2003 年 4 月 17 日 星期四 【晴】

今日有兩個驚喜。
第一個係中史讀書報告，分數竟然比想像中高，雖然都只係比平均數高少少，不過都幾開心架喇~!
第二個係R.P. test竟然拿到幾高gei分數，呢個真係估唔到，初時仲驚唔合格(可以check番我之前gei日記架)，答gei時候都係吹水gei多，不過反而仲高過背熟哂筆記果位，證明我d吹水功夫都有d進步，有番兩位賢弟gei幾成功力喇~~ ^ ^

今日亦都係假後第一次見到 Kenix 同楊希。
Kenix 又破左佢中史遲到gei記錄，竟然o係第二堂搭正先至返到~ @.@ 佢可能都覺得唔好意思，所以見到我時都即刻o係度笑(不過又笑得幾cute~~ ^ ^ )。哈哈，唔駛嘟嘴喇，高你 5 分就係高 5 分~~ ^0^
楊同學換左個新髮型(張萍都係)，都唔錯。今日係我第一次見佢戴口罩，又係好似第一次見佢有化妝(不過之前都好似有搽d眼影...)，亦都係同佢講野講得最長時間gei一日(因為荀子大家都早到左)。哈，其實你o係會議室指住本論文期刊問我野gei時候，我係聽唔到你問我d乜架(因為你把聲實在太溫柔喇...)，好彩艾域o岩o岩講開第二d野，令我可以混過去... ^ ^"

另外，我覺得我講普通話講得自然左(無論係對楊希定係曹師兄)，可能係開始習慣，放膽左。
今日荀子o係天台度上，幾特別，感覺都唔錯，只係稍嫌開始時曬左d，同埋後尾太大風...



>>April 17, 2003 at 11:10:51 PM GMT+8

2003 年 4 月 16 日 星期三 【晴】

今日覺得自己靚仔左，成日都好有自信，因為由朝到晚都戴住個口罩，遮住左半塊面~~! ^ ^
(雖然有人話我最好去戴埋眼罩 / 黑超，會仲順眼d... @.@" )

有人興致勃勃咁同我講佢同男友睇咸片gei情況：
o係最精彩gei鏡頭出現時，女方正睇得興高采烈，而男方竟然訓著覺......女的大呼冇癮...
(咁都得？)

我都奇怪ga la，仲點會有人會似阿七ar~? 不過都係俾佢個頭呃左...

今晚係我第一次見到新莊著哂suit，熊貓、阿虹、小米、阿芬個個都好靚女哩~~ ^ ^
我仲覺得yoyo好似瘦左靚左d，假期減肥？ @.@
唔使講，1.86m著起套suit緊係型爆啦~~



>>April 16, 2003 at 12:22:33 AM GMT+8

2003 年 4 月 14 日 星期一 【晴】

今日復課。
一朝早8：30返去上當代大課，阿子平兄一開口竟然就話跟隨學校政策，大課會改做自修同網上學習，大家可以走人喇……
呢個時候，遲到gei Ivy同Peter o岩o岩入o黎…… @.@"

小john子，小心呀，你o個區係重災區o黎架…
阿Yan好似冇乜事la wor……幾好~

是日精選：
(一)劉老師的email：
CHI3950、CHI3750 同學
1. 希望你們 不會介意坐地板坐樓梯上課，我找到一個非典型 / 開放式的教室，XXX(地點)，空氣流通，只是沒有任何設備；
2.負責報告的同學：請把印刷文獻預備好些。另請每人帶備一些物品(膠布、書包之類)當臨時坐墊；
3. 恐妨找不到課室的同學，請在上課之前五分鐘，到XXX(另一地點)集合。
四月十七日，星期四，導修課上見。
祝好
劉楚華 14/4/03
( 又及：這是個好地方，請不要太過對外張揚…以免鵲巢鳩佔 )

真係好型！中文系仲有邊個老師會send d 咁gei email？
(對唔住，少璋兄唔係中文系gei老師~)

(二)以下是一段真人真事(簡錄自"阿蛋"鄭丹瑞在經濟日報的專欄內容)：

小女孩跟父母與叔叔去郊外野餐，她在草地發現一隻蝸牛，便歡天喜地的捉住叔叔問那是什麼。小女孩興致勃勃的聽完叔叔講解後，問了一個令叔叔震驚的問題：「我可不可以踩死牠？」
叔叔想了想，覺得這可能只是小孩頑皮不懂事，便耐心解釋給小女孩聽：「因為這樣會令小蝸牛的爸媽很傷心。你想想，如果你一個人迷路了，還要被壞人欺負，多可憐？」叔叔以為他已說服了小女孩，豈料他一轉身，小女孩就一腳把蝸牛踩扁了！
叔叔大驚，馬上問明原因，小女孩的答案是：「無所謂啦，或者牠的爸爸媽媽已死了，不會掛念牠的。」叔叔呆在當場，啞口無言。
叔叔連忙告知小女孩的父母，他們的反應是：「哎呀，你真頑皮。」

大家睇完有乜感受？
我就覺得好心寒……



>>April 14, 2003 at 11:20:41 PM GMT+8

2003 年 4 月 12 日 星期六 【晴】

天意弄人！
話說小弟在newsgroup聽聞鄺老師下個sem開科武俠小說，立即雀躍萬分，打算誓死報讀，則yr3不枉矣！點知...小john子一言驚醒夢中人，令小弟驚覺該科課程編號為3940，即是與小弟上個sem所修之流行歌詞一樣！Oh My God~!!!
驚聞噩耗，實在傷心欲絕...
可怒呀！(普通話)
為何要是3940？
~~~~~~~~~~~~~~~~~~~~~~~~~~~~~~~~~~~~
美軍成功攻下巴格達後，立即就露出真面目了。
生化武器？在那裡？
重建工作為何一定要由聯軍來做，而不是聯合國？
為何解放後的巴格達比未解放時更糟？
連「自由就是凌亂」這樣的說話都講得出口！
~~~~~~~~~~~~~~~~~~~~~~~~~~~~~~~~~~~~
你真係唔發覺自己有咬指甲gei習慣？唔會掛？ =.="

峰迴路轉，躲躲豬Carmen又俾ust收左，恭喜哂！ ^ ^



>>April 13, 2003 at 12:48:03 PM GMT+8

2003 年 4 月 10 日 星期四 【晴】

昨夜二弟遠從上海致電返來，話佢已有漫遊，聯絡更方便咁話。
可惜當時我正在吃飯，又睇緊電視，阿媽又突然發哂脾氣 ( 佢話昭仁公主係毒婦，好賤格咁話......喂，睇戲之嘛...)，場面勁混亂，搞到我竟然唔係好聽到肥平講乜！真係心有愧，抱歉抱歉...

從三弟果度得知 Carmen (唔係熊貓女女呀) 報 Master 衰左，剩番 HKU Edu，好傷心，喊哂口咁，我聽到都有d難過...
話時話，我都有年幾 (只唔只呢?) 冇見佢喇，希望佢冇乜事啦......

小燕子突然問我要手提number，話有好重要gei事咁話，我 icq 問佢又唔講，原來竟然係...... ^ ^

是日金句 (都好耐冇出喇...)：

問：點解突然間 post 郁達夫 gei 詩？
三弟：型！

PS：o係呢一刻，相信受感染人數已經破千喇... >"<

To Yan ：愛自己多一點~!

" 我是什麼 在十個當中只得一個
葡萄園裡 響起水仙子的讚歌
我是什麼 是萬世沙礫當中一顆
石頭大這麼多 我也會喜歡這個我... "


>>April 11, 2003 at 1:00:05 AM GMT+8

2003 年 4 月 8 日 星期二 【陰】

今日冇乜好寫，求其寫兩句。

小燕子icq黎話唔開心，我安慰左佢幾句 (雖然o係呢方面我好差...)，希望佢舒服d啦~
肥平終於又寫番日記 (可能係我催得多...)，知道佢平安，放心左d~
冇辦法，肥平你太忙，我最多係可以咁幫架ja...

又發現一個朋友唔開心 (呢個仲大煲d...)，只好盡量開解佢啦 (點解又係一d我唔擅長gei野?)，過去左gei就無謂傷心喇，呢d野冇所謂對錯，夾唔夾亦要真正相處好一段時間先知，所以，如果無法挽救的話，就隨緣啦...
最重要係可以及時振作，你點知之後會唔會有更好？
要對自己有d信心，你絕對唔係"唔適合"架~~! ^,,^

"從前是天真不冷靜 愛自由 或會忘形
明白是得失總有定 去或留 輕鬆對應..."



>>April 9, 2003 at 12:24:39 AM GMT+8

2003 年 4 月 6 日 星期日 【晴】

隔左幾日都冇寫，因為放假實在冇乜好寫...
不過係咁二都寫下啦，費事之後冇人睇...

尋晚終於都睇左「異度空間」，好精彩，男女主角都演得極出色。
哥哥不愧係香港少數能夠準確演繹複雜心理戲gei演員，演繹得逼真、細膩，不過可能真的太投入了...
林嘉欣都好厲害，以新入行黎計，的確係超水準，一d細微gei地方都演的好好。
不過覺得套戲最尾gei水準有d回落，果隻著住校服gei野做得太實在喇，同個主題有d唔夾...
睇番哥哥自殺前被懷疑係抑鬱gei一d跡象，好似手震、失眠、食鎮定劑等，令我有一個奇怪gei感覺，覺得未必係好似一般人所講gei係哥哥抽離唔到角色，反而可能係因為佢原本已經係有d神經衰弱，所以演得特別逼真... 唉...

依家睇緊哥哥演員會，真係正，呢d咁gei舞台功架仲可以o係香港邊個歌手身上搵到？
話時話，我覺得今次d懷念節目亞視安排得比無線好好多。

PS：
放假咁耐，乜都未做過，又未出過街... 算，當提前o抖暑，充電...
非典型已破八百，第二個高峰期又到...
夠哂喇，求神拜佛停下啦，唔好咁快過千呀~~~! =.="
知道阿虹棟樓有人中招，希望佢身體健健康康，唔會中招啦~!
近排阿虹同小熊貓都開始寫日記，越來越熱鬧喇~~! ^ ^
二弟肥平去左上海公幹已經半個月，近幾日又音訊全無，唔知點呢？(好忙？)





>>April 7, 2003 at 4:36:58 PM GMT+8

2003 年 4 月 2 日 星期三 【陰】

今天原打算寫小說，不過因為心情依然沉重，整天竟然只寫了不足五百字...
整天聽著他的歌，越覺可惜...
有時投入了去唱，會唱到兩眼泛濕...
我、為妳鍾情、今生今世、小明星、當年情、風再起時、有誰共鳴、儂本多情、這些年來、追、路過蜻蜓、春夏秋冬、誰令你心痴、倩女幽魂、夜半歌聲、只怕不再遇上...
繞樑不去，一聽再聽...

抬頭望星空一片靜
我獨行 夜雨漸停
無言是此刻的冷靜
笑問誰 肝膽照應
風急風也清 告知變幻是無定
未明是我苦笑卻未停
不信命 只信雙手去苦拼
矛盾是無力去暫停
可會知 我心裡困倦滿腔
夜闌靜 問有誰共鳴...

這是否你當時的心情...？

沒甚麼可給你，但求憑這闕歌，謝謝你風雨內，都不退願陪伴我...
永遠懷念你...


PS：
查小欣說張國榮之前退出樂壇，內幕竟然是被惡勢力威嚇而逼不得已，不但揚言要求他封咪，更要他低調地遷往加拿大！不知是真是假？
有說哥哥墮樓時撞到地上的花槽，令他的血中浮著幾片鮮紅的花瓣，十分淒美...
雖然人已逝，但我寧願希望這次完全是出於他自己的決定...那麼，他也可安息...
我會記得...這個愚人節......



>>April 3, 2003 at 12:34:22 AM GMT+8

2003 年 4 月 1 日 星期二 【陰】

今日係愚人節，不過完全冇心情，因為覺得我地o係度俾d肺炎玩緊...

香港感染個案已經近700，我住緊gei梨木樹都證實左有一宗，而且好有可能香港會o係不久之內被定為疫埠...(呢次係愚人節玩野，預左，但一兩個星期後呢？如果仲係每日有幾十人中招，定為疫埠只係時間問題...)
(超市擠提！好似打仗咁...犀利...)

不過，到宜家仍然有人出街唔戴口罩(我阿媽話果個人o係lift度俾人勁啤，我阿媽即刻勸佢戴口罩)、去完廁所唔洗手，亦有朋友們覺得情況唔算嚴重，冇咁易會中招咁話...
唔知佢地究竟當依家香港果600幾人、淘大果200幾300人、一日就多左出黎果80幾人係乜野？果d人可能就係最初有d咁gei態度，所以搞到依家咁。
人命係好脆弱架ja！
唔係話樂觀唔好，但係如果到今時今日都認為問題不大而唔知驚，或者認為自己好壯而出街唔戴口罩，咁我就覺得佢地真係輕視左今次事件gei嚴重性lor！
我當然驚自己有事，不過我更加驚自己中左招而唔知或冇事，反而惹到身邊gei家人朋友都出哂事！咁我就真係會好唔安樂... 所以我會做足哂安全措施，自己就算唔驚，都唔想有機會累到其他人。
可能香港人有時真係緊張過頭，但識得緊張點都好過唔知驚，起碼安全d，話哂都係人命黎家嘛... 希望我gei朋友們同果d唔戴口罩gei人都有呢d危機意識啦，因為今次真係唔係講玩架，千祈唔好輕視！
(以上言論全部對事不對人，如有得罪，請勿見怪。)

是日警句(警告個警！)：
引用熊貓女女gei icq info ---

請各界朋友仔注意﹕
這次肺炎事件實為驚駭，不容忽視。
請朋友仔們小心身體，出入戴口罩，保持個人清潔。
願災難遠離我們﹗﹗﹗

PS：驚聞哥哥張國榮逝世惡耗，簡直不能置信，不知因何如此？深感婉惜。
(嗚~~ 哥哥係我自細就鍾意gei歌星黎架... >.<" )

任舊日路上風聲取笑我
任舊日萬念俱灰也經過
我最愛的歌最後總算唱過
無用再爭取更多
風再起時 默默地這心不再計較與奔馳
我縱要依依帶淚歸去也願意
珍貴歲月裡 尋覓我心中的詩
風再起時 寂靜夜深中想到你對我支持
再聽見歡呼裡在泣訴我謝意
雖已告別了 仍是有一絲暖意... (風再起時)

永遠懷念一代巨星張國榮 --- 即使是一剎那的光輝也等於永恆...

>>April 2, 2003 at 12:57:26 AM GMT+8

2003 年 3 月 31 日 星期一 【陰】

肺炎病毒隨風長，惶惶不可終日。縱然忽而有假，猶難竊喜心安。
鄰區荃灣、葵芳，已有染病數人，今朝驚聞，敝村梨木樹，亦傳有受害者云...
真嚇煞人也！
區區只好足不出戶，在家休養生息。
街坊相顧竟無言，有口難話淒涼，蓋因此病太毒，老少同一死，何似在人間！
何由竟至此等境地？是無能，延誤禍更深！
惟願諸君與我俱長久，安康度日晨。

>>March 31, 2003 at 12:14:59 PM GMT+8