2007 年 3 月 6 日 星期二 【颳風】

嘩~~今晚都唔知飲左幾多十柸紅酒啦!!!
幾十間Gallery, 數大堆鬼佬鬼婆, 遮住哂d畫同sculpture,
摩肩接踵咁迫先迫倒入去,
隔左一年冇去, 今晚去Art Walk 真係特別開心,
以往係學生身份, 今年就例外, 而且又食又拎,
前年一睇就知係學生, 今年我著皮褸, 髮型平實左, 點睇都唔似學生啦.
上一次就見倒有我以前亞sir 鐘大富既作品集,
今年就見倒以前亞sir 李展輝既作品,
以往香港藝術雙年展都見過李展輝sir 既作品,
真係利害!!!
點解讀書跟咁多勁既亞sir, 做野又跟過老爺...咁多勁人, 我宜家都係成pat 屎咁既???!!!~~~

>>March 7, 2007 at 6:08:01 PM GMT+8

2007 年 3 月 3 日 星期六 【晴】

...今日先發現,原來「是你的餐廳」,已經改左做「新是你的餐廳」... ...

>>March 4, 2007 at 6:05:53 PM GMT+8

2007 年 2 月 28 日 星期三 【晴】

終於上返網啦~
好耐冇寫diary lu.
依個新年都過得幾不錯. 年三十晚就做左 PK仔.
晚上十點幾0係兆禧宛街市間花檔揀花, 突然身後有人跑過, 回頭一望,
一個女仔追住個男仔, 唔知乜野事啦, 之後個女仔大叫:「捉住佢呀, 佢變態嫁」
個男仔沿湖翠路住海翠走, 都走左一段路, 我即刻幫手追啦. 一邊叫一邊追,
前面有兩班途人竟然係讓開條路比佢走, 激死,
之後佢衝過馬路, 我差唔多追倒既時候, 無啦啦就0係馬路度PK,
人又捉唔倒, 仲仆到手腳損哂, 條7百幾蚊既Levi's左邊穿左個大癃, 隻精工條錶帶又斷埋,
未新年已經仆街兼破財,唉...
之後問返個女仔發生乜事, 原來佢比人淋野, 之後我就陪佢去警署報警.
落口供都落左好耐, 好彩趕得切睇戲.

今個新年比往年少左利是, 因為上年有工返, 淨係0係 FCB 都收左成千蚊利是,
今年雖然少, 但收利是既來源多左, 都唔錯.因為拜年多左. 意義上大過上年.
仲有好多係50蚊紙tim, 連一百蚊紙都有,
雖然總收入比上年少, 拜年多, opportunity cost都多, 車費, 買盒野, 時間, 精神, 食飯錢,...
但個gain 係人與人之間既關係, 互相既祝福同喜悅,仲有顯伸出黎既invisible value 點都大過個cost 掛.

今晚7點睇「香港特首候選人答問大會」, 平心而論, 比我選我會選煲呔曾,
梁生雖然有部分係食倒曾任權, 但梁生既政綱又似乎太過口號而欠缺具體既方案,
有夢但唔知能唔能夠實踐, 好難比倒信心同說服我去選佢,
論口才, 對答反應, 梁生係勝於煲呔, 但煲呔曾最強既係佢幾十年時經驗同對政府各部門既認識,
所持既係具體既數據同理據, 玩既既招數已經唔係辯論,而係用「事實勝於雄辯」,
梁生就單單只從立法, 施政去作為解決方法.即使 係用立法去解決, 又點立法, 點執行呢?
梁生既內容似乎過於空洞, 作為普通市民, 又會唔會冒咁大既險呢?
要是長治久安, 又點可以單憑立法同政改去達到呢.
無可否認,梁生講既空氣污染問題, 教育既小班制, 普選無期, 又指出曾施政未能顧及草根佳層, 等等,
曾生都無話可說, 係好既, 提出倒一d確切既問題, 但作為市民既最想聽既唔係只提出有乜問題未解決,
而係想知用乜野方法去解決,用某某方法既具體安排,成效, 同可行性.
曾生啞口無言, 有時比人覺得盡力撐, 但回過頭來,梁生亦只提出問題, 冇講出解決方案,
最多都只不過又係講「立法」兩個字。
今場debate, 好明顯曾生勝一籌. 但唔代表曾生係最好, 只不過係比梁生好.
就正如梁生先前所提出既確切既問題, 0係曾生做特首依段期間亦從來未解決, 甚至冇正視過.
所以其實今次答問大會最大既意義唔係在於誰勝誰負, 而係在於正視問題以尋求解決既方案同政策實施。
今晚睇完依個節目,雄辯滔滔, 真係令我好懷念中六0個陣0係debate team 日以繼夜去搵料,度問題, 佈局既日子,
我啦, 樑仔, 基哥, Eric, 蔡輝, 就咁就組成一team debate team,
好感恩我有依段咁美好既歷史同經歷, 亦好感激邱sir既悉心訓練, 0個陣,晚晚12點都仲0係學校討論同練習,
餐餐都係邱sir請我地食飯, 多謝邱sir!!!

>>March 1, 2007 at 8:38:40 PM GMT+8

2007 年 2 月 4 日 星期日 【晴】

我已經搵倒一個最好既人啦. 除妳以外, 別無他選, 好感恩. 彤彤, 妳宜家相信我嗎?

>>February 5, 2007 at 4:31:39 PM GMT+8

2007 年 1 月 4 日 星期四 【颳風】

岩岩0係屯門醫院過左一個白色聖誕, 一個不一樣既聖誕^^
原來患病依段日子, 可以係咁精彩. 肺炎原來都可以有正面既意義,
0係入院前4日, 我跟隨基督徒廣告人會去唔同agency 度報佳音, 兩日都有參與,
雖然我病到真係唱唔出聲, 我大部分時間係做舉歌辭牌既工作,
但0係依個日子能夠用詩歌帶比人祝福同歡樂, 真係好享往.
仲撞返一位舊同學, Carman, 咁岩佢幫Grey做interior design.
如果唔係依個病, 返工咁忙, 都冇機會可以上去d agency 度報佳音啦.
隔一日後, 我又帶老豆同細佬出去尖咀睇燈飾,
老豆一向都唔會出去九龍行0下, 今次可以借休養依段時間帶去行0下,
而且, 好耐冇同老豆一齊合照啦, 對上都可能係我中二中三既時候,
所以... 一家人既感覺, 真係好開心. 都係因為依個病先比倒我依次既時候^^
之後, 返到屋企, 我病情就嚴重左, 條氣好促, 又發冷發熱, 又咳, 又流鼻水,...
結果未覆診就要去多次A&E, 一去到個護士見我氣促得太嚴重, 列我做urgent case,
冇幾耐就見醫生, 就照X ray, 之後就入左一間房, 比張輪椅我坐同比氧氣我吸,
之後就話要即刻留院, 推左我上去10樓.
0個晚, 3點幾, 冇覺好訓, 5點倒, 差唔多訓著, 醫生又黎睇我個病, 醫生走左,
訓左陣又護士又黎, 量血壓啦, 探熱啦. 抖左陣又另一個護士黎, 0係我左手手腕度抽血,
打到好入, 佢話要抽動脈血, 一定要打插得好入先抽倒, 又0係我手背中指對落打左支抗生素針,
佢地叫依d叫豆豆, 又係插得好入,由手背去到手腕, 以後就用佢黎吊藥.
之後, 再0係我手婉打支消炎針, 打落去0個陣, 好想嘔, 因為d藥太勁啦.
早上, 又另一個男護士黎, 著哂全套盔甲咁, 由我個鼻插條好長既管入去, 差唔多到喉嚨黎抽我鼻黏膜,
過程真係好辛苦, 但最辛苦既係等報告既心情, 因為唔係即刻知, 0係醫院依個地方, 個心好不安.
每次抽野化驗, 我都會驚唔知有乜結果, 亦冇任何野可以做倒, 只有祈禱,
依年黎, 祈禱祈得最多都係今次啦,
0係醫院依6,7 日, 真係體驗左好多好多,
聖誕節0個晚, 一個人臥病在床, 個腦就0係度遊思: 唔知二千零六年之前窗外0個粒星星有幾閃呢?
... 其實 , 能夠每日可以睡覺訓醒, 仲可以張開眼, 已經係恩典啦.
0係醫院度, 我反而覺得自己係幸運.
入院第二日, 左邊近窗既病床0個位病人, 醫生對佢講左佢既報告, 係更壞既消息, --- 骨髓瘤, 即cancer.
40歲咁後生, 醫生都話好唔好彩, 咁後生有依個病,...
之後有兩晚, 由於太多病人需要床, 我讓左張床, 訓左病房走廊既暫時床,
早上,醫生巡房講返病況同報告,我隔離張床既病人係肺水腫入院, 醫生放左佢兩人返屋企,
返黎等報告出, 初初唸住最多都係肺癆, 點知得到更壞既消息, 醫生話佢肺cancer, 仲要係惡性, 已抗散,
切都冇得切, 只可以用化療頂住, 未比報告佢太太已經擔心到就黎癲, 之後佢太太黎, 佢都冇講比佢太太知,
但冇辦法隱瞞, 第二日, 醫院已經要佢太太黎傾依件事, 之後一日, 依位病人就調左去9A5號病房.
近門口左手邊既亞叔, 細菌入心, 蝕左一塊心瓣, 宜家d細菌又無啦啦跳左去手指尾, 成隻腫左,
醫生都控制唔倒, 如果不幸跳上腦就玩完.
0係醫院, 我已經係好令人羨慕既一個, 比我不幸既人實在太多太多啦,
有時深夜, d 伯會會叫, 會呻吟, 作為病人, 我肺炎都知辛苦, 更何況佢地,
每次聽倒佢地既痛苦聲, 我冇覺得煩, 反而我心裡自言, 支持住呀, 亦不停為佢地祈禱,
住院依幾日,我好欣賞d護士, 唔係只係專業咁簡單, 少d愛心都唔得.
我住0個度係男老人病房, 全房只得我一個廿幾歲, d 伯伯成日都會0禁鐘, 有d會要佢地幫大小便,
有d仲要幫佢換尿片, 又要氹佢地打針,食藥,食飯, 抽血, 有好多仲真係會好唔好老皮對d護士,
所以, 做得護士真係唔簡單.
可能我係最後生一個病人, 我同d護士都有傾有講, 都識哂佢地d名,
不過, 最感動就係秀芬姐姐, 聖誕節當晚, 晚上11點幾, 佢見我睇住電視既宗教節目,
佢同我傾傾0下,問我係唔係christian, 我話係, 但未受洗,..
佢原來又係基督徒, 大家傾左d大家既野, 我講我都有嬲神點解會比我亞媽離開,
佢講左返好令我感覺既說話:「係媽咪過生, 你會好難過. 但其實神比係更加更加難過,
因為你媽咪都係佢個女, ... 有時, 有d野, 擺0係個心度丫, 妳亞媽一直0係妳心中, 冇離開過!」
我真係好感動, 秀芬姐姐唔單只係一個好護士, 仲係一個好媽媽, 佢有一個女一個仔,
佢聖誕節寧願放少日假都想照顧病人, 佢講我知有時佢個女都會想佢0係d節日, 假期多d陪佢地,
但佢講返比佢個女聽:「如果媽咪同妳慶祝, 咁d病人病病, 咁佢地冇媽咪照顧, 咁點算呢?」
之後, 佢個女就會「哦」, 佢先生就會加把話:「係呀, 做護士真係好偉大嫁,...」
所以, 真係好想寫返張感謝咭多謝佢地.
秀芬啦, 南南啦, Jeffrey, 朱Sir, 好cutie 既思敏啦, 幾靚靚既寶寶, 仲有靜雯, 同著藍色衫既學護,
真係多謝佢地既照顧^^
住左幾日, 仲學左d佢地既語言, 例如M.O 係解醫生, 牌板係指病歷, 思敏都話我學哂佢地D語言, 哈哈!
住醫6,7 日, 先知我有好多好關心我既朋友, SMS郛都爆哂.
仲有好多朋友黎探我, GiGi, Polo,釗仔, 肥文, 邱溫如, 亞di, 細象,Camiko 亞田, 亞Gesses, BiBi, 亞桑, 亞羊,....
最感動就係亞羊,亞桑, 住藍田都專登入黎屯門探我病, BiBi就由旺角入黎,
仲有Camiko, 又煲潤肺木瓜鮮奶湯我飲,仲有兩盒士多啤梨, 一包潤肺合桃同一蜜糖,
仲有保持氣管溫暖既hand make 頸巾, 好似請左個私人助護咁, 哈哈.
仲有亞田,亞Gesses進貢既design同插畫書,邱溫如本Mike同數支飲品, GiGi既雜誌,...
係醫院既日子, 冇野食冇野做就悶到死, 真係多謝哂.
有d時候覺得人越大朋友就越黎越少, 原來當有事既時候, 先睇倒乜野叫做朋友,
記得前年新年同我中二既班主任Miss Chan傾計話覺得自己乜野都冇,
Miss Chan話:「你已經擁有好多」唔知係唔係大概係咁既意思呢??
住院當中, 亦都有幾件趣事,
第一件事係沖沖0下涼發覺同緊舊屎沖涼啦, 沖沖0下發覺浴室地下有舊屎, d 伯伯當左係廁所, 吹脹!!
第二件事係訓訓0下教個伯伯偷左我個漱口盅黎用, 我發覺左仲對住我笑ka ka, 又係吹脹!
第三件事最好笑, 個伯會半夜換哂衫, 風褸, cup 帽,.., 比護士見倒, 護士問佢:「伯伯, 做乜換哂衫,仲著到咁靚仔呀? 未走得嫁喎. 個伯伯話:「頭先有人叫我走喎」d護士話:真係撞鬼囉!!
住左6, 7 日, 醫生比我吊多次藥, 食埋個晚飯,出院. 但我仲未好.
唔返得工, 仲要乖乖休養, 11號仲要返去照Xray.
今個除夕, 我要0係屋企渡過, 乜野節日都冇哂lu.
希望生日前可以好返哂啦.
宜家最煩都反而係經濟, 醫院d錢又未比, grant loan 1 月8號前又要還3千幾, 咭數又未比, 電話費先岩岩交左,
Euro又拖我唔肯出糧, Rmg又有排先出,
搞唔掂真係要搵勞工署喎, 幾個月啦. 搵勞工署都趕唔切,真大獲!!!

>>January 4, 2007 at 9:50:11 PM GMT+8

2006 年 12 月 17 日 星期日 【颳風】

今日又去醫院覆診,
一早有戲睇, 有個男人0係大堂想睇醫生唔比錢,
又係咁用粗口問候d醫生同職員既娘親, 行起黎仲懶凶神惡殺咁,
百分之百一個老粗無賴, 又賴皮, 又冇品, 爆粗還爆粗, 唔好講人地屋企人丫嗎,仲以為自己好英,
個個都當佢小妞咁睇, 廢柴.
唔理佢咁多, 我有我睇醫生, 今日真係好, 等快左, 即係病人少左, 冇咁多人有病,
最好d醫生唔洗做仲好. 雖然少人左, 但都要等.
一邊等, 一邊唸野.
突然間覺得今次患病都唔係完全係壞事,
我會唸返我老豆上年一樣患肺炎, 住醫院住左好耐, 仲嚴重過我好多,
我嘗試感受0下我老豆0個陣有幾辛苦;
又唸返我亞媽患癌時痛苦過我幾多陪,
有時唸:如果我又有癌症會唔會經歷更多, 更加了解我亞媽當時既心情同有幾咁唔捨得我地.
我每晚都睇新聞, 因為我好想知依個世界每日發生緊乜野事, 我覺得自己係存活緊係依個世界,
應該去關心世界. 但都會驚睇得多天災人禍, 傷亡既新聞會比社會同化, 覺得生老死病死係平常事,
如果當我認識既人有事, 而我將事件以宏觀看作平常事, 其實只不過我冇用主觀去代入當時人去睇,
其實係唔係不自覺地個心變左麻木而自己冇留意, 定係其實根本本身係忽略同唔體恤同關心別人呢?
0係等睇醫生依段時間, 唸左好多平時忙而冇唸既問題, 或者可能係一d九唔搭八既無聊問題.
唸返其實我中學0個陣都有好多類似依d問題去思考, 特別係中六0個陣中化同debate team影響我更大,
但yrs1開始就越黎越少唸依d野, 只係唸design上同廣告上既野, 其實... 我都幾受環境而影響左自己,
前晚得知, 我個師妹去左天星碼頭絕食, 絕食到琴晚兩點.
有好多人覺得佢地好無謂同好傻, 但我心裡好支持同欣賞佢.
記得四年前第一次既七一遊行, 當時主題係反二十三條, 當時既我好清楚知道自己應該做應做既事,
大是大非,應該站出黎, 表達返對事件既意向. 雖然當時覺得即使遊行中央都一意孤行,
但0個陣我唔係睇成果, 而係睇件事既對錯, 同埋覺得作為香港人應該對香港有承擔.
結果又竟然真係唔實施廿三條喎.
今次高麗珊其實都係同我當時一樣, 表達返對清拆天星鐘樓依件事既不滿, 所以我好支持佢咁做.
眾市民, 立法局議員,都反對折鐘樓, 一向亦有不少環保團體反對再對維港填海,反對再對維港造成環境污染同破壞生態.
敢問政府佢點樣講「已廣泛諮詢公眾」呢?所謂「廣泛」, 以乜野黎做基準?
政府點樣0係「廣泛」依兩個字當中立一個定義?
0係政府黎講,「公眾」, 係大部分唔同年齡,階層,行業,性別既人, 定係只係小圈子既諮詢呢?
作為香港人都幾失望, 依個政府有時都幾廢 , 一意孤行, 又亂洗錢, 又解決唔倒好多社會問題.....
一個字"廢"!

>>December 18, 2006 at 7:28:22 PM GMT+8

2006 年 12 月 15 日 星期五 【颳風】

今晚, 突然間好似通左少少.
發覺自己好多野渣得太緊,
框死左自己好多,
既然框裡都冇任何野得倒, 可能框外會有果樹, 有葡萄, 再行遠d, 仲可能有彩虹, 有銀河, 有星星呢~
我唔知我宜家有依個唸法係唔係算係嘗試緊行出依個框,
但0係個框裡面一定係死路.
所有感情又好, 理想又好, 以住執著既野又好, 依一刻, 突然間想放鬆一點,
比自己從新定位.
甚至性格, 原則, 個性, 我都有d想從頭黎過.
突然有咁既唸法, 唔知係唔係岩, 但一定唔會係錯.
嘗試0下一步一步去變0下, 都唔係一件壞事~

>>December 16, 2006 at 7:21:14 PM GMT+8

2006 年 12 月 14 日 星期四 【颳風】

今晚帶病去飲, 堂亞哥,建明結婚,
十幾年都冇見過面, 其實都有D生疏,
當中有好多由廣州專程黎既親戚, 最記得就係伯爺,
記得8年前倒0個陣我仲住0係蝴蝶村,
佢專登由廣州黎探我地, 我老豆又無啦啦比我D畫佢睇,
佢仲話我有天份, 叫我讀d 藝術既科目.
隔左咁多年冇見, 佢老左不突祗, 原來之前仲中過風, 又要睇中醫同針救,
亦從廣州黎班親戚口中得知, 鄉下間祖屋下榻左, 又冇錢起過, 唔理又可能會比政府霸左塊地.
唉...
人真係冇個錢唔得, 點解我仲係咁冇用, 祖先塊地都分分鐘都保唔住.
就快廿七歲人, 錢都冇隻, 仲要爭政府10萬幾loan, 讀依三年書都唔知讀黎做乜,
想再讀多d野, 進修多d, 錢都冇隻, 仲要還loan, 讀Q. 一來冇錢, 二來冇時間.
工又搵唔倒份穩定, 錢又唔係搵得多, 做幾做又肺炎, 分分鐘有乜事都冇錢醫.
女朋友又冇個, 仲要還10年grant loan, 35歲都唔知結得婚未,
酒席, 禮金, 影婚紗相, 各樣各樣都係錢, 仲要有瓦遮頭, 要供倒樓,
咁即係唔使唸, 幸福冇我份.
雖然話人比人比死人, 但唔倒我唔比喎.
點解硬係咁梅, 想脫貧都係好似遙遠既一件事咁既.
我放棄脫貧既話, 真係一代又一代都係窮嫁喎, 係無間窮喎,
等運到又唔係辦法, 有乜計呢?
雖然唔可以話有錢一定有幸福既生活, 但起碼會減少左生活上既困苦同心靈上受壓迫既感覺,
真係要唸唸計喎~

>>December 15, 2006 at 8:05:10 PM GMT+8

2006 年 12 月 12 日 星期二 【晴】

星期六晚, 都係去左飲, 仲乜都唔飲得, 只可以飲暖水.
炸野, 生冷野,油膩野, 又唔食得,
有得睇冇得食, 慘慘 T_T

星期一晚, 唸起細妹生日, 即刻落去買個蛋糕,
嘩, 咁細個都百二蚊, 唔好去搶?
不過, 細妹返黎. 我一到12點拎個蛋糕出黎, 細妹都好開心^^
但好似個蛋糕, 我又唔食得~~
之後即刻打比我哎呀細妹同佢講生日快樂,
佢唔單只同我地同姓, 仲同我細妹同年同月同日同時間出世, 真係好緣~

琴日一早9:00去到屯門醫院覆診,先去會計部比診金60蚊, 係咁等,
之後去大堂登記, 又要等叫名, 10:30先有得探熱, 終於退左燒,
之後又去22號房等叫名, 22號房根本唔夠位, 有d病人要企0係度等,
等到11:30先入去照X 光,
之後又要等叫名,等到12:30先見醫生, 睇返張X光片, 個肺仲係花, 仲好左少少,
醫生話仲要休息, 唔可以返工同做運動, 19號要返黎睇多次,
之後又要去會計部比藥錢, 又要等no.,
之後去拎藥, 又要等no., 等到1點半先拎到藥.
由去到醫院到離開, 搞左4個半鐘, 靠佢救命死左lu,
唉, 19號又要浪費多次一個上晝, 又要比錢,
又窮又病, 今個聖誕, 我唸都唔可以過得快樂啦.

>>December 13, 2006 at 5:13:36 AM GMT+8

2006 年 12 月 8 日 星期五 【晴】

依排都要0係屋企休息同準時食藥,
一早食左藥, 要落街食d野, 因為有d藥要餐前食,
on the way, 行行0下有一架Harley好慢咁經過,
迎面而來兩個男仔對架Harley指指點點, 又話人地「0個頭近, 係咁(歹),..」,
人地都係開得好慢0者, 使唔使咁咀咒人呀?
大家又各不相識, 佢殺左你老豆老母咩,
最多咪話佢架車大聲, 話佢串囉.
我個舊同事之前都渣法拉利返工啦,咁 係唔係要咒佢全家丫?
依個世界係小人多過好人, 唔認識既都可以想佢死, 乜解???

食左幾日藥, 休息左幾日, 夜晚總係有咳.
醫生比張 X光片黎睇就話肺炎, 我又唔記得問佢:「典型定非典型? 究竟係乜肺炎?」
12號覆診記得要問問.

今晚好想去飲雞哥0個餐, 一來屯天人, 識左咁多年, 最重要既就係唔想洩500蚊人情,
我一向又係好鐘意食, 雖然有好多野都唔食得, 又唔飲得凍野, 但都好想去,
今次真係15, 16, 唔去唔舒服啦!

>>December 9, 2006 at 4:01:20 AM GMT+8