我地會帶遮，佢就唔帶，結果濕晒。多謝你地份禮物：《江湖》DVD，好彩去年你地幫我買既CD-ROM有齊晒所有野，連DVD都睇得。有樣野好搞笑，記得我地果時一入去k房坐低，拿住張menu來睇，唔知邊個講先話：「咦？乜d code咁似jupas d code既？」，跟住又唔記得邊個話，好似一齊話：「咦？係喎，好似係hku既code來架喎。」有人話要查下揀左咩code食返咩code，拎個意頭，哈哈。6xxx，唔知有冇意思呢，嘻嘻？

7月8日，我地班趁放榜前搞個小型"GRAD DIN"
我居然都仲收到生日禮物，係一件izzue既polo shirt，好靚，多謝晒，真係好難忘。

7月9日，放榜。真係由高峰急速滑落囉，真係真真正正明白到咩叫「晴天霹靂」。
係度諗，點解會係咁既呢?有時唔到自己唔認命。
得悉濤濤乃4A1B狀元，真係要恭喜佢，入HKU GOV'T and LAW，實掂硬，唔駛憂！自己有個咁掂既friend，真係好驕傲，有ｄ叨光咁既feel~~~
之後幾日唔好再提添啦，唉，簡直又煩又唔開心(有時又幾開心喎，因為有d都算唔錯架考得^^"""")，仲好似病病地添，不過我自知係壓力而來架囉。
thx dear friends to comfort me and make me feel better!!!

放榜後果幾日既天氣有ｄ奇怪，日日都係下午3點幾就落好勁大既雨，但係一路落就一路猛咁好太陽，係咁射入我間房。一日係咁，都已經夠怪，連續幾日係咁，就真係天氣異象。有人笑話係「六月飛霜」喎，哈哈。我係都諗，係咪個天都好鄧我唔抵，or有d咩其他意思呢？

7月16日，嘩嘩嘩......八號熱帶氣旋警告訊號呀，呢個「圓規」雖然係細風(熱帶風暴而已)，但係西貢萬宜水庫登陸，實行橫過香港上空，真係咪話唔野少。

7月17日，出左旺角行街，行到腳到跛，又時不時落雨，好煩。
晚上，去左polyu既jocky club auditorium聽SJC既Green and White Concert 2004。
performance真係好好，除左一開頭既harmonic band唔知係咪打頭陣有ｄ驚，所以走音之外，其他既performance真係一流！係咁短時時間，st. joe有ｄ咁有水準既musical performance，DB仔係時候加把勁，慎防有勁敵，異軍突起。SJC係一隊不可忽視既學界樂壇新力軍。
係Green and White Concert，得悉林華棠老師退休，真係好shock! 即刻諗返起年頭表姐提過林sir，仲大講sjc野，我真係冇諗過林sir咁快退休喎，佢教中文幾好架，起碼我只係睇佢d notes，中化既文化都有A呀！哈哈~~~ SJC明年剩下教中化既只會得返兩個老師，一個係方燕蘭，一個係黃婉芬，呵呵～係點，St Joe仔自己會知既.......

今日，睇報紙，嘩！香港特別行政區傑出學生，嘩！Colette，好野！我冇睇錯你！Colette真係......哈哈，唔講。 congrat, Colette!!! ^^ 我又諗返起一個月前，在旺角亞皆老街撞到佢既情景！

我真係發覺，我好多friend都係勁，唔係狀元，就係傑出學生，我?真係the orange at the bottom，有d自卑添~~~ ><""

>>July 18, 2004 at 5:38:00 PM GMT+8

2004 年 7 月 2 日 星期五 【清涼】

近呢幾日都好熱，日日都卅幾度，仲試過幾次去到34度、37度咁，真係熱到溶左。事關風又打唔成，朵「蒲公英」飄飄下就飄左過台灣，搞到香港鬼咁熱仲加埋空氣超混濁。
就尋日7.1丫，就錄得34.6C，而沙田更錄得37.5C，為有紀錄以來最熱的7.1；而空氣污染指數東涌最污染錄得161甚高水平，而我當時雖然不在東涌而在中環，中環都錄到110甚高水平。

講返尋日7.1丫，今年遊行既人數仲多過去年，有成53萬人上街，我係其中一個。尋日咁熱，都咁多人上街，就知當權者有幾無能啦。



6月30日晚去左同人慶祝生日，結果玩到過晒時，趕唔到尾班車認真狼狽。

6月28日晚11點，突然收到盧sir電話，佢話我知我考到7A第一名+中化第一名。嘩！I MAKE IT! I RECAPTURED MY LONG LOST #1!

>>August 10, 2004 at 10:55:16 AM GMT+8

2004 年 6 月 25 日 星期五 【酷熱】

今日係我19歲生日，新舊曆生日都係尋日，都算係幾特別，因為係19年先會一次新舊曆生日重疊既。

19歲，"最後一teen"了，有d感慨，好似就快好老咁，時間過得實在太快啦！

今日去左睇《木馬屠城》，以前d古人真係好聰明。個故仔成日提到希臘神明，令我諗起對呢d希臘神明甚有研究既Eric。夜晚去左富豪機場酒店食buffet，算係咁啦。

其實每年生日都會睇到邊d人對你重視，邊d人唔放你在眼內，邊d人對你好，邊d人睬你都傻。尋日有開心有好嬲，我嬲既係老竇，佢生日同父親節就日日提住，搏人同佢慶祝，今日我生日就懶洋洋乜都唔想郁，哼！不過又咁，佢今年送既禮物係最大手筆既，Samsung LCD Monitor喎，算啦！

以下既人我真係好想係度寫低多謝佢地，佢地畀到我果種好warm既感覺，佢地畀左個happy birthday我(排名不分先後)：
媽咪
Leo Lee
Eric Lau
Jason Tong
Alex Huen
Dai B Chan
Joe Poon
San Lam
Leo Chan
Ris Toto Wong
Mark Lai
Austin Kwok
Kiu Fung Wu
Shania Chan
Vicky Chan
Junes Ho
Janis Leung
Ada Siu
Dorothy
Yandy Kwok

Really thx so much to all of you!

>>June 26, 2004 at 1:03:11 AM GMT+8