2004 年 2 月 10 日 星期二 【乍雨乍晴】

我想放下那些令我困擾的事

本來自己想通了
卻又遇上了波折

其實自己依然很怕那些事
要深入的討論，我就會害怕起來了
無敵Sandy 以前這樣說過我
這是對的
我想逃避，我要逃避

我的理想，將來或許不能和那些事共存
總要放棄其中一項

我要對神，對自己負責任
我不能像上一代那樣差勁

我希望能早日消除紊亂的心情
很煩
雖說是自己胡思亂想

---------------------------------
不知道有多少人明白我發生甚麼事呢~
最重要的，是某些人不可以知道
----------------------------------------------
但又好像無情了一些，不負責任了一些
--------------------------------------------------------
我都不知道自己究竟想怎麼樣.......

>>February 10, 2004 at 6:35:44 PM GMT+8

2004 年 2 月 8 日 星期日 【乍雨乍晴】

「忘掉積分你是冠軍」!

>>February 8, 2004 at 5:15:08 PM GMT+8

2004 年 2 月 7 日 星期六 【乍雨乍晴】

夜晚同阿本傾電話
講左好多野
但當然唔會打曬D 野出來啦

不過佢話我知，原來佢小組做組長，有好多野要做，我都唸唔到ar
跟住呢

佢提醒我，想去知某人情況，而只係問某人的朋友，不直接問某人，就不算是關心了
對的，不要再自己騙自己啦 !
自己跟本沒有太多關心別人
成日自欺欺人，老是想著自己會「關心」別人，但其實自己幾時做過呢 ? 還要感慨人家可能忘記自己嗎 ? 自己都唔係咩好人......

但是，煩到人就唔好啦

-----------------------------------

後來又同阿茶icq
佢send 左D 野俾我，唔知係咪歌詞呢
好講中我心聲ar

「徘徊在似苦又甜之間
似是濃卻仍然很淡
猶疑在似即若離之間 」

>>February 8, 2004 at 5:15:50 PM GMT+8

2004 年 1 月 30 日 星期五 【颳風】

如果我不去想一想，現在還有好多人看不起自己
我就不會有動力去努力讀書
冇錯，我讀書的其中一個動力，係「唔想俾人睇死同反擊」!
感謝那些人對我的態度，我學會了發憤

這兩天上學，我看到了某些人，他們的樣子，就覺得他們依然是看不起自己，他們不欣賞，甚至討厭我做的每一件事情，見我的功課差就鄙視我，見我差點set唔好部實物投影機就輕視我，見我在圖書館行走亦然。我自己都好唔想見到那些人，那些人給我不安不自然的感覺。

如果我自己都不發憤，不盡力反擊，那麼我就真是「抵死」了 !

我究竟為何要走上現在這條文科路 ? 第一當然是為興趣。但竟有人因此笑我，說我只是「D 史勁，其他廢到爆」，哼 ! 你好了解我咩 ! 你見過我溫書咩 ! 你又知我「唔掂」? 難度我每次都要把我的測驗卷show off !? 你有咩資格評論我 !? 對歷史有興趣有錯嗎 ! 不了解我，只會看我的表面，我做甚麼事都胡來的評論，收聲啦 ! 不埋會我不要緊，但那些對我亂加評語的人，是我最討厭的 !
也要感謝那些人，沒有他們看不起自己，我那會加把勁的發憤 ? 總之，我不會再給那些人看不起 ! 我不會輸給那些人的 !

講番1月30日
我放左學，返完高團，就返屋企，六點幾出自修室。本來約左阿孫 ( 晉誠 ) 係圖書館門口等，拿回紀念冊，但我落左去參考圖書館，偏偏那兒電話收得勁差 ! 結果他找不到我，把紀念冊給了阿本。唉....佢今日 ( 1月31) 就回澳洲了，最後一面都冇機會見.....無奈。
在寧靜的參考圖書館和自修室 ( 少人呢 ) 溫Geog, 十點清場，行番屋企，十二點左右再開始，到四點幾先停。一個人投入溫書寫Notes 的感覺，好正，好令我陶醉。

我一定要努力原校升中六 ! 我一定不能衰給那些人看 !

-------------------------------------------------------------------------
另一方面，家裡的三根水仙，有一個竟然開花了，真係奇跡~

>>January 31, 2004 at 2:28:19 PM GMT+8

2004 年 1 月 15 日 星期四 【炎熱】

大坳門旅行日 !

晨早番到去，呆了一會兒。有人幫我影左張相，哈 ! 都幾靚仔 !
跟住落操場等車，等到九點先有車，有冇搞錯 !
不過搭車時候好開心ar ! 我地開始活躍起來 !
到了大坳門，我同阿坤即刻直奔目標燒烤場，oh, 竟然冇人啦，仲唸住4D 班D 人己經到左霸住個場，真係好彩 ~
齊人就開始整爐開餐 ! 我那組燒烤組D 野好正啦 ! 雜丸那些不在話下，那個雜菇就真係滋味呢 !
另一方面，話就話分組燒野食，但到中途都周圍走周圍燒周圍玩gala~ 加炭時就周圍走囉 ~
食完kick 左陣波，哈，有球話我中碩鼠要害....哎啊，邊有咁容易啊，不過算啦，被罰任人向我射球啊!
之後上去「放風箏地點」，玩遊戲~
紅綠燈好玩，「火燒後X」(唔識打~@@)仲正 ! 玩到我地個個都玩地索曬氣 ! 不過真係好刺激，個個都好投入ar !
玩到死下死下，終於有人叫停~ 跟住就休息，影相呢~
影完班相，就落番去，走啦。
哈，搭91號車，成個巴士上層都係5B 人!
到鑽石山廣場就散啦

其實睇相睇番旅行D 野會仲正 !
http://community.webshots.com/user/ryan_gm3

跟手同溫, 溫, 怪獸, 蕃茄去尖沙咀，講溫同某人的問題，認真起來，竟搭過龍 !
不過就係因為搭過龍，我地由金鐘番尖沙咀，就在地鐵站裡碰上Miss Chan ! 陳建英老師ar !
實在太好啦 ! 仲同佢影左相 !
唉，不過佢個樣好似老左好多.....可能工作辛苦吧....

跟住同超人, 皮勳, Karl, Ricky 會合，去太空館，買ticket , 係海旁影相傾計，越傾越覺唏噓.....
八點半入天象廳睇電影 ! 嗯，回想了那次搞笑的比賽，那個戲劇性的賽事，那個「季軍」~ ( 可是我到現在都冇掂過那個獎座呢 ! )

跟手去食飯，哎啊，九點半那有飯吃呢，去到無印那邊，D 鋪頭都開始關門，我同溫, 曾, Karl, Ricky 趕住美心，又衰左 ! 死下死下，才到了一個「茶餐廳」，唉，三十三蚊一個飯，又要加一，冇計啦 ! 尖沙咀係"CBD" ( Central Business District ), high-order services, 有錢食到野都好好gala ! 無奈啦 !
跟住碰上有村巴，唔理咁多，上車歸家 !

第日咁樣一齊的時間有幾多呢?
求主保守我們的友誼 !

>>January 31, 2004 at 2:20:15 PM GMT+8

2004 年 1 月 12 日 星期一 【晴】

今日調左位ar !
其實同萃欣坐，有溫在後面，Tiff, Po, 何水, 碩鼠在附近，個位真係唔錯ga !!!
不過宜家調左新位都唔錯la~ 有羅思係隔離，雞翼同阿盈係前面，都幾好la ~ 不過附近好似好多女仔bor !

今日lunch time 冇錢食飯，飲左包麥精算數，仲食左溫少少面，呵
跟住就Dancing la !
大家都唔錯la !
其實我自己同Joey 係搞錯左D 舞步ga !
不過下面應該唔多覺 ~ ( 其實當時人都好似話唔知錯左wor~ )
可惜冇拿DV 來錄ar !
真係可惜la !
不過算啦~~~ =.="

上番班房就急急腳落番地下看些相到了沒有
後來母親大人話佢三點先囉到喎
那間曬相鋪真是的

話說我昨日去囉相，去到佢話「仲未搞掂」
咁無計啦，去隔離睇睇碟，見到有麥兜故事ar ! ( 當晚就播啦 )
一會兒後，我再去看看，佢地竟然話「部機壞左」，要等師傅來維修.....

激氣，唯有番屋企啦.....

第二天下午，母親大人由旺角回來，三點鐘終於拿到相，就送來學校了
唔該曬啊 !

跟住班會就開始用D 相來進行計劃當日旅行日的事情了~
好開心我自己可以幫到忙!

>>January 31, 2004 at 1:39:20 PM GMT+8

2004 年 1 月 11 日 星期日 【晴】

凌晨仍在與History 共對
星期一pre-mock 喎，同大家一條船，一齊作戰，唔想話人家努力自己卻在歎世界
於是也有奮鬥
不過一路打notes 一路聽Beyond 演唱會
真係好正ar !
佢地D 歌同我好有共嗚
真係好想我可以早D 學識打鼓ar !!!

「每次記憶哭笑 將心意再變改 一分一秒
無意對一切話別 無意卻遠走它方」

「沒有淚光 風裡盡闖 懷著心中新希望
能沖一次 多一次 不息自強
沒有淚光 風裡盡闖 重植根於小島岸
如天可變 風可轉 不息自強 這方向 」

「無奈靜靜不捨心聲 和我偏偏正呼應
前方或會一生奔波 無悔這一生經過
縱有冷風飄過 將心緒再痛悲 緊守不變」 ( << 無悔這一生 >> )

「這一刻 心中千個疑問
這世界 佈滿愛的控訴
你我充滿夢想 追蹤心裡所愛
彼此嘲笑自己 誰人和我共嗚」

「全是愛 到那裡也聽到愛的呼叫
全是愛 這世界以愛去逃避痛楚(忘掉記憶)」

「這季節 哭泣不會流淚
歪曲的 變了至真至愛
千首歌 寫出真愛無助
告訴我 這叫愛的控訴」

「總不相信自己 今天失去感覺
始終總覺陌生 何時才有共嗚 」 ( <全是愛> )

希望我會繼續係個有情感ge 人 !

>>January 11, 2004 at 3:04:32 AM GMT+8

2004 年 1 月 8 日 星期四 【晴】

上次去筲箕灣做店鋪project
見到環境和時代轉變帶來的唏噓

知道某巨星離世，又有人墮樓
感覺得生命的無奈

看到人際關係中的不協調, 猜忌, 失和
也同樣感覺得到無奈

「遺憾的事情總會發生」
我不得不「讚」自己說得精警.......

晞嚧, 無奈.....

>>January 9, 2004 at 1:09:36 AM GMT+8

2004 年 1 月 7 日 星期三 【晴】

點解D 填詞人可以填到咁好ge 詞......

< 我只在乎你 > (節錄)

任時光匆匆流去
我只在乎你
心甘情願感染你的氣息

人生幾何能夠得到知己

失去生命的力量也不可惜

所以我求求你
別讓我離開你
除了你我不能感到一絲絲情意

－－－－－－－－－－－－－－－
對我來說，我不會看這首為一情歌
它有特別的意義

「人生幾何能夠得到知己」
講得好
我慶幸我這麼一個差勁的人也能擁有一班對我好好的朋友
但我自己又唔知可以為他們做些什麼
佢地自己唔開心時，我唔知要同佢地講什麼野才對．．．．．．
有時候會覺得自己好冇用

我真係唔知點講好

－－－－－－－－－－
宜家我好鍾意呢首歌 !

>>January 11, 2004 at 3:17:06 AM GMT+8

2003 年 12 月 24 日 星期三 【晴】

平安夜的早上和下午
出左去大坳門那邊探路同行山ar !
大坳門的情況唔多講
旅行那天一定會好正ga~!

下午食左少少野就行山啦
由大坳門行去龍蝦灣
我自己儲錢買的行山鞋也能有個「測試」的機會~
一開始就要行梯級，我也嚇了一下，沒想到一下子就要行梯級gama
以前D 路都係斜路開先
由於都幾猛太陽下，所以行行下都有人覺得不適
Miss 隻腳早前傷左，痛
阿坤第一次正式行山，難免覺得辛苦，中途都差點不行呢，不過大家一起幫佢潑涼呢，所以一會兒就冇事lu , 感謝主 ! 這令我想起第一第二次行青山的經歷，第一次都類似咁ge 情況，仲要完全冇風 ( 今次都有涼涼的海風 ~ ) ，結果要全體撤退ar, 第二次上到綠屋仔，都有人覺得好唔舒服，仲記得溫曾說自己有快要中暑的感覺呢。我唔會忘記行青山的經歷ga, 06 宣佈成立前第一二次行, 中四的十月一日同大S 跟一個阿伯由良田坳上青山，同埋大考後同本, Kpo, Ricky 黃昏上黑夜落的經歷 !
講返正題。上百幾米之後，到了差不多山頂的位置，風更爽，又見白花甚美 ! 阿坤都話辛苦行上山係「抵」ga ! 到左山頂，我地係咁影相，包括D 「危險位置」!~ 風更是清勁，完美的天然冷氣 ! 神的創造全然偉大奇妙 !
之後繼續行，觀奇石賞海景，有個海灣D 水好美，好似馬爾代夫咁ga ! 第日一定要剷林落去 ! 仲有D 石景好得意，有個大石頭三角形ga ( 應該係Granite + Block Disintegration ~ ) 不過話爬唔上去呢，倒是發現個「石室」，阿本發現左 d 不明金屬物品，覺得可能之前有 i i ! ( 其實上山時候溫都發現左個形跡可疑的人，我都見到佢著啡色衫，跟住縮左去一邊啦，可能有 ii 都唔出奇 ! )
落山後去左一個石灘ar ! 我地鬥擲石頭呢，發洩下壓力都好ga ~!
係擲石頭時發現，石頭看來堅硬，但其實好易碎ga......好多時人都係
我同阿本爬D Cliff, 發現左有兩男一女，染左髮，唔似行山人士，由於其他人好似唔多覺，我地D 財物有放埋一邊，加上我地有女仔，安全起見，認為回程好D, 所以急忙落番崖叫佢地走人ar
回程我覺得好驚險囉，見到有D 人驚私家車來，車上D 人都唔似普通遊人，我覺得好似黑社會做軍火交易 ! Joey 話我多疑，但我真係覺得好似 ! 一路上好有「無間道」feel ! ~_~"
後來落左一個所謂的「古代石刻」，塊保護ge 玻璃朦曬 ! 甚麼都看不到。側面望過去，覺得似天然weathering 多D lor !
回程影左D 相 ~ 到了鑽石山，去左蕉葉咖喱屋食飯呢。d野唔錯，傾計傾得好開心~
回程時不斷談會考

－－－－－－－－－－－－－－－－－－－－－－－－－－－－－－－－－－－－－－

其實自己話「唔好再談成績」，但一方面又想人講下自己喎。真係好矛盾ga, 一方面唔想人覺得自己只懂讀書，對「高材生」這個詞語反感，另一方面，也希望人地讚下自己，或者叫Miss 俾評語自己。有時總想講返自己那次比賽的經歷同戰績。有時候，不知不覺都會變得驕傲，看不起其他人。當然我唔會忘記背後有上帝幫我，但我係驕傲左，覺得自己一定得，仲走去「教人地」，檢討一下，真係覺得自己好白痴好自我。
或許真係好難避免講呢D 野，我都唔知點解釋好。
人生真係好矛盾

－－－－－－－－－－－

講返今日同行者
有阿本 , Kpo, 溫, 曾, Miss, Joey, 坤, 自己

>>March 13, 2004 at 12:27:11 AM GMT+8