2006 年 12 月 6 日 星期三 【晴】

今日終於放早, 返到屋企, 老豆見我係咁咳,
睇唔過眼帶左我去急症室睇, 探熱先知真係一直發緊燒.
醫生見我咳得太勁, 要我照照個肺,
照完之後等左好耐, 我都預感倒一定有事,
之後, 醫生叫名, 去到醫生度, 一睇張X 光片, 右邊肺下部分花哂,
醫生話我肺炎, 佢話嚴重d要留醫,
短期內都唔可以返工, 要食哂d藥, 如果中間情況嚴重要即刻黎睇, 又要覆診,
咁我唸, 我辭得職啦.
今日本來同FCB d死黨,Melody, Amy, Karance去太古城UCC食飯, 應該係好好好開心既一件事,
但一直係咁咳,完全講唔倒野, 都係慘.
本來今個星期六雞哥結婚,要去飲, 宜家都唔使飲啦, 人情又5舊, 食又冇得食, 慘慘慘!
宜家唸返, 老爺真係好好好好呀!
以前我, Debby , 亞基一有d病佢自己會趕你返屋企休息, 病好先返黎,
宜定依間,睇倒我得返半條人命, 零晨一兩點都仲有新野要係即刻趕比佢,
老爺, 如果你仲係我個CD就好lu~~
問心一句:返工返到個身體咁, 真係唔知為乜?

>>December 6, 2006 at 6:57:33 PM GMT+8

2006 年 12 月 4 日 星期一 【乍雨乍晴】

今日晏晝, 基督徒廣告人會聚會, 練歌,...咳都傻, 我都冇乜唱,
完左之後, 一位弟兄私下同我講我既流言,
真係有d唔開心, 或許佢已經誤會左我,
不過我都唔唸得咁多, 我病到就黎死啦.
用左10分鐘時間去睇中醫,
佢寫我發燒, 感冒,...
飲左藥好左一陣間, 之後又係咁咳,
個頭越黎越熱, 仲越黎越頭痛,越黎越咳.
又要OT到兩點先早, 一早又返十點. 頭先仲有d想暈,
「人縱然賺得了全世界,卻喪失了自己,或賠上自己, 為他有什益處呢? 」
我放棄好唔好呢??

>>December 5, 2006 at 7:44:57 PM GMT+8

2006 年 12 月 3 日 星期日 【颳風】

天呀, 如果你想收回我既生命, 你唔好節磨我啦.
我咳到就黎肺都甩埋啦.
本來唸住人工有13.5K都唔錯, 初初唸住J 記, 又有Nike,
in 先知係subsit,Rmg,
都算啦, 學野都好, 點知冇nike, 佢講仲要係7乘BTL,
都算啦, 學野.
點知我直覺feel 倒100% BTL , 仲要都係得個砌字.
都算啦, 我都說服自己去吸收BTL 既經驗,都冇壞.
點知日日返10點,晚晚放兩三點,
d客又仆街, 晚上9點比brief, 聽日11點要有final哂既layout, 後日要output埋.
仲要同時負責兩三個客, 個個客都一樣咁冇人性.
都算啦, 我仲要返第二日已經病左,係咁 咳,
星期五上晝拿拿林睇醫生, 睇左食左d藥, 咳多幾倍,
晚晚冇一晚唔OT到兩三點,
又冇的士錢比, 又冇晚飯錢比.
Euro 已經係地獄, 宜家我更落左十八層地獄,
Euro如果佢包我月都有15K, 又有的士錢,晚飯錢,
雖然辛苦程度都差唔倒好遠, 但宜家我比之前更加只做人隻手,
搵個錢都咁節墯,我都係想屋企人過得好d, 想還grant loan, 同搵返d基本開支0者,
廣告究竟係d乜?? 同我一直唸既咁大出入既?
廣告已死? 我都就死!

>>December 4, 2006 at 8:00:27 PM GMT+8

2006 年 11 月 22 日 星期三 【晴】

簡直係整定, 拍戲咁!! 黑到12點.
六點5等車, 等到6點9先有車, 明明6點半應該到站, 唔知點解又咁遲,
之後仲成十個交通燈都撞哂紅燈,
去到長青隨道又塞車,都已經邪啦!
去到上環轉的士去Art Centre啦, 一落的士,即刻衝入Art Centre,
搵極都搵唔倒個銀包, 即刻衢返出去, 架的士已經走左,
本來唸住睇「極品廣告片」, 冇得睇之餘連聽晚張飛都冇埋.
咁岩小知同高麗蔘個電話又冇電, 打極都唔通,
我係咁問經過d的士,d的士司機一係就話唔關佢事, 一係話冇辦法,九十幾個的士台,
唉.. 我打1083係咁問, 佢比左個商台馬路之友既電話我.我打完之後,
又係咁打去報失卡,
報完之後, 唸住等小知, 高麗蔘同佢d同學出黎, 點知又等唔倒,
我去警署報失, 報完失, 一出警署門口, 狂風暴雨行雷閃電,
好似拍戲咁, 最當黑既時候就狂風暴雨行雷閃電,
我又冇遮, 一邊搵地方避雨, 一邊打電話求救, 結果soso話放工黎搵我,
我行地灣仔地鐵站, 十年都冇比差佬逗, 偏偏我冇左身分證就比幾個男帽子問身份證,
我講我唔見左銀包, 比埋報案紙佢睇,....佢最尾仲話: 祝你好運啦!
之後, 我行去金鐘地鐵站join soso, 落左旺角食個河粉,
食食0下碗粉裡面又有隻浮屍, 真係黑到爆,
黑到12點!!
身分證, 回鄉卡, 車牌, 信用咭, 八達通, 捐血咭, 圖書證, ....乜野都要申請過,
連個十字架頸鏈都冇埋,
乜野叫見你唔死踩多你一腳, 就係依d啦,
越窮越見鬼, 問你死未?!?!

>>November 23, 2006 at 6:52:56 PM GMT+8

2006 年 11 月 21 日 星期二 【颱風】

屌, 又比說話我聽. 又話人地個仔點點點. 人地個老豆夠冇我老豆咁梅啦.
全世界得我亞媽最好, 無限支持鼓勵.
我老豆, 我搵倒錢又唔會讚, 搵唔倒錢就屌,屌,屌, 依d就係一家人.
我都0係地獄Euro做左排freelance啦, 抖一兩日都屌, 你做丫,
6年黎全屋企冇人執屋, 次次都係我掃地拖地,
6年黎d電器全部我買, 電視, 暖爐, 微波爐, 洗衣機,風筒, ...,
唔唸0下你用既d野邊個買比你地, 有d乜野就埋怨我.
只係覺得細佬最叻, 我唔係degree, High dip好差咩??
我讀書好0個陣唔見讚0下我, 我中文好過細佬好多啦.
我year 1 typo全級第一啦, F.6中化都試過全級第一啦, sport day我個人全場都拎埋啦,
全港學界辯論最佳辯論員都拎埋, ....咁耐以黎一句讚既說話, 鼓勵我既說話都冇,
得細佬同細妹係你生既, 我死既,
真係火都黎埋!!

0係地獄已經灰灰地啦, 唔單只只係做砌稿機器,
冇野唸不突只, 最pk係都唔logic,
唔講名, 廢時又比人小,
我砌個story board, 係Mabella 手機既game,
我已經用自己部手機既字黎做返咁上0下大小既字,
某某人係都要勁大d字, 我講返真正手機都係依個size,
某某人竟然話個客五十幾歲, 睇唔倒d字,
喂, 有冇腦嫁, 你都話個game 比d 女玩啦,
比個亞婆玩咩?
我唔信某某人係冇腦囉, 只不過係當份工, 討好個客就算咋嗎.
creative都有責任去講比個客聽乜野先係suitable for個target audience囉,
提一提, 個客一意孤行先算囉, 根本佢就冇盡創作人既責任,
已經唔只一件事唔logic啦!!
我freelance, 又冇野好講啦, 講都唔聽,
雖然我冇佢地十幾廿年咁有經驗, sofeware唔夠佢地熟,
但個心都好過佢地啦!
唔講咁多, 一陣又比人批判.

依個月, 都冇乜空間可以寫0下diary,
忙都嘔, 工作以外, 仲有睇好多好多show,
「極品廣告片」啦, 5場全睇,
仲有「東京字體指導協會展在香港」啦, 0係BU關於advertising既「The Best Of The Best」,
聽埋吳秋全個talk, 睇埋「龐比度」,
雖然今年我冇得去金帆, 但睇咁多show同展覽,都夠滿足啦!
除左睇show, 又忙casting 啦,
cast左兩條TVC, 一條政府片, 一條銀行, 仲拎左CINTECT production既Angela電話,
識多d人, 可能第時有野要搵佢幫手呢.
而另一間, 原來又係上次cast過0個間, film magic, 我識亞信啦.
仲有,依排又係咁踢波, 每星期總有一場,
琴日又返返側魚涌踢左場, 得知有個波友過左FCB做AS,
亦得知老爺完來去北京係做ECD, 真係勁!!
好榮幸跟過一個咁勁既人做野.
算啦, 我只不過係二打六黎0者.
丫, 仲有一件事, 星期一我做左件十年都冇做既事,
我返左屯天呀,
星期一同GIGI同Polo返左屯天, 仲同鄧sir同曹sir去建生間酒樓食飯,
十年冇返屯天, 估唔倒仲有老師記得我,
我到宜家我仲可以講「我仍然流緊屯天既血」,
留0係屯天既日子只係好短暫, 但感情係永恆,
以前既屯天, 冇冷氣, 冇電梯, 冇咁多個斑房, 冇咁多個教員室,
冇多半個籃球場, 曹sir冇咁多白頭髮, miss lam冇咁多皺紋,
楊sir冇cancer.
唉...楊sir宜家仲休養緊, 聽鄧sir講佢發現既時候已經好後期,
有好多事, 真係冇得預計, 冇得掌握,
楊sir 0係屯天教左咁多年, 天主都唔保守楊sir既?
我小學,中學,預科, 唔係天主教就基督教, 宜家,天主又唔保守我既?
點解楊sir有絕症?點解我亞媽會cancer過生?點解我老豆會埋怨我?點解我前景一遍灰暗,...?
點解主會容許依d事發生?
好多野真係搵唔倒答案. 唯一知道既係「我係我」,
離開屯天咁耐, 我依然好愛屯天, 好留戀屯天既一切,
好愛屯天既老師, 甚至宜家既師弟師妹.
亞媽過左生幾耐, 我永遠都咁愛佢, 永遠都感恩.
老豆點埋怨我, 我都咁愛我老豆.
仲有永遠既朋友, 永遠既友情.
但主愛, 老實講, 好似飄飄忽忽咁,
因為我都唸唔明點解會容許咁多唔開心既事發生, 而且係好多好多.
我亞媽係唔應該咁早過生, 楊sir係唔應該去到後期先發現, 李浩銘係唔應該咁後生有腦cancer,
考驗係能力範圍以內可以解決既事,
依d都唔係考驗,
係厄運.
點解會比依d冇得改變既厄運去發生??? 點解???

>>November 22, 2006 at 9:15:28 PM GMT+8

2006 年 10 月 30 日 星期一 【晴】

今晚, 我有個心願: 希望聖誕節會聖誕快樂!
今晚係Halloween , 唔使扮鬼,已經係一隻「死窮鬼」,
真係唔快樂,
仲有個幾月, 點樣先可以成真呢?

>>October 31, 2006 at 4:13:15 PM GMT+8

2006 年 10 月 27 日 星期五 【晴】

今日去Paul Yu既婚禮, 真係全場都比佢lum到溶左啦^^
認識亞Paul既日子唔耐,
仲記得0係未join基督徒廣告人會之前,原來我同佢已經唱過一次K,
之後, 識倒佢, 佢仲講:「主所造既世界真係細啦!!」
亞Paul比我既感覺係一個好真誠, 好關心人同一個好有責任感既人」
我記得有次聚會, 佢分享返岩岩返新公司, d野要跟得好足, 唔想d野甩甩漏漏,
從佢身上真係學倒好多野.
今日婚禮, 睇倒亞Paul真係好愛好愛佢太太,Vivian,
主禮牧師講佢地兩個完成冇一樣相同, 係要互相磨合, 包容, 去愛對方所有,
愛唔係單愛對方個人, 要愛對方愛既野, 尊重對方尊重既野,
包括佢既家人朋友,工作,理想,一切,
好岩一樣野,兩個人一齊之後, 發覺好多野唔似, 唔同, 唔夾,
相唔相似, 夾唔夾, 係睇你有幾重視依段關係, 有幾珍惜依段感情,
會唔會去磨合, 去改變兩者既不同.
今日個婚禮, 見證住佢地兩位, 0係佢地讀出承諾既時候, 我真係感動到有少少眼濕濕,
亞Paul真係又幽默又浪漫, :「..要多謝一個好重要既人. Vivian」~~哈哈哈哈.....
最後亞Paul對Vivian唱0個首詩歌,又溫柔又深情,
首詩歌完完全全講盡亞Paul既心聲,
全場都lum到溶哂,
就好似燒綿花糖咁, 好甜, 好暖, 溶化左既綿花糖!
好掂呀, 亞Paul!
今日, 仲撞倒我細佬之前part time既同事, 原來佢係亞Paul d教友,
哈哈~主所造既世界真係細啦!!
今日係我兩個幾3個月來第一次祈禱,
雖然一向都對主失失地望, 但能夠比倒其他人祝福, 都唔緊要啦.
前兩日, 有d傳教既人上黎傳教,
見倒我個十字架, 又同我睇聖經, ....
我成大半年冇打開過啦.
計埋今日, 連續3日唔多唔少都係接觸倒信仰,
即係想點?
星期一,二, 幫Euro做freelance, went to hell, 真係Hell 黎,
做到早上6點半先走, (之前有次有係咁, 其餘都一定兩點幾先走,)
搵相又要搵得多, 但可以搵既相用既相又少,
個storyboad每一格都有人, 有d有成4,5個人, 每個人都要大做手術,
眼, 耳, 頭, 頸, 手, 腳, 博頭, 身, 全部唔屬同一個人, 砌成一個人,
有d一格有4,5個要砌, 仲要砌景, 其他objects,
16格storyboard, 聽落簡單, 做到PK,
同埋一去到, idea,concept有哂, 只係砌, 做人地隻手,
其實唔使多丫, 有少少idea可以參與0下都好啦,
唉....長工, 幾時先有呀??

>>October 28, 2006 at 9:18:54 PM GMT+8

2006 年 10 月 21 日 星期六 【晴】

唔經唔覺,..7年, 今日係我亞媽離開既日子,
....
加上依排真係太多問題.
就連電腦都壞埋, 個Hard Disk, Display Card, CD rewriter, 電腦板既電溶, Floppy, 通通壞哂,
Window裡system32既一個程式損毀左,Window都去唔倒,
係今日細佬返黎先可以上一 上網, 今晚佢返科大, 又唔知幾時先上倒,
最慘係我電腦裡面所有野都冇哂,
d design 功課, 做野既portfolio, d作品, 所有既相, video, 所有回憶, 一次過冇哂,
究竟點解會黑到咁?!
如果我有一日失左憶, 就連比我回憶既相都冇, 咁可以點呢?
還掂都差唔多乜都冇, 不如比我失埋憶,
所有野重新黎過啦!
琴日, 按133打比至柔,...得知佢都有自己既生活, 算啦.
人地幾年, 我地幾個月, 有d野係只有回憶.
既然人地離離合合最後都係同同一個人, 那裡會有我.我又算得係乜丫 ,
不如祝佢幸福啦!
無論生活上, 心靈上都,係騰空既, 真係冇乜意義.
其實, 如果比我去陪我亞媽都好丫, 反正我真係真係好掛住佢.
最遺憾0係0係我亞媽0係度既時候, 我都仲未講過一句"我愛妳",
其實..生活, 一d都唔可貴,
做其實真係好難好難!!
捱, 慳, 一日食一餐, 一日過一日,
依d就係現實,
人生, 都只不過係捱,
就好似我新部電腦, 一直都係長期病患者,
捱左4, 5年, 終於都捱唔住, 瓜左.
我部電腦, 只不過係我人生既寫照!

>>October 22, 2006 at 12:52:01 PM GMT+8

2006 年 10 月 17 日 星期二 【晴】

今早11點幾比個電話嘈醒, 原來搵我in 份freelance,
雖然唔係4A, 但冇懷丫, 任何事就算99%差, 都會有1個%屬於好.
但訓都未訓醒一大堆英文, 真係聽死人啦.
岩岩去Polo屋企睇歐聯, 巴塞對車仔,
頂, 伊度奧傷左, 細哨廢左, 巴塞輸左.
但杜奧巴0個球真係好靚,
禁區頂背住龍門右腳撥左修正, 轉身抽射右上角,差唔多網仔入網,
d位置感真係一流.
抵巴塞輸, 踢得太差啦.特別係細哨, 冇計, 人有高低潮,
GDP 條path都會有起有跌, 正如道家老莊講既「物極必反」,
球王遲早會踢返球王應有既水準,
所謂「業精於勤,荒於嬉. 行成於思,毀於隨」,
只要唔好去wet唔去玩咁多, 專心習訓操番d狀態,
一定會好快踢返出球王既風采.
細哨, add oil, 唔好令我失望.
因為我好想我隊阿仙奴會對你隊巴塞,
好想睇享利大戰細哨--世界足球先生第一第二大 對決. Wow~ 正呀^^

>>October 18, 2006 at 9:38:35 PM GMT+8

2006 年 10 月 16 日 星期一 【晴】

頭先同屯天一個師妹傾,
其實之前都聽過楊sir患左cancer,
宜家證實左.
亞肥lam(Miss Lam) 探佢話佢瘦左好多好多,
仲記得中一0個陣楊sir教我D&T,
佢仲介紹模型學會比我同我d同學,
又都我用木整架木製四驅車, 有燈有摩打; 又教我用鋼片整開瓶器, 又教我畫圖,
楊sir 雖然係訓導組, 但都唔惡既,
不過, 中一0個陣佢已經有少少白頭髮,
估唔倒宜家咁.
之前gigi 講我地中一至中三個同學李浩銘患左腦cancer,
gigi見佢0個陣, 做化療做到成個頭光埋,
記得中學0個陣佢成日學我打波d動作, 連小動作都跟我, 0個陣有少少討厭佢,
宜家大個左先懂珍惜.
唸起我媽媽.... 0係我中六0個陣就係因為依個病而離開左我地,
我...趕唔切去見佢最後一面, 去到醫院已經....
我最遺憾, 最內疚既,...依件事, 始終都放唔低
人真係好化學, 好兒戲. 今日唔知聽日事
人無常, 事更無常.
乜野都緊要唔過生命同人與人之間既關係同感情,
好想好想返屯天探返以前既老師, 好想去醫院探楊sir, 同李浩銘,
珍惜眼前人!!

>>October 17, 2006 at 7:46:08 PM GMT+8