2004 年 5 月 10 日 星期一 【晴】

今日返左BU交paper兼拿論文，可惜論文是未有分的。
幾次返去BU都撞到Judy，今日仲撞到兩次，Judy開玩笑話：「我肯定你係跟蹤我gei~」 ^ ^"

之後同阿平老闆去左拉麵橫町，今次去時已過了lunch時間，冇乜人，可以隨便揀位。我地揀左去有個靚靚侍應姐姐gei「福福」(九州風味)度食，揀左廚房前的一列「吧台位」坐，感覺上好有日本街頭風味，好free。
肥平點左侍應姐姐gei推介----招牌「福福拉麵」，配料有溏心蛋、日式叉燒、紫菜等。因為我唔食半生熟蛋，所以點了個「叉燒拉麵」，配料有......叉燒。但又好食bor~
先試試個九州豬骨湯底，um......掂！第一個感覺係唔會太鹹，比上次「山頭火」的淡少少，而且飲完唔會頸渴，o岩我！不過湯面上有一層油，女仔可能比較驚肥，層油係用來替碗麵保溫gei，我食完碗麵個湯仲係熱的(肥平那碗因為有紫菜索左d油，碗麵比較快冷)！「福福」的日式叉燒又與「山頭火」的不同，係細細塊圓形gei，切得很薄，可以吸哂湯底gei味道，入口軟滑而不失o趙頭，但若你是喜歡大塊肉的人，「山頭火」的日式叉燒會適合你多d。

之後我地又去左阿神介紹、好有私竇feel gei 「Cafe Corridor」。找到不起眼的門口，經過窄窄長長掛滿相的 Corridor，終於入到去。

地方細細，可以容納 20人度，裝修幾別緻，Bar檯旁邊放左d杯、 CD同小飾物，另一邊牆則放o左d書俾人睇。肥平點左個cake set，一件 Double blueberry cheesecake 加一杯Corridor Monster，我則點了個 Latte。個cake ok，上軟下實，脆餅做底，芝味不濃，o岩我。Corridor Monster係espresso加奶泡，細細杯，同 Latte 一樣o係泡面都有拉花圖案，我的 Latte 係一棵樹，Corridor Monster 則是招牌笑臉。Latte 奶味較重，咖啡味清淡，o岩女仔多d，我下次還是試試Corridor Monster好了。
我地吹水吹到4點多才離去，好relax的一個下午！

>>May 12, 2004 at 10:34:49 AM GMT+8

2004 年 5 月 5 日 星期三 【微雨】

《標殺令3》

KILL BILL！KILL BILL！KILL BILL！KILL BILL！KILL BILL！KILL BILL！KILL BILL！KILL BILL！KILL BILL！KILL BILL！KILL BILL！KILL BILL！KILL BILL！KILL BILL！KILL BILL！KILL BILL！KILL BILL！

5 月 4 日晚上11：00至 5 月 5 日清早5：30，我與豬 Bill 來了一場血淋淋的決戰......

血淋淋的是我。

血淋淋的我一邊決戰，一邊抽空欣賞夜色......

1：45 am，天朗氣清，一輪皓月皎皎。
2：05 am，薄雲虛掩，掩不住朗朗華光。
2：50 am，天生異象，月全蝕。
3：35 am，月全蝕繼續。
5：20 am，月全蝕繼續，月光繼續被烏雲所蝕......
5：35 am，ZZzzzzzZZZzzzzzzzzZzZZZZzzzz......

>>May 6, 2004 at 11:09:49 AM GMT+8

2004 年 4 月 30 日 星期五 【晴】

LAST DAY。
最後一日，卻是最忙的一天。昨夜改作文改至2時多，今朝勁眼訓，成日都冇精神。

第一堂就同1C默書，班細路都真係幾離譜，有成半人拿零雞蛋！不過好彩都仍然有人100分......
之後上2C堂，講完文後剩返少少時間，大家就映下相咁。我原本帶左部DC返來，但竟然唔記得帶去課室，結果只有佢地映而冇我映...
收到一張卡&一筒糖，佢地都幾厚道下，入面都係一d鼓勵性同唔捨得gei說話，連一向頗多不滿的Cher都肯寫d好野，算係咁啦！睇左都幾開心gei~！
臨走時又係例牌「一輪嘴」問你拿icq，吸收左阿神的經驗，我冇俾佢地，但就專登開左一個留言板俾佢地上去可以傾下偈。不過唔知係未個板有問題，暫時都係看的人多、留言的人少，亦有同學話留唔到言。唔知大家知唔知邊度有d又免費又穩定的留言板可以申請呢？
另外又有同學叫我快d去申請MSN，我而家申請左喇，感覺都唔錯，如果大家有玩開MSN的話都可以add我架：[email protected]

之後Lunch同細之、琛、曾Sir、Miss Chan等去了荃灣稻草人度食兼順便買西餅，因為下晝係週會，唔急，所以今餐食到完全超時，成2：30先返到去！哈哈，勁free！
放學又係派餅時間(搞到有學生搵我映相都搵唔到添，真可惜...)，6打餅都唔多夠分，派到最後幾件時都真係幾尷尬......

返左成日學，都真係幾累下，但夜晚仲要趕畢業同學歡送會。其實只在見返一d好耐冇見的同學，大家都冇乜大改變，我同小john子傾左一陣偈後就一齊走了。

又要開始趕paper了...... 但我到而家都唔知「行動研究」係點做......
地獄，已出現在我的面前......
ps. 多謝Carew的影印。

>>May 2, 2004 at 12:19:45 PM GMT+8

2004 年 4 月 26 日 星期一 【晴】

今日放假。

5 May - Psycho.
8 May - Teaching Principles
12 May - Curriculum Studies
15 May - Classroom Comm.

唉......
仲有梁燕冰份4302，唔知張野去左邊，都唔知要幾時交......
有邊個可話我知？
希望唔好係5 May之前......

>>April 26, 2004 at 7:07:31 PM GMT+8

2004 年 4 月 25 日 星期日 【晴】

"Life is like a dream" 聽後感：

論作曲，少數的歌曲質素還不及他多年前的「這個冬天不太冷」，例如「勇敢的故事」，曲詞都可算是垃圾。
雖然可以聽出學友欲作多方面的嘗試，但涉及的音樂類型雖多，但依然是大路得熟口熟面。
不知是否因為學友的曲如流水行雲，連綿不絕，死唔斷氣，做成了填詞上的困難，多數歌曲的詞都填得不好，即使是出自林夕、黃偉文等大家之手。
平均來說最高質素的應是與歐丁玉等合作創作的「寧願做錯」，但學友的演繹又略嫌過份用力，太激。
另外，「給朋友」與「搖瑤」都甚為討好，「她」的音樂頗有異國風情，「讓妳知」與「慢條斯理」都ok，但不突出。
總而言之，這隻碟之所以值得買，是因為它的紀念性，而非質素。
不過話說回來，若只留意音樂，有幾首也作得蠻不錯的。

>>April 26, 2004 at 7:10:15 PM GMT+8

2004 年 4 月 23 日 星期五 【晴】

助理校長「石仔」又有新搞作！唔知係未之前同我同阿神傾完計後被撩起對可風學生的不滿，這天朝早集會又宣佈話下星期開始搞一個「自律雙週」，名義為要求學生自律，實為打擊不守紀律的學生。任何老師可以在任何時候記下不守紀律者的姓名，若該學生不加改正，可以記第二次、第三次......一天內可被記廿幾三十次名都得。記一次名的，即出家長信；記兩次，留堂；記三次便扣操行分，所以一個不守紀律的學生，一天隨時可被扣七、八分甚至十幾廿分！
真係好激...... =.="

>>April 25, 2004 at 3:57:10 PM GMT+8

2004 年 4 月 22 日 星期四 【晴】

今日圖書館的Miss沒返，圖書館關門，不准學生進入。我們一班TP變成「無王管」，好free！

劉sir今天呈亢奮狀態，一直大發偉論，題目由「假如我中了三千萬橫財」開始，他說：「一定先買一輛勞斯萊斯。」之後我們說買了一架勞斯萊斯後，三千萬已所剩無幾。之後，劉sir的三千萬橫財夢發展成三億橫財夢，一會之後又再變成三十億橫財夢，然後，是三十億英鎊橫財夢......

今日阿神來可風探班~! ^0^

是日金句：
劉sir：「若果我有三十億，幾歹都包個明星仔玩下！」 =.=

ps：各位2+2的同學，你們拍了 video 未呢？

>>April 22, 2004 at 10:53:05 PM GMT+8

2004 年 4 月 21 日 星期三 【晴】

昨天第一次拿簿回家改，屋企人好似睇到牛在彈琴一樣，鬼哂咁嘈：「嘩！改簿呀！」
車！少見多怪！

現時兩班的情況：
2C，大致順利，沒甚風浪。
1C，場面不受控制！

神火葉三：
那不是明天嗎？好，沒問題！12：10 放 lunch，你可以在12：00 左右上圖書館找我。
或許還能見到逸之，一起吃飯呢。
你還可能見到你的林同學和胡同學，她們間中會回來代課呢。

>>April 21, 2004 at 4:52:32 PM GMT+8

2004 年 4 月 19 日 星期一 【炎熱】

今日 Mr.Hui 來睇堂。
許sir 比馬教授嚴謹一些，給分沒那麼鬆手，好的評語也不多。之前問過阿七，佢拿全部「剔」。我比他好一些，沒那麼悶，比他多兩個「有待改進」...... =.=
不過，整體的總分卻比 UA 來看時還要高半分呢。

>>April 20, 2004 at 5:14:15 PM GMT+8

2004 年 4 月 18 日 星期日 【晴】

尋日收到楊希的email，好開心！我地好耐冇聯絡喇！

各位，有冇人有興趣同埋小弟去睇《受難曲》呢？
有興趣找我吧。免費的，我有換票證。

John：我沒正式玩過 "炎龍"，但應該頗不錯。

>>April 18, 2004 at 10:51:59 PM GMT+8