2003 年 8 月 2 日 星期六 【晴】

喜歡林峰把聲音
林峰唱的"忘記傷害"已見上準
歌詞內容寫出"得不到的吸引"的傷感
他於此感情位亦拿得很準
只不過有時咬字發音略嫌生硬
但比上次的"記得忘記"好了許多

今日真係好累, 明天才打日記, goodnight

>>August 2, 2003 at 8:32:53 PM GMT+8

2003 年 8 月 1 日 星期五 【晴】

今日精神奕交咁同阿心去唱Ｋ，
‘二人行，一日後，想跟你果洲同遊’。
唉，果洲群島之旅，拿苦黎辛呀～～～
之後再行文化博物館，行左兩個半鐘都未行完，因為我地都好仔細咁欣賞每一件文物和照片。
今日博物館之旅，令我明白中史人同西史人的分別在哪裡。當我們站在其中一張照片前，看一下它的文字解釋時，我看的是“城門口的交通”，她看的卻是“Traffic at the great gate”，Do you see the point？
我即刻打左個兀：“阿心，你做咩睇英文版？”
無言對望一會兒之後，
然後我就“…hum… pu...pu……wa...哈…哈哈~~~~~~~~~”
原來西史人習慣性的看歷史要看英文版，中史人看的是中文版才能入腦。
難得有人喜歡陪我逛歷史博物館，阿心，下次去親呢Ｄ地方，我都預埋你架啦！


>>August 1, 2003 at 10:20:15 PM GMT+8

2003 年 7 月 31 日 星期四 【晴】

早上十一點在音樂島教琴至十二點，碰見一位以前大埔聯校的“同事”，發現我們很有緣，我們是由同一個Miss調教出來的，又在同一間琴行共事，希望我們可以做成朋友啦～
之後同Rebecca食飯，再約好一班朋友在吉野家等拿飛，我們便一起進場。
場面不算虛堪，但個show就run得好掂，最緊要有At17的２汶唱歌，佢把聲，嘩，超正，仲好入咪添。原來佢係救恩書院書院既～哈！有趣。我仲同佢影左相添～
比賽開始了，參賽者亦有Ｄ水準既。合唱出現了雙冠軍，分別是一隊Band和一隊四人男子騎呢組合，我同Barry就得了季軍。能夠入三甲之內，我已經好開心架啦！要不然，我會覺得很丟臉的。但我妹妹就猛咁話造馬造馬，話個那個阿sir偏愛救恩話，又話那個阿sir係救恩的。是但啦，有張coupon都好！
勝出者會得一張ＨＭＶ$50 coupon一張，我便用了這張coupon買了Maksim的ＣＤ，算是不錯啦，不過Ｄ鋼琴聲唔係好出，突出唔到Maksim的功力。
夜晚同Rebecca Sum and B出去沙田食晚飯，傾左一陣計之後，我地就返屋企啦。
一上床訓覺，一覺訓到大天光，好耐無試過咁舒服咁訓一餐。
我懷疑自己有思覺失調症，每逢到半夜三四點，我都會起身去廁所，之後就唔知驚Ｄ乜咁訓唔著，又驚有Ｄ咩dirty thing害自己呀，搞到成個人好唔健康。
死啦，我係咪有病？


>>August 1, 2003 at 10:14:41 PM GMT+8

2003 年 7 月 30 日 星期三 【晴】

今日下午雨點到箏藝教琴，三點趕去文娛中心綵排，唱得好難聽，發現練歌的必要，四點趕返去箏藝教琴，五點半到音樂島教琴，到六點收工，再同Rebecca食飯，好似一個明星咁出通告，趕完一場又一場(hahahahahaha)，亦難怪我個樣變得很殘。
夜晚同Barry&梁思雁到沙田GreenBox練歌，終於拿捏了音準，希望明天不要走音～！


>>August 1, 2003 at 10:12:10 PM GMT+8

2003 年 7 月 29 日 星期二 【晴】

今日要離開泰國囉～有點興奮，又有點不捨。興奮的是不用再逛街，不捨的是我根本不曾在泰國玩過！
午餐在一間樓高８７層的大廈的７８樓吃自助餐，終於有一餐是有“食物”吃，要知道其實凡參加這類經濟團，吃的食物根本不是食物，不是炒旦，便是青菜，要不然是豬肉，真係食之無味！今日終於食返Ｄ人食既野，極其安慰！
再到連當地人也會逛的Robinson商場打了一個白鴿轉，我們便乘搭飛機返香港啦～～
不過，今次我們的飛機卻遇上了行雷閃電，被迫急降百幾米（定公里？）來避開那些雷電，但見機身不停左搖右擺，又上下移動，真係險象還生。
幸運地我們於香港時間十點半抵港，拿了行李，和笑容可鞠的香港領對握過手後（當然，我阿爸俾左成200蚊extra tips 佢呀嘛！），便搭E41返屋企！
十二點幾先返到屋企，一邊忙於執野，一邊忙於和朋友玩ICQ，發現沒碰電腦五天，就成日打錯字，速度也慢了許多～
朋友們，我終於回來了～～～

解決了，感覺非常好！

>>August 1, 2003 at 10:06:28 PM GMT+8

2003 年 7 月 28 日 星期一 【晴】

今日算是比較充實的一天，皆因行程都算不錯。
早上自由活動，在酒店周圍走了一圈，當我在看四周的街道景色之際，在我面前賣貼紙的攤檔突然郁，仲高速咁在馬路上行走，看真點，原來那是一架單車推動的小攤檔，好搞笑。
然後午餐吃日本buffet，極奇難食！
再去看一家類似國貨商場的皮革巿場，很娘炳，但我們買了兩條中國色彩厚的電話rope。再參觀燕窩專門店，試食要俾錢，我們怎麼也不肯試。
黃昏在水門街拜了四面佛，其實那並不是真的四面佛寺廟，有點蝕錢。但我發現比較虔誠的教徒真的會五體投地般拜佛，但凡經過四面佛像，亦都雙手合什拜衪一拜。
夜晚到水門街的世貿中心走了一趟，再上去吃自助火窩。再在那裡用了$2港幣玩了!5分鐘電腦上網，仲0係自己的留言版留言，當是給自己的手信！哈！
到了今日才跟團裡其中三位小朋友熟絡，搞笑！


>>August 1, 2003 at 10:03:32 PM GMT+8

2003 年 7 月 28 日 星期一 【晴】

好野！
呢幾日玩得好開心，
听日番香港喇，
仲開心，
因為我好掛住阿心丫麻…
hehe@v@

>>July 28, 2003 at 11:28:02 AM GMT+8

2003 年 7 月 27 日 星期日 【晴】

吹漲！今日的Pattaya竟然天晴！但係我地呢團卻要返去曼谷啦～～個天到底想點？？？？？？？
今日的行程頗為豐富，但始終還脫不了羊牯團的特色。寶石廠、蛇園等，都是迫你買東西的地方。所謂的蛇園，只不過是門口放了好幾條蛇，然後一班羊牯一起入去一間房裡面被人推銷而已。唉～
你信唔信我去泰國參觀哪吒廟？真的，今天我們便到了由中國人俾錢建的哪吒廟，算是金壁煇煌啦～
又參觀了一條周圍樹上都掛滿蝙蝠的街，很恐怖，也很臭，成地都係屎，不過都幾新奇古怪。
黃昏的時候，我們去看人妖show，感覺就似看了一場六七十年代的麗花皇宮的表演一樣，有姚小蝶、鳳萍等等歌手演“唱”。之後仲同其中一個人妖影相，睇返張相，感覺都幾突兀。好地地一個男人竟然將自己變成女人咁，就是為了那丁屎咁多的錢，太大犧牲了吧？到佢地老左，咁生活又會係點呢？
聽導遊講，泰國是一個女多男少的地方。點解呢？第一，泰國是信奉佛教的，男人一生人之中總要出家做一次和尚，而且做和尚的待遇很多，有免費醫療服務、又有人捐錢俾佢地、又有政府養，所以好多男人都做左和尚；其二，泰國有好多gay佬；其三，唔做gay佬的話，要不然就走去做人妖。他還說養大一個正常的男人已經好不容易，所以我地可以看見當地公車上都係女多男少，同中國大陸相反。
晚上去大笪地買野，真真正正的shopping。不過其實香港乜都有，用不著在泰國買，況且又唔係真係平好多呀～


>>August 1, 2003 at 9:59:21 PM GMT+8

2003 年 7 月 26 日 星期六 【雨】

早上去pattay的沙灘，天空還是下著大雨，往珊瑚島的行程被迫取消，自己好似完全沒去過泰國一樣，很失落。走的時候上演了一齣驚象還生的追巴士好戲。
下晝始回復一點生氣，因為我們去dum骨，古法按摩。唔可以話正，如果早上去過珊瑚島玩，成身酸軟的，再去dum骨，咁就會舒服好多，精神百倍！
之後去蜂蜜園參觀。我覺得自己好似參加緊羊牯團一樣，原來這是一個促銷蜂蜜。
夜晚再去pattaya沙灘的一間餐館吃晚飯，門口show左好多明星相，有沒發紅的青靚白淨版林峰、劉曉坍、cookies等，懶係有好多明星到過0個度食飯咁。
之後去cho墨魚。Sheet！一條也沒能釣到，反而那個七十多歲的阿婆就釣到兩條咁多！正當人地有老有嫩玩得好開心的時候，我地一家四口竟有三人暈船浪，被迫提早走，真掃興！我諗我地呢家人真係要檢討下～～哈！


>>August 1, 2003 at 9:55:38 PM GMT+8

2003 年 7 月 25 日 星期五 【晴】

晨早四點三起身，就是為了六點要趕到機場集合。
香港領隊是一個似蔡瘋華的男人，剛巧他也是姓蔡的，難道他倆人是親戚？我地呢團總共有１７人，全部都是一家大小一起去玩的，有兩家人是奶奶＋媽媽＋１０歲小朋友，有一家人是從外國回來的，帶著幾個８－１０歲的小朋友，然後便是我們一家四口了，可想而知，這個團有老有嫩，就是沒有年青人！可想而知這個trip對於我兩姐妹來說係幾悶！

0係機煬我見到鄭伊健同林珊珊，明星即係明星呀，一眼看過去零舍閃Ｄ，不過Ekin個樣好似蠟左Ｄ，即係假！

當地導遊係一個順德人，泰國華僑第三代，識講中文。扺步後，因天雨關係，即刻坐旅遊車去芭堤雅。途經老虎仔樂園，手捉住一隻老虎仔拍照之後，又逛了一個小圈，沒什麼好看，我們又再繼續行程。
先到酒店放下行李，我們又去當地最貴的商場行街，那裡等同於香港的尖沙咀的國貨公司一樣，兩個字可以形容：貴＋悶！
我們一家人自己在走走當地的酒吧看看。Pattaya是一塊男人消遣娛樂的地方，每走兩三步便可以找到幾間酒吧，每逢入黑，那裡變得很熱鬧。原來當地酒吧飲酒好平，大概$5~港紙就有一瓶啤酒，我們光是在門面看，卻沒進去光顧，有點可惜。
夜晚打電話叫Rm Service拎水飲，服務員一個推一個的說不是她們要做的事，一句” I don’t know”我便很想狠狠地揍他一頓！只不過俾少$20 tips 0者，用不著這樣嘛。隨即對泰國的貪污有了深刻的了解。
聽導遊講，全泰國人口之中，差佬只佔了幾個percent，可想而知泰國係一個秩序幾咁亂的國家，販毒呀，貪污呀，賣淫呀，乜都有。


>>August 1, 2003 at 9:46:32 PM GMT+8