Showhappy.net - Members diary

日記

日記主簡介

<< 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 >>

2004 年 1 月 20 日星期二【晴】

☆年廿九╭☆
今日我訓到成11:00左右至起身，屋企個個都返晒工，於是我就自己整野食，跟住我就整下呢樣個樣咁，3:00左右我就出左門口喇。
因為黎緊個幾日會好凍，於是我就去左市中心，諗住買d暖蛋芯，點知行左好多地方都係得賣，於是我唯有買住d暖手包先……買完之後，我就搭西鐵出九龍搵婆婆喇。
去到婆婆屋企，我拍左好耐門先至有人開門比我(我舅母開門)，我諗如果再遲d至開門比我，我實變雪條都似 =_=︱︱︱……入到屋，我個表弟仔阿德仲訓緊晏覺，但佢一見到媽咪送比佢既馬騮仔背囊，就立即醒晒，仲立即起身同我玩，跟住我又比左d暖手包比婆婆，5:30左右，我就搭地鐵去旺角，同iED班朋友仔會合喇……
落左地鐵，已經5:45喇，於是我就快步走去火車站喇，不過街上面真係好多人，想行快d唔得呢……好左行到去都係岩岩6:00啫………正當我四圍搵佢地個陣，Fening就打電話比我喇，佢話其他人仲未到，於是我地就係商場行左一陣，仲影左D相，隔左一陣Megan就到喇，之後我地再影多一陣相，之後由於我地有d肚餓，於是我地就上左Food Court等阿B黎喇(原本Nymphea同穎茵都黎嫁，不過佢地臨時有事唔黎得)，等左一陣，佢就黎喇，不過佢搵極都搵唔到我地，佢搵我地時個樣真係好得意呢~ XD 食完飯之後，我地就去左行街喇……依?乜唔係話我地要行花市既咩?點解變左行商場既?不過無所謂啦~只要大家都開心就得啦~係未?隨左行街之外，我地四個仲影貼紙相呢~好開心可以同我一班iED既朋友一齊出街玩呢~如果可以成日同佢地出街玩就好喇……(但係記得要早d早d早d做功課~!!!)
之後原本諗佳同阿B一齊搭車返屯門，不過最後個班車開左，所以最後我地都係各自搭車返屯門………雖然我搭個架車比阿b個架遲開，但唔知點解仲快過佢搭個架 =_=︱︱︱大約12:00左右，我就返到屋企喇……
今日可以同佢地出街，真係好好好開心呢~!!! XD

>>January 27, 2004 at 6:07:56 PM GMT+8

2004 年 1 月 16 日星期五【陰】

☆想哭2╭☆
今日上午上CD2，入到課室，阿B送左一張揮春同一封大利是比我呢，多謝阿B~今日我地主要係匯報我地之前個堂去搵既資料，不過我覺得我講得唔係好好呢………係break既時候，我同一班同學仔一齊搵住阿B送比我地既揮春係課室影相呢~break之後我地繼續上堂，差唔多落堂既時候，Stella佢入左黎課室，公佈返佢個科既成績，我present個分都算ok咁啦，不過paper個分就認真麻麻喇，不過拉返d分都算ok既，個分應該會好過ICD個分……
下午上DECE同埋ELD，不過上DECE時，我地發生左一d唔係咁愉快既事，攪到之後我都無咩心機上堂……不過呢件事我唔想再提同埋諗喇，因為我唔想比人覺得我好似一個臭八婆咁，四周圍講是講非……
放學之後，我同阿B、Ming Ming同Kati搭校巴返屋企呢，我地係巴士站仲見到Elate同Zero添~係巴士上，我同Ming Ming同Kati講左好多野呢~原來Ming Ming同Kati既關係比佢地之前所知道既更加密切呢，佢地知道左之後都好開心呢~當阿B、Ming Ming同Kati佢地落左校巴之後，我先發現原來Francesca都係同我搭埋同一架車返屋企既呢~好開心呀，終於見到佢喇~落左校巴之後我地仲一齊行返屋企呢~

>>January 18, 2004 at 11:56:47 PM GMT+8

2004 年 1 月 14 日星期三【晴】

☆想哭╭☆
今日止上下DECE，冰冰博士趁break時入左黎課室，佢黎係比返之前12月交既個份ICD既reprot比我地，攪到我上堂時一路心掛掛，無心機上堂，淨係一味諗住份功課……點知落堂時，嘉芺派比我地，我一打開，個分真係唔係好好呢………雖然我之前已經有定心理準備，但真係估唔到會差成咁呢……個一刻我真係好想喊呢………不過唔想嚇親大家，所以一路死忍……
之後我就同Megan、Nymphen去左C can買化妝品，我仲買左眼影,睫毛液，原來睇住其他人被人化妝係咁得意既呢~買完之後，我地就食飯喇……
食飯之後，我就就上EEP，噗一堂真係好好好悶呢，而且個導師又唔比人去廁所，咁有時女仔真係有需要家嘛………無人權呀~!!!
落堂之後我就陪左Ming Ming買化妝品，我地班好多同學都買呢，我地班女人真係…… =_=阿菊反抗被人化妝時好攪笑呢~之後就上左Ming Ming間房一陣，之後就一齊搭校巴走喇，原本阿B都同我地一齊搭嫁，不過佢有D事，最後都無同我地搭……
之後我就係元朗落車，去書店買D野，同埋去影印，之後係我發晒脾氣同喊之下，好朋友仔先至肯送我返屋企，人地今日已經唔開心嫁啦，佢仲要激我……
個種感覺又返黎喇，攪到我又唔想返學喇……

>>January 15, 2004 at 4:39:31 PM GMT+8

2004 年 1 月 5 日星期一【晴】

☆新學期新開始╭☆
今日係SEM 2既第一日，係呢度祝10B1既同學學業進步，呢一個SEM繼續咁強~!!!
今日我7:45起身，之後8:45左右出門口，諗住搭261去上水，點知等到9:05，巴士仲未到，心急死我喇，我要上10:30嫁……好左再得多一陣，巴士就到喇，仲立即開車添，不過去到上水都9:45喇，之後立即搭火車，去到大埔墟，都9:55喇，於是我就跑呀跑，跑去巴士站，好在架275遲左黎咋，如果唔係我SEM 2第一日返學就遲到，咁就死得喇………我仲同阿菊一齊搭車車返學呢，佢個個菠蘿扭蛋公仔好得意呀，不過我去左好多地方都無得扭……
我同阿菊佢地行到Library門口，就見到嘉芺仍地喇，於是我就叫佢地快d入課室，因為我係澳門買左d野比我親愛的10B1呢，哈哈~
今朝早我地上ITE，我同一班同學仔搵左好耐至搵到係邊度上堂呢……今個SEM終於都有科係阿Sir教喇，呢一科我地要學點用POWER POINT同Dreamwaver，不過我地會學左POWER POINT先，我之前已經學左POWER POINT喇，我想快D學Dreamwaver，之後就整好D我個網頁呢……
之後下午我地就上CHC，呢一科係Christine教呢~ >﹏<好緊張呀~聽講佢好嚴格既呢……佢講左佢自己以前做護士時，試過接生時，接過一個有尾巴同埋一個無左大半頭骨同腦既BB，好恐怖呀，嚇死我喇……我真係算比呢D BB幸福好多呢，係一個正常出世既可愛B……
之後我仲要上EEP呀，好唔想上呢，第一次就要人test，仲要攪到我遲放學，搭車返屯門時大塞車，攪到我幫唔到Katherine補習，要改聽日補………之後仲要同歡歡補習補脣成10:00之食飯，攪到我成11:00至開始做功課，我聽日要返8:30嫁，即係話我要6:00就起身嫁喇……
死喇，星期五要文功課，宜家仲未做好，死得喇……
*是日金句﹕
我相信！我堅持！
唔怕感情看似廉價，只怕無人看懂！

>>January 27, 2004 at 8:38:38 PM GMT+8

2004 年 1 月 1 日星期四【晴】

☆Happy 2004╭☆
今日係2004年既第一日，係呢度祝大家新年快樂~!希望新一年有近既開始啦~!All Things Bright and Beautiful~!
今日我一早就同阿丸補習，今日係同佢最後一日補習，希望佢生性d，新一年努力d啦……
有咩野事的話就要打電話比我呀~!丸~!我會成日掛住同擔心你嫁~!
因為好朋友仔要返工，無得出街，所以補習之後，我就返左屋企食飯喇。
食完飯之後，我就重新整過日記板既板面喇，好粉紅呢~! XD
*是日金句﹕
Happy New Year! Let's start with a SMILE *^__^*

>>January 1, 2004 at 5:03:56 PM GMT+8

2003 年 12 月 31 日星期三【炎熱】

☆大除夕╭☆
今日係2003件最後一日，今日我1:30就幫阿歡補習，之後4:00就去同Katherine補習。之後我就返左屋企，用左一陣電腦，7:15左右，我就約左Samuel係我屋企留下等(因為佢幫我手攞d筆記比鮑鮑，等鮑鮑既妹妹用，唔該晒你呀~!)，然後就一齊去屯門大會堂，同埋寶寶、鮑鮑同Cindy一齊食飯，我地去左排王食呢，雖然真係貴左d，但今日係大除夕，唔理喇，豁出去喇~!我地仲攞住把刀影相呢，超級攪笑~! XD
食完飯之後，寶寶就同佢媽咪返屋企喇，我地其餘既就逛左一陣街，之後我就同好朋友仔去左睇午夜場，因為我地之前去左澳門玩，無時間睇《地下鐵》，所以我地就去左睇呢一套戲喇，好好睇呢，我覺得好睇過《向左走向右走》呢~!睇完之後，好朋友仔就送我返屋企喇~!
*是日金句﹕
忘記過去
展望未來

>>January 1, 2004 at 5:36:18 PM GMT+8

2003 年 12 月 26 日星期五【晴】

☆Boxing Day╭☆
今日我8:30左右就起左身喇，跟住就叫埋好朋友仔起身，梳洗之後，我地就去左酒店餐廳食早餐，不過d野食麻麻地………我地都只係食左少少，不過d服務生好好人呢，介紹左好多好玩既地方比我地~之後我地就返左房，收拾好行李之後，大約11:00左右，我地就check out喇~

因為我地尋日未買手信，所以我地首先去左議事廳附近買手信，我買左好多野倀呢XD，之後我地就搭巴士出發去氹仔喇~

我地第一站係住宅式博物館，個度d屋仔好靚呢~我地影左好多相呀~之後我地仲去左嘉模聖母堂&隔離既library、天后宮……跟住我地就係一間茶餐廳午餐，午餐之後我地就去左黑沙灣行左一陣，同埋影左少少相，之後我地就去左葡京，諗住睇下，但太多人，最後無入到去，跟住就由葡京行去觀音像，之後就去左新八佰伴逛左一陣，因為行到好累，所以我地就提早搭5:30既船返香港喇(我地原本係8:30個班既)。

返到香港，因為今日係三姨(好朋友仔一位朋友既姨姨)生日，於是我地就同佢食飯慶祝喇~

真係好想係澳門玩耐d呢~

>>January 1, 2004 at 5:07:50 PM GMT+8

2003 年 12 月 25 日星期四【乍暖還寒】

☆Merry Christmas╭☆
今日係我同好朋友仔去澳門玩既日子呀，等呢一日黎真係好似等左好耐咁呢 XD，因為我地搭9:00班船，所以我6:00左右就起身，準備好晒所有野之後，7:00左右我就出門口喇，跟住我就搭輕鐵，轉西鐵，係天手圍站同佢會合，係西鐵上，佢比左份聖誕禮物我，我一打開，佢真係買左呢~!!!係我好想買既魔女宅急變音樂盒呢~!!!真係好開心呢，錫晒你呀~!!!跟住我地一齊搭到美孚站落車，轉地鐵，去到中港碼頭，好好好多人呢~攪好晒所有離境手續，我地就向我地既目的地 —— 澳門出發喇~

一落船，就有一個聖誕老人派禮物比我地喇，我地等左好耐，接我地去酒店既車好耐至到呢……去到酒店，d人仲未check out，所以我地仲未有得分配房間，所以我地就將d行李寄倉，之後就攞住張地圖，四處逛逛喇~我地先去左議事廳前地、板樟堂街、聖母玫瑰堂、女媧廟同大三巴喇，我地影左好多相呢，之後我地去左三盞燈食午餐，我地去左一間叫雅馨既店食緬甸野，d野食好好味呢，而且好平，我地2個人食，都只係$32.5，抵呀~!食飽飽之後，我地就向另一目的地 ——松山燈塔出發喇。

去到松山燈塔，原本諗住睇埋係燈塔隔離既聖母雪地殿教堂嫁，不過修葺中，無得睇 =_=，之後我地就沿住搭巴士去燈塔既路行下，順便搵巴士返酒店，點知比我地搵到一間玩具店，仲比我係入面搵我我想要既woodmate果子玩具呢，於是我就買左我係香港搵極都搵唔到既4號同10號喇，好開心呀，終於搵到喇~!!!

之後，我地就搭巴士返左酒店休息一陣(我大感冒，有d，頭暈暈)同整理行李，7:00左右，又再出發去玩喇~
我地今次由酒店出發，先行去前澳督府，再沿新口岸行去旅遊塔，沿途既景色好靚呢~!之後我地仲去左海事博物館個邊行左一陣，跟住就去返新口岸個邊食野，個聖誕餐真係好好味呢~!!!而且價錢好抵呢~!!!
晚餐之後，我地又去左議事廳前地同大三巴個邊影相，個邊開晒聖誕燈飾，好靚呀 XD
玩到十一點幾，我地就返左酒店休息喇……
聽日我地會去氹仔個邊玩呢~
*是日金句﹕
LOVE ACTUALLY is all around, All I need for Christmas is YOU .

>>January 1, 2004 at 5:18:34 PM GMT+8

2003 年 12 月 12 日星期五【乍雨乍晴】

☆Keep heart warm╭☆
<賂今日好好好凍呢，大家要著多件衫，唔好凍病呀~

今日上午我8:00左右起身，之後9:00左右出門口，去左天水圍趙柏文補習，補到11:30，就去左元朗搵好朋友仔一齊食飯，同埋去攞影印，係行去影印店途中，我地見到一隻著住Winnie the Pooh既貓貓呢，隻貓貓真係好得意呢~

攞影印完之後，我就搭巴士學校交功課同還書喇，我係學校仲見到穎茵、Carmen同Karen，走既時候Karen仲陪我一齊等校巴，好開心呢~

返到屋企，上左一陣網，之後就同阿歡補習喇，我地今日補習時都好開心呢，我地仲一齊沖熱朱古力飲添呢~

如果25/12同26/12快d到就好喇~好期待呢 XD呢掛成日都可以拖住你隻暖暖手，好開心呀~

*是日金句﹕

寬恕人家所不能寬恕的

是一種高貴的行為。>

>>January 2, 2004 at 1:22:35 PM GMT+8

2003 年 12 月 6 日星期六【微冷】

☆決定了╭☆

今日上午我6:30左右起身，之後7:30左右出門口，返左學校，為13/12既賣物會做準備，我被人安排左個日幫手扭波波賣呢~

離開學校，我就立即搭車去天手圍幫柏文補習，我只係遲左個五分鐘左右，佢阿絲就好緊張咁打電話比我，話驚我唔記得同佢個仔補習咁話喎，佢把口就咁講，但佢個心諗咩，大家心照啦，搵佢個少少錢真係好麻煩………如果唔係諗住搵多d錢，真係唔想同佢補習呀……

幫柏文補習之後，又立即趕返屯門同漪彤補習喇，之後就同好朋友仔一齊食飯，呢掛好開心呢，成日同佢出街食飯~

我決定左25/12周6/12去澳門玩喇，好興奮呢~

*是日金句﹕

生活不帶批評

喜悅來自接納

>>December 12, 2003 at 10:14:25 PM GMT+8

<< 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 >>

人氣: 27674

Design & Scripting by ShowHappy.Net