2007 年 6 月 15 日 星期五 【晴】

留不得。光陰催促，奈芳蘭歇，好花謝，惟頃刻。
彩雲易散琉璃脆，驗前事端的。

風月夜，幾處前蹤舊跡。忍思憶。
這回望斷，永作終天隔。
向仙島，歸冥路，兩無消息。

柳永《秋蕊香引》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第十七天

太晏訓
今朝唔係雷拎鎖廁所度門（很難才能鎖上的）太吵我也起不了床
Yuki 好似完全唔受影響
睡得很甜

我同雷拎分別梳洗後 Yuki 先起身
過左陣就去食早餐
除左準備供「夾帶」做午餐用既麵包 + 火腿外
仲拎左個茶包沖茶
原先綠茶最穩陣, 但係呢度無得供應
拎左包 peppermint
第一口好難飲, 走出去沖過杯
今次係花茶, 仲難飲
迫住飲番 peppermint
今次又接受到喎！

食完早餐就出發
首站係 Dachau Concentration Camp Memorial（達豪集中營紀念館）
上錯火車去左對頭線
坐返轉頭
卒之明白之前點解會坐錯
原來鐵路公司由今日開始一連三個週末都改左幾條列車路線
難怪會痴晒線

坐到 Donnersbergerbrucke 就落車
轉車到 Dachau, 然後再等 726 號巴士過紀念館
見到好多人都應該係去果度
咁都無咁擔心會搭錯車 / 坐過龍

到左, 行一條碎石路入去
地方很大, 一望就知係個操場
映左陣相就入內參觀
好多相, 好詳細既資料
講述德國設立的集中營, 以及 Dachau 集中營內既情況
有好多令人不安既相, 但係都唔夠館內既 introduction film 果幾個鏡頭震撼

無聲的黑白片
一卡貨車上原本是活生生的人
運到集中營時, 已變成一具具瘦得皮包骨的屍體
不用誇張的表達手法
就表露到震撼人心的效果

可惜放片時周圍環境頗黑
很適合疲累的我偷睡
否則就能看到更多有用的資料

如果香港多用點舊建築來建造一些具特色的專題博物館
不是可增加地區的文化意識嗎？
如果是經濟問題的話, 何以外國有相當數目不收入場費的博物館還能經營下去？
單講公屋, 為何不把一舊公共屋邨來做個公屋發展博物館？
這遠勝於在何文田這個不太對位的地區放一個小小的展覽就算數吧

看畢館裏的資料（睇英文都睇到疲累）
就實地參觀當時的環境
有一幢舊有的營舍開放給遊人
令遊人更對當時的環境有親身的體會
其餘的營舍已被清拆, 但留下地基, 上舖以碎石為記

路全由大小不一的碎石舖成
很難行
當時如果沒有一雙好鞋的話就更痛苦了
兩位小姐一個著涼鞋, 一個著拖鞋, 行得唔太順利
我對鞋乾得切, 先有對好鞋著

走到焚化爐及毒氣室
不寒而慄
焚化爐更有新舊之分
舊的僅有兩個爐, 新的則有六個
相信是因舊爐不敷應用才添置新爐
一個爐一天可以處理多少屍體？
何以會不敷應用？
想到這兒便心寒

參觀過後, 返車站坐 726 返 Dachau
再坐去 Marienplatz
呢度係市中心
大部份既舊建築都響呢度
原先想參加 city tour（中途離隊可以唔使錢果種）
不過等到夠鐘都無人, 最後決定信步而行
無專登搵景點睇
周圍睇人睇風景睇生活
行埋去州議會果陣已經 1700
於是離去, 前往 Olympiapark

坐 U1 到 Olympiazentrum
好多人同路而行
沿途見到唔少人炒黃牛票
果然德國人同香港人都有相同之處
不過香港人好 D, 只係會唔遵守交通規則亂過馬路
以及亂扔垃圾
仲未致於周街扔碎啤酒樽

風景不錯
不過「欲窮千里目, 更上一層樓」
悠閒地登高
行到山頂先停低飽覽四野景色, 很美
儘管望向山下人頭湧湧, 更有演唱會的喧鬧
但在一片綠色的包圍下, 登山望湖（人工湖來的, 少了些詩意）
遠眺市區風光, 又得浮生半日閒

回程, 行去 U-bahn 站不果
是但上左架可以去到 U-bahn 站既電車
去到車站轉另一架電車去 Muchen Hbf
再轉 U-bahn + 電車返 hostel
很複雜

梳洗過後, 雷拎落大堂上網
等左陣就落去搵佢
尋日佢坐響右手邊壞左既電腦前上網
今日右手邊部電腦整好左, 輪到左手邊既電腦壞

雷拎用到 2200 就畀我用
Konnie 睡得正熟
即使佢話我上網就叫醒佢, 但係都叫唔醒
都係由得佢訓好 D
睇埋馬家輝日記就熄機
今日佢兩個訓得好好, 無畀我嘈到
2345 訓覺, 早左

>>June 30, 2007 at 11:16:35 PM GMT+8

2007 年 6 月 14 日 星期四 【晴】

青翼傳情，香徑偷期，自覺當初草草。
未省同衾枕，便輕許相將，平生歡笑。
怎生向、人間好事到頭少。漫悔懊。

細追思，恨從前容易，致得恩愛成煩惱。
心下事千種，盡憑音耗。
以此縈牽，等伊來、自家向道。
洎相見，喜歡存問，又還忘了。

柳永《法曲第二》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第十六天

雷拎除左會打番一個正常既行程出黎之外
仲會自己另行手寫一個私人日記
當我問佢 Secret Dairy 寫幾多字既時候
佢居然反問：「乜野 Seafood Dairy 呀？」

睇到《中世紀的旅行》的某段
十分應景, 即管節錄出來：
「起初，長途旅行是為了和周圍的人一刀兩斷。重要的要離開；
　去哪兒，是第二位的。」（P. 215）

0700 先肯起身
隔離床既雷拎乍醒乍睡時動作頗多
如果拍 Video 的話都幾搞笑
儘管已經好小心盡量動作細 D, 但係都好似嘈醒佢
佢咁醒訓, 尋日都仲要開大個窗訓
無計, 間房大焗了

食早餐, 然後執野去隔離車站
放低行李, 佢拎個汽水樽回收
接著兩個人就各自低頭寫野
我當然係寫日記
至於佢......應該寫「Seafood Dairy」掛

先坐車到 Steinach 轉車
再坐去 Ansbach
過一個站到 Nurnberg Hbf
然後就唔使轉車到 Muchen
真好

不過由 Ansbach 到 Nurnburg 呢程車真係唔多好受
原定 1018 到 Nurnburg,
坐坐下聽到廣播要 Delay 45 分鐘
最後抵達時間為 1115
好彩只係旅行, 做生意話唔定咁就無左幾千萬了

1130 ICE 火車開走
卒之可以安安樂樂坐到總站落車

落車以後, 唔知點行
雷拎走去問 DB Service Point 既職員
然後搭車
除左響柏林我仲幫到手
其餘行程我只係苦力部員工
好多野都要雷拎一手包辦
除左覺得佢本事外, 仲覺得自己無用

轉坐 U-bahn 到 Hohenzollenplatz
本來根據 DB 職員指示去坐 Tram 38
但係有個好心既路人過黎問我使唔使幫手
之後就話我地知要坐 Tram 12 或 Bus 54
除左感激呢位好心人咁熱心幫遊客解決問題外
仲好難明點解佢地會咁熟路
如果係我, 即使響香港
我都成日唔知點幫人解決點去目的地既問題
尤其只係得目的地個名而無地址時
真係唔太得

落車, 搵左陣
我指住對面大廈問雷拎：「係咪呢度呀？」

Check in
匙咭又係 Frankfurt hostel 果款
不過今次無失靈, 很好
雷拎走落大堂 on9（大堂先有無線上網）
我就響佢隔離呆 + 訓 + 寫日記 + 睇地圖
由於佢個朋友遲遲未到
我地就響大堂一直等

等到接近 1645 佢朋友 Yuki 卒之黎到
個人無個名咁 Kawaii
好獨立, 好有個性
隠約見到佢個小包有盒煙
祝我好運

響房 Settledown 就出發
佢兩個掛著傾偈, 由我帶路
結果我邊行邊望地圖
然後估自己行到邊度
搵到條 baseline 就知道身處既位置
蕩失路問題不甚嚴重
行到兩個景點

不過去到度門既時候已經落大雨, 仲好大風
大風到遮都反
唔想開遮, 但係又好大雨
兩難

望見地圖附近有個車站
走去等電車 / 巴士（同一個站）
上左架電車
搏到有 U-bahn 既站時會停雨
可惜事與願違, 雨勢到總站未曾減弱
最後決定坐回頭車到 Muchen Hbf

到 Hbf 雨勢稍歇
周圍搵野食
可惜太夜, 好多地方已經收工
行入車站, 搵左一輪
雷拎無啦啦話：「我見到蔡迪華！」
跟著望多眼就衝入人群
果然見到蔡 9 同兩后
暗讚雷拎好眼利, 同時懷疑蔡 9 係咪跟"�我地

映多幅相就走（上次偶遇映既相, 雷拎雙眼合上了）
再三肯定蔡 9 唔會再響我地行程出現
然後繼續搵野食
最後發現都係 Hbf 內「漢堡大王」既 €2.99 餐最抵
於是就去食

食完返歸
梳洗後問雷拎借電腦落樓下大堂
同 Konnie 講野
2100 講到 0000 先收線
可怕
如果要畀錢一定破產

返上 155 號房
佢兩個早已入睡
執野時頗論盡
好似嘈醒醒訓既雷拎
事後佢又話無喎
無論如何, 都係唔好意思

>>June 30, 2007 at 7:12:41 PM GMT+8

2007 年 6 月 13 日 星期三 【晴】

佇倚危樓風細細。
望極春愁，黯黯生天際。
草色煙光殘照裡。無言誰會憑闌意。

擬把疏狂圖一醉。
對酒當歌，強樂還無味。
衣帶漸寬終不悔。為伊消得人憔悴。

柳永《鳳棲梧 - 其二》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第十五天

上網有好有唔好
好既係可以同在港既各人報平安及接收情報
唔好既係會收到各人要手信既要求（一笑）
主要還是失卻了一個人在途上的自在
難以放下在港的一切
變成肉身旅行, 精神依舊束縛在港

所以還是偶而上網較好
至少會少發點噩夢

朝早 0545 起身梳洗
等到雷拎起身先開始執野（怕嘈醒呢個咁醒訓既人）
然後食早餐
早餐有各式香腸火腿任君選擇, 豐富得很
豐富得每樣各一便已足夠（儘管胃口不佳）

雷拎邊食邊上網睇明報新聞網
見到一 on9
主要都係雷拎同佢講野
我就等佢打完字先望番佢部電腦

食完返房繼續執野
出發, 又係佢負責買飛, 不過今日我畀錢（€20.2）
今日要轉車
0941 開車, 1024 到 Steinach, 再轉車去 Rothenburg o d Tauber
由於聽日就走, 即使火車站對面 Hotel-Gasthof Rothenburfhof 要 €34
都仲係好抵
事關其他 hostel 要行入老城區入面先有
而步行前往老城區都要十幾分鐘（無行李步速）
實在搬野搬到怕

Settledown 後出發
行左一排先到老城區
沿城牆通道走, 先後去過 Gallow Gate, Kling Bastion, St. Jacobs Church, Town Hall

行去 Castle Gate 入 Castle Gardens
儘管飛蟲纏身, 感覺很好
望著天空, 望著樹木, 望著城市, 望著城牆
發呆也相當寫意

行過最有趣的 Mittelaterliches Kriminal Museum（中世紀罪行博物館）
入面陳列了中世紀時期可怕的刑具
可惜雷拎行完 Museum Shop 就話唔太想去
由於唔想一個人行, 又唔想留佢一個人響教堂
所以過門不入, 認真可惜

本來雷拎想行去 Double Bridge
但係佢帶錯路, 行左另一度門
結果行到 The Spital Bastion
行出去先發現行錯
過馬路去對面既一個花園
果度曾經相當風光, 但係好明顯宜家唔太得
飛蟲橫行, 行左陣就回頭

行返 Kobolzell Gate
響上面坐左陣
餘下時間就不斷行紀念品舖頭
佢行行下問我人地畢業係咪應該要送禮物
唔通佢想送畀我？（發夢）
同時發現佢自己都唔記得果陣有冇送畀一

穿過 Roder Gate 行返火車站
行過一個墓園, 參觀左陣先走
果度既墓碑形狀各異, 頗有心思
不過上面一係就有十字架, 一係就有耶穌基督個樣
可以既話不如加多少少創意啦

響火車站附近既商場閒逛
無野買, 無野食
雷拎得番一個杯麵
見到 Kebap 又貴（€３）, 同時又食厭了
響超市勾留良久毫無收獲
決定返 hotel 食消化餅充飢

響火車站問埋行程資料就返 hotel
佢沖涼時我訓響張床
訓醒佢已經梳洗完畢 + 就快食得杯麵
梳洗完就食消化餅
呢次旅行帶左六條消化餅黎食
今日卒之食第一條
仲要食左幾塊就收工

同雷拎講野
佢講左句非常精警既金句：
「我除左唔係傻婆既時間之外, 都係傻婆。」
講得非常合乎現狀

1600 返到 hotel
寫完日記都只係 1825
仲有大把光陰可以虛耗
呢個旅程真悠閒

講番畀雷拎聽之前既行程
事關佢之前無打
宜家咪唔記得咯
講完就埋數, 一次過畀番 €76.3 佢
真肉痛

夜晚睇雷拎響歐洲一年既相
景色優美
可惜相機不行
經常有手震情況出現, 可惜

同佢傾左陣「供求」關係
同原本講既「今日拎 up」好似無乜關係
但係都好, 至少有話題講下

聽日去慕尼黑
佢同佢水球朋友實大把話題
一來打水球, 二來都 exchange 嘛
咁我一係就齋聽, 一係就自閉
睇怕都無我置喙既餘地了

2105 先訓, 晏過尋日

>>June 30, 2007 at 5:50:28 PM GMT+8

2007 年 6 月 12 日 星期二 【晴】

簾下清歌簾外宴。
雖愛新聲，不見如花面。
牙板數敲珠一串，梁塵暗落琉璃盞。

桐樹花深孤鳳怨。
漸遏遙天，不放行雲散。
坐上少年聽不慣。玉山未倒腸先斷。

柳永《鳳棲梧》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第十四天

2130 就訓
真實睡眠時間為 2200
其時天尚未全黑
要靠拉上窗簾, 房內纔不至太亮

太早訓, 很早便睡不著
0300 已在床上輾轉反側
只見身旁的雷拎早已熟睡
儘管她在床上轉來轉去
但與我眼光光的等待睡眠
宛若雲泥

見到雷拎起身就起身
各自梳洗
今日會坐早車過 Romantic Road的第一站Wurzburg
所以 0700 就醒

落樓下食早餐
各自食剩兩個包返上房（作午餐之用）
本來應該有肚食埋佢
但係食完早餐個口太乾
唔想再食了

尋日食既蜜糖粟米片質素不錯
今日倒了滿滿的一碗
卻發現蜜糖不見了
乾得很（不愛落奶的結果）
食完整硗已經乾夠, 唔想再食

上房最後收拾
然後行去火車站買票
兩人共 €29, 抵
所以唔用 pass 係有道理的

響 7 號月台等到 0850 就上車
安頓好一切就睇書
火車抵達 Wurzburg 就落車
一落車既首要任務就係搵 hostel（之前唔夠時間搵, 加上上網搵既又唔平）
唔太順利, 一係貴, 一係就客滿

幾乎行左成個市先搵到間叫「Sankt Josef」既 Hotel-Restaurant
價錢為 €85, 都幾貴架
幸好有無線上網, 私家浴室和廁所

安頓好就出發
照樣由雷拎帶隊
我就兼職攝影（苦力工作做完嘛）
最主要既係去 Festung Marienberg（瑪麗恩貝格要塞）同 Residenz（主教宮）
先去要塞
在山頂坐下吃了酒店拿的麵包
很悠閒

步行前往主教宮
呢度係 UNESCO（聯合國教科文組織）轄下既世界文化遺產
踏入宮殿正門就見到兩道懸掛式大樓梯
上覆壯麗的拱頂
拱頂上有泰波羅（Tiepolo）壁畫名作《The Four Continents》
二戰中奇蹟地完好保存的壁畫, 為世上最大的天花板壁畫
建築師紐曼本人亦出現於壁畫中, 手扶禮炮驕傲地站在那裏

被天花板壁畫震撼的時候
聽到有把男人聲叫我中文名
抬頭一看, 蔡 9？？！！
他 7 月去 Lyon 讀法文
所以佢同兩個女仔早少少過去歐洲旅遊
之前都諗過有機會撞到佢, 但係估唔到響無事先預定既情況下撞到佢

同佢傾左陣
映多幅相就走
遊完皇宮, 參觀隔離既皇宮花園
幾靚, 不過好曬

行完就跟地圖在城市內逛
都是教堂等等
最後一站本想去倫琴博物館
倫琴為 X-ray 的發現者
館內裏展示他的生平和科研工作
可惜搵唔到, 反而行左入人地大學既某座大廈
入面放左好多量地用既儀器, 好似 theodolite, levelling 等等
同行乎？？

返 hotel
響房無線上網不果
後經查證, 原來係間房收唔到
最後行出走廊盡頭既梳化上網
先後同多人對話
得知有人搵我見工, 可惜早就過左期
仲知老爸撞車
嚇死, 好彩只係架車花左少少

同蔡 6 對話
佢話佢細佬連 email 都無 send 個畀佢
之後就討論佢之後歐洲之旅既事宜
5 個人玩, 實平過二人行既
不過要意見一致既就比較麻煩
至少無咁自由

上完網, 畀番部 notebook 畀苦候多時既雷拎
一個人返房食杯麵
然後寫日記
響房呆左一陣, 雷拎走番黎問我用唔用電腦
應左佢會用, 一用就用到 2100
再同 Konnie 講左陣野
佢聽日要上堂, 所以好快就講完

坐響 441 號房出面既梳化
成日聽到入面既 msg. 聲
煩得很
得知 Study Tour 既 year 3 同學順利回港（剛返港就上網）
幸福

熄機, 搬番部 notebook 入房
上床等眼訓
儘管有「美」相伴（雙人床兩個訓）
但係時間過得很慢
尤其她已經很舒服地熟睡
輾轉良久才能入眠

暫時為止已經消費左 €526.91

>>June 30, 2007 at 11:19:27 AM GMT+8

2007 年 6 月 11 日 星期一 【晴】

昨宵裡、恁和衣睡。
今宵裡、又恁和衣睡。
小飲歸來，初更過、醺醺醉。
中夜後、何事還驚起。

霜天冷，風細細。
觸疏窗、閃閃燈搖曳。
空床展轉重追想，雲雨夢、任欹枕難繼。
寸心萬緒，咫尺千里。
好景良天，彼此空有相憐意。未有相憐計。

柳永《婆羅門令》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第十三天

再次早過鬧鐘響起身
今日比尋日更早
0635 就起左身諗著梳洗
雷拎無啦啦起身問我做乜咁早起身
諗左幾諗, 又試訓過

0715 再次起身
今次雷拎又起埋身（唔知係咪嘈醒左佢呢？）
各自梳洗
落樓食早餐

儘管包左響房錢度
但係有早餐供應既 hostel, 很好
幾塊火腿 + 芝士 + 麵包
簡單
過左陣老闆仲落埋黎歎茶睇執紙
很悠閒的生活

食完早餐
各自順應自然的呼喚
然後出發
首站係去 Reichsparteitagsgelandse
呢度係希特勒用以集結納粹黨員的地點

步行前往, 行左半個鐘左右就到
只見一大個空曠既操場, 以及未建完的大會堂（Kongresshalle）
這是自納粹時期以來現存最大的紀念性建築物
沒有其奢侈的雕飾
簡單的以大麻石堆成
外形跟羅馬鬥獸場相似, 規模更大, 但少了一份歲月的滄桑

行了小半圈
沿人工池塘群行
入了露天的大會堂內
證實了高音比低音更易引起回響

步進了文檔中心（Dokumentationszentrum）
內裏展視了納粹黨的崛起
以及紐倫堡審判的真實情況
很有一遊的價值

遊過後就坐電車返 Hauptbahnhof
再坐 U-Bahn 到 Lorenzkirche
由於文檔中心買既門票包埋幾個老城區內的博物館
所以佢好趕時間咁帶我去遊博物館

先到Albrecht-Durer's-Haus（Albrecht Durer's House）
見到呢個德國最著名的文藝復興風格藝術先驅既生平
雷拎仲收到人地送既一幅木刻版畫
很精美
看書時經常看到這類型的版畫
很想收藏, 可惜沒有這種機緣

再到 Spielzeugmuseum（Toy Museum）
同佢玩左陣, 見到好多唔同年代既玩具
發現原來同佢真係有年齡上的分別
同時發現佢無乜童真

下很大雨
等了等, 還是按捺不著出發
到 Stadtmuseum Fembohaus（City Museum Fembohaus）
這座博物館位於 16 世紀的商人之家中
對這座城市超過 950 年的歷史進行了有趣的概括與總結

本來仲想行去 Museum Tucherschloss mit Hirsvogelsaal（Museum Tucher Mansion with Hirsvogel Hall）
但係礙於本人太肚餓
餓到連認路既能力都無埋
結果行到幾乎蕩失路（幾乎既意思係真係行錯路, 但係至少仲知大約方位）

幾經辛苦（又餓又熱）, 卒之行返 Hauptbahnhof
買左隻鹹豬手返 hostel 一齊食
柴皮得很, 不過柴皮既外表包著幾好食既肉
儘管如此, 無乜機會食較易食同好食既肉（負責切同埋禮讓）
所以總覺得不如在 Frankfurt 吃的那鹹而肉嫩的鹹豬手

各自梳洗過後
睇佢先響電腦打一段短文, 然後寫在明信片上
再輪到我打日記
打打下, 佢已經不知不覺執好行李
仲開始訓覺
當時只係 2055
可怕的早睡

這樣也好
明天要早起趕九時許的火車
至少她應該能趕得切踢我起身
呵呵

>>June 28, 2007 at 7:48:27 PM GMT+8

2007 年 6 月 10 日 星期日 【晴】

別岸扁舟三兩隻。葭葦蕭蕭風淅淅。
沙汀宿雁破煙飛，溪橋殘月和霜白。
漸漸分曙色。路遙川遠多行役。
往來人，只輪雙槳，儘是利名客。

一望鄉關煙水隔。轉覺歸心生羽翼。
愁雲恨雨兩牽縈，新春殘臘相催逼。
歲華都瞬息。浪萍風梗誠何益。
歸去來，玉樓深處，有個人相憶。

柳永《歸朝歡》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第十二天

又係較左鬧鐘
又係早過鬧鐘起身
今日佢話我臨起身前有鼻鼾聲嘈到佢
咁我之前有冇鼻鼾呢？

執左陣行李就去食早餐
食完返房繼續執野
執完就 check out
坐火車過 Hauptbahnhof 過 Nuremberg

唔知去邊個月台上車
走左去自動 information 機
然後等佢 print 埋 D 資料出黎
方便, 但浪費紙張

坐到咁上下就有車到 1 號月台
上到車廂, 煙霧彌漫之餘仲有濃烈煙味
原來誤上煙格
連忙走去無煙地帶
安頓好一切就坐低寫日記

寫到一半, 火車行到 Lepizig
有職員叫我地行去後面既車廂
因為我地坐既車廂唔會到 Nuremberg
當然全車廂剩番我地兩個
異常狼狽地搵位 settledown

火車繼續行
我一時訓覺一時寫日記
卒之響落車前寫到呢度
真快手

寫完就睇書
由於開始左真正既旅行
拎左本《中世紀的旅行》黎睇
見雷拎聽 iPod mini 聽得咁開心, 又聽埋一份

見佢部野無乜電, 提醒下佢
佢話唔使怕
因為我有叉電器
=.=

落車
見到個名好似有少少唔同
雷拎無啦啦問：「其實呢個地方 arm 唔 arm 架？」
嚇死

之前無 book hostel
一落車就猛咁搵有乜野地方畀我地今晚踎
搵左陣, 有個路人走左過黎問我地使唔使幫手
佢指左畀我地聽個方向, 同時話佢有地方畀我地訓
好快就決定同佢一齊去睇下

佢負責上去睇房（因為我覺得佢既要求會嚴格 D）
睇完佢覺得無問題就成交
無 lift, 住三樓, 有一個得一塊浴簾既企缸同洗手盆
但係無獨立洗手間
20 Euro 一晚
比起 lonely planet 既經濟 hostel 都算抵

放好 D 行李
一人一個杯麵
然後出發遊覽
跟住 lonely planet 既地圖行

行到去 tourist information 拎多本地圖
呢度無柏林果 D 一見到就會嘩一聲既名勝
但係響老城區（真係響城牆入面）內閒遊
感覺十分舒服

去到 Imperial Castle（帝王堡）, 見到好多操流利廣東話既香港人
點解知道佢地係香港人？
因為佢地胸前掛住個名牌
睇佢地既名唔足以知道佢地係香港人
但係睇到上面既中大標誌就知係香港人了

行錯路
但係錯有錯著, 搵到間賣 Doner 既舖頭
一個 Doner 賣 1.99 Euro, 好抵
一人一個
食完繼續行

去到 Weisser Turm（白塔）
塔腳處有一座大型的金屬噴泉, 叫 Ehekarussel Brunnen
上繪有 6 幅關於婚姻生活的闡釋圖片（其中有一些確實非常悲傷）
以中世紀著名詩人漢斯 – 薩克斯（Hans Sachs）的詩篇為依據繪製而成
（上述簡介鳴謝 Lonely Planet 中文版翻譯）

行到 2015 就返 hostel
佢一邊沖涼我一邊開始打日記
開頭打番 31/05 既日記
經佢提醒後就先打今日既日記
咁就可以懶左唔使寫字
^^

各自梳洗加執野
然後就好似死屍咁攤響張床度
乜都唔諗, 聽日先算了

>>June 28, 2007 at 7:47:44 PM GMT+8

2007 年 6 月 9 日 星期六 【晴】

前時小飲春庭院。悔放笙歌散。
歸來中夜酒醺醺，惹起舊愁無限。
雖看墜樓換馬，爭奈不是鴛鴦伴。

朦朧暗想如花面。欲夢還驚斷。
和衣擁被不成眠，一枕萬回千轉。
惟有畫梁，新來雙燕，徹曙聞長歎。

柳永《御街行（聖壽） - 其二》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第十一天

夢見 Konnie 媽媽撞破我兩個既「奸情」
奇怪
同檯食飯無數遍, 難道我仲覺得伯母不曉得我們的事宜？

較左鬧鐘起身
但係兩個人都起得早過個鬧鐘
梳洗後食早餐（宿費包早餐嘛）
都係粟米片, 燕麥片, 麵包之流
不過最驚喜既係有四款火腿, 以及芝士以供選擇
甚好
雷拎仲話有機會我食多幾塊火腿就食番個宿費返黎

食野其間講起 SMC 同胡仔仔
話佢地兩個「焦不離孟, 孟不離焦」
雷拎又話未聽過
到底係因為代溝問題, 定係佢睇既書根本唔會出現呢 D 詞句？

食完返上房, 然後出發
本來想先去 Checkpoint Charlie, 但係又坐錯對頭車
剛好睇「寂寞的行星」見到呢個方向有間 Berlin Karlshorst Museum
就同佢坐多兩個站, 響 Berlin-Karlshorst 站落車
步行十分鐘左右就到

一行到門口就見到一輛坦克車座落於石基上
睇唔明旁邊既俄文告示
爬左上去映相
結果被館內既人大聲用俄文趕落黎（其實又唔知佢講乜文, 亦唔知佢講乜）

映完相行去另一邊
見到幾架裝甲車同迫擊砲車
映完相雷拎話唔知係咪開放入內參觀
事闗一開頭無英文之餘又重門深鎖
映完外圍就見到度大門打開左, 即係歡迎內進啦！
行左一輪, 感覺相當唔錯
仲覺得如果肥仔黎到的話, 一定會講：「列寧超靚仔」、「希特勒超性感」類既野

坐車過 Kochstrasse, 上 Checkpoint Charlie
由於雷拎唔想畀 €5.5 入去博物館睇
響個 point 映相, 同埋入 Souvenir 舖睇左陣就離開

其間佢問我點解叫 Checkpoint Charlie
仲問係咪因為牌上照片中的軍人叫 Charlie
或者呢個 Charlie 有 D 乜野重要貢獻
最後佢認為應該係 Checkpoint C 既長寫版本
我都幾認同呢個講法, 但無從考證

一直想去 Alliierten Museum（盟軍博物館）
入面有 Checkpoint Charlie 原來既警衞室, 仲有一段柏林圍牆及前東德哨站
以及對柏林空運的記載和部份重建的柏林間諜地道（由 CIA 建造以接進蘇聯電話系統）
搵唔到佢座落既 Oskar-Helene-Heim 站
問完 Checkpoint Charlie 既人就搵到
原來響幾遠下既車站（之前睇指示話響市中心附近嘛）
坐車過去, 步行一會就到

睇緊一個模型既時候
雷拎無啦啦叫左聲：「巴黎鐵塔呀！」
奇怪, 德國幾時有巴黎鐵塔？
一望, 原來佢指著既係電塔
=.=
參觀左好一陣子就走

兩人開始疲累, 雷拎響盟軍博物館提議去埋睇 Siegessaule（勝利女神柱）就打道回府
坐 U-Bahn, 又坐錯方向
更正後繼續過 Zoologischer Garten
入超市, 佢買左支啤酒消暑解渴

一邊飲一邊行
穿過 Zoo 同 Tiergarten
連女神個樣都未望到佢就飲晒成支啤酒
但係佢拎著個樽死都唔放
原因係呢個樽價值 €0.08

響女神下映左幾幅正常 + 唔正常（唔正常果個當然唔係負責攝影既我啦）既相
然後再穿 Tiergarten 去超市
行到火車站, 佢見到垃圾桶上有個空酒樽
二話不說就執佢走

排隊按樽
有機器輔助
見到有 D 應該係拾荒者拎著成個行李箱既空樽
最高紀錄係按樽都有 €4.12 以上既收入
搵到餐晏仔架！

排隊都排左半個鐘
換來 €0.08 既額外收入
去旅行去到好似我地咁得閒既都真係少見

坐車返 hostel
響樓下買野食
今日兩個人各自買左個 currywurst（咖喱腸仔）, 我另外加個 Doner im brot
估唔到個 Doner 咁大個

返到房, 雷拎拎左兩個杯麵沖自來熱水
然後開始找地既晚餐
食得好慢
佢沖埋涼洗埋野, 我先剛食埋最後一啖 Doner（實在太大個了）
食完個 Doner, 滿足
食埋個杯麵, 簡直係豐衣足食

夜晚乜都講下
講到燈都熄埋都唔停
不過睡魔急 Call
無幾耐就訓著左

>>June 28, 2007 at 9:40:04 PM GMT+8

2007 年 6 月 8 日 星期五 【晴】

暮景爾蕭爾霽。雲淡天高風細。
正月華如水。金波銀漢，瀲灩無際。
冷浸書帷夢斷，欲披衣重起。
臨軒砌。素光遙指。
因念翠蛾，香隔音塵何處，相望同千里。
盡凝睇。厭厭無寐。漸曉雕闌獨倚。

柳永《佳人醉》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第十天

0600 畀 Ian 踢醒
今日同佢兩個人晨早就走
連早餐都食唔切（早餐供應時間係 0700 – 1000）
蝕左

之前上網查過今日去柏林既火車時間
要到 0737 先有車過 Frankfurt
0705 同 Ian 一齊行到 Frankfurt Hbf
發現有間車由 Frankfurt 直接到 Berlin, 仲要係 0713 就開出
好彩早 D 到
匆匆同佢話別就衝左上車
仲搵緊位既時候就開車了

寫日記與訓覺交替進行
拎左本《波蘭通史》出黎, 但係睇都無睇過
會唔會返到香港都仲係一本書都未睇晒？
咁我帶兩本消閒書過黎做乜？

寫到尋日就要落車
追日記追得好辛苦
連搭到總站都寫唔完呢三日既事
到底係多野發生得滯, 定係我訓得太耐寫唔切呢？

落車, 轉車去 Ostkreuz
個車站相當殘舊
跟已經變得相當現代化的西柏林相比, 更覺其破落
作為東柏林轉車重要站口
這區是個相當有潛質發展的地區

要轉車去 Landsberger Allee
行上另一個月台
列車往來方向 90 度旋轉了
寧願走左一班車都要搞清楚邊架車去到 Landsberger Allee
問埋人先知之前走果班車的確可以到目的地
儘管走左架車, 但係都無浪費時間
響等車其間就睇得明佢個時間表
很好, 無浪費光陰

到左 Landsberger Allee
正當想是但搵一個出口出左去先, 然後向路面望下環境同搵 hostel 既時候
望見一個周身行李, 滿身大汗, 神情狼狽既中國籍女子
好熟口面, 再望多望
佢對住我笑
原來真係雷拎, 唔怪得咁面善啦

一齊行上地面
見佢個行李箱太大個, 佢身型關係拎得唔太方便
同佢交換行李箱黎拎（我果個既輕便又細個, 節省地方之餘又唔會拎得太辛苦）
然後問人知唔知點去
佢問左個途人, 失敗了
我問左個食店職員, 佢話轉角就係

行到 Generator Berlin 門口
離遠望一眼就嚇親
因為比預期差太遠
事關之前仲以為係「兜踎」小旅舍
點知規模原來咁大
佔地廣闊, 樓層又多, 最緊要價格相宜
誤打誤撞都搵到間好野, 喜出望外（我搵架, 呵呵）

佢負責 Check in
上房休整一輪就出發
由我帶隊（話晒之前都行左咁多日柏林嘛）
一開頭就坐錯車, 要轉多程車
之前多數響西柏林坐車, 東柏林既鐵路情況真係唔多熟悉
尤其係 Ostbahnhof 之東既車站根本都未去過（最多係行路經過）

1530 出發
首站係位於 Oshahnhof 既柏林圍牆彩色版（東面畫廊, East Side Gallery）
行晒成條就響 Warschauer（咁就行左一個車站的距離了）
落 Alexenderplatz 站
行電視塔等景點（同 03-06-2007 果日差唔多, 都係去果 D 地方）

無入柏林大教堂, 可惜
主要係因為雷拎覺得教堂唔應該收錢
入 Altes Museum（老博物館）一陣就走
由博物館島行去 Hackescher Market 上車

前往 Potsdamer Platz
一出就響 Sony Centre 上地面
睇下個天幕, 再過隔離 Lego Land 同隻長頸鹿 Lego 映相
當然, 最重要既係去 Memorial to the Murdered European Jews（大屠殺紀念館）
之前雷拎響老博物館曾經話佢想去果個「一個個長方形石既地方」
完全聽唔明佢想去邊
搞清楚原來佢想去大屠殺紀念館之後, 真係有少少懷疑佢既表達能力係咪有問題

不虛此行
上次遺憾黎唔到呢度睇
好彩可以返到黎睇
未至於帶著遺憾返港

響館內雷拎提出左一個相當有趣既問題
如果畀你揀, 當置身在如此惡劣的環境內, 你會求生定求死
我講左句：「好死, 不如歹活」
原來佢連原文都未聽過, 仲諗住改左少少停頓位黎陰佢添

由大屠殺紀念館行去Brandenburg Tor（勃蘭登堡門）時天色已經開始變得陰暗, 仲偶有閃電
有 D 擔心會落雨
響勃蘭登堡門映左兩幅相就走
匆匆出發往 Reichtag（國會大廈）

排隊入 Reichtag 其間, 雨卒之下了起來
起初雨勢不大, 兩人一傘尚可力保不「濕」（儘管各有一傘, 懶得拎嘛）
其後雨勢加劇, 佢又企響迎風位
就各執一傘分開企, 以減輕佢被雨淋濕既機會（當時佢條牛仔褲已被風打濕）
後面排隊既女士就唔使畀我地傘上流下既雨水打濕了

行到有瓦遮頭既地方
雨勢開始減弱
上到 Dom 直頭停埋雨
天氣乾燥, 過左陣個身就乾番

映完相就走
大家都始有疲態
坐 U-Bahn 由 Unter den Linden 去 Fridrichstr.
然後遊 S-Bahn 河
去到中央線既盡頭 Westrenz
明明已經 2145, 成個站既鐘都顯示 1700
錯得相當徹底
莫非佢想欺騙成個站周圍既人？

響 Charlottenburg 落車
周街行, 睇下有冇野食
無乜特別 + 幾昂貴
又坐 S-Bahn 去 Zoologischer Garten 睇 Kaiser-Wihelm-Geodachtnishirche（威廉大帝紀念教堂）
即係我地之前日日見到, 又唔知係景點既教堂
睇完, 商舖多數關門, 又無特別野好食
返 hostel

響 hostel 樓下一人半隻雞
合共 €4.2, 抵
返入房慢慢品嘗啖啖肉既快感同奢華
食完梳洗, 再寫左陣日記就訓

>>June 28, 2007 at 8:54:09 PM GMT+8

2007 年 6 月 7 日 星期四 【晴】

閒窗燭暗，孤幃夜永，欹枕難成寐。
細屈指尋思，舊事前歡，都來未盡，平生深意。
到得如今，萬般追悔。空只添憔悴。
對好景良辰，皺著眉兒，成甚滋味。

紅茵翠被。當時事、一一堪垂淚。
怎生得依前，似恁偎香倚暖，抱著日高猶睡。
算得伊家，也應隨分，煩惱心兒裡。
又爭似從前，淡淡相看，免恁牽繫。

柳永《慢捲袖》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第九天

1130 先出發
原因為要 check out 同埋 check in
Check out 係因為其他人就快要走
Check in 係因為我同班 Year 1 仲要留響度
食完早餐, 1030 去睇下可否唔轉房（D 人未走要留低 D 行李響我地房, 同埋唔使咁早執野）
無問題就畀錢
冒著有其他陌生人同房既危險唔轉房（10 人房, 我地得 7 個人嘛）
不過偷睇到佢部電腦, 房務好少人
所以搏得過

行完去尋日去過既景點
映左幾張太陽下既相
大家就唔想再行
走返去近 hostel 既超市買野
再行去美因河畔搵個唔曬既地方坐
結果行到去個單車 + 滑板場, 響橋下面
18 個人（Faith 離左隊同佢朋友去玩）響度玩 Killer 同埋呯嘭嘩
完全唔似響外地旅行

1445 就畀小朋友趕走
返 hostel 無所事事
走去訓晏覺, 訓醒 Cat 就唔見左
成間 hostel 都唔見佢
有點擔心

買多張票上網
同 Konnie 用 xanga 傾左好耐
不過部電腦開超過一個 IE 就好易 hang 機
麻煩得很

Chat 到要買晚餐先走
先去超市買聽朝早餐（聽朝太早坐車, 趕唔切食免費早餐呀）
無功而還
同傑 & Alice 一齊去 Frankfurt Hbf 買鹹豬手
買完返 hostel 食
Ian 開頭話只係食少少
但係一吃不可收拾, 風捲殘雲地食左 1/3 只
加埋佢自己買既沙律, 應該相當飽

一個字可以形容隻鹹豬手──鹹！
鹹既程度可以令我立即飲半壺水
3.6 Euro, 比尋日果隻稍有不如, 但係價錢彌補一切
抵！

Cat 自動出現番
原來佢見我地全部人都響間房訓晏覺無出色
所以一個人走左出去買涼鞋
響 D 環境咁雜既地方一個人出去
擔心死我地呀
仲要擔心之餘都暫時唔畀老師們知道
廢事佢地又掛多樣野

再同 Konnie 響 xanga chat
Chat 到無晒錢
呢度收幾錢一分鐘完全視乎當時多唔多人用電腦
總之你買票就至少要 1 Euro, 畀你用 60 mins
無人用既時候就會以 0.8-0.9 Euro / 60 mins 既價錢, 畀你用多十幾分鐘
多人用既時候可能會升到 1.2 Euro / 60 mins, 咁就會用唔到 1 小時了

Giselle, Cathy, Rachel 呢個 BSE 三人組今日晏晝出發過瑞士
無送佢地
一來懶, 二來眼訓
話咁快就就完左個 Study Tour
時間好似好過咁

不過夜晚等埋 Year 3 既眾人都走左去 Dresden
仲覺得時間快過
佢地 2200 先出發
走左之後, 成間房就剩番七個人
回復第一晚黎既人腳
但係間房就由八人房變成十人房
連埋 D 公用空間, 冷靜多了

聽日 0600 要起身
所以 0100 就訓覺
話晒都係真正旅遊既開始
心情難免興奮
要養足精神先有精力四周圍玩

黎左德國咁多日
響 Study Tour 其間用左 210 Euro（唔計響香港預先畀左既錢）
唔知成個行程會用到幾多錢呢？
我準備左既錢會唔會唔夠用呢？
唔夠就大鑊了
唔係無錢既問題（因為仲有信用卡）, 而係居然可以揮霍到咁多錢
遲 D 容乜易使晒 D 錢無銀用架！

>>June 28, 2007 at 7:57:11 PM GMT+8

2007 年 6 月 6 日 星期三 【晴】

寒蟬淒切。
對長亭晚，驟雨初歇。
都門帳飲無緒，留戀處、蘭舟催發。
執手相看淚眼，竟無語凝噎。
念去去、千里煙波，暮靄沉沉楚天闊。

多情自古傷離別。
更那堪、冷落清秋節。
今宵酒醒何處，楊柳岸、曉風殘月。
此去經年，應是良辰、好景虛設。
便縱有、千種風情，更與何人說。

柳永《雨霖鈴》

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
歐遊第八天

朝早 0900 起身食早餐
上左陣網
1100 就出發
今日去 Museum 區

成條街都係博物館
行到國家藝術館
見到一隻被縛既小狗
一群女性就猛話得意, 仲爭著同隻狗映相
輪到 Cathy 既時候, 佢蹲低同小狗映相
數一二三時隻小狗突然哄埋去 Cathy 既重要部位
搞到佢好尷尬
之後輪到 Rachel 同隻狗映
數一二三時隻狗就行開
唔通狗同人一樣, 要揀過先黎非禮？？

行行下 Kenneth 突然同迎面而來既旅客講野
原來果班係 City BST（Asso）既同學
問佢地有幾多錢 subsidy, 佢地話有 $7,000
有人立即埋怨點解我地得 $6,000
就好似返工問隔離位人工, 知道人地人工高自己一截咁

其實有 D 唔知去邊間博物館好
建築博物館又好似摺埋左咁
於是我就睇「寂寞的行星」搵左間博物館
再由我地幾個負責探路
最後去左間講世界各地人民對身體做各種加工（e.g. 彩繪, 紋身, 隆胸等）既博物館
門票 1.3 Euro
無乜特別野睇, 勝在響室內可以畀大家條息下

好快行完
大夥兒都響二樓房內睇電視
內容環繞各地既身體加工行為（類似 discovery channel 既德語版）
睇完就落樓睇紀念品
Cathy 睇中左一條響秘魯做既手繩
用加工過既草繩串著陶土燒製成既幾粒彩珠組成
價值 30 Euro
Cathy 買既時候仲話佢響香港買條銀手鍊都要 $500
佢覺得抵咪抵咯, 不過連 Faith 都嫌太貴之嘛

Faith 本來想買個印仔返屋企
木製的印雕上印第安人身上的紋身圖案
加上特製的墨水, 可以印在身上
十分切合 Faith 呢類愛玩人士
可惜印仔唔算非常貴（一大一中一小既套裝都只係 20 Euro）
但係墨水好貴（一支 100mL 唔夠既墨水, 加埋印台, 又係 20 Euro）
儘管成套買既就只要 35 Euro
但係 Faith 都縮沙唔買

佢反而睇中左個5 Euro 既袋
有個無眼既印度愛神
職員話係代表愛情係盲目咁解
同 Faith 一人一個
點睇個袋都抵過條手繩

休息左一輪
又係時候出發
沿 River Main（美因河）行去教堂
遊左陣, 響入面訓左陣就走

過河去 Museum Judengasse（猶太巷博物館）
呢度係個猶太人居住既遺址
同市內既猶太博物館同氣連枝
但係大夥兒都相當疲累同想食野
淨係睇完呢個博物館就算
儘管平 D, 只係畀 1 Euro, 但係都相當可惜

返 hostel 搵書睇下去邊度食晚餐（食好野本書響 Kenneth 酒店內）
張匙咭又失靈
排隊排到 1845 先搞掂返入房
1900 又要出發
集齊所有人已經 1910, 而原定同老師會合既時間則為 1915
又遲到了

行去食野既時候又見到今朝班 Asso
佢地停低左好耐
原來今日傑跌低左張記憶卡
事後居然畀果班人執到
真好彩

唔覺意行埋聽日唯一既景點
不過 no photo, 呵呵
明明間野唔係我搵
但係就由我帶路（Idy 塞左份圈低左地點既地圖畀我）
好彩行 arm 路
室外早就畀人坐滿
唯有走入室內

響香港 D 人都係寧願入室內都唔留響室外
點解呢度 D 人會選擇響室外逗留呢？
原因好簡單
室內太焗太熱, 又無冷氣
好快我地就明白點解室內仲有咁多位

未野食已經一身汗
食物質素唔錯
七碟六款菜色（叫左兩碟一樣既鹹豬手, 每隻只係 9.9 Euro）都煮得幾好食
係呢個 study tour 最好既晚餐, 應係最後的晚餐
事關聽晚留響 Frankfurt 既只有 Daisy, Kenneth, 我同班 Year 1

老師資助我地 60 Euro
我地分開兩檯食
我地 11 人檯（連老師）每人只係要額外畀多 2 Euro 左右, 抵到爛
8 人檯食左塊百幾蚊港幣既牛扒, 份量只係一人一口, 比啖啖肉既鹹豬手差好遠
佢地覺得抵既都無所謂, 不過扣除資助位位 4 Euro

食野既同時 Faith 拎左我部相機拍片
仲叫大家講下對呢餐飯既感受
拍到我張記憶卡無晒位
第一次拍爆卡, 好彩仲有張卡做後備
足夠佢拍晒所有人既欲望

返 hostel
途中經過明日的景點
夜景幾靚, 又係時候熟習相機性能了
同 Faith 研究我同佢邊個相機映出黎既相效果好 D

今日係 BSE 三人姐既最後一晚
聽日佢地就過瑞士玩
同佢地響我地間房玩左陣
不過我地都無乜精力
0200 就上床訓覺了

>>June 25, 2007 at 11:04:38 PM GMT+8