2004 年 10 月 27 日 星期三 【晴】

之前兩晚都係一番屋企就完全陷入昏迷狀態……有冇咁支力呀? 真係有……相信係前兩晚同叉叉傾電話傾夜左，咁耐都未叉番電……老喇，真係老喇，唔怪得人人叫我霞姑……

不過今日有一樣值得開心架，就係Iva今日話最初見我覺得我好細個，不過聽我講野又好似好成熟，呵呵呵呵，多謝Iva，嘻嘻~ 抵我成日叫你做少女既。慢慢覺得Iva比我想像中強，我最初以為佢都係“林zi zi”果種，不過識落，又好似唔係……

呢幾日阿欣好似soft番少少，都好既，我都會當無事發生過。

花花成日話我個樣惡，佢講左好幾次喇，咁我個樣生成係咁架嘛，sorly囉……我都知既，我做野太認真既時候係會令人誤會，我自己都知呢個係問題，其實係我既角度我只係無特登笑姐，我一唔笑個樣就係咁“lau打”，你地原諒我啦。我自從出黎做野已經知道呢個問題，我上次同露大髀、粟米同杜比食飯時都講過，竟然連同我相處左廿幾卅年既阿媽都試過誤會岩岩訓醒仲係戇居居既我係黑口黑面……天生樣衰真係無得救……

----------------------------------------------------------------------

今日地盤佬同我講，佢係THAI時Novem叫佢睇一篇野，跟住佢話唔睇，Novem睇完之後又叫佢睇，佢又話唔睇，點知Novem都係俾左佢。跟住佢拎左張紙望左一分鐘，之後Novem同佢傾談之間都係發現，佢根本無睇過，望住張紙只係一個假動作…… 地盤佬就係地盤佬……真係好鬼中意佢咁地盤！

-----------------------------------------------------------------------

有一件事真係唔記唔得，阿Cherry小姐，聞你說你有“追看”開我既日記架，下話? 咁你就睇清楚喇喎﹕
我有一個朋友，叫Cherry，佢係飛機王，佢本來約左我尋晚食dinner，跟住打幾次俾佢都搵佢唔到，轉頭我開緊會時佢就留個voicemail俾我，講左一堆藉口，跟住話出唔到黎!!!!!!!!!!!!!!
原本我呢個朋友就話星期二會覆我佢星期六去唔去踩單車既!!!!!!!! 不過佢尋日無覆我之餘，今日都全日搵佢唔到!!!!!!!!!!!!!!!!!!!!
我而家同我呢個朋友講﹕我同地盤佬星期六唔去踩單車喇，你唔駛覆我喇!!!!!!!!!!
我而家話俾我呢個朋友知呀，你搞到我尋晚發夢都係度鬧你放飛機呀，鬧左好耐呀!!!!!!!!! >o<



>>October 27, 2004 at 11:20:42 PM GMT+8

2004 年 10 月 24 日 星期日 【晴】

地盤佬同Novem今日應該返到香港喇，不過我無打俾佢地，因為唔知佢地幾點機，而且返到黎都應該好累，所以都係聽日先啦！

今日訓到差唔多十一點，起身，睇左一陣果套講古風餅店既日劇，跟住一點度番左公司做少少野。兩點幾，收到阿媽電話，岩岩諗住走人去同佢飲茶。就係呢個時候，見到阿欣番黎，嘩，佢係唔係個個星期日都番黎架?! 我次次番親都要見到佢既? 傾左少少有關星期三做果個Focus group，我就走人了。

今日有個idea，想問下以前我做過兩個幾月既B & P公司睇下可唔可以做到一D File係岩我地公司用黎放一d手冊加VCD既，等我聽日send個email過去睇睇先。

呢排總係好似訓得唔好，成日都發惡夢……成日發d夢就好似日本同韓國果d恐怖片咁，雖然唔係咩咁驚嚇，但係就總係陰陰沉沉，令我醒左都仲係好唔舒服。

我好相信夢就係一個人既潛意識既message，如果多嘗試記住你發過既夢，有時間去諗一諗，我認為有助更了解自己。就好似我成日都會訓訓下急shu shu，跟住個夢就會係我係咁去搵toilet，不過總係唔會搵到，即使場景係一個我好熟悉既地方；就算俾我搵到，都會去唔成，一係full哂，一個鎖唔到門。因此，證明夢並唔係毫無意思既片段，而我地既意識同潛意識係會一齊運作，而夢會以一d故事性或形象化地表達我地既意識。

可能呢排真係開始有d壓力……

~~~~~~~~~~~~~~~~~~~~~~~~~~~~~~~~~~

今日電視播少林足球，係一套希文好中意既電影。我唔知希文中意呢套戲在咩，不過我今晚再睇，又再感覺一個我一直都有既感覺。

我認為周星馳既戲有好深層既意思，而且佢用既手法係令人好易係不知不覺間明白。佢刻劃感情好細膩，而且套套戲都好有激勵性。所以以前dr.話佢係五號仔，我真係好認同，我認為佢係五挨四，都應該無走雞。男子真係以才為貌，有時真係覺得佢幾靚仔，哈哈！



>>October 24, 2004 at 11:29:17 PM GMT+8

2004 年 10 月 23 日 星期六 【晴】

今日開會, 氣氛又再一次怪怪的……點解會咁架? 點解好似同之前好唔同?

我相信, 可能唔係客觀事實有太大改變, 只係正常既, 唔通一黎就嚇死你咩? 俾著係我, 我都唔會啦。不過都係自己之前睇得唔夠清楚, 其實出得黎做野就好應該預左係咁, 無咩完美既。

就好似我一直相信既一樣, 當做磨鍊囉, 正如我一直都相信, 如果我生於一個更幸福既家庭, 可能我今日既性格會好軟弱, 少少風浪都經唔起。

我記得我以前成日都問自己, 應該係話而家好down既時候都會問, “點解? 點解要我生o係一個咁既家庭? 點解我要有咁既屋企人?” 當然, 呢d係一d好幼稚既想法, 而且都係好down既時候, 自己忍唔住會咁諗。我成日係度諗, 唔係人地既錯, 都係我自己唔deserve人地對我好。成日見到其他女仔都唔係咁既, 人地d女仔總係會有人錫, 佢地總係會受保護。我呢? 通常都係被人笑下、串下，有咩事, 自己照顧自己得啦, 咁大隻, 最好幫下手照顧埋其他人啦。

好！照顧其他人我樂意, 我本身既性格係唔知點解中意保護人, 中意錫人。但有時我都會諗, 點解我同其他女仔一d都唔同……? 其實我知點解既, 因為我既外型丫嘛。跟住我知道人地又會話﹕咁你知你又唔改?

我好矛盾, 邊個唔想自己靚呢? 不過有時又覺得既然已經無人錫我, 係唔係自己又唔可以tum下自己呢……? 其實我都唔係好過份姐, 不過係中意食野, 就算真係食得多過人, 其實都唔係多好多姐……? 咁吸收我都控制唔到格……而且我個個星期都有做運動, 都係一d用都無, 我都唔想格……

我然後會安慰自己, 算啦, 可能我聽日出街就俾車車死呢, 點解今日我唔可以做自己中意做既事? 我又無害人！ 無人錫咪無人錫囉, 今日我錫人, 他日死後可能天主會錫我呢? 我點知唔會喎！

之後我又會鬧自己, 就係因為自己咁安慰自己, 所以一直都下唔到決心！

哈哈, 我真係一個矛盾既人！

不過, 講番轉頭, 當我漸漸睇清楚一個人, 我相信我真係要開始發力, 我要證明我做到！

只係我做到咁又點? 係唔係咁我就會被流放? ……我唔想……我唔中意被流放既感覺, 我需要一個我知道我自己屬於既地方, 我唔中意被放逐！

~~~~~~~~~~~~~~~~~~~~~~~~~~~~~~~~~~

今日鍾生入黎約阿欣出去食lunch, 行左後, 阿Jess講﹕鍾生約欣欣唔約你呀。

其實我唔覺得出奇, 始終我仲係一個二打六, 我係未能證明俾人睇我既能力, 我認。而且, 俾著我係鍾生, 都唔會約我啦, 因為次次同我傾計, 我都好似好趕住走, 唔想同佢傾咁……是但啦, 其實我覺得無所謂, 不過我好似覺得果下好似俾人串左咁, 有少少hurt之嘛……

唉, 好多好多野做, 我樣樣都係做左個頭, 未做個尾, 都唔知會唔會樣樣都衰收尾……希望部門快d回復「嚴謹處事、寬厚待人」既氣氛。

~~~~~~~~~~~~~~~~~~~~~~~~~~~~~~~~~~

聽日地盤佬同Novem就去完泰國旅行番香港喇, 唔知佢地玩得開唔開心呢? 唔知我有冇手信呢? 又唔知地盤佬有冇幫我吸一口泰國空氣，番到黎見到我至呼呢?

我已經PLAN定下個星期六可以去大尾篤踩單車, 因為下個星期希文無幫我BOOK場打波呀~

仲有, 聽日係心理學MBA最後一日喇喎, 唔知順唔順利呢……?



>>October 23, 2004 at 11:30:37 PM GMT+8

2004 年 10 月 22 日 星期五 【晴】

今日係九月初九重陽節。呢個節日一向都對我無咩影響, 因為我都係不孝架喇, 我從來都無藉呢個日子, 去探下阿爸......

今日無咩特別, 平平淡淡過左一日假期。原本打算番公司做下野, 最終都係無。不過鍾生原來真係番左去, 早知我都番啦, 因為我想俾佢睇總裁金句寫成點, 之前俾阿欣佢好似覺得麻麻......

鍾生問我﹕"係唔係寫得好正架?" 雖然佢好cute...... 不過你叫我點答呢? 真係想講﹕"呢d野, 見人見智啦......"

今晚同左露大髀、杜比同粟米去打羽毛波，打完去杏花樓食菜飯，好開心~~~

聽日又要番工lu~~~~勁多野做! -_________________-"


>>October 23, 2004 at 12:56:32 AM GMT+8

2004 年 10 月 20 日 星期三 【晴】

仍在思考平哥格言﹕「辱我者師也」當中……

係好有道理，不過要做得到，非常唔容易，要有呢種胸襟，恐怕我仲有排修練。

好多時聽阿鍾生既事蹟，總覺得佢同阿爸好似。外型、容貌、氣勢、性格等等，都好似。可能好似dr.講，移情作用。我對鍾生係由心既佩服，以致於每次見佢總有點戰戰兢兢，明明想聽佢講多d野，但又好似趕住走咁……我覺得佢講野好好聽，佢講既道理又真係好有道理，哈哈，不過我每次例會聽佢講野都無hup眼訓……

佢既大細眼、佢既身高、佢既不怒而威、佢既幽默感、佢既經歷、佢既獨到見解……一切都讓我想到佢。我好多時諗﹕點解鍾偉平有今時今日既成就，而郭巽燊就要鬱鬱而終? 我雖然對佢印象唔多，愈來愈依稀了，然而我係對佢既能力非常有信心，我相信佢係一個絕對有能力既人！我唔明，點解兩個咁似既人，命運會咁唔同……

鍾生一句「辱我者師也」，清清楚楚咁俾左答案我。

當日佢因為人地一句羞辱既說話，放棄左一個佢最愛既人，更放棄左佢自己既人生。點解佢唔可以因為果一句說話，去做好俾人睇，去風風光光咁幹一番事業???

佢無。

就係因為佢無，由佢決定放棄既一刻開始，佢同時決定左佢下半生既命運！

今日阿媽同我講﹕「你阿爸死前果一兩年成日講﹕『妻也空、子也空、黃泉路上不相逢』……」

……

係咩? 你真係咁認為? 我地真係令你咁失望咩? 所以你一d留戀都無就離開左我地? 所以你到死果日，都親口咒罵我地?

……

今晚就到我夢中，告訴我 我誤會了你……


>>October 21, 2004 at 12:34:05 AM GMT+8

2004 年 10 月 18 日 星期一 【晴】

今日鍾生似乎心情唔錯，去到佢房門口，一片音樂聲傳來……

俾完一d野佢簽之後，我問佢今期總裁金句想寫咩。佢就反問我想寫咩，我話不如寫下你既成功之道丫，好多同事都想知！佢又反問我一輪，邊個想知呀? 你點知佢地想知呀? 佢地幾時同你講佢地想知呀? ……總之我就係知啦！

佢問我﹕“咁你認為有咩原因?” 我答﹕“……性格卦……你廿三歲就開始做廚房大佬，咁我估你性格係令人地好容易願意跟你做野既……” “咁能帶動人都要有料至得架嘛，唔係話就咁就可以架喎！” (……係既係既……)

傾左一輪，佢話佢覺得自己易同人溝通，又能帶動人。佢經常讓我想起我爸爸，可能有一d特徵好似啦。我又諗，呢兩樣我爸爸都好強架喎，點解我爸爸無佢咁叻呢? ……原來跟住果句至係戲肉！

“我今日抄低左一句野……你抄低先得格！ 係「欲我者思也」” “下? 咩「欲我者思也」(正在抄錯字當中……)” 跟住佢就俾張咭我睇，哦，原來係「辱我者師也」。

佢話﹕就呢個題目，你發揮啦，你寫到架喇！

唔……都得既，呢句果然唔錯，好！我鐘意！

「辱我者師也」


今日收到一封希文既email，係一本online album，有我以前幫我d寵物影既相。我先見到Cookie，又見到黃貓，都無咩太大感覺。之後，見到老貓，原來佢真係咁靚、咁可愛，佢訓得好得意……我忍唔住淚水喇，我覺得自己好殘忍，果時無盡力挽留佢，佢陪左我十幾年了，由我阿爸仲係度開始，陪左我咁多年……好卦住佢，唔知佢而家幸唔幸福……?


得知大哥唔單止經常失蹤，中午時段經常唔見左人，而且對物邊每人呼呼喝喝，我真係覺得佢好衰。我真係愈來愈唔想見到佢，甚至幫佢做開既野都唔係好想再幫佢做……點解物邊咁多人盡力幫佢，佢要咁樣對佢地……?


今晚睇左 “龍鳳鬥”，幾好丫，有好幾個touching位！


>>October 21, 2004 at 12:35:17 AM GMT+8

2004 年 10 月 18 日 星期一 【晴】

又upload左一批相喇，真係開心。我而家日日都楂住部相機，我又發覺真係好似每次就算我唔開心，只要囉部相機出黎影幾張相，個人自然開心番。不過依然都係果個principle，就係我中意影人，影唔同既人開心既時刻，咁我就最開心喇！所以我都知呢排我d朋友好慘，個個都被我影幾十張相，不過我又真係影得好開心丫嘛！

我仲有一個mission架，就係到Noel同Kevin結婚時，我可以貢獻到好多好珍貴既生活照俾佢地！因為我真係影左好多佢兩個好開心既相 (我覺得)，所以我而家係佢地兩個既專用生活照攝影師 (自封！)。

淨係希文都已經俾我影左過百張相啦差唔多……嘻嘻，我知你唔介意既！

今晚有得睇獎門人，又有得睇天國笑片，都幾開心架！仲有，Karen同Mandy又上左黎我屋企，又俾我影左好多相，哈哈，我已將佢地既醜態放哂上網，公諸於世！

__________________________________________________________________

尋晚睇左隻VCD，叫 “連鎖蝶變”，係講一個我早於楷亞聽過既butterfly effect (我買呢隻VCD都係想睇下佢地點演譯呢個Concept)。

睇完，都幾好睇丫，我唔識評論佢地拍得係唔係真係符合個concept，不過我就睇得好入戲，好似代入左個男主角既角度，呢樣都應歸功於拍攝手法吧?!

我睇完覺得佢想講既可能係有好多事情我地成日都會覺得 “如果俾我從新再黎過就好喇！” “如果我當時可以xxx，咁我就一定可以做好d喇！” ……其實好多野，如果真係再黎過，如果真係可以xxx，我地又點知一定會好d呢。根據butterfly effect既原理，一樣變，一切都變，可能你想變果樣真係變好左，但係其他事情又會因為你呢一個改變而變得更壞呢?! 如果butterfly effect真係可以好似戲入面咁，我相信係一個好大既concept既改變，時間唔再重要，一切決定亦都唔再重要……我唔識講，總之好多而家人人信奉既野都唔再一樣啦！……都幾得意。


>>October 18, 2004 at 12:35:49 AM GMT+8

2004 年 10 月 16 日 星期六 【晴】

今日，本來book左四點至五點打羽毛波，不過因為十一點幾Noel打黎，話想去沙田踩單車，叫埋我同希文去。我其實又真係無咩所謂，不過又哂左59蚊既羽毛波場。

當時，我已經係話如果有人肯定去到可以踩家庭車我至會去，因為我根本唔識踩單車。希文同Noel講到好似好肯定咁，又話見到好多人都係咁。但係我明明就係記得多年前我同希文去過已經係唔可以。不過既然佢地咁肯定，希文又咁鍾意踩單車，咪陪下佢地囉。

一向唔中意坐地鐵同火車既我，建議坐巴士去。不過原來Noel已約了Kevin係旺角火車站等。咁本來我都話一齊去啦，不過希文唔知係唔係想就我，同左Noel講我地兩個坐巴士去，於是就分頭去，係沙田等喇~

等車加坐車竟然用左差唔多個半鐘，實在太過份喇！Noel同Kevin一早到左。係車上，希文令我覺得佢認為要陪我踩大車好為難佢，於是我好唔開心，唔識踩單車又唔係我錯，咁我真係學唔識，天生就係對需要平衡力既野好弱架嘛！我都唔想架，都話左叫佢地自己去，我無所謂架啦！又要叫我去，叫左我去又嫌棄我！咁我咪嬲囉。去到仲要唔識路搵Noel，希文又周圍走左去問路，得番我一個徬徨無助既 “小”女孩，嚇鬼死我！佢又見我嬲都tum番我，我咪愈來愈嬲囉！（對唔住囉大家，嚇親你地添~）

搞左好耐至見番到Kevin，黑口黑面嚇死佢。去到仲嬲緊，Noel苦笑。最初我仲要扮嬲扮唔食野，不過終於都係忍唔住問Kevin﹕你碗麵好唔好食呀?

Kevin的確係一個老實人，一本正經分析一番﹕“麻麻地呀，好咸……”Noel已經即刻話﹕“咩呀? 好好食！你緊係話好好食啦！……好食呀，你幫Sonia叫一碗啦！” Kevin過左兩秒至知咩事，就連我都覺得自己好無聊。係人都知我前世係餓死架啦，扮咩野姐?!

之後去租車，租唔到啦，家庭車係沙田同大圍一帶全面被禁！

無得踩單車，我覺得希文同Kevin都幾失望。咁都無計格。之後去左行街街，行下IKEA，行到六點八，各自番屋企lu~

今日我內地既姪女o係我屋企過夜，聽朝早可能一齊出去飲早茶卦?~


>>October 16, 2004 at 11:05:30 PM GMT+8

2004 年 10 月 14 日 星期四 【晴】


今日去左聽一個由現飲搞既“前線新丁變服務之星研討會”。都唔錯丫，聽到萬寧既營運總監同埋恆生既培訓經理講佢地點做培訓，點樣去提升佢地同事既服務質素。

我認為萬寧既講者Lily講得唔錯，大方得體，幾有感染力。相反，我就唔太中意恆生果個speaker。

我地集團由Iva講，仲要做埋總結添。佢都講得幾好丫，輕鬆得黎都好大體呀!

我覺得學左好多野，知道多d人地係點做野，幾得意呀！

不過今日心情麻麻，因為成日好多濕碎野做，但係又日日都要出街，一係開會，所以可以話係 “完全” 無時間做野！

我唔想再成日俾鍾生問我﹕你點做秘書架?!

雖然講真，我又真係覺得佢適合做秘書多過我，佢又真係幾細心，次次都係佢提我，無一次係我提佢既~~~ >v<

今日係我生平第一次食矮瓜，連希文都話值得寫落日記。

今日因為本來諗住同阿欣兩丁友食Lunch，點知入到麻布茶房被阿Paul叫住，原來佢又係果度一個人食飯。

叫左個鳥肉定食，有三大舊矮瓜，唔食就會俾人發現我偏食，硬住頭皮就咬左一啖，不過真係接受唔到個texture，就無再食喇。

食完去到Miramar聽野啦，未入門口就覺得肚痛到不得了，真係痛到我死左死右呀！研討會期間去左四次大大，依然隱隱作痛，仲搞到我再一次係鍾生面前出醜﹕佢係研討會一開始已講左既致謝詞，我因為去左大大錯過左，等我break時仲問佢有冇帶篇稿黎，佢苦笑﹕一早講左喇喎！又瘀爆！ *乜致謝詞唔係活動尾聲至講架咩?!*

我總係覺得我今日個肚痛成咁係關矮瓜事！

另外，食lunch時同阿Paul傾左兩句，發現佢應該係睇過我CV，仲要有D記性記得我之前做過咩添，我又真係好佩服佢既記性，點解連我呢d二打六既資料佢都會記得?

佢對DR.既事亦略知一二。平時都同佢無咩兩句既我，都係講起DR.就識講兩句，其他完全撘唔到嗲，因為真係唔係好知佢講緊咩，所以都係佢同阿欣係咁傾、係咁傾、係咁傾……

我都唔想咁架，我會睇多D野，等自己識多D野，下次咪可以撘嗲囉！

聽日一早去信和潮樓拍優資培訓，諗到少少新形式，希望聽日拍到出黎啦~


>>October 15, 2004 at 12:28:32 AM GMT+8

2004 年 10 月 12 日 星期二 【晴】

呢兩日無咩點聽到阿嫂既新消息，佢都無再打俾我，無再send message俾我。

聽講，佢仲係好落力幫我阿哥手做野。我覺得佢係咁多人之中最辛苦一個，自己番工已經做到死，仲要o係番工前、lunch time、放工後，全部都要出去幫手。仲要拎住幾十袋野去同人迫電車，仲要俾坐電車d人鬧……經過今次，我真係認為佢真係一個值得佩服既人，真係好西利！



呢排做野做得好差，處處出錯，都唔知我自己想點。我要快d做番好d，如果唔係就次次總監會上都會聽到鍾生串我架喇！


自從買左數碼相機，可以成日周圍影，真開心！


>>October 12, 2004 at 11:56:25 PM GMT+8