2003 年 8 月 22 日 星期五 【晴】

今日I團去南灣旅行,衰在上晝要返工,要一點鐘先走得.

走時同Joyce一齊去佐敦,咁o岩書蟲打黎,Joyce玩野同書蟲講佢係我女朋友,點知書蟲又好似信喎.
佢好認真咁同Joyce講"我係佢教會既朋友呀",低B既.
點會咁都睇唔出係Joyce黎架.

兩點鐘去到金鐘地鐵站,join埋示羅Cathy,Polly,阿峰,莉妍一齊入去南灣.
入到去都成兩點幾囉,都係得個零鐘玩.
班友傻既,玩掟沙,好多人都玩到成頭沙呀.
今日跟阿亨又學多左少少游蛙式既祕訣,我諗玩多幾次水我就會學識游水架啦.
完左搭旅遊巴返去時,好多人都好累,淨係訓覺.

返到樂富大家去左M記食野,又影相,感覺都唔錯丫.
數碼相機係方便,不過我都係鍾意影菲林多D.

食完野自己落美麗華麻布,同和哥傾下幫手既野,順便睇下新鋪環境.
新鋪好過一號鋪好多,地方又大左,廚房都寬敞好多,唔洗好似舊鋪咁左頂右頂.
返到黎見到好多新人,我呢D"前輩"感覺高人一等咁,但如果做落手慢過班新仔既話就瘀爆囉.
今日又見到西念san,佢仲認得我,呵呵~
今次幫手只係兩個禮拜,做完我一定要走,我唔會留低.

>>August 25, 2003 at 10:37:29 PM GMT+8

2003 年 8 月 21 日 星期四 【晴】

今日本來約好合唱團練歌,但批貨遲遲未到,結果不單止去唔到練歌,連培靈都去唔到.

四點幾時先話批貨會成七點先去到機場,我知道後真係唔係咁高興.
點解我準備好哂,結果都係去唔到練波喎?

o係機場等架車度時我仍然懷住失望既心情,點解我硬係咁黑.
但當我行出管理處門口時,我見到有個壯漢正企o係七仔門口食雪糕.
我覺得呢個情景好"得意"(其實唔應該用"得意"黎形容,但唔知用咩形容詞好)
一個中年既運輸工人,仲好似細路仔咁拎住杯雪糕,呢個情景o係我心中構成一幅美麗既圖畫:
一個童心未泯既壯漢,仍然會享受雪糕既甜味.

或者你會話,男人老狗食雪糕好出奇咩?
唔知呀,或者因為我冇諗過會o係此時此地見到咁既情景啦.
如果有相機既話,我一定會影低佢囉(話唔定真係拎起相機影既時候會俾人問候).

睇住呢個情景,忽然感到涼風送爽,我心底裡突然泛起一陣平安既感覺.
事情如意又好,唔如意又好,只要抱住一份盼望,抱住樂觀既心態,你就唔會有咁多埋怨.
此刻我又感到主既同在,忽然對唔可以去練歌既事感到釋懷.
呢種感覺就係平安,就係喜樂,係難以形容既.

算啦,聽日俾多D心機練好首歌佢啦!

>>August 22, 2003 at 6:23:33 PM GMT+8

2003 年 8 月 20 日 星期三 【晴】

連續兩日都好多野做,好累......

今朝返到公司,右半身已經拿住拿住咁.
下晝搬哂D貨上車之後仲大鑊,腰部舊患又發作,一發力就隱隱作痛.
本來生命約左以栽練波都冇去到,返左屋企抖.
死火啦,聽日仲有批貨到添,點做呀......

原來身體健康真係好緊要,就算你幾唔如意,你仲可以靠雙手扭轉.
但身體有問題既話,你就好多野都做唔到架啦......
好似生命之家足球隊咁,出場機會少仲可以靠努力爭個正選返黎.
但身體唔掂既話,你就連踢都踢唔到.
身體健康原來已經好幸福,一切都唔係必然既.
所以,有一幅健全既身體已經要感恩,唔好咁多埋怨啦.
趁自己身體狀況仲好時,就要努力活好每一天啦.

好在休息過後,夜晚時條腰已經好返好多,感謝主~

>>August 22, 2003 at 6:08:00 PM GMT+8

2003 年 8 月 18 日 星期一 【晴】

今日臨收工先話又入機場,又搬野上車,好在最後都係遲左三個字收工,趕得切去join Gloria.

冇錯,今日Gloria約左我去睇錫安既舞台劇.
原來係因為佢而家o係錫安做緊實習助導,所以有飛,同場有佢媽咪同細佬,仲有Anita同Anita表妹.
今日個舞台劇唔可以話好好,其中一段播片仲衰左添.
但一班無乜經驗既年青人搞既,仲有乜好要求丫.
睇得出佢地俾左好多心機,已經好好架啦.
能夠一班人同心協力搞一個大型舞台劇出黎,係一次好難得既經驗,佢地真係好幸福.
呢個係一個好難忘既回憶,但呢個回憶係佢地既,與我無關.

當然,生命之家冇必要又學佢地咁搞返個舞台劇,事實我覺得黎緊搞既歌唱比賽都唔錯丫.
不過,有機會既話,我都希望可以搞返個劇.
唔理啦,希望大家o係黎緊剩低既暑假可以更加俾心機,搞好個暑期活動佢.
製造屬於我地既回憶,難忘既回憶.

係呀,今日睇完舞台劇,同Anita一齊去搭地鐵.
以前一齊o係生命時都唔知同佢講乜好,但今次都同佢傾左一陣.
唔知呀,以前對住佢會好大壓力咁,可能覺得佢太叻,又好屬靈,感覺好似高不可攀咁.
冇見咁耐,又覺得大家相處可以輕鬆好多,very nice~

>>August 21, 2003 at 2:52:06 PM GMT+8

2003 年 8 月 17 日 星期日 【晴】

月尾既歌唱比賽I團出左隊合唱,我有份唱喎,所以今日約左練歌.

本來要OT,好在臨時批貨唔走,結果又可以準時收工去練歌.
去完camp之後把聲仲係沙,根本唱得唔好.
加上我本身唱歌又唔係好聽,又捉唔o岩個key,大家又未夾好,結果出黎既效果未如理想.
我仲要係全場唱得最唔好o個個添囉.

為左呢個比賽,我一定會好好練歌,當俾自己一個考驗啦,反正我其實都鍾意唱歌既.
希望呢幾日既表現可以有改善,到禮拜五再練時大家唔洗就我就得咁辛苦啦.

>>August 20, 2003 at 7:27:52 PM GMT+8

2003 年 8 月 16 日 星期六 【晴】

今朝成8點先起身,例牌刷牙沖早涼,食早餐.
早餐竟然係杯麵炒蛋夾麵包,好滯囉.
結果又係勁塞都食唔哂,又係side料......

食完早餐影完相就出camp,咁快就走,唔係太捨得囉......

今朝一起身就死哂火,把聲激沙,講野都有問題.
好在莉妍教我唔好用喉嚨聲,改用丹田氣,叫做好D.
唔理啦,撘車時大家唱歌咁開心,聲沙都照唱啦......

落車返崇拜,上到大禮堂釣左陣魚.
頂唔順,索性完全投入個崇拜,加上個崇拜hold得好,果然唔記得哂眼訓,連証道時都冇釣魚喎.
雖則聲沙唱唔可以好似平時咁唱,但冇辦法,既然把聲沙左,唯有出盡十二成功力唱詩.
聲好時又係咁唱,聲沙要更加俾心機唱,冇理由把聲唔好就唔唱架嘛.
我唔會咁輕易認輸架啦!

完左去食tea,冇野做等今晚比賽,去左德福pacific上網.
竟然俾我撞到Debby,仲以為佢已經冇做添.

夜晚去摩士比賽,又係咁,成場都唔放我落場,又輸......
完左場即走,冇mood留o係度.
真係唔happy架,打家隊咁耐都係忍,忍,忍.
出場機會仲係少,淨係坐o係場邊忍,忍,忍.
睇住自己友唔掂,都要坐o係場邊忍,忍,忍.
都唔知要忍到幾時,好泄氣.
唔單止踢波,現實環境都係忍耐.
唔鐘意份工都係要忍耐.
升家員冇進展要忍耐.
有幾唔如意都係要忍耐.
個個各有各忙,唔開心都唔知同邊個講好.
就好似孤軍作戰,獨自面對各樣唔如意既事,我真係覺得寂寞囉.

好在仲有主陪我,快樂時有主,寂寞時有主.
我開始體會到,究竟保羅點樣靠主渡過獄中既日子,就全靠住o個份由主而黎既喜樂同平安.
原來我並唔係孤單.
感覺到主冇離棄我,所以我都唔可以放棄.
我唔會認輸,我一定會發奮,我唔要再好似而家咁.

主必保守.

>>August 17, 2003 at 7:18:06 PM GMT+8

2003 年 8 月 15 日 星期五 【晴】

今朝晨早七點未夠起身,刷牙沖早涼,跟住食早餐.
食完早餐就靈修,之後又開始遊戲.

首先玩製作濾水器,執沙又執樹葉咁.
結果淨係我同李剛峰兩組既濾水器做得好,其他組整既都過唔到泥水既.
跟住再玩量水,估唔o岩份量就要將D水喉水飲哂佢.
o係主席屈機之下,組組都被逼飲左三劑水喉水......

話咁快又食飯,食完飯又上hall繼續遊戲.
第一個遊戲係傳波,音樂一停邊個拎住個波就輸.
冰仔成為眾矢之的,係唔係都俾我地成班男仔"懲罰",玩到佢殘.
第二個遊戲唔記得係咩啦,總之又係好白痴咁玩完啦.

跟住玩煮飯仔連食晚飯,我o係麻布學返黎既刀法總算冇白費.
可惜食淨好多野,塞極都清唔哂,side料......
食飯時聽到示羅撐艇時有兩隻返唔到岸,要搵人救.
好在大家都平安無事,有驚無險,感謝主既保守.

食完飯到營火會,例牌又唱又跳,但就係例牌咁白痴咁開心.
跟住食糖水同分享,弟兄姊妹們互相稱讚,感覺好好.

再夜D成cell同書蟲同B麗慶祝生日,又玩估腳趾.
我好屎呀......估極都唔中......
之後又玩左D手手腳腳既白痴game,成cell最close就係今次.
呢D就係我一直最想要既野,係衰在咩咩囉......
總之唔係衰野啦......

好累,都係訓啦~

>>August 17, 2003 at 6:31:45 PM GMT+8

2003 年 8 月 14 日 星期四 【晴】

今日生命之家入camp,但今日有批貨要走,費事請假,冇得同佢地一齊入去......
本來以為有成車貨落黎,擔心唔知幾點先走得.
返到去先知原來得二百幾箱,仲要係走飛機,唔洗分貨分到死,咁都冇咁驚.
最後五點幾就走得,仲要六點零鐘就入到去大尾篤,真係感恩.

但入到去就有少少唔耐煩囉,個個去哂玩,我就要自己一條友拎住D行李等佢地返黎.
好在唔洗等好耐,佢地就返黎,終於上到房安頓.
不過已經miss左幾個game,聽講仲係成個camp最好玩既game黎添.
但......可以入到camp仲想點丫?算囉.

今晚I團落住雨燒野食,落雨濕濕都幾難透爐,加上我又唔係咁鐘意BBQ.
本來都想幫手透爐,但阿強同Aaron又透到好pro咁.
我都費事插手,搞到我好似唔做野咁......

之後就上hall玩左幾個遊戲,又成班弟兄o係房度打左場"枕頭互扑大戰".
源仔喪既,扑爆左個枕頭.
好癲,好搞笑.

之後cell靈修完就訓囉,話哂仲有兩日,費事谷咁盡啦.

>>August 17, 2003 at 6:32:39 PM GMT+8

2003 年 8 月 11 日 星期一 【晴】

今日仲係有少少灰,都唔知仲要忍耐到幾時.
返工都係遊魂咁,不停諗野,一係釣魚.

收左工返到屋企就冇乜野啦,隨手開個電腦.
ICQ度見到好耐冇見既pizza,突然想見下佢,睇下佢而家點樣,就約左佢出黎飲野.
我地傾左兩三粒鐘,見到佢好似已經冇乜野咁,我就安心好多啦.
咩路都好,都係一條路,雖然我同pizza既路唔同,但都要努力.
我知我理想既路唔易走,我希望我唔會又半途而廢.
God Bless You & Me.

>>August 12, 2003 at 11:45:03 AM GMT+8

2003 年 8 月 10 日 星期日 【晴】

睇完Almost Famous,聽過懷舊既The White Stripes,我覺得70年代真係一個美好既年代.
戰亂剛完結,社會洋溢一片新氣象,新希望.
充滿希望,充滿生機,充滿機會,好明天啊!

　　　　　　　　　　＊　　　　　　　　　　　＊　　　　　　　　　　　＊
Jewel冇令我失望,新碟雖然商業味重左,但我都覺得好過聽Metalica.

>>August 12, 2003 at 11:59:01 AM GMT+8