2004 年 1 月 23 日 星期五 【晴】

恭喜發財!

猴年來啦!!! 希望今年事事順利，升到理想既大學啦！！！

嗯，年卅十，當然去左維園行年宵啦，好墟陷呀！行都行唔到，簡直係「大塞人」呀，過紅隧都冇咁塞呀！今年維園年宵多左學校攤檔呀，好似有喇沙書院、新法書院、旅港開平商會中學、香港理工大學、筲箕灣官中。以理大同新法最落力！喇沙對比真係爭左Ｄ喎，可能真係「少爺兵」（喇沙檔名）既關係啦！之後同Alfred（劉鎮然）講返呢樣野，雖然佢冇去，但佢d friend同我既意見一樣喎，佢話會同佢地講返，出年可以改善一下。
至於係年宵既斬獲有：閃燈風車（似風扇多ｄ）、搖控城巴模型！
Yeah Yeah!!!有我至鍾意既巴士模型呀！勁開心呀，仿真度好高架，因為係問左城巴拎版權架啦！正呀！！！我自細就對巴士模型情有獨鍾架啦，雖然唔可以講話係巴士痴，但就係巴士迷，哈哈！(Notice the difference?)

年初一就梗係要行大運架啦，我同爸媽趁大年初一就走去港九新界旋風一日遊勒，仲激過ｄ個人遊！我地搭地鐵去南昌站轉乘西鐵，哈哈，第一次搭西鐵咋！沿途風景唔錯，係"DUN"左ｄ嗟！南昌站好搞野架，有４條電梯，但係設計唔同架，係同一個建築物入面，有兩種設計既野，地鐵用地鐵既設計，九鐵用九鐵既設計，好搞笑。英華書院好近南昌站咋喎，地鐵計既A出口就係勒！我地搭西鐵直去屯門再原車去美孚轉車，乘機去食Ｄ野。美孚西鐵叫美孚新邨近荔枝角公園做Ｄ出口，但地鐵係同一個出口就叫做Ａ出口，真係同一個出口，各有各叫，劃清界線，站牌各有各掛，哈哈！食完野，搭地鐵去將軍澳，又係我第一次搭將軍澳線，直去寶琳再沿車返，搭搭下見到TVB藝員，我地係調景嶺落左車，結果原來冇野行，徒步行去企係度都見到不遠處既將軍澳站，咁近隔一條街都整個站，行下個將軍澳中心，去果度既老麥食菠蘿新地，跟住又去搭地鐵落太古城睇＜熊之歷險＞，我好耐都冇睇過卡通片啦，居然迪士尼今年一套既熊仔卡通片搞到我勁有興趣去睇卡通片，反老還童，哈哈！套片唔錯，係迪士尼既佳作，配音好生鬼，真係好正，方力申、張達明、鄭中基掂呀！真係好正正正正．．．．！！！佢地Ｄ配音好生活化、好自然，唔造作，好似有一幕有隻熊仔食完魚，將Ｄ魚骨周圍dum，結果畀第二隻熊話：「唔好將Ｄ魚骨周圍DUM先得架，罰你千五蚊架！」，哈哈！勁正！

尋日年初二，去拜年LU，勁凍囉，Ｄ煙花唔錯，果Ｄ水底煙花幾得意，居然背景音樂有TWINS同BOY'Z既賀年新作<四喜臨門喜迎春>囉，仲有女子十二樂坊既名作！

2004 年 1 月 14 日 星期三 【乍雨乍晴】

唉，真係多得班同學唔少囉．．．一個二個病又唔戴口罩喎，搞到傳染到我都有ｄ作病，鼻塞、頭痛and乞嚏咁．．．大佬呀，新年流流先來病，唔多老黎喎，hope我冇事啦！

唉，第二次唉勒，因為今朝返學爭ｄ遲到！！！
今朝落到地鐵站個月台，岩岩就聽到：「請勿靠近月台幕門.......」，即刻滴汗，因為果班車係岩岩好，返學唔遲到既last一班車，我唔可以衰收尾架嘛，打破左我自中四以來冇遲到過既「彪炳」成績！結果我一到站，即飛奔上街截的士！好彩有的士係度等客咋，我梗係拿拿聲飛去架的士度上車啦，估唔到上車既時候撞親個頭，仲要畀個司機嬸嬸笑：「哎呀，我都鄧你痛囉！」，我滴汗again！到差唔多去到學校門口，佢竟然寸我一句：「好野，唔駛遲到，大把同學都未返到學校！」唉，以我當時咁驚會遲到既心情，仲邊得閒同佢去講笑丫！

>>January 16, 2004 at 8:45:44 AM GMT+8

2004 年 1 月 6 日 星期二 【炎熱】

唉，個A Level越來越近啦，我都有D緊張、驚同埋feel到d壓力，話說只有八十幾日就到呢個咁重大既日子啦！不過呢幾日真係唔知點解，成個人好累，唔單只眼訓咁小事，係成個人都好累，D肌肉好疲累，有ｄ酸痛既感覺，今日仲大劑，返到屋企有ｄ想嘔既感覺！哎呀～唔好病呀，仲要衝刺架，拿拿拿，仲有個中化閱讀報告未做、星期五既test未溫，唔好講話個TAS啦，唉唉唉，我真係好Ｄ擔心憂慮咁呀！希望可以爭爭氣氣啦好冇?

今日去左佐敦補習，嘩，同室而坐，就已經見到３個龍精虎猛既學生，佢地既眼神好有鬥智呀，分別係DGS既代表、St. Paul Boy既代表同埋英華boy既代表！唉，我而家咁有心無力點同人地打呀......

都係唔講咁多啦.....要差差電啦, bye!

>>January 7, 2004 at 4:32:20 PM GMT+8

2004 年 1 月 4 日 星期日 【乍暖還寒】

今日係2004年1月5日，話咁快踏入左2004年這個新的一年都有5日咁耐啦！而上次我寫日記既時間原來已經係去年聖誕節的事，不過唔係我懶唔去寫日記呀，而係我部電腦係12月28日開始就已經虧左啦，個winamp唔知點解成日hang喎，hang hang下就打唔到中文字啦，uninstall左個winamp但都無補於事喎，仲反而部機就越run越慢，我忍受唔到之下就format我部機啦，搞搞下執返好晒d software、hardware(the microphone，我之前果支原來壞左，而家用左$20買左Leo果支落來，又幾好聲咁喎)，咁就已經到左假期既尾聲啦，咁就梗係要趕功課啦，仲邊得閒就來寫日記丫，所以就搞成咁勒。

咁不如我襯呢個機會講返下我呢個假期做左ｄ乜啦（我見到我好多friend既日記都好充實呀！）。

12月27日，我同Jason Tong搞左個【至尊頒獎禮2003】既東西，係for RadioNetwork既，由於係「大show」既關係，我地都籌備左好耐，例如錄音啦、整jingle啦、promotion啦等等，搞到我地晚晚捱夜去準備，要成4點先訓得...不過都係一個好好既經驗來既，原來做一個畀人覺得好似玩咁既project，佢既準備功夫都唔野少架！【至尊】早前就整左個投票，估唔到都有超過120人來左投票呀，成績好好呀，真係好意外！【至尊】始終都係第１年搞，所以好多不足既地方，但我真係好想多謝大家咁踴躍既支持，especially RadioNetwork既兄弟：Jason同Alex，without you two, this show cannot go on！

同樣係12月27日，我下晝去左黃埔喎，不過唔係踩新城既場，而係踩新城隔離既「真雪嘉年華」既場。不過我去到真係好失望囉，咁假既同埋個場實在太細啦，都唔似電視影咁大既，好似juz for小朋友玩咁。

12月底，唔係顧住搶修返部機，就係要去補課and補習囉，搞到我一D時間都冇呀！12月31日大除夕，雖然果日仲要去補習，仲要補到去成7點，有D累咁，但係中間個break度同小維去左九公泳池既看台度吹左成２個鐘水，都唔錯既，總好過悶到嘔茄丫（去到九公泳池，又令我諗起inter-school swimming championship啦！）。

大除夕補完習就join mom and dad落左銅鑼灣，真係爆多人囉！去到times square果時９點幾已經封左啦，唔入得去，跟住就轉移陣地去左最近既維園工展會勒，今次係第二次入場啦，雖然唔係好覺岩睇，但果度有得countdown丫嘛！個場臨近12點就越來越爆囉，我估都有成萬人架啦果度，一度2004，個stage就放左都幾靚下既煙花，我都希望我既２００４年呢個咁重要既一年，可以好似煙花咁大放異彩啦，希望身體健康、高考成功、入到Band A既學系啦！同時亦都祝願我d friend今年都考試順利、升學升到自己既理想啦！講開又講啦，我果晚count完down，大概12點20分度就收到Jason Tong既new year call啦，佢係第一個打畀我，不過我就真係feel唔到個機震左，所以冇聽到，真係唔好意思勒，過左幾分鐘，Alex打來，不過我今次係趕唔切聽，打返畀佢地啦，原來佢地係百德新街喎，哈哈，咁點解我路過既時候撞唔到佢地呢?打完畀佢地之後，我就即刻打畀我d friend啦，嘻嘻，年年要你地打畀我先，實在唔係太好意思既！

來到個假期尾聲，功課我真係好坦白講，一D都未掂過，我都唔知點趕好，根本就係趕唔切啦，我尋晚趕到成凌晨5點先至有得訓，不過仲未做晒ｄ功課架，but都幾搞笑，個個都係同一時間趕功課喎，成班兄弟有ｄ互相扶持既感覺，個心好warm架！

道維係佢既事情上面處理上好似係新一年有左ｄ新既轉變呀，希望佢可以盡快搞掂埋佢啦，其實呢件事都幾令好多人擔心架！really希望yc既說話可以幫到佢啦！(尋晚唔撞左入gnw online上學年果個version，睇返gnw day果幾張相，真係有ｄ唏噓！呢ｄ可能就係道維所講既無奈啦)

講左咁多展望同新既野，就等我回顧一下個2003年啦(嘻嘻，我見個個都回顧，我又要回顧埋一份先)：

2003年真係一個唔多好既一年。恐怖襲擊、伊拉克戰爭依然存在；SARS呢個世紀疫症係香港爆發，單單係一個四月就奪去左數百人的生命，淘大花園呢個重災區亦因此「一炮而紅」；政治風波一個接一個，梁錦松偷步買車、細價股事件、教育經費的削減、SARS調查委員會自己人查自己人事件、23條立法風波、７．１五十萬人上街反對２３條兼倒董(我同我屋企人第一次參加遊行)、梁錦松同葉劉淑儀辭職、民建聯於區議會選舉大敗、民建聯主席曾鈺成請辭、田北俊請辭行政會議成員職位、大學生罷課、王見秋被辭去平機會主席的職位(平機會事件)、維港巨星匯涉款一億混亂醜聞、西鐵通車問題......；演藝界動盪一個緊接一個，張國榮於４月１日在文華東方酒店跳樓身亡、寶詠琴4月中因癌症離世、林振強11月因血癌病逝、柯受良12月中於上海暴斃、梅豔芳於12月30日因子宮頸癌引發肺功能失調逝世(娛圈最轟動事件。梅姐於９月公開承認自己患癌，１１月舉行「梅豔芳經典金曲演唱會」。連上數天報章頭條、各雜誌封面、電視電台新聞報道頭條報道、中聯辦及特首辦致唁文、紀念特輯特刊.......)、「舞影行動」涉及樂壇買獎風波、環球唱片陳小寶因「舞影行動」請辭並促使環球正東合併、四台頒獎禮「互片」行動升級，較正面的有1:99音樂會，但都同SARS有關。
係呢一連串唔好野當中，穿插著一Ｄ好既野沖喜下：中國第一個太空人楊利偉順利升空；CEPA、個人遊使香港重現生機，經濟有復甦之感。

就講下我果筆啦，2003年對我來講都算唔錯架啦，去左我好想去既地方、認識到一班玩得埋既校記朋友、港台實習(嘻嘻，有bonus，可以極近距離見到edison and仲可以同佢影相say hi！)、明報實習......都算係咁架啦，雖然唔可以好似劉鎮然同學咁可以拎到Grand Slam(好似係咁串，唔係好記得添），上埋報紙咁威，但都算好架啦我。
寄望２００４年更加好、越來越好啦！

2003 年 12 月 24 日 星期三 【颳風】

尋日係平安夜......都仲要去補習，仲要補到去7點果隻，真係好冇癮，下個禮拜三（31號大除夕）案件又重演過，不過再衰多幾錢重，連朝早都仲要去補課！2003年既X'mas真係夠晒「無間道」囉......我一定一定會好好記住既！（為左個A-level冇計啦，都係呢一年嗟！）

我係佐敦補完習就打畀dad and mom問佢地係邊，我一心以為會係佐敦尖咀附近啦，點知佢地話係奧海城，搞到我要即刻去搭地鐵飛去奧運站，早知係咁，我就同埋小維去搭地鐵啦。落到去地鐵站，開始左封站同人潮管制啦喎，上到架車逼到嘔泡，去到奧海城估唔到都有咁多人，成個商場都係人。食完野又搭返地鐵去尖咀，去到果時都只不過係8點幾鐘，就已經好墟陷。今年D燈飾係幾靚既，ｄ人真係肯~K本咗，最特別果個我覺得係新世界中心果個，雖然好簡單，只係一條條原本都有係度既光管，但經過電腦既構圖控制，就有好多好多既變化，真係夠新鮮又豐富，而半島個WE O（<心形）HK都好搶眼。

今年人係真係好多，但秩序真係好好，冇人作反，不過就條條街都話封路唔畀行，話太多人，結果我地要係個尖沙咀都兜左成晚都去唔到天星碼頭。

廣東道今年又搞大型christmas party啦，輪到環球唱片搞，我一去到就聽到余文樂，之後仲聽到女子十二樂坊。不過我已經行到冇乜心機，隻腳行到又攰又痛咁，結果行到１點度行去九龍站搭地鐵走人。

今日係聖誕正日，但冇出街，唉，唔出咁多啦，間屋亂到嘔，搞到乜mood都冇晒，仲有呀，咁多野做，個假期又唔係長，真係驚做唔切，我既聖誕願望其中一個就係趁呢個短短既假期做晒所有要做既野，清理好間屋，跟住係無後顧之憂同無唔安樂既情況下準備為我既A-level作戰！好多friends已經開左引擎啦，我真係好遲啦！

23號，道維約左我去食lunch，講到今年jupas d人揀咩科最hit。唉，估唔到hku既bj係新開科入面係最多人爭既！換句話講，我既機會又細左啦，我擺左佢做1st choice架。如果入到，我真係會好開心架，不過似乎對我來講難左DD。

>>December 25, 2003 at 7:13:54 AM GMT+8

2003 年 12 月 20 日 星期六 【乍雨乍晴】

今日晏晝去左睇《無間道III終極無間》，唉，睇到我都亂埋......Ｄ插敍法搞到我都唔知做緊乜咁....ANYWAYZ, 呢套港產片經典神話就係咁完左勒...個故事真係一個大悲劇，乜咁多人死架......最後尾睇到我都喊埋......（眼濕濕咁嗟，又唔係真係滴晒眼淚咁）

唔講啦，呢個XMAS都唔係自在得去邊架啦~~~

>>December 21, 2003 at 3:50:49 PM GMT+8

2003 年 12 月 6 日 星期六 【綿綿細雨】

i'm so scared, worried, exhausted, upset, depressed... 5 hours later, i'll be on the stage and perform that horrible song. i wanna escape from the show now!!!

>>December 7, 2003 at 4:55:25 AM GMT+8

2003 年 12 月 3 日 星期三 【晴】

life is hard in the recent days, that makes me no time to touch my diary. So, i'm gonna make use this free time to write it. u kno, the last entry had already been nov19, what a long long history ago!

anywayz, happy 18th birthday to towai on nov30. no matter what's happening, i'm willing to listen and help ya. human relationship and character changing of a person are rather difficult topics for us to study right now, we need time doin' it. i kno the matter depressed you so much, but i still hope you can concentrate on your coming pre-mock exam. add oil, toowei!

the music contest costs me so much time, money and effort, and lastly we lost in the final. 7C is so "chin", what an apple-polisher!!! i hate it, hate it! i'm not that happy to see their "chin jiu" working and got the champion! but anyway, we, 7A, had done our own very best.

oh yeah, the piano concert organized by my piano teacher is approaching on the next sunday, i'm working so hard on it to achieve a good performance (not demanding an excellent one, i kno myself well). frankly speaking, i've already got bored of the song and it hurts my fingers much, i dun really like it at all. sigh, the problem is that, i'm not so satisfied with my performance in practices.

i still believe, there shouldn't be any nonsense assignments given in form7. everyone knows, time is precious in form7. if time is used to finish those silly assignments, would there be any time for us to revise the topics taught? the most disgusting event is that, that fu*king p.lau had forced us to make a silly project for her field trip, and then forced us to attend her extra lessons in christmas vacation timing from 9am-5pm. but this is not the "great picture". the MOST RIDICULOUS one is, she said, "well, i'm going to make good use the study leave period to upgrade your answering skills in A-level exam.". i'm not going to say she is a lazy teacher, but is she a considerate person? definitely not! we are not just only going to take her only one subject in a-level exams, but also others. if she makes use all our revision time for her subject, there will be no time for us to revise others! what a selfish witch!!

2003 年 11 月 18 日 星期二 【晴】

Oops...原來我都有成10日冇寫過日記啦，都幾係耐下~~

頂！點解果2張相係都show唔到?!一時得，一時又唔得咁，算點先?!要睇就去返webshot睇啦惟有......

anyway，今日有幾件好有趣既事發生左：
一）今朝上中化堂，miss想叫我出去演繹一個情景，開口叫我果時竟然叫左：劉鎮然!!!!!!我既第一時間反應係覺得好好笑，咁就回左一句：下?佢o係喇沙喎！miss聽到仲好surprised咁話：下?，跟住D同學同佢講係正呀唔係鎮呀，佢先好似覺悟：呀！係喎～（罷到明佢仲未訓醒啦咁！雖則我同劉鎮然同學既中英文名都好近似嗟，都唔駛咁卦！）
二）今日睇《星島》，睇到教育版，睇睇下，嘩！Noble既大名竟然見報喎！really really surprised!!!!岑國寶真係國寶，好問唔問，星島個記者竟然好似專訪咁訪問左佢點睇網上任download AL Pastpaper + Marking Scheme，仲要出埋報紙，真係神奇！同Patrick討論呢件事件，佢爆左句好精境既野，不過呢度唔講lu。Toowei為呢個咁奇怪既現象揭開左神秘既面紗，原來係Noble個補習老師係星島記者來架喎，所以一D都唔出奇，哦......原來係搵人過橋去交稿！
三）六點幾度，劉浩賢send左個msg來，話佢成張list，一共有28個人online，但其中有27個人係n/a，只係得我係online mode，話好unbelievable喎，咁又係既，都幾「震驚」，當你開左icq之後，睇到成張list咁多人online，不過只係爭一個就全部都係n/a架話，咪話唔驚嚇，邊有咁岩得咁橋架，係咪?

2003 年 11 月 10 日 星期一 【晴】

話咁快就黎到十一月中，睇返都唔係仲有好多時間剩去prepare個A-level，我好多好多friends都start revising啦，我都仲未點話投入入去溫住。道維有句講得好："we compete with all the hk students."，講真又係喎，全港成幾百個A-level考生，當中有ｄ勁人，果ｄ幾條A又唔拔尖果ｄ，要同咁多勁人鬥都唔係易架！我諗我都係時候投入其中啦!

上個星期真係好霉，霉到唔好提啦，一提起就火到來埋!!!

11月9日（即係前日）係DBS既Garden Fete，真係搞得好成功，簡直人山人海，好多old boy返左去。唔講咁多就不如post d相係度做証先!!