2007 年 6 月 22 日 星期五 【晴】

日本第五天


每天都係自助早餐, 實變肥仔.....
今天時間唔係咁多, 主要去TV tower+兩個購物中心, 午飯後就要上機。

水中宇宙飛船購物中心, 奇名,
裡面全部玩具店、兒童用品為主,
有Tomica、Pokenmon專門店, 其他有龍貓同好多得意o既character,
我買左一隻熊仔俾自己, 個專櫃到好多佢o既介紹, o係香港暫時未見過呢隻熊,
又買左d送俾人......

附近有一個玩具中心未開, 好可惜, 走到另一百貨公司,
呢一刻我地分頭行動,
o係日本婆到買左一條銀手鏈, 4500yen,
又買左一隻小狗公仔俾媽媽, 好好玩架,
你摸佢個頭, 佢會叫, 你摸佢個身, 佢會行, 幾cute架,
媽媽收到呢份禮物都好開心。

午飯係日式燒烤任食,
我地訂左一塊神戶、一塊"雙鋼"牛扒,
好好食, 鍾意食牛扒o既我食得好開心,
放落口真係會熔架......超正!
呢餐加埋吞拿魚、三文魚等壽司任食, 飽到..........我個肚大左好多......

終於要回程了, 回港坐番國泰, 服務麻麻地.....

今次日本之旅, 好玩之餘又上了一課,
個導遊好勁, 教左好多日本文化同人生哲理我地聽,
超值, 再跟團的話, 我希望可以跟番呢個導遊,
第一次感受到有導遊o既好處, 就係呢次日本之旅。
自己去唔會學到咁多o野呢!

回港後打算研究一o下和歌山、大板、京都, 希望可以認識更多......
今次係一個難忘o既旅程!

番到屋企, momo狂kiss我呢! 好lum呀!

>>July 7, 2007 at 4:15:55 AM GMT+8

2007 年 6 月 21 日 星期四 【雨】

保密日記，請登入觀看！

>>July 7, 2007 at 3:11:53 AM GMT+8

2007 年 6 月 21 日 星期四 【雨】

日本第四天


收拾行理, 離開新板急酒店, 今天去京都。

今天下雨, 所以在渡月橋帶來一份淒美, 拍了照就閃回商店, 因為雨勢大了。
渡月橋一帶好多舊店舖, 而呢幾年流行o既100、200、500yen店唔見晒,
換來係1000yen店, 因為經濟好左呀嗎!

來到清水寺, 好靚, 不過我想如果有紅葉, 會更加美。
清水寺是日本京都最古老o既寺院, 以列為世界文化遺產,
兩座戀愛石都幾有趣, 相傳只要合起雙眼, 由一塊石走到另一塊石, 再掂一掂, 戀愛運就會打開。
清水寺之下o既精品店街, 係最吸引我的, 好多食品店鋪, 可以一次過買好多手信,
我就買左七味粉, 黑芝麻糕餅, 同八橋店o既餅仔,
其中八橋店d食品, 全部可以試食, 我都食唔少。
o係呢條街行, 會遇到好多學生, 因為佢地旅行好多時會選清水寺,
睇過小丸子o既關係, 覺得日本d學生、小朋友好得意。

去到名古屋巳經係夜, 為左再掃貨, 我地又唔食飯住,
我地揀左去名鉄百貨公司(Meitetsu), 因為有人話要買Burbery手袋,
最後兩個新出o既手袋, 都俾香港人買埋。

唔講你唔知, 我係Shiseido o既fans,
我用左佢好多年, 如果唔係我點會咁靚喎,
冇錯, 我係一個男人, 但係, 我唔用Shiseido男仕o個條line,
因為女仕d化妝品溫和d, 我試過有一年冇用佢, d皮膚真係差d,
我買左一枝gentle cleansing foam, 係skincare條line,
日本d service真係好好, 個日本妹多謝左我好多次,
仲送左好多sample俾我,
我諗諗o下, 又回頭買多一枝, 因為諗住遲早都會用, 佢service咁好,
值得支持, 今次我買係White Lucent條line, 係 Brightening cleansing foam,
未試過呢條line, 我諗係多左美白作用啦!
個日本妹見到我回頭好鬼開心, 今次佢俾個catalog我睇,
然後再將一d sample一個一個慢慢貼上去, 讓我可清楚試用唔同o既 產品,
我同佢講英文, 佢就不停同我講日文,
不過佢似乎明明地我講乜o野。
買兩枝, 就送左咁多sample, 好抵呀!
對佢o既服務我真係要寫個服字。

再等埋佢地o係Fancl house買o野,
又係食飯時間勒,
之前知道名古屋最出名係炸豬排飯,
我地走左落名古屋o既地下街, 搵到一間專門食炸物o既食店,
而真係用炸豬排為主打,
我order了一碟炸豬排加炸蝦,
豬排好新鮮, 炸蝦好香脆, 唔係傳統天婦羅o既造法。
好好食! 好香呀!

今晚住名古屋東急酒店, 把爸爸安頓後,
我地再出去打機, 見到一部夾公仔機, 有一隻好大o既輕鬆熊就跌就跌咁,
我就決定夾, 不過用左好多錢, 都失敗,
只有留低輕鬆熊在日本,
"輕鬆熊, 再見勒!"

後來我玩打鼓機, 其實部機都幾out, 我一連打左幾鋪,
後面個日本妹話good, 我剩係聽到個good字, 佢跟住又講番日文,
我只有點頭謝謝她.....
日本打機都幾貴, 我總共用左2000yen, 即是hk$126, o係香港打機唔會用咁多呢!
入吓入吓, 洗錢真係唔覺。

今晚我又係浸浴, 好舒服呀.....
每晚佢地訓晒後, 我都會汽水+零食+電視,
雖然唔明電視講乜, 但係有d游戲節目我就睇得明, 都幾好睇架,
我又好享受宵夜o既樂趣, 番香港先講減肥啦!

>>July 7, 2007 at 3:08:48 AM GMT+8

2007 年 6 月 20 日 星期三 【晴】

日本第三天


之所以要記低去旅行咁多大小事同心情, 讓自己有份回憶,
因為第二時睇番都會好過癮.......

今日係去環球片場, 我曾經去過LA 的環球片場,
究竟有冇分別呢?

我地o既策略係咁玩:
Spiderman
Terminator 2
E.T. Adventure
BackDraft
Back to the Future
Waterworld
Jaws
Sesame Street
Jurassic Park
再玩多一次 Spiderman

Spiderman 係最好玩,
而Jurassic Park 真係好驚, 因為o係25米高急速滑下,
其實我唔係咁enjoy, 因為我有畏高....

總算玩晒以上d遊戲, 我地由開門玩到6點幾,
要排隊架, 先頭諗住閒日少人, 冇買Express pass,
不過, 如果再去, 我都建議要買, 雖然唔買都可以玩得晒,
但係買pass排少d隊, 個人冇咁疲累。

日本個環球就唔見左星戰, 其他大至上分別唔大。
仲有一個另我好開心的時候, 就係食完午飯時, 見到人玩魔術,
而播緊o既係Fatboy slim o既音樂, o係big beat節奏下, d魔術好似變得神奇左,
好可惜冇時間停下來慢慢睇。

送左爸爸回酒店休息, 打算夜d先食晚飯, 因為女仕門話要再掃貨,
日本d商店都幾早關門, 約8:30至9:00pm

我地揀左去Hep Five, 因為有好多名店,
有i.t., Abahouse, Pou Dou Dou, SM2, Jeanasis, X Large等等, Beams 裡面都有四間,
我地分頭行動, 我就去左Beams,
買左件恤衫, 都成144000�, 不過就係made in Japan.
Beams o既key chain都唔錯, 買左o黎做手信。
t-shirt都好靚, 不過好貴呀, 呢一刻真係要忍.......因為我巳經洗左好多....

大家都滿載而歸。
回酒店接爸爸, 再去番食拉麵, 因為大家都覺得好好食,
食飽飽就要回酒店訓勒, 因為今日好疲累。

聽日去京都!

>>July 7, 2007 at 1:44:36 AM GMT+8

2007 年 6 月 19 日 星期二 【晴】

日本第二天


我發覺我愛上去浴堂沖涼同浸溫泉, 所以今早我六點幾都未訓醒,
就落去浴堂, 洗白白同浸溫泉, 可能太早勒, 連我都係得三個人,
浸到好醒神, 好happy........真係好鬼free架!

吃了一頓豐富早餐, 收拾後就上大巴, 因為今天要轉酒店,
有時覺得跟團的行程, 要轉酒店好麻煩, 因為唔想執o野,
不過唔轉酒店, 又點可以去咁多地方喎,
我都鍾意自由行, 但係如果自己去,
就住唔到串本溫泉酒店, 或者唔會去串本呢個溫泉,
咁就只可以去d市區人工造的溫泉。

今次日本trip我就好似一個小朋友咁, 所有o野我都覺得好新鮮,
連每一餐食o既o野, 我都用相機影低。

今天連續去左三個名勝:
o係串本o既橋杭岩
白濱裡面有三段璧,
仲有就係千疊敷,
其實d地方我都唔係清楚得晒,
不過, 風景好靚架, 到此一游亦無憾。

終於等到去漁獲市場勒, 蔡蘭都話啦,
要了解一個地方, 最好就係去佢o既街市,
我完全同意佢所講o既, 好多o野睇架,
仲有一樣o野我地好開心,
有機會遇上大師傅"湯魚",
條魚有成兩米咁長,
早前睇完日劇"派遣員的品格", 大前春子就表演過點樣"湯大魚",
我面前呢條叫aw魚, 電腦可能出唔到, 係呢個字"魚虎",
唔好試讀, 係冇中文讀音,
呢個show真係好好睇, 成條魚要分幾個部份來"湯"
d新鮮魚肉好靚,
介紹完後, 即時拍賣....

午飯我地就o係魚獲市場食, 表面上係食天婦羅定食,
其實主角係一盤大魚生,
真係一大盤, 多到兩個人食一盤都食唔晒, happy!
不過, 原來佢地唔係最喜歡三文魚,
有兩種魚較為普遍受觀迎, 不過唔知叫乜名。
離開漁獲市場, 我巳經一袋二袋手信, 買俾自己o既都唔少

接著係去梅干館, 不過我對梅呢樣食物,
就冇興趣, 其中有種化粧品, 係用梅來提煉,
可以去走皮膚上的角質層,
幾好賣喎, 我買兩枝來造手信先.......

晚飯係一間15000搘繾凳堨q店,
質素唔錯, 我食左14碟, 都覺得自己有d個份,
但係我隔離個日本妹, 我諗都有18至20碟呀......

心齋橋掃貨開始, 因為要陪人,
唯有先去Good Afternoon Tea睇o野先 (我冇投訴呀, 我都鍾意睇架),
之後去左鞋店, 即刻找Tiger, 好開心, 有我想要o既顏色,
仲係最後一對, 5 min內買完鞋, 126000�, 好抵,
個日本妹service真係好好.....
又係陪人, 去左Uniqlo, 佢地話即係日本Giodano,
睇左一陣, 我都買左三件t-shirt,

心齋橋行街, 都幾多靚女, 可以話成街都係靚女,
佢地打扮又潮, d日本妹俾我想像中又高左,
不過佢地真係好貪靚, 細細個都著高掙鞋.....

跟住連續兩晚我地會住新阪急酒店,
位於市中心, 行街好方便,
導遊今晚帶隊行夜街,
大板o既地下街係全日本最大,
叫板急三番街, 真係幾方便,
不過店舖幾參差, 我都係比較喜歡心齋橋。

行到疲累, 我地排隊食拉麵,
博多一風堂拉麵館, 係稱為三大排隊店之一,
d"u肉好好食, 湯更加好飲, 記得一定要加蛋,
隻蛋全隻上, 不過係半生熟, 加埋d湯, 好好食呀!

因為太飽, 我地再行dvd+書店, 呢間o野好似HMV咁,
好多o野睇, d雜誌好多, 漫畫都好吸引, 不過買左都睇唔明啦!
呢間o野2:00am先close, 最"琠]鬼行....

今日我好開心呀!

>>July 5, 2007 at 4:31:45 PM GMT+8

2007 年 6 月 18 日 星期一 【陰】

日本第一天



帶著興奮的心情到達"關西國際機場", 其實大板本身有"大板機場",
不過我諗大板機場可能係內陸機, 關西國際機場當然係國際航線啦, 不過有待証實....

由於今個trip係朋友加家人的關係, 父親年紀又比較大, 所以我地跟縱橫遊出發。
時間亦唔錯, 因為係早機, 2點幾巳經到日本,
唯一不太滿意, 就係架大巴係舊車。
第一晚係去和歌山, 住o係串本溫泉酒店。

去酒店途中, 即白濱呢個地方, 會經過一個有海龜o既公園,
叫什麼志原海岸, 風景很美, 不過, 都見唔到海龜。

終於到達酒店, 個團真係唔錯, 我地五個人, 佢都俾三間房我地,
d女士話要兩個一間房, 咁最後就變左我自己住一個房, 其實我覺得仲好,
因為全日都一齊玩架啦, 晚上自己訓咪仲舒服!
間酒店係傳統形式, 好有風味, 可以話四晚裡面, 我最鍾意呢間酒店。
酒店係單面形式, 即是只有走廊一面有房間, 所以就全部房間都向海。
風景好美, 地理無錯的話, 個海就係太平洋,
和歌山最具代表性溫泉, 就係串本溫泉。而所謂三大古泉, 其中一個叫白濱溫泉,
跟團就只會二個選一個, 住串本酒店, 就唔可以住到白濱酒店。

晚上o係酒店食日式自助餐, 我食左好多魚生同壽司, 而天婦羅就食得更多,
佢地見到我都嚇一跳........每次去trip, 我都食多左o野, 可能心情真係好啦!
因為酒店有人打年糕, 我睇電視都見過, 原來係好好食架! Good Good!

接著係放煙花, o係酒店可以放o既煙花, 都係好簡單, 不過因為望住個海,
而我, 好耐冇同爸爸一齊, 雖然心裡不能接受他過去所作的,
但我還是希望佢開心....

我們為了回避人多去浸溫泉, 所以休息到十點幾, 我地先落溫泉,
赤裸裸成大班人一齊沖涼, 起初我都有d怕,
望乜呀望! 未見過咩!
不過, 我身材都唔錯, 洗乜怕人望呀! (要停勒.......)

慢慢地, 我好享受浴堂o既感覺, 坐在小椅上, 慢慢沖, 好舒服,
之後就浸落溫泉, o係日本d人好自律, 每個人都會先洗澡,
然後先落溫泉, 想起上次去海南島, d人唔沖身就落溫泉, 中國人又退一步....

今晚, 我第一次訓榻榻米, 感覺很好! 想起叮噹和大雄!

>>July 5, 2007 at 4:31:37 PM GMT+8

2007 年 6 月 18 日 星期一 【陰】

保密日記，請登入觀看！

>>July 4, 2007 at 8:38:04 AM GMT+8

2007 年 6 月 14 日 星期四 【陰】

好開心係由7月開始,
公司由5日半工作天, 改為5日+星期六長短週,
對做左好多年5日半o既我, 巳經係好大進步, YO!

呢頭另你好開心,
跟住又繼續向員工打壓,
可能係先俾d甜頭你,
等你條氣順d 啦!
公司要員工在7月前清晒所有2007前剩下的假期,
我有24天假, 有18日係以前o既,
所以5月尾到6月, 我要放成18日, 加埋端午節, 七一假期,
我呢個月只係番十日工,
放到個人懶散晒,
而且, 離職時補少好多錢.......
其實, 公司要員工清假, 冇問題, 行政呀嗎,
不過, 要個多月內, 要人清, 咁就好急........妖!

正面d想,
好耐都冇咁舒服放假勒,
一種好舒服o既感覺,
飄下飄下咁,
叫我拍衞生巾廣告, 我都俾到戲!

-----------------------------------------------------------------------------------------

早前巳經去完海南島,
在個個人都返緊工o既情況下,
我decide帶momo, 同埋媽媽去大嶼山玩兩日。
帶俾人歡樂係我o既正職, 我有時真係覺得上帝給我這個性格,
就係要我令身邊人開心d,
但係點樣可以再做好d,
係一個好深o既問題,
我想我仲有排學。

我o係梅窩租左一間屋, 應該話係一層apartment,
環境普通, 不過$400, 好抵,
為左另momo同媽媽更舒服,
我租左架van, 係屋企樓下出發去到中環離島碼頭,
咁就可以直接坐船,
媽媽話momo 小狗的生涯好勁,
佢話簡直係海陸空都齊,
我就覺得好好笑,
阿媽, 何謂海陸空呢?
阿媽就話, momo以前搭過飛機,
從加拿大回來,
又搭過車,
呢次仲搭埋船,
咁仲唔係海陸空......: )
Mother! 租埋車又坐船呢個設計,
除左momo, 都係為左你架!

我地同momo在碼頭食蜆, 食點心.....
d food味道唔錯, 不過主要係個環境好好,
momo就好乖坐o係度,
真係good good 小狗。

收左屋後, 我地就去左大澳,
媽媽話好鍾意d風景,
而momo每次見到d大狗,
就得把口,
"wu"人地,
不過其他狗就對佢好奇,
有d狗就想同佢玩。

晚上我唔想阿媽咁疲累,
我地決定食外賣,
我自己走左出去碼頭, 買幾味小菜,
不過最正係盒賴尿蝦, 成二十隻都有, 好好味!

成個晚上, momo有時就跳上我將床,
有時就跳上阿媽將床,
玩到唔想訓。

第二天因為下雨,
我地飲完早茶,
玩多一陣,
就坐船離開, 再坐私人van回家。
成個trip, 我洗左$1200左右,
不過見到momo同媽媽咁開心,
我都好開心!

--------------------------------------------------------------------------------------------

聽日團契o既週會係模擬講道
今次可以同Eugene, Nicole合作,
而講員就有Carmen, Sing, Laurels,
佢地都好認真預備,
感謝主!

-------------------------------------------------------------------------------------
短宣呢個階段o既o野都預備好晒,
希望多d人參加啦,
求主保守,
希望呢次宣教可以榮耀主!

-----------------------------------------------------------------------------
我就會出發去日本勒,
好其待呀!

>>June 15, 2007 at 9:37:20 AM GMT+8

2007 年 6 月 1 日 星期五 【晴】

差不多有兩個月沒有坐下來,
細心回想吓自己的生活, 寫吓日記咁....

回想生活, 對我來說係需要架,
因為發現自己做錯o既事, 就要認,
有得改善o既地方, 就要改,
因為若只管忙著, 可能到頭來會發現自己其實沒有好好生活過。

剛剛去完海南島旅行, 好好玩。
對別人來說, 或者海南島唔係一個好特別o既地方,
但係對我來說,
可能好耐都冇試過訓o係沙灘泳池度,
乜都唔洗想,
曬太陽, 睇吓風景, 睇吓女仔(冇乜靚女),
感覺好舒服,
我地住Sofitel hotel住左一晚,
再o係Sheraton住左兩晚,
d hotel真係好靚,
酒店個浴缸同房間係開放o既,
咁樣即係迫人o係好開放o既情況下沖涼,
不過感覺就好正
在Sofitel hotel, d 溫泉好正, 有成二十幾個,
我就差不多浸左十個溫泉,
而溫泉望出去,
巳經係海....正
在Sheraton hotel, 就要講d泳池,
有幾個咁多,
又清潔又靚,
游到疲累, 我們就在泳池旁,
叫cocktail飲,
叫串燒食,
仲有好多新鮮o既bread任食,
好耐冇試過o係咁o既環境下食o野,
正, 以後我一定要多d咁做....

海南島o既椰子糖,
其實我好鍾意食,
但要指定"春暉"呢個牌子,
仲要食番原味,
而軟硬兩種都咁好食......

海南雞飯都幾好食,
d文昌走地雞冇乜脂肪,
好有雞味.....

呢個trip真係開心!

-----------------------------------------------------
早排睇左Spidermen 3,
好睇噃, 一d都冇拍續集搶錢o既感覺。
講到電影,
好開心劉青雲攞到金象獎最佳男主角,
作為佢o既fans, 等左好耐,
不過憑著"我要成名"呢奪戲得獎,
就好似美中不足,
因為奪戲其實唔係咁好睇,
並且覺得劉青雲o係以前d戲做得更出色。

-------------------------------------------------------------------------
近排團契出席o既人數少左好多,
再上團契個website睇埋Helen個留言,
真係好感慨,
好多弟兄姊妹都提供左方法去改善,
而我就和Nicole說,
我們來緊要負責o既週會,
我地要做好佢,
提高週會o既質素,
吸引其他人回來,
呢個係其中一個方法,
而且係我們可以即時落實做的.....

待續....

>>June 2, 2007 at 4:56:06 AM GMT+8

2007 年 5 月 30 日 星期三 【陰】

保密日記，請登入觀看！

>>May 31, 2007 at 9:32:22 AM GMT+8