2009 年 12 月 21 日 星期一 【晴】

今日都係冇咩特別野做....

但一到下午...D野就要飛快咁做好,因為冬至可以早收...同明天係2位老闆都放假,所以要做好D野~~

四點走人...行o左一震街先返屋企...仲好早!!不過返到屋企仲有好多野要做.....

哩幾日,日日都有人送禮黎...搞到唔係食曲奇就係蛋糕,今日仲有撻食....日日下午茶,遲早肥死!!

>>December 22, 2009 at 11:32:31 AM GMT+8

2009 年 12 月 20 日 星期日 【晴】

又係要開大會架時候....不過今次係有presentation睇...仲要係睇OPCF哩個基金過去一年做過D咩,係有贊助4間大學去外國研究D野生動物~~突然係到諗,都市人好多時都唔會珍惜哩D大自然架東西,只有不斷破壞~~

開完會...冇咩特別野做,都係平平咁過~~準時收工...

>>December 22, 2009 at 11:27:59 AM GMT+8

2009 年 12 月 19 日 星期六 【晴】

今日又係去o左行山....開始幾鍾意行山,一來又可以做運動,二來又可以感受下大自然架氣息~~

今次行架都係飛鵝山道百花林...個度有孫中山媽媽架墓,好大個景都幾好,但不過因日久失修,所以有好多野都爛o左啦,同有機會係有人去破壞,希望唔係真係啦~~

之後,我地係山間到煮野食「花雕雞」勁好味...同唔知係咪山水架關係,煮咩都好好飲,好好食!!行到5點多出返西貢~~

再出銅鑼灣,行工展會....夜晚都冇咩人行....好舒服~~

>>December 20, 2009 at 2:13:11 PM GMT+8

2009 年 12 月 18 日 星期五 【晴】

今日返全日工.....顛o左...因老闆A返3點,老闆B放假,咁即係我可以好自由咁去邊到玩都得啦!!

早上,就冇玩架,係好努力咁整sign架,點知仲要努力到一野cut到自己隻手指公都唔知....係見到有血出先知死,一心諗住按住等佢止血,點知係唔得,係停唔到,為有走入公園架救護站到止血,個個人仲問我要唔要報工傷,我話cut到少少啫唔洗啦,但其實係cut到冇o左一小舊肉~~ 同個個人竟然包到我隻手指勁大舊....算吧!!

下午,走o左去睇冰show....由於係員工架關係,所以可以坐到一個好靚架位,仲要唔洗排隊,仲要個位係正中間D飛人係會係你個頭到飛過~~不過個show又唔可以話唔好睇,又唔可以話好睇咁啦~~

之後又走o左去睇"海洋伴我心"....不過因為今次遲o左行去,所以冇位坐,只係企位,仲要同D大陸人一齊迫...

睇o左2個show...返到公司做下野,又到收工時間啦,準時收工,勁開心~~

之後,去o左太古去飲,第一次用自己私人名義去飲,平時都係跟亞爸亞媽去,但今次唔係啦~~去飲巴別個餐係抵架,雖然佢年齡大過我,但好似睇住佢成家立室都好開心了!!

>>December 20, 2009 at 2:06:01 PM GMT+8

2009 年 12 月 17 日 星期四 【晴】

終於到星期五了!!

今日係忙架一日...但忙埋D唔知咩野,例如:一早就要火警演習,同突然我又做o左安全隊長,哇...明明哩個位唔係我做的,同我又冇去開會,話要點走,最重要架係我第一次走咋哦~~算吧...就係咁亂!!

走完火警,坐多震又要去開「垃圾」會,真係講垃圾架會....好彩又係好快又搞掂o左啦~~

lunch去o左睇熊貓,樂樂突然好活潑,係我見咁多次最勁架一次,佢係咁跑來跑去..玩到勁顛,但佢都係自己一個係到玩,都可以玩到咁顛!!

收工同o左同事,行o左一震銅鑼灣,又見到舊同事...好彩佢地見唔到我...之後返屋企食飯~~

>>December 18, 2009 at 2:30:13 PM GMT+8

2009 年 12 月 16 日 星期三 【晴】

今日又到老闆A放假,同今日冇會開,所以都工作架速度又可以加快點,太好了!!

收工去o左學陶瓷...今次玩拉杯...wow...都幾順利咁哦,但隻手臂會有D攰,同今次係最後一次啦....有作品已經好好了!!

>>December 18, 2009 at 2:22:46 PM GMT+8

2009 年 12 月 15 日 星期二 【晴】

老闆B放假...工作就可以輕鬆點....因我主力都係幫佢手~~

突然老闆A要我幫佢出個e-mail約人開會...哇...真係前所未有架挑戰,完全怕用錯字眼等~~最後多得老闆A架draft,咁我可以好快約到~~

又係要跟老闆A開會..不過好快就開完...我估佢地都唔知自己可以講咩,同有D咩可以講....

唉...又到工作沮喪期,因真係覺得自己D英文好差....同多謝老闆A一直都冇話我...忍受我D一pat英文,仲要好多時都比佢改到七彩,唉...都唔知幾時先可以唔洗改到七彩呢??

>>December 18, 2009 at 2:17:20 PM GMT+8

2009 年 12 月 14 日 星期一 【晴】

今日終於可以慢慢來啦~~

不過突然要做appraisal,事但啦..做o左我都唔會有人工加架啦...所以都係好hea咁做...不過老闆B係唔知未過試用,所以係唔會有人工加,佢仲要好似覺得我好唔抵咁....anyway都係做野啫,同儲經驗啫...

同臨收工前老闆B又突然比野黎做....哎呀...次次都係咁架...真係想走都走唔到..好彩佢個D野可以好快做起...如果唔係真係想話佢..

>>December 15, 2009 at 2:04:49 PM GMT+8

2009 年 12 月 13 日 星期日 【晴】

放o左2日假...終於要返工啦....一見到我個tary同張枱....由如一個亂葬崗咁....D同事張D野放晒係我到,包佢地D野,最後要我分番晒比佢地.....唉!!好似屋企個管家咁~~

同又突然好多sign要做...因為連續2日都冇人係到,所以一次過要係星期一到做返晒...所以放假有放假架唔好....

最後,收工架時候係....6點多....

夜晚,約o左以前日文班架同學食飯...所以先上o左去sit 免費堂,哇...見到D野好深咁...完全唔知講咩...所以都係扮下野咁學~~ 最後食個dinner 就返屋企啦~~

>>December 15, 2009 at 1:59:33 PM GMT+8

2009 年 12 月 12 日 星期六 【晴】

今日一早起身...同埋靚媽帶埋細佬...一齊去幫DR.PET籌款....

是次活動我估有近百隻狗行....當要起步架時候,突然有架Benz突然砵我地要我地讓路,但個度係郊野地方點解可以有私家車入呢...真係唔明,同當時有成幾十人(未計D狗)企晒係條路到,好難一下就讓開比架車行,點知Benz佬突然係到發顛落車話我地唔讓路比佢,又話問我地有冇申請封路,但我地所有人都覺得郊野地方點可能有車入呢?? 最後Benz佬講講下野,突然發顛除褸話要打過...同仲要對住個亞婆問候佢媽媽,當時會場架人都聽到,係到噓佢....同佢完全係一個冇文化架人~~

當我地所有人都慢慢讓比佢架時候,點知佢又係到踩油..我地全部人更加唔想讓比佢.同佢差D撞到隻狗,個主人就即一腳踩落個車頭到,佢就係到落車,咩都冇講行o左入漁護處到,仲要食埋煙,下....郊野地方可以食煙架咩...哩個人完全係挑戰法律~~

最後我地都順利我地個步行籌款....細佬哩個亞伯,仲識o左個亞婆...但雙方家長都覺得ok,但男女就互不理睬....最後都只係兩狗同行....冇交流~~點都好...細佬都係已經老人家了,我都會尊重佢架決定,同我覺得佢好叻架啦....老人家都可以行o左咁多路,又唔扭抱~~只係我唔忍心見到佢咁辛苦,就抱o左佢行....

籌款完畢,就要去嫲嫲屋企到做節啦.....

>>December 15, 2009 at 1:54:41 PM GMT+8