2004 年 11 月 14 日 星期日 【晴】

近來，少了寫日記……

是太忙嗎? 算不上……雖然近來好像不停地約會不同的朋友，留在家裡的時間好像少了，但也不見得沒有時間寫日記。

常常在心裡想了很多事情想要記下來，不過到真的坐到電腦前，又不知道寫什麼才好。

記得我自己寫過，唔開心的我盡量都唔想寫太多，記住又點呢……?

呢排的確唔係太開心，因為同希文既關係有D緊張，大家都好似講左一D問題出黎，但係又唔算真係講左……果晚我地係鬧得好唔開心，雖然我唔知係唔係得我一個人唔開心，可能希文都已經慣、已經悶，但係我知你仲有好多野想講，仲有好多對我既不滿，對嗎?

……我都唔知寫咩好……

聽日係現飲會慶，本來以為我可以出一分力，不過最後都係無咩幫到手。鍾生下年都會做現飲主席，希望到時我可以多D幫到手啦！

尋日去跑馬地打羽毛波，走果時竟然見到馬俊偉o係度拍皆大歡喜（我估）。佢都幾靚仔丫~

哈哈，諗起蔡主席話我好似個個明星都鐘意，其實我又真係好多都鐘意架，例如劉青雲啦、穿屎啦、吳卓羲啦、張家輝啦、楊采妮啦、古天樂啦、應采兒啦……仲有好多架！ 咁佢地真係個個我都鐘意丫嘛，有問題咩? ^_^





>>November 15, 2004 at 12:22:24 AM GMT+8

2004 年 11 月 9 日 星期二 【晴】

今日又係我一星期裡面最難過既一日，開會開個不停，早上十時至晚上八時，好彩我呢d係二打六，d管理層仲要繼續開........

今早開會時接到鍾生電話，佢問我忙緊d咩，我話開緊會，咁佢就話無野喇。我好驚，唔知係唔係想鬧番我尋日做錯野呢........?

一直到總監會，佢又好似無乜野，都同我有幾句講下......諗住應該無咩卦~?

晚上八時，開完會，大髀同三眼先走了~ 我見到阿欣係會議室走出黎同我講，鍾生叫我等埋佢地開完會一齊食飯......? 下，乜原來真係有野搵我架...........?

等左約半小時，等到了。一齊去左一間酒家食飯。

原來都係關我做錯野事既，不過佢唔係鬧我，係想借一個機會溝通多d，等我了解佢做事方式多d o者。

全餐飯多數都係佢同阿欣係度講公司既野，唔係好正經既公事，不過係討論一d人同埋一d處事手法......我都幾似撘檯！

不過唔緊要，我除左覺得自己真係好無用，咩都唔識一齊傾之外，我覺得只係聽都學到好多野！簡直就係大開耳界呀！

我心諗﹕如果每個月有一餐咁既飯食，可以學到咁多野，唔加人工都唔係大問題啦！

鍾生，係我偶像！


>>November 12, 2004 at 12:26:43 AM GMT+8

2004 年 11 月 6 日 星期六 【晴】

尋日同今日阿欣放假，佢去左行毅行者喎~ 好強！

我雖然仲未出去睇資訊站，又未食福食，不過都唔係太想出去，畢竟已經好耐無係office做下野喇~

尋日下午唔知邊個發起，打左場office war game……玩左好幾個字……哈哈，仲要影埋相，好搞笑！

Office War Game

今日十點幾，我等緊入去睇資訊站時，無端端見到爹力係度幫緊三眼拍緊video，我就問佢地拍緊咩。見到三眼扮緊James Bond，佢就叫我扮邦女郎 (……我?)。我諗住佢講下笑，於是敷衍下佢就算啦。點知佢好認真……咁我就是但啦，諗住一兩個鏡頭玩下姐。點知一拍就拍左幾個字，後來露髀同埋阿花都拍埋一份呢~ 其實之後我係o係製作室入面睇資訊站，同阿開一齊執緊架，唔係玩得哂架~ 不過就好似我地幾個係入面成個幾鐘咁。

放工時阿即時黑面又唔出聲，我諗佢嬲左我地了，卦住玩……

咁我又係既，阿欣叫低我代署理佢既事，我竟然卦住玩……不過講真我地大家都忙左好耐啦，我覺得我地已經無最初時咁close，因為大家呢排都忙。咁趁住大家輕鬆少少時放鬆下，都唔係太過份丫，我地又無放低手頭上既野唔做……我覺得ok喎~



>>November 7, 2004 at 1:05:54 PM GMT+8

2004 年 11 月 4 日 星期四 【晴】

今晚放工後同左Toby, Suki, Johnson, Leeman, Jennifer, Jess, Eva, Ruby, Herbert一干人等去左食巴西buffet同杜比farewell加同粟米預祝聽日既生日。

玩得好開心！果度有兩個人唱歌，當佢地黎到我地張檯唱時，三眼就細細聲同佢地講請佢地幫手唱首生日歌。果時杜比仲傻下傻下出左去囉野食，我即刻去捉番佢番黎啦！

唱完後，果兩個人都幾鬼搞笑，仲要係咁話要有birthday kiss。我地一班人緊係撥行佢啦，係咁火上加油，跟住就真係kiss左喇，哈哈！之後一round後，果兩個人又再番黎，今次係我後面唱，我又影左好幾張相喇。而且仲影左好多阿花好搞笑既相！

接近尾聲，一向沉默既利民竟然開始講鬼故。佢果d親身同埋佢朋友既親身經歷講極都仲有，好搞笑。

不過聽完實有排驚了。

☆ 睇下我地幾開心 ☆


>>November 7, 2004 at 12:51:04 PM GMT+8

2004 年 11 月 3 日 星期三 【晴】

今日例會加深化五常比賽，前段勁眼訓，好彩有伊娃坐我隔離，批醒我，我鐘意！第一次訪問咁多人，都幾好玩呀~

呢排好似成日約人出街，今個星期就得今晚係屋企食飯，其他都約哂人，係好現象嗎? 應該是吧……

Jack你終於又搵到結婚對象喇，恭喜哂喎！聽你自信滿滿既說話，相信佢令你改變不少吧，要好好珍惜啊！過往你教我很多，多謝你。

Toby聽日last day，希望佢下份工做得開心d，祝你快樂。Toby係我心目中係一個小朋友，不過係一個好有風度既小朋友，相信無左你，我地都會悶少少架~



>>November 3, 2004 at 11:54:59 PM GMT+8

2004 年 11 月 1 日 星期一 【晴】

近來情緒非常波動......我大概知道原因，但我沒辦法......

我知道我有辦法，但我不會去做。希文，也許叫你擔心了一點，不好意思，不過我還是要再一次告訴你，雖然我不知道自己有沒有事，不過無論是有還是沒有，我還是不會去做些什麼！無論如何都不會。

也許我的決定叫你失望，但我是真的決定了......


>>November 2, 2004 at 1:05:09 AM GMT+8

2004 年 10 月 31 日 星期日 【晴】

今日阿媽打電話俾一個親戚，講左好多我兩個阿哥既事。

當年，阿爸死後，就留下一檔麵檔。大哥做做下就諗住番大陸搞生意，二哥又咁岩係果個時候話想唔再係檔口做。阿媽話大哥番左大陸發展，叫二哥留係度一齊做。二哥話大哥打佢，佢唔想再做。不過後來因為大哥已經全身卦住做大陸既生意，於是二哥留低了。阿媽話佢果時好俾心機做，仲做得好好，比大哥更好。

後來，大哥生意失敗了，就想番黎做。二哥就馬上決定唔做了。佢話唔想做到兩兄弟感情完全破裂至走。之後，佢做過好多行，次次都係做得唔好，因為佢自己個性格又真係唔係太有責任心。

而家，大哥又開左一間地舖，佢又想叫二哥番黎一齊做，一人做一檔。二哥無應承。佢而家番左鄉下做汽車美容生意。聽講，佢聽唔少閒言閒語，因為佢同埋佢既二奶小雪一齊番去，果度d親戚個個都唔中意小雪。D親戚打電話出黎，講好多我二哥既壞話，聽講佢睇起來好唔掂。 不過，又聽一d由佢講既說話，我覺得佢識諗左好多，我都希望佢今次真係會改變，好好做人……就算佢點衰，佢都係我阿哥。 其實有時諗番，佢以前真係好衰。有時，我真係差d就對我屋企人講出口，我係最唔應該原諒佢既人，不過我都已經原諒左佢喇，不如你地都算啦，過左去既野，大家一家人，支持下佢啦。……算啦，我唔可以講。

有時，我問自己，係真係原諒，定係無得唔原諒?! ……

我又諗起，其實我自己細個都好曳……我去便利店偷野、o係屋企偷錢、冒簽……好多好多……仲有好多唔開心既記憶，士多啦、後巷啦、巴士啦……雖然係唔開心既事，不過我都唔想唔記得，因為我對於我小時候既記憶，就只剩低呢幾個片段，其他都通通唔記得哂lu……仲有仲有，記得我仲係幼稚園時，有一次放學時去到樓梯口開門，阿爸問我班主任姓咩，我話姓余，佢問我係唔係一條魚個魚，於是我就好努力咁解釋唔係喇。

又記得有一次，我小學自己坐巴士返學，阿爸唔知囉d咩落黎巴士站俾我，見到巴士站個叔叔搣我，佢就即刻走過黎鬧個阿叔，仲話佢再係咁就會斬佢。哈哈，果時真係覺得佢搞到我好尷尬，因為果個叔叔以後望都唔敢望我了。不過，而家諗番其實佢係好錫我，其實佢講果陣個樣好威架，佢死左之後，再無人咁樣為我出頭了。如果有時光機，我真係好想再番去果個畫面，去感受多一次，去多謝佢一次。

仲有仲有，我記得以前細個有隻小熊陪我訓左好多年架。果隻熊係淺啡色既，著住一年黑色背心。不過唔見左好耐lu……仲有，我二年級第一次考第一，阿爸買左個玩具琴俾我，我仲記得係o係三越買既，粉紅色，有咪架! 仲有，我細個好鐘意去“得成冰室”食沙嗲牛肉米粉架，阿爸成日帶我去既。

雖然記得既片段好少，不過我相信我係曾經被疼愛既……聽講，阿爸以前最錫就係我，可惜，佢無俾機會我報答佢……

所以，我明白有d野係你到過左去，你至知道你曾經擁有。好似而家我有時見到阿媽用手機時小心翼翼咁噤制，有時聽得明明珠店新聞報導裡面既一兩隻生字果個開心樣，同埋佢有時講左一d野好搞笑、自己都笑得好奸果個樣，我都會目不轉睛咁睇住佢……因為我知道，除非我早死過佢，如果唔係，呢d片段都會係我同佢之間最開心既回憶，因此我珍惜。

我成日同我身邊既人，包括希文，講要珍惜你地既父母，你明唔明呀……?



>>October 31, 2004 at 5:20:35 PM GMT+8

2004 年 10 月 30 日 星期六 【晴】

今日因為上個月heman仔無book場既關係, 所以無得打羽毛波...........

放左工即時飛身去銅鑼灣廣場一期neway，希文十二點半度去到，到左一點三至有位。叫左兩個lunch, 分別係楊州炒飯同海鮮炒烏冬，一聽都知超行貨。去到先知原來只有得唱個半鐘，d野超唔好食，而且部電視同音響又唔好，埋單仲要97蚊，仲貴過之前去天樂里!!! 我覺得neway係因為天樂里果度裝修緊，d人去哂銅鑼灣呢間，所以噤住黎搶!!!!!!! 真係激鬼死我，之前天樂里果度都有得唱兩個鐘啦! 簡直係痴線呀! 我唔會再去呢間架!

之後番左屋企，又訓左一個下晝，哈哈!

----------------------------------------------------------------------

晚上，同阿媽去左銅鑼灣廣場第二期九樓食巴西燒烤。我覺得幾好喎, 原來就係維園果間既分店。98蚊一位，好多野食，d野都幾好食，又有野任飲，環境唔錯，服務態度亦好，仲可以用$20既coupon，兩位埋單都係一共一百七十幾，好抵呀，我好滿意!!! 我同阿媽最初好驚訝我地右邊檯果幾個女仔食咁多野，覺得佢地戰鬥力好強! 點知臨走我地得既結論就係係我地兩個太屎，食唔到好多，其實身邊檯檯比起我地都食好多! 蝕哂!

都係果句，我真係太吸收喇!

----------------------------------------------------------------

夜晚番到屋企，又煲我呢排成日玩既掘金game同埋麻雀game (同一樣就可以篤果隻)。玩左好一陣子，覺得對眼好累，點解d人可以玩咁耐既???


>>October 31, 2004 at 12:55:48 AM GMT+8

2004 年 10 月 29 日 星期五 【晴】

今日lunch約左Hilda去皇室堡稻香飲茶，好開心~ 一個以前我做楷亞時成日都去既地方，有一排差唔多兩日去一次咁滯，好多時都有Hilda份。今日，得我同佢兩個，都好開心丫。

今日放左工本來約左阿Jay、杜比、栗米同阿Man食飯。不過阿Jay又係甩底, 已經第二次喇! 唉...... 我唔會再book場架喇，個個都甩底，最初又係你地叫我book羽毛波場既，而家又個個都唔黎，咁我book黎做咩，你估真係好易book架? 雖然係玩得好開心，不過約人果時真係好煩，好似要周圍求人陪我去咁......做咩姐? 我最初係諗住幫大家book架咋，我自己個個星期六都打架啦~ 嗚~~~~~~

>>October 30, 2004 at 12:22:23 AM GMT+8

2004 年 10 月 28 日 星期四 【晴】

今日又受一個重大打擊! 鍾生9:08打俾我, 問我佢今日係唔係 9:30 上ISO堂, 我睇一睇我為佢準備既Schedule, 係丫, 無問題呀! 跟住佢話﹕"係 9:00 喎, 邊個話你知 9:30架?" ......唔記得喇喎, 月頭既事, 仲點記得......? "你記下呀, 睇下做咩寫左 9:30呀!" ......哦!

跟住搵番email, 原來係月頭Jess以 email傳遞阿欣既口訊, 寫住係 9:30。不過算啦, 我都有唔岩既, 我應該再double check 集團行事曆, 當初無check係因為本身鍾生係唔駛上呢個堂, 佢係代人上既, 所以最初係check唔到......係我衰, 又衰左!

我lunch time打俾佢問野, 佢問我 : "你難唔難過呀......? 你咁樣我會俾人羞辱架........" 難過! 慚愧添啦! "算啦, 你唔好難過啦, 下次小心d啦!" 唉, 雖然佢係笑笑口咁鬧我, 不過我都真係好唔開心, 因為真係覺得自己做少少野都做唔好!!!!!! "巢"哂皮......

跟住仲要收到Vincci出既一封遲到通知書, 寫明係鍾生"因為Sonia通知錯時間而遲到", 真係吹漲! 更 "巢"......

我日日都同自己講要做好d, 點解仲要做成咁? 我能力係唔係咁低???????


>>October 29, 2004 at 12:30:27 AM GMT+8