2003 年 6 月 4 日 星期三 【晴】

今日七點俾人炒醒, 就是為了去那個中華白海豚旅行團, 慘, 勁眼訓!

不過都抵既, 我地好好彩, 去0個程見到有三條粉紅色的海豚0係水面玩, 不過就距離好遠啦, 影到都只係一粒鼻屎咁大(咁樣稱呼有D 核突, 但我慣左)

之後去左龍鼓灘睇那個連島沙灘, 個view幾靚
拍了幾相靚相, 便過去大澳買野, 食lunch

回程時, 見到船上有個三四歲大的靚仔好可愛咁走圍走黎走去,
我搵相機影佢, 佢仲走黎我度, 任得我影.
之後又0係船頭見到佢, 仲同佢一齊影左D 相, 玩下...咁
我明明唔喜歡小朋友, 點解我咁留意個靚仔?
皆因我覺得佢好熟面口, 好似拍過D乜廣告咁,
又可愛, 又百厭, 又頑皮, 仲唔怕人, 成日撩人同佢玩添.
好可愛呀！！！！！
我問佢你聽唔聽得明我講乜,
佢竟然拎頭...聽唔明你又拎頭???
跟住我就即刻諗起原來自己對小朋友無乜耐性,
平時講野太快啦, 把聲又太沉,
所以吸引唔到小朋友同我玩.
我決定, 明天教那個三歲小朋友, 我嘗試把聲音提高,
再減慢速度, 加上親切的笑容,
配合阿Tra教我的兩三度板斧,
征服三歲小朋友恐懼症的難關!

返家途經旺角, 換左隻碟, 但係唔知係我地部腦short, 定係隻碟唔得, 話找不到什麼檔案.
sheet, 即係點??
返到屋企, 沖埋涼, 坐底抖下的時候, 個腦突然間浮下浮下咁, 好似仲搭緊船咁.
好暈呀...

不過今日好開心, 仲影左好多相. 最開心就係見到相中的小朋友天真漫瀾的表情.

>>June 4, 2003 at 10:46:01 PM GMT+8

2003 年 6 月 3 日 星期二 【晴】

今日去尖咀, 因為廣東道那間世界商業中心(即海港城入面) 今日第一天開倉, D 野大平買
但估唔會有咁多人去買...失策
搞到無哂MOOD

再買阿MING的生日禮物, 同LEEANN 阿旦講買左一個好搞笑的COUSION形clock, 一講佢地就知係乜, 有無搞錯! 咁份禮物都唔特別啦

再落旺角, 行過波鞋街, 見到BARRY, 唔敢SAY HI, 即閃
入左旺角中心買左GAME, 點知係雙CD, 勁貴, $40
等取貨, 點知我地買完唔夠十分鐘, 佢俾人COM 檔
SHEET! 真黑仔!
碟去人空! 搞到我要搵過一日出去換碟!
有無搞錯!

>>June 3, 2003 at 11:23:41 PM GMT+8

2003 年 6 月 1 日 星期日 【晴】

昨天在大陸收到一個電話，叫我今日夜晚七點去IN琴行，仲要準備兩首pieces。
大佬，漫遊黎架嘛，仲要一打打兩次，貴死！
in完之後先發覺自己呢排真係掛住玩，無乜點進修自己，
要檢討啦，檢討啦～

今日的心情，算係咁啦，係極奇差......
因為俾阿爸岩岩煩完.
超煩

>>June 2, 2003 at 5:45:16 PM GMT+8

2003 年 5 月 31 日 星期六 【晴】

本來今日十一點半有個interview做救世軍導師的，但最後因為唔知醒，所以無去到。
算啦，搵銀唔係好多既。
但係因為要俾手信肥狗，又要出去大埔。
食左餐飯之後，就去打壁球，體力勞動消耗太厲害了。
再到肥狗家中坐下，
今日終於見識到寬頻的厲害了，
人地download一首四點幾mb的歌只需１分鐘
而我就要廿分鐘，甚至以上！！！！！！
５６Ｋ，慘！
無無聊聊之後，就返大陸我老鄉－－布吉。
唔係0係泰國，而係0係深圳龍崗區的。
下個星期大家都上去坐下，打下牌呀，我組團呀。
第二天下午三點幾返黎，食到肥哂！

>>June 4, 2003 at 10:17:03 PM GMT+8

2003 年 5 月 29 日 星期四 【晴】

澳門自由行之旅
經過一日玩“雅玩”的辛勞，第二天朝早五點半勉強撐起身，約好六點三在大學火車站見面，有史以來咁早約人去街，大家都有Ｄ睡眼醒松咁。
然後到中港城買Ｍ記早餐，等上八點的船過大海。

九點就到左澳門之後，四條盲炳周圍搵廁所同兌錢，之後就plan下自由行點行。其實自由行幾好玩，因為跟住地圖去搵一個地方去行的成功感都幾大，不過換來的疲勞仲大，因為我地身上一人一個大袋，仲行左四個鐘！
第一站──盛世蓮花，只不過是豎立在廣場內的雕素。
第二站──ＸＸＸ藝術雕素，其實只不過係放在馬路上的一塊頑石。低能仔的我地仲要影相，點知影左個路過的巴士。
第三站──上聖堂，經過那條將會行幾廿次的大堂斜巷。
第四站──聖物寶庫，好陰深恐怖，入左去之後見到Ｄ聖像，俾人一種好邪門、毛骨悚然的感覺，冷冰冰的，十分不舒服。始終中國的東西才能給人溫暖。（大佬話既）
第五站──手信街，今次只屬探聽虛實。
第六站──大三巴，與裸女合照＋好多雀屎！
第七站──澳門博物館，遇上一個好心地的secure，不過好煩，這位好事之徒係咁幫我地（或迫我地）影相，猛係咁介紹在哪裡拍照最好，仲要同一個street of love的假女人公仔合照，好恐怖，好煩！
第八站──上炮台山，一眼望哂個澳門，Ｄ屋又平又矮，街道也無甚規劃，無甚好看。但就同Ｄ大炮影左Ｄ相，玩左一陣長平與世顯。

行到十二點來，我地就打的返酒店放低Ｄ行李。不過我地懷疑個司機呃＄，猛咁兜圈。全靠我地精明，車走人到之後就即刻悉破其奸計！
大家在酒店抖左一陣之後，兩點幾再度出動，走我們的美食之旅！
1st 　８蚊豬扒包。比起在美食指南介紹的正宗豬扒包少了＄４，所以食品質素即下降１００％ x 1000times。頭炮失敗！
2nd 　禮記果汁底雜果杯（指南介紹的！），１２蚊果然不同，正！
3rd 　紅豆餅，可惜無緣相遇
4th 　行左九十幾條街先搵到的正宗美味葡撻，＄５.５，抵！
5th 　再回手信街，每經過一間舖頭都會給你試食旦卷，飽哂，唔係試食試到嘔，係飲水飲到嘔。
行到五點來就搭酒店專車返酒店，幾醒！

　　Then，賭場之旅……大家都贏錢！
分析必勝祕技
１． 從側門入，避開賭場的蝙蝠獅子陣……想吸我地血？無咁易。
２． 俾Secure Check 袋的時候，露出女仕每月的恩物……邪死佢！
３． 入場後，先環繞賭場走一圈，吸盡場內的luck氣，選中目標，一擊即中！

最後，大家選好了老虎機，仲贏左錢……足足２８蚊！幾勁！我地的笑聲震遍全場，側邊那些閒閒地幾萬蚊上落的賭客
非常驚訝，以為四條盲炳贏大錢。
　　賭場小插曲，有個盲賊盲炳咁想偷我銀包，但被我好型咁擋開左。幾威！
　　Then，等車去觀光塔，但因太夜歡光塔關門了，我們轉到落酒吧蒲！
　　那裡的酒吧都唔係好雜，幫襯開的都係葡藉人，幾high-class。
　　之後我就有少少飲醉酒，浮浮地咁，都唔知自己做咩，只記得最後返左酒店，訓覺。不過呢種感覺幾high，最衰我未醉得哂，真係想試下劈底自己的感覺，應該幾正。


　　第二天八點半起身，周身腰酸骨痛咁，隔離房兩個肥婆仲未醒，要打個Morning Call先肯起身。之後在酒店食左個自助式的早餐之後，就到附近的海防博物館同媽閣廟觀光，無乜野睇，又無乜野行，回程的時候仲要無車搭，要行山返酒店，要了我的命！
　　１２點就Check Out，咩住一袋二袋行李，再出發到 dum 仔買Ｄ手信。點知Dum仔就好似上水咁，乜野地方都無得行，只有一條官也街，大佬呢個大花筒就一口氣買左好多手信，全部都係俾自己食既。買好野之後，大家就搵路返去市中心，沿途經過一間賣紀念品的舖頭，本來甘婷想買了那塊“十月初五街”的路牌，１８蚊嫌貴無買到，點知一到碼頭睇，２９蚊，即刻後悔。哎呀呀
　　返到澳門市中心，搵左一間舖頭hae，一hae就hae左兩個鐘頭，仲要對住一杯勁難飲的生果特飲，又再一次lai野。好在有好好味的葡撻補數，否則真係該煨！
　　之後再回手信街買手信，食個晚飯，行下新八百伴就走人。
　　明顯地，第二日的行程比較悶。
　　但係整體上來說，成個trip幾好玩！最衰你（有份睇日記的顧客）又唔黎啦，係咪有Ｄ後悔呢？


>>June 2, 2003 at 9:38:09 AM GMT+8

2003 年 5 月 28 日 星期三 【晴】

一朝早掛住玩ICQ, 玩到遲左一個鐘先同Rebecca 肥狗 Rita 甘婷佢地打牌.
對! 又是打牌.
以為自己好型咁去到人地屋企, 點知去錯地方, 走左去Rebecca屋企.
見到佢阿媽先知搞錯, 真正的地點係甘婷屋企.
於是好瘀皮地趕去甘婷屋企.
但入Lift的時候, 才發現唔會到十一樓, 搞到我滕雞咁按"開門" 掣,
點知那個原來是警鐘掣, 不過好搞笑, 佢竟然無響到.
最後幾經辛苦, 終於都到甘婷度...
繼早前"出沖全包宴事件"之後, 又一新作, 傻仔到爆, 真係俾人笑到面都黃.

開頭打牌我都好黑仔, 之後出左街教那個三歲的小朋友學琴返黎,
整個人當旺, 將十年前輸落的搵返返黎.
玩到八點先返家中休息.

教那個小伙子教到我嘔血, 即使我俾糖糖佢食, 再貼貼紙, 上堂都唔留心既
係咪佢怕左我? 我真係唔識點同三歲的小伙子相處
嘔血!

走的時候, 死唔甘心咁0係度等巴士, 點知一等便等了十五分鐘... ...
皆因自己正為自己打賭.
快D 好返啦... ...

>>May 28, 2003 at 10:13:35 PM GMT+8

2003 年 5 月 28 日 星期三 【晴】

又訓得唔好啦, 發夢成日都見到呢D 境象, 又熱喎, 真係失眠架!

>>May 28, 2003 at 10:11:06 PM GMT+8

2003 年 5 月 27 日 星期二 【陰】

今日一早約左肥狗到太和游水，
明明約好在門口等，但一個就在閘口等，一個就在俾錢處等，搞到大家都變成遲到，
已經唔係第一次啦，真搞笑。
明明今天係陰天，但太陽光就陰Ｄ陰Ｄ咁哂落黎，
哂到好黑，都幾傷架。
現在的我不是王寶，變成黑寶。

下午到rebecca家打牌，
我亦好大方地讓出我的ＩＣＱ任人魚肉。
及後佢地亦都留左Ｄ不應該留的ＭＥＳＳＡＧＥ。
真的，玩，都要有個譜。
然後，被佢地誠邀我打牌。
我同肥狗都坐在同一個位，
我坐就成日輸
肥狗坐就成日嬴
W-H-Y

我的ＩＣＱ壞了，怎麼辦？

>>May 28, 2003 at 10:42:04 AM GMT+8

2003 年 5 月 26 日 星期一 【晴】

今日明明有人話要黎我家坐下，但又臨時甩底。
搞到我白等一場。
ｃｈｕｒ

下午便去聽中大的Econ Admission Talk，
又咁岩碰見師父，今日幾好呀，師徒三代同堂，幾正。
但個Talk好悶囉，講者又口吃的，係自然的口吃，聽到我隻耳仔都側埋，救命。
連Q&A那part都耐不住，要早走。
但係聽完個Talk之後，覺得Econ似乎又幾有用咁喎。
唔知呢，但我對這沒興趣。

然後再和肥狗行下沙田，買了少許東西，便回家抖抖。

真的真的，令人心煩。
訓唔著......

>>May 28, 2003 at 10:55:20 AM GMT+8

2003 年 5 月 25 日 星期日 【晴】

今日走左去同Rebecca Sum一齊做義工，要到赤柱賣" 種" ，好在Sum的爸爸用佢架七人豪華房車送我地直接到現場，要不然車費都蝕埋。

赤柱的風光真係靚，沙灘又是一絕，下次一定要黎呢度游水！我地三個仲應承過大家，一生人起碼要豪一次，到了六月尾，我地就一齊黎呢度食最豪的大餐！

夜晚返到黎......虛脫！


>>May 26, 2003 at 11:11:12 AM GMT+8