2003 年 6 月 30 日 星期一 【晴】

呢排真係好累呀~~~~
我又過佐一個生日喇﹐今次我一次過許佐好多既願望﹐希望全全部部都實驗到啦﹗
最近幾日晚晚都玩到超夜﹐兩日加埋都訓唔過6個鐘﹐今日見完客就係咁訓呀。
今日除佐浪費好多時間外﹐仲浪費好多錢﹐來回就唔見佐50蚊﹗﹗

經過佐呢個生日﹐我做佐一個重大既決定~~~~~~


>>July 1, 2003 at 12:09:43 PM GMT+8

2003 年 6 月 27 日 星期五 【晴】

日記式小說週記連載(第十二日)

2002年4月19日 晴
呢D相﹐真係令到我充滿罪惡感﹐我之前都估唔到﹐自己會做D咁卑鄙既行為。
另一方面﹐諗到自己可以為中意既人犯罪﹐都覺得有D偉大。
今日我一早就將本貼紙簿原封不動咁擺番原位。
我覺得自己咁樣既暗戀真係慘不忍睹﹐有時諗番都覺得好似做賊咁。
好彩都有呢本日記﹐佢幫我記低晒所有見到寶琳果陣既所有感覺。
下個星期就係學校既45週年紀念﹐我又收到料﹐寶琳都有份負責D重要既職位。
希望又可以同寶琳一齊做啦﹐我覺得同佢咁有緣﹐一定得既﹗

>>June 27, 2003 at 6:13:55 PM GMT+8

2003 年 6 月 24 日 星期二 【晴】

好累呀﹗好累呀﹗﹗
呢排番工後真係好多野做﹐好多野學~~~~~錢真係好難賺呀﹗

出佐糧後仲辛苦﹕
1﹑自己要供份保單
2﹑要出去應酬
3﹑搭車見客
4﹑俾錢屋企
5﹑下月既車費﹑伙食費

以上全部都自己負擔﹐完全辛苦過以前。
星期六團契既比賽都應該唔會有時間出席架喇﹐又再要番深圳請親戚食飯......
話係我第一次出糧喔~~~~~~~~唉﹗
仲諗住出黎做野﹐賺番D錢﹐買D自己中意既野﹐不過一出糧就已經係負資產喇~~~~
D錢連一蚊都儲唔到﹐仲要諗住每一個明天點樣可以節省D洗錢添~~~~~
無時間﹑無自由﹑無錢.......算啦﹐屋企人開心就得喇
錢財都係身外物﹐‘錢唔係萬能’﹐
如果身邊既人﹐個個都身體健康﹐無病無痛﹐行得走得﹐寧願一世涯窮都滯~~~~

保險只可以俾到財務上既保障﹐身體既保障只有倚靠神﹗

>>June 25, 2003 at 12:01:40 PM GMT+8

2003 年 6 月 21 日 星期六 【雨】

日記式小說週記連載(第十一日)

2002年4月12日 晴
我都仲係同琴日一樣﹐無膽接近寶琳﹐淨係敢偷偷咁偷望佢係學校既一舉一動。
今日就係復活節既假期前既上課日﹐今日之後﹐有排先可以見到寶琳喇。
於是﹐我放學時等到無人就潛入寶琳果班﹐見唔到人﹐見下張台都好呀嘛。
佢張台既左上角有幅好得意既畫﹐台邊有袋PE鞋﹐櫃桶入面有本野。
好奇下﹐我打開黎睇﹐原來係寶琳以前學校F4到F5既貼紙相。
----------我真係好想據為己有﹗
咁做﹐寶琳一定好難過﹐而我亦好唔安落﹐但係唔借番屋企﹐又對唔住自己。
之後我拿拿淋打電話俾我既老死﹐‘四眼仔’ 。
佢話‘俾人偷相﹐係一種榮幸黎架﹗’
就憑呢句話﹐我既慾望戰勝佐罪惡﹐狠下心去裸本貼紙相簿。
番到屋企係咁睇寶琳D相﹐我都唔知咁做究竟ARM定錯﹐
不過算啦﹐開心就得啦﹐我決定聽日將D相彩色影印﹗
我始終唔明﹐點解D咁貴重既野﹐佢會擺係櫃桶﹖
莫非‘俾人偷相﹐係一種榮幸黎’ ﹖


>>June 21, 2003 at 5:45:20 PM GMT+8

2003 年 6 月 15 日 星期日 【晴】

唉~~琴日做佐早堂主席﹐著得咁有character﹐一定有煥然一新既感覺﹗
上個星期只係好累﹐好多野做﹐準備都唔算充足﹐如果有下次﹐應該會好D既。
琴日都真係幾誇既﹐主席﹑司琴﹑司他﹑講員都著得咁靚。

黎緊既呢個星期﹐應該可以有番多D既休息時間﹐真係好呀。
可惜﹐爸爸既身體已經無以前咁健壯﹐請大家幫我代禱啦~~~~~~


>>June 16, 2003 at 11:02:20 AM GMT+8

2003 年 6 月 13 日 星期五 【雨】

日記式小說週記連載(第十日)

2002年1月15日 晴
開學到而家已經有一個學期喇﹐縱使我每日都見到寶琳﹐但係我始終覺得佢根本就唔識我。
今日係寶琳既生日﹐我已經準備佐一份禮物送俾佢﹐後尾都係諗住親手交俾佢﹐表示誠意嘛。
通常諗既同做既都係兩回事﹐以我既性格﹐又點會敢親手俾份禮物佢喔。
最後就想係放學之後﹐擺落佢櫃桶。
經過一整日既反覆思考﹐始終都覺得求其擺低既話﹐倒不如唔送好過。
只不過﹐呢份禮物﹐我淨係會俾寶琳一個﹐因為咁﹐我要諗個好辦法收埋份野。
於是﹐放學等D人走得七七八八﹐我先至將份禮物﹐埋係校門前果棵樹既下面。

係個去既學期入面﹐我其實無同過寶琳講野﹐只係敢偷偷咁望佢。
我唔知點解我咁細膽。唉﹗只係想同寶琳講番句野~~~


>>June 15, 2003 at 3:57:45 PM GMT+8

2003 年 6 月 10 日 星期二 【雨】

暑假都叫做開始喇﹐不過我就真係唔多得閒。
因為我要係暑假入面﹐做一個成功既男士。
我有背後支持我既動力﹐所以雖然我每日都好辛苦﹐但係都覺得係值得既﹗
‘凡勞苦擔重擔的人﹐都可以到我這裡來。我就使你們得享安息。’
最近我既靈命又高番好多喇﹐可能同我就黎做主席有關。
可惜既係﹐靈命高佐﹐讀聖經既時間就大量減少佐。
有得返工之後﹐我完全感受到第七日既重要性﹐而家我真係好想得休息。

‘連續四日’-----哈哈﹐連續四日有聯絡﹐呵呵﹐呵呵... ...
呢D就係我精神既支柱喇﹐‘拜~~拜’﹗

>>June 11, 2003 at 3:01:10 PM GMT+8

2003 年 6 月 6 日 星期五 【晴】

日記式小說週記連載(第九日)

2002年1月8日 晴
每隔一段時間﹐我就會睇番以前寫既日記。
上星期胡端端見到寶琳﹐我真係不知所措﹐潛意識就好似以前咁﹐
呢埋偷偷咁‘裝’ 佢﹐直至佢走出麥記為止。
-------佢紮住條‘小馬尾’ ﹐令我又諗起阿珣。
可能因為我唔夠膽同寶琳講野﹐所以我知道而家既我﹐係中意寶琳﹗

每次見到佢﹐我都有種興奮﹑怕醜﹑緊張既心情﹐好想俾佢知道我望緊佢﹐
好渴望同佢眼神接觸既果種快感﹐但又驚俾佢知道我望緊佢。

我收到風﹐話佢下星期生日﹐我決定送一樣特別既禮物俾佢。


>>June 6, 2003 at 7:42:56 PM GMT+8

2003 年 6 月 2 日 星期一 【晴】

幾經艱辛﹐終於有驚無險咁肯定pass佐兩份paper﹐
暑假可以happy番夠本喇﹗
真係感恩﹐呢個暑假有排都唔得閒喇。
另外﹐我要預言﹐團契既聖經問答比賽﹐由我帶領果組肯定贏梗呀﹐
如果各位想縮窄D個差距﹐就記得睇多D聖經喇。
記住﹐如果好似我果組個個都咁有信心既話﹐都可以睇埋福音書以外既章節。
呢個網好得七七八八﹐我可以繼續每個星期六post 日記小說。
請繼續多多支持~~~~


>>June 2, 2003 at 4:34:42 PM GMT+8

2003 年 5 月 30 日 星期五 【晴】

日記式小說週記連載(第八日)

2002年1月1日 雨
一訓醒覺﹐我就去裸番D相﹐之後就拿拿淋番屋企睇相。
我祈禱先﹐感謝 神一路以來對我既保守﹐同埋俾我可以如願以償。
一打開裝相既個袋﹐奇異既事就發生佐﹗

我一心以為琴日影佐成筒菲林﹐會有好多阿珣既相﹐可惜搵暈成袋﹐搵到袋都穿﹐
都只不過得一張阿珣既相﹗﹗只係得一張呀﹗﹗﹗
我將晒唔到既廿幾張相底裸去第二間相鋪再晒﹐可惜店員話呢D相已經走佐光。

我覺得好奇怪﹐D相我用兩筒菲林影﹐兩筒都有阿珣﹐而且影得最多仲係佢添﹐
有乜理由影其他人既時候就完好無缺﹐影佢就影唔到﹖
就算阿珣同其他人合照﹐又點解淨係睇唔到阿珣喔﹗
隨即我就諗起我番深圳時既一個承諾﹕

『只要見到佢﹐只要影到一張相就夠喇﹐其他既真係唔重要架喇﹗』

呢個時候我完成感受到 神既能力﹐佢真係有聽我禱告﹐真係兌現佐我既願望----------咁我仲有咩怨言﹖
我打個電話俾瀚文﹐講俾佢聽﹐話D相已經晒好﹐我仲握佢話D相影得唔錯添。
之後佢仲講佐個好震撼既消息俾我聽﹐
『琴日你走佐後﹐煦陽送佐阿珣番屋企﹐阿珣仲應承佐同佢拍拖﹗』

我聽完之後﹐都講唔出個心有咩感受﹐愁腸百結﹐
又替煦陽開心﹐又覺得自己可悲。
今日係1月1日﹐半年前我既生日願望﹐好似已經實現佐﹐我應該覺得高興至係。
我諗起一句話﹐
‘舊事已過﹐一切都變成新的了’

我望見出面落緊既雨﹐一時衝動就跑出去淋雨。
感覺真係好爽﹐雖然小雨洒在臉上﹐但係覺得D雨點可以洗去我既不快﹐同琴日既雨好唔同。
‘無論快樂同唔快樂﹐佢都陪我渡過。’
——如果情人同D雨一樣咁就好喇﹐忽然間好想同中意既人雨中漫步。
我越行就越慢﹐跟住入佐麥記既廁所﹐出番黎﹐
我竟然見到一個人——寶琳。


>>May 30, 2003 at 5:00:03 PM GMT+8