2003 年 7 月 25 日 星期五 【晴】

今日頌德同我講﹐話好羨慕我可以有D好close既野﹐而佢就乜都仲唔得。
其實佢係呢個時候羨慕我可能都係正常既﹐不過可能佢到佐我既處境既時候﹐就唔會羨慕。
人就係咁貪心架喇﹐當日﹐當我同佢而家處境差唔多既時候﹐我都係希望有而家既野。
但係當我得到佐之後﹐就希望發展一D更進一步既野.....
不過一句到尾﹐我有而家既野都已經係恩賜黎架喇﹐都係知足算啦。
我都會祝福佢地既~~~~

講佐咁耐呢D野﹐你地又知唔知我講緊乜野﹖﹖﹖

>>July 25, 2003 at 6:01:10 PM GMT+8

2003 年 7 月 23 日 星期三 【陰】

今日掛八號風呀﹐真係好----唔駛返工。
域拖話教會有好多野都未整﹐於是就諗住番教會幫佢整野。
一出門口﹐麥sir就請佐我食佐餐﹐又食埋Ivy整既芒果布甸﹐今日果然係好既開始。
係教會整完一輪野﹐就同麥sir 區生捉棋﹐結果我都兩勝一負﹐成績唔錯~~~~

今日雖然打風﹐不過就無打風既感覺﹐天氣其實都唔差架。
無啦啦休息佐一日﹐個feel都幾好。


>>July 24, 2003 at 3:00:08 PM GMT+8

2003 年 7 月 21 日 星期一 【晴】

今日約佐梁姑娘食飯﹐不過係佢請我地既。
佢而家已經係傳道人﹐係屯門返工添。
咁橋佢今日出糧﹐所以佢就話請我地。
咁樣又過佐一日喇﹐
今日真係好累呀﹗

>>July 21, 2003 at 4:41:02 PM GMT+8

2003 年 7 月 20 日 星期日 【晴】

今日ACM後﹐去佐譚生屋企玩。
雖然住係東涌咁遠﹐不過倩婷﹑海光真係好得意!
不過海光就超暴力﹐經常要玩‘超人打怪獸’.........
雖然俾佢係咁打﹐不過我地走既時候﹐佢即刻大喊。哈﹗真係好有童真。(仲有kiss我添)
倩婷同我地一齊係房入面玩﹐我地梗係.......嘻嘻......哈哈......玩得好開心啦﹗
我地走既時候﹐拒地個個都好依依不捨。
仲有海婷﹐佢都好肥﹐好得意。

過多兩個星期再探拒地啦~~~


>>July 20, 2003 at 6:15:03 PM GMT+8

2003 年 7 月 18 日 星期五 【晴】

日記式小說週記連載(第十五日)

2002年5月19日 晴
就快考試喇﹐<戲劇學會>先黎攪校際戲劇比賽﹐今次係我第一次參加戲劇既活動。
我就揀佐做幕後﹐而寶琳佢就做女主角﹐男主角就係一個不嬲同寶琳好好傾既奸夫﹗
每日放學我都去排戲﹐當然﹐最大目的都係為佐係寶琳身邊出現同埋可以望佢。
有次﹐寶琳係休息既時候﹐話好口乾﹐於是我就拿拿淋買佐包士多碑梨奶俾佢。
能夠幫到自己中意既人做番D野﹐真係好開心架~~~
可惜既係﹐戲裡面有一幕要男女主角拖手﹐我望見男女主角既背影﹐
述說著開心既回憶﹐真係感到心如刀割﹐恨不得將眼﹑耳都切晒落黎。
雖然可以見到自己中意既人﹐但係就見到佢同另一個男人一齊﹐係男人又點可以忍受﹖
要開心既話﹐就要承受極大既痛楚﹐呢D就係我既代價。
係排戲既日子裡面﹐我不斷受住呢種煎熬……
慢慢﹐我開始厭倦佐呢種做人背後男人既感覺。

我開始意識到﹕我要對寶琳死心......


>>July 19, 2003 at 3:40:39 PM GMT+8

2003 年 7 月 16 日 星期三 【晴】

從今日開始﹐我要增加日記既數量﹐同埋內容。

今日我再一次參加佈道會﹐今次其中一Part講醫生﹐而我就有種感動。
當牧師講醫院既時候﹐我特別有感概﹐因為我去過醫院無幾耐﹐
對生命既睇法又有新既領受﹐感謝 主~~~哈利路亞
可惜既係﹐身邊既然仲有人懷著D無聊同唔成熟既想法而參加今次既佈道會。
------佢真係浪費佐個咁好既佈道會......希望主可以俾機會我地慢慢改變到佢啦﹐我會祈禱

去完佈道會特別醒神﹐夜晚立即就做到份保單﹐哈哈...........
今個月做到目標﹐好野﹗﹗﹗﹗
繼續為前途努力﹐yeah

>>July 16, 2003 at 5:13:50 PM GMT+8

2003 年 7 月 12 日 星期六 【晴】

妖~~~~又少兩餐飯添........

今日同媽咪﹑爸爸食飯時講落佢地拍拖既曾年舊事﹐而家先至知﹐
原來媽咪以前係村入面既群花之首黎架﹗﹗追求者由村頭排到村尾......
以為爸爸咁符碌﹐得到美人垂青﹐原來爸爸都唔差﹐當年都唔少少女借意接近爸爸......
佢地原來咁襯﹐我都係成廿年先知﹐以後要多D同屋企人溝通先得﹗

>>July 13, 2003 at 3:42:42 PM GMT+8

2003 年 7 月 11 日 星期五 【晴】

今日下晝爸爸出院喇~~~~~~
我要拋開之後要面對既問題﹗
終於可以共聚天倫之樂﹗
我一定會好好咁珍惜我既好爸爸﹗

>>July 12, 2003 at 3:09:13 PM GMT+8

2003 年 7 月 11 日 星期五 【晴】

日記式小說週記連載(第十四日)

2002年5月3日 晴
經過校慶之後﹐我足足開心佐成個星期﹐每日我都好開心咁番學﹐好開心咁遙望寶琳。
今日<環保大使>去馬屎洲做實地考察﹐寶琳當然都有參加。
我地係大埔坐Van仔去佐條村﹐跟住就行上山。
上山既途中﹐我見到好多花花草草﹐山山水水﹐突然間﹐有佐好多既感概。
就算係花草﹐都係俾人光明正大咁欣賞﹐唔願俾人偷偷咁望﹐
而我就顯得十分羞恥﹐每次都唔敢正面睇﹐每次都淨係遙望佢既背隻。
不過我又壓抑唔到自己每一次望寶琳果種興奮﹑緊張而又喜悅既心情。
只有佢﹐我既生命充滿期望﹔只有佢﹐使我既細胞不停跳動﹗
佢係主宰我心境既第一個女人﹐就連阿珣都俾唔到我呢種感覺。

沿路有好多特別既地方﹐由老師介紹﹐我一直跟住寶琳既背影直到終點。
寶琳原本白雪雪既天使面孔﹐帶有少少紅色﹐十分惹人憐愛﹗

我地係終點影相﹐原本個Miss企係中間﹐我同寶琳分別企係Miss既左右﹐
後尾渣相機個阿Sir就叫個Miss企執邊﹐
就係因為咁樣﹐我就有佐第一次同女仔影相既寶貴回憶。
當時我好緊張﹐兩隻手都唔知擺邊好。唯有左手捉住右手﹐勉強咁笑一笑。
雖然有D咁符碌既成份﹐但我始終覺得寶琳唔會識得我。
去到終點果陣﹐我仲作佐一句詩﹐以表達當時既情緒。

【依依背影幾銷魂﹐片片回憶半生恨】

到回程坐Van仔既時候﹐我坐係寶琳後面﹐呢個位對我黎講﹐真係好正﹗
使我可以名正言順咁望寶琳﹐見佢隨風飄蕩既頭髮所帶出既香氣﹐令我神魂顛倒。
就係呢個時候﹐憑住呢一刻既衝動﹐用原子筆畫佐一幅寶琳既背影﹐加埋果句詩﹗WOW……
我張幅畫擺係銀包﹐好好咁保存。


>>July 12, 2003 at 3:06:39 PM GMT+8

2003 年 7 月 5 日 星期六 【晴】

日記式小說週記連載(第十三日)

2002年4月27日 晴
今日係學校45週年既校慶﹐我被安排做門口既接待員同埋介紹‘環保大使’ 既板。
接待員就係要接待所有黎學校既人﹐帶佢地入場。
企佐無耐﹐我就見到一副曾經見過﹐而又唔識既相貌﹐
原來佢就係上星期﹐我睇既貼紙簿入面﹐寶琳既同學﹐叫明明。
我見到佢﹐就問佢係迷搵寶琳﹐之後我仲同佢講佐幾句。
我有時裸番D相睇既時候﹐都會佩服自己﹐
佩服自己雖然無同寶琳講野﹐都可以知道佢咁多事﹗連阿車都話我唔做私家偵探‘篩’晒。

而寶琳既工作﹐就係負責做活動既司儀﹐所以我好多時間都可以望到佢。
‘環保大使’ 既板放係地理室入面﹐我得閒就呢入去避暑﹐因為地理室有冷氣而且又少人嘛。
忽然﹐寶琳都入黎幫手﹐咁我地就一齊招呼來賓。
負責影相既人都好醒爬﹐識得把握我地一齊招待小朋友時影佐張相。
估唔到張相仲係之後會登上網添。
‘http://www.sja.edu.hk/45openday/Photo_28-4-2001/big/openday_28_121.jpg’
坐佐一陣間﹐隔離房既物理老師走入黎﹐搵我幫手唱省紙黎做實驗。
於是我就靈機一觸﹐諗起同寶琳換省紙。
就係硬幣交換既期間﹐我掂到佢隻手﹗佢隻手又白又細又滑﹗
今日我真係好開心﹐我諗我今世都唔會忘記今日發生既事﹗


>>July 5, 2003 at 11:54:36 PM GMT+8