2008 年 5 月 7 日 星期三 【晴】
馬交記二
第二次『登台』,今次去了三個地方。係其中一個地方我見到一啲好古老既野,一支1935年的紅酒,它比我老,甚至比我的祖父老。它的內裏有沒有變質就不得而知,但它的外表仍然保養得很好,可是人的保養便不及一支酒了。我也看見一支與我同年的澳洲Penfolds,我在想,它在酒瓶裏二十六年,仍然有它的價值,要是我在棺木中二十六年,我必定變灰。酒,比人永恆?
勾起了我的酒癮。
>>May 8, 2008 at 12:29:55 AM GMT+8
2008 年 5 月 4 日 星期日 【晴】
今天搭巴士的時候,突然有種很嘔心的感覺。對於經常的九日假,我似乎膩了,我只是覺得,放太多的假,不事生產,生活又有何意義?有逃跑的衝動。
今天Part Time很忙,前所未有的多人,又前所未有的國際化,有一段時間,我一邊說國語,一邊說英語。但是要做的事情不多,而且昨天留下給我的工作,我都完成了,很高興,肯定了自己的工作能力。
昨日在沙灘曬傷了。
>>May 4, 2008 at 10:18:26 PM GMT+8
2008 年 5 月 3 日 星期六 【晴】
年年有今日之五月三
我放假既三日H,都係慶祝的日子,所有Jobs推晒~
五月一我地去左食日本野,不過唔係食開果間(因為唔想排隊)。
↑佢似唔似溫緊書?↑
當晚,我地在家中準備了至愛的住家邊爐,(準備的人不是我),買左十元一兜瀨尿蝦,好抵!不過...唔好味既...令到我地好期待翌日既長洲海鮮。(洗碗的人...係我!)
↑除左住家邊爐,呢張相既另一主角係一年花費一萬大元的嗜好『鹹水魚缸』。↑
五月二日,我地避開左Torch Relay,一早就入左長洲。仲要俾預定時間早左個半鐘,又唔塞車,又搭到快船。入到去,酒店都未check得in。
我做既係手勢並不是V,而係五月二既二;而你就好勁咁做左五月二(當日),五月三(生日)既二,三,五都做晒!
Check in喇,酒店比相像中差,不過已經係全長洲最好架喇(We think)~好似係北京,台北住啲三星酒店,連YVR既Landmark都比佢好,無浴缸,個所謂的露台只係擺左張枱同兩張櫈,不過算啦,個境都唔差,可以望到海。同啲度假屋比,我地用錢買左個海境。
↑我地試左好多張,咩重點測光+800度+人面對焦+正負補償都出埋黎↑
之後我地過左好悠閒的一日,首先去左一間好似麼麼茶的沙灘茶座坐低飲左杯野,望下出面曬住既救生員,有種『偷得浮生半日閒』的感覺,不用埋時間,想做咩就做咩,想去邊就去邊。之後去左食第一餐海鮮餐。其實人地一啲都唔餓~
好健康的活動,我地租左架單車,由長洲既呢邊踩到長洲既果邊,一個鐘都唔洗;長洲真係好細。而且好唔安全囉~有好多『機動三輪車』行黎行去,而且單車又無倒後鏡,我覺得係『長洲大街』穿插,好危險架~
↑有人話我似『樹熊』。↑
休息其間,有一對好好笑的小情侶:
女:我好多謝你!
男:多謝我咩?
女:多謝你教識我踩單車。
男:...
女:我...幾耐之前踩過,如果唔係你我今日都唔會踩返...
個女仔似追攻,個男仔好似想避...好好笑。
趁有時間,我叫你踢毽俾我睇,有人話過踢毽踢到攞獎,我都想睇下啲『古老玩意』。我第一次玩的記錄係:3下。
回房欣賞日落同埋睇六點鐘新聞(aTV)+六點半新聞報道(TVB)。
又再一次係唔餓的情況下食野,好飽呀~
好好彩,我在長洲都無錯過今期好鍾意的『銀樓金粉』,又繼續電視報紙消磨左一晚。沒有電腦的夜晚,你會攬住份報紙,而我就攬住部電視。
晚間新聞報道之後,『YEAH!35歲!』;生日,始終都要有蛋糕,唔係點許願,點吹蠟燭呀?
↑呢張相,我地由幼稚園生日會到唔知幾多歲,都仍然係會影。↑
Surprisingly,我地個早餐原來係咁豐富架~即刻加左分!
↓有人生日著新衫喎~↓
之後想去釣魚,但係人地話唔識喎,其實我唔係好有興趣,不過想做釣魚人士身邊的女人,想靜靜地陪人做啲野,算數~
想游水架,不過酒店個泳池要暑假先至開,喂,而家都已經30度,游水唔一定要等暑假~
懷疑由於食滯左既關係,返到屋企,好想食蔬果,就被要求整左個沙律,啲奇異果酸到暈呀~
晚上,我又係未肚餓的情況下,又去食日本野,好飽呀~我既其中一個comment:『$148既二人餐求其俾啲野黎食咪算囉,碟碟都咁大碟,人地食得辛苦之餘,又霸住張枱做唔到生意。』我食到怕左~
你生日,我可唔可以唔好肥?
>>May 4, 2008 at 12:50:31 AM GMT+8
2008 年 4 月 27 日 星期日 【晴】
『一份工』
有一個新朋友(新?一點也不新,只可說重遇的舊朋友)問我當空姐的生活,我答了一句『只是一份工』。我知道這一個答案就如一盤冷水潑向發問者面上,很掃他的慶緻,可幸的是今次的發問者不是一個小妹妹,而是一個成熟穩重的男人。我已經不是第一次這樣答了,追溯回一兩年前,當我的同期漸漸減少的時候,我已經把這一份人們認為很精彩的工作當成『純粹一份賺錢的工作』。
『去日本可以成日買野』-- 當你在飛機度做到已經死左,你未必會有興緻或者體力去血拼。
『可以成日食到日本野』-- 當你程程機都要食野的時候,(因為食野是必須的),日本野就如你在香港食茶餐廳一樣,一點都不再特別。
而且最苦之處就是現在我的情況:凌晨四點,時差未tune好,待會兒7:30要在lobby集合上機,精神及體力煎熬十四個鐘後才回到酒店,試問點樣去血拼,點會有胃口食野。
好彩既,係我一陣班機會好少客,可以鬆一口氣。
而家出到outport,除非有緊要野要買,否則都會選擇休息,始終一個『通宵』是好難補得番,況且,我是經常好多個『通宵』。我計過,一個『通宵』起碼要兩覺才可以恢復體力及精神,第一覺8小時,活動一輪之後,再一覺4/5小時,氣力精神才得以恢復。
而家PC才是我的必須品,可以聽歌,上網,上youtube,緊追香港電視節目。
所以飛黎飛去,對我來說,只不過係『一份工』。
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
『韓國人』
在飛往紐約的航機上,我好用心工作,人地果份都幫人做埋,卒之,我的努力換來2+40的Rest Time,兩個幾鐘,真係瞓醒再瞓再醒,超好瞓。聞說,回程C25,Y45,如果係真,就實在太好了。可望5+00。
唔知係咪韓國經濟起飛,啲人越來越有錢,多左出國旅行,日航越來越多韓國客。你問我最憎咩人,我會答:
1.『唔識英文,唔識日文既韓國人』。溝通唔到,指手劃腳,仲要勁無禮貌。又或者係
2. 『文盲』,『文盲』一詞於我來說,填一份Form錯漏百出,問我攞Form攞多過2次,我就會稱之為『文盲』。因為我總認為,如果要500yen一份form,佢地一定唔會填錯。呢啲人咪乞人憎~
有時候,喺班機到突發其想,如果我可以開PA:『請第40行至43行的乘客現在到GLY排隊攞餐。』幾好!
今程機,有個韓國媽媽(又係韓國人),同埋韓國婆婆,帶住一個韓國小朋友(約3歲)同埋一個韓國Infant,一家人三個位,坐screen前,如果開埋個Baby Bassinet本應就無問題,不過佢個Infant 23個月大,牛龜咁大,我諗有成3/40磅,用唔到Bassinet,媽媽婆婆要輪流抱住佢,其實係俾佢壓住就真。十二個鐘,兩個女人都無覺好瞓。曾經佢地試過俾個"Infant"瞓腳旁的地下,但係俾我話事制止左。我都覺得佢地好慘,其實班機唔滿,都有零星吉位,但係又無可能要其他客人就佢地,話晒佢地都因為"Infant"而買少左張機票,既然money同comfort,當初佢揀左money,呢個moment,我覺得我唔洗幫佢地,就當等佢地受下教訓。下次唔好喇~唔搵你地錢,我點加人工呀~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
講起加人工,有消息指(我粗略計算)加薪幅度將比預期中少,導致今日的心情指數係------跌。
>>April 27, 2008 at 4:08:18 PM GMT+8
2008 年 4 月 27 日 星期日 【晴】
反思了好幾日,似乎真的需要跟你有個小孩。同你鬥孩子氣。然後『爸爸爸爸爸爸爸爸爸爸爸爸』的叫你,把你嚇怕。
:一定要生個女。
:如果生左三個都係仔呢?
:咁好,生多個可以湊夠打牌,挫D又得,無咁悶。
第一個我會傳授我的攝影技術,第二個傳授養魚心得,
第三個我教佢踼波,第四個教咩好呢?、、、我教佢揸車。
咁就變成四大天王!
~~~~~超低能~~~~~
>>April 27, 2008 at 5:18:28 AM GMT+8
2008 年 4 月 26 日 星期六 【晴】
有人話掛住我的時候會想睇我的日記,所以叫我勤啲寫。
>>April 27, 2008 at 4:24:29 AM GMT+8
2008 年 4 月 23 日 星期三 【晴】
順地過度,我放左9日假。下個月又係一連串Standby,返7又放9。好做過消防。
呢啲一個月兩班機的Schedule,好似oasis!
聽聞有啲新人每個月得三四十個鐘,勁Standby,仲要唔Call,有消息話呢啲女仔通常勁唔得,公司想逼佢地自動辭職。當初仲簽人地兩年死約~
不過原來想知道公司妥唔妥你,睇你每個月的鐘數就略知一二。
MY May Schedule:
1,2,3,4 大爺生日occupied
5,6,7,8,9 Standby唔call當放假
10~16 7日LAX
17,18,19 真係放假
20,21 Standby唔call當放假
22~28 7日芝加哥
29~2/6 本宮生日休息
>>April 27, 2008 at 4:41:12 AM GMT+8
2008 年 4 月 21 日 星期一 【晴】
今日生活的軌跡出現突變,異常的遭遇,做左一啲早上起身時候完全無計劃過又無想像過的事情。
今日,我聽了好多『說話』,被input了好多,但是唔知道可唔可以output。我好似夾左喺中間,兩隻耳朵聽著不同的道理,要扮無知,扮第一次聽,扮是局外人。其實我真係一個局外人,點解要同我講?我只不過係一個Part-time!
>>April 27, 2008 at 4:34:41 AM GMT+8
2008 年 4 月 17 日 星期四 【晴】
今日再行多一次,再食多一次,幾經辛苦,終於定到日子同埋場地喇~
係就係out-bud左啲,不過我諗我應該會好滿意。
辛苦晒!
>>April 18, 2008 at 12:52:51 AM GMT+8
2008 年 4 月 16 日 星期三 【晴】
友人問:你今日洗唔洗趕返屋企煮飯?
>>April 17, 2008 at 12:14:48 PM GMT+8
|
|